Luk 15

Fare sḭḭ ge tame ge ba̰a̰ ne

Mat 18.12-14

1Ago, nda ge chal siyal ma, ɓanna ge nda ge kee sone ge ɗogle ma peɗ, ha̰a̰le ta ge gwan-na Zeso ta zì guwa, za̰a̰ ne. 2Nda ge no ɓan pagal ge Farisi ma way zì mage nda ge hate eeya ge Moyiz ne ma kaɗ ka faa laa hoɗɗa go: Ne sḛ mbe no ame nda ge sone ma, ka zam kaŋ zam ge num dagre me ba! 3Dwam a̰me go ɗu Zeso kê num fare sḭḭ no go: 4Mà deɗ ja go, ndu ge ḛ buwal zige ge tame kis, ɗu wa ban, mà n̰a ge kis wa gezi ɗu pɔgwa wa gezi ɗu ma ɗoo, mbo babur pul yà mbo ɓyare ge ɗu mbe, ɗiŋ ge go na see ne ya mbḛḛ to de? 5Sok ge seɗ ne ya, dol ne ya na ka̰a̰l pagal ge laa saal. 6Yan ja diŋ, tol na kondore ge wa kag mage na nda ge zok pe ma, jan num go: Ḛ ke laa saal dagre ge mbi, ago mbi tame ge ba̰a̰ mbe, mbi see ya ne. 7Mbi jan ḛ no go, ne mbe go ca, laa saal mbo kaɗ gḛḛ pḭḭ zì yà, ge ndu ge sone ɗu seŋe tene ya se pe, ge num ge kis wa gezi ɗu pɔgwa wa gezi ɗu ge temel ge gwan ɓyare seŋe ta se to ma.

Fare sḭḭ ge silay ge ba̰a̰ ne

8Tamekyala gwale a̰me mà kaɗ-ɗa na ge silay wol, silay ɗu ban no, ee lampe digi ɗoo, poy zok pul, ndwa ɓyare ne liliɗ ɗiŋ na see ne mbḛḛ to de? 9Sok ge seɗ ne go, tol na koŋ kale mage na ka̰a̰m zaab ge zok pe ma, jan num go: Ḛ ke laa saal dagre ge mbi, ge dape mbi seɗ mbi silay ge ba̰a̰ ya go. 10Mbi jan ḛ no go, ne mbe go ca, malayka ge Dok ne ma kee laa saal ge ndu ge sone ɗu seŋe tene ya se pe.

Fare sḭḭ ge van ge ba̰a̰ ne

11Zeso jan num go iya: Ndu a̰me kaa ge van son ma zi. 12Ge jiyale jan na ba go: Baa, ho̰ mbi mbi kaŋ joo ma ndwa. Go mbe me, num ba mbe vaa num na kaŋ gan ma se. 13Dwam ma kaal to peɗ, van ge jiyale mbe kwate na kaŋ joo ma mɔɗwag, mbo gɔswal suwa ge kaal ndiɗ yà, gaa kee kaŋ keeya ge batraŋ ma, vḛḛne na kaŋ gan mbe ma gezi mɔɗwag. 14Sok ge aa na kaŋ ma banna gezi mɔɗwag go, camal baktar deɗ ge suwa mbe pagal, kaŋ ma peɗ ɗege hoɗege ne. 15Sok mbe go, mbo din tene ge ndu ge suwal a̰me ɗu diŋ. Ndu mbe teme ne mbo koy kosoŋ ma ge na gaaso ma zì yà. 16Camal ee ne ɓyare vin̰a ge ndal na dul pe ge kaŋ zam ge kosoŋ ma way, ɗaŋɗe, ndu a̰me ge hon ne vin̰a ge zam-ma kaɗ to. 17Ge sok mbe go, ɗege dwaɗ na kàɗɗa ge wal, jan tene go: Nda ge kee tèmel bware ma gyana ga ge mbi ba diŋ yà, ge àa an̰ no ge kaŋ zam har pe gaa de! Mbi me, mbi wa ka fiɗɗa go go ge camal me de. 18Mbi vin tene ya go mbi guwa̰ mbi ba diŋ yà, mbi mà jan ne go: Baa, mbi kee sone ge Dok ndwa se, ge mo ta me. 19Mbi be mbyaɗ daa ge àa gwan tol mbi mo van to. Ndi mbi dinna ca, ge ɗu ge mo nda ge kee tèmel bware ma buwal zige go.

20Guwa̰, ɗege, gwan mbo ge na ba ta yà: Ajo̰o̰ na gale ge zum ya kaal puy ɗe, ne ba kuwa ne, ngay kuwa a̰se ge na ne ge ne ta gḛḛ, chiya mbo dol tene ge ne kṵwa̰l zì, àa buu ta zì. 21Sok mbe go, ne van jan ne go: Baa, mbi kee sone ge Dok ndwa se, ge mo ta me. Mbi be mbyaɗ daa ge àa gwan tol mbi mo van to. 22Ɗaŋɗe, ne ba jan na nda ge tèmel ma go: Ḛ gene ba̰a̰ ga̰a̰l ge waɗe ge siŋli ya vun cab, ḛ hon mbi van ne ka̰a̰ na ta, ḛ paa ne kyaɗa ne tok zì, tyako ma ge ne ko zì me. 23Ḛ wa̰a̰ nday van ge so̰o̰l ya, ḛ hun ne se, nè za, nè an̰ ɗaŋ. 24Ago, ḛ kuwa mbi van mbe no, suu dee suu, a tan ja no. Ba̰a̰ dee ban, mbi seɗ ne ja no. Àa ee pe kee laa saal.

25Sok mbe go me ɗe, ne van ge pul sway gale sok kee tèmel gaaso yà. Sok gwanna ya diŋ, yan na guwa ge zok, za̰a̰ kaŋ haleya mage kaŋ mballa ma. 26Tol ndu ge tèmel a̰me ya ɗu, ndwa eleya go ne ma̰ kaŋ kee ne diŋ tem de. 27Ndu ge tèmel mbe jan ne go: A mo na̰ van guwa̰ ya ne, ajo̰o̰ na dee ya kwaɗa bàŋ, mo ba hṵṵ nday van ge so̰o̰l no ɗu. 28Sok mbe go, ne laa vḛḛne, ɓyare waɗ-ɗa diŋ to. Ne ba waɗ-ɗa zum, ndwa lwabe ne waɗ diŋ. 29Ɗaŋɗe, gwan ge na ba janna go: Za̰a̰ gale, del ma bergete, ge mbi no, sok kee mo tèmel ma go, mbi be hele mo wa hoɗɗa ma pagal dwam ɗu to baɗ. Dwam ɗu mo be hon mbi ɓin̰a van ɗu go mbi kê vḛḛso ge mbi kondore ma to me. 30Ɗaŋɗe, kaɗɗa ge mo van mbe no, ne ge vḛḛne mo kaŋ gan ma ja gezi mɔɗwag ge nda zaab ge zam ta ma ta, yin̰a ya, mo hṵṵ ne nday van ge so̰o̰l no ba! 31Ne ba jan ne go: Mbi van, mo dagre ge mbi ɗaɗag, mbi kaŋ ma no peɗ, àa amo ma ne. 32Ɗaŋɗe, mbiya go nè kee vḛḛso mage kee laa saal, ago mo na̰ van mbe no suu dee suu, a tan ja no, ba̰a̰ dee ban, nè seɗ ne ja no.

Obecnie wybrane:

Luk 15: kiaGRB

Podkreślenie

Udostępnij

Kopiuj