Makòrzì 3
3
Yerzù à mà wɔ̀wìrzɛ̀ è mòtò wà lìya la njɛmbu
(Mat 12.9-14; Luk 6.6-11)
1O ehvɛhvɛ hvònda Yerzù à mà kpèeyà ò ndawò yà màkanɛ̀ yà wònyà Yudà. O mà hwɛ munyanà mɔ̀kɔ aŋga ema à ma ɔ̀kirzɛ̀ mɔ̀ɔ̀ mò njɛmbu. 2O ma hwɛ hwatò aŋga ema hwà mà hwɛ lì arza ò lì mò lùwa njɔ̀mì. O èŋgànɛ̀lɛ̀ hwa mà mò ìnja lòŋgòlòŋgò ò lì ɔŋgɔ̀ ŋgà à wɔ̀wìrzɛ̀ òŋgò mòtò ò Wùnyà wò lì Arzìyòlɛ̀. 3Yerzù à mà òhweyà òŋgò mòtò ema à ma ɔ̀kirzɛ̀ mɔ̀ɔ̀ mò njɛmbu nanù ema, “Jà ò tɛ̀mɛ̀ ò màrzò ma hwatò hwa arzɛ!” 4Rzìi à hwa ijòwa nanù ema, “Mamɛ è hwèlì e mbenda ò Wùnyà wò lì Arzìyòlɛ̀ e? O lì gbeyà gbamù ŋga wòhwe. O lì rzùŋgà lòŋgɛ la mòtò ŋgà ò lì mò òŋwa e?” Ndi wɔ̀ hwa arzɛ hwa mà kina. 5À mà hwa ɔ̀ŋgɔ nà hwètàtò rzìi, e mò tàtìrzɛ̀ ò ŋmèma mò eni. Rzìi à òhweyà òŋgò mòtò nanù ema, “Ènyòwa mòŋgò mɔ̀ɔ̀ mò àŋgɔ.” Nà òmà a mà mò enyòwe, mò mà wɔ̀wɔ̀. 6Ihvalìrzàyì i mà wurza ò èwòkà, rzìi hwa ùŋmanɛlɛ hwatò hwa ehvehva ya ama Hɛ̀rɔ̀dì, rzìi hwa wòteyà lì arza ŋmanò nɛ wɔ̀ hwa tànɛyì lì òŋwa Yerzù.
Ŋgindi è mà òŋgama Yerzù ò yùlu ya Galìlì
7Yerzù à mà ànjiya nà hwà-òkòwèlì hwa eni rzìi hwa ɛ̀ndɛ ò yùlu ya Galìlì. Ndi ŋgìndì ndɛnɛ̀ yà hwatò è mà hwa nɔ̀ŋgɔ aŋga. Hwaŋga hwatò hwa mà uwɛ̀lɛ̀lɛ̀yi ndi ò erzòòkà ya Galìlì, Jùdeyà, 8Jèrurzalɛ̀mù, ò erzòòkà ya Èdùmeyà, nà ò hwèrzòòkà hwe ɛnɛyi èhvarzù ya Jɔdànì, nà mambòwà ema mà kòmbɛ̀nɛ̀ nà mambòwà mandɛnɛ ma Tàyi nà Rzidònì. Hwanù hwatò hwà mà jèeyà Yerzù èhwanja hwà mà hwèya hweyà ema a mà hwɛ lì gbeyà. 9À mà òhweyà hwà-òkòwèlì hwa eni nanù ema hwa mò rzèkeya wɔ̀lɔ̀ èhwanja è ŋgìndì ema è ma mò àyìinɛ̀lɛ̀ è mà kòka. 10Èhwànja Yerzù à mà wɔ̀wìrzɛ̀ rzayì-rzayì ja hwatò, ò èŋgànɛ̀lɛ̀ hwatò ema hwà mà ɔ̀kirzɛ na ihvɛ-hvɛ nyàmbɛ, hwa mà hwɛ lì àyìinɛ̀lɛ̀ ò lì mò uka nanù ema a hwa hwàkɛ màà mà eni. 11Tɔ̀ ima hvònda ema hwèŋge hwèlìŋgɛ̀ hwe wòhwe ema hwe ma hwɛ ò hwatò hwe mà mò ɛ̀nɛ, hwe mà kpìrzɛ hwaŋga hwatò ema hwe ma hwɛ ò tenì ya awu. Hwe hwa tɛ̀yìrzɛ merzeya nanù ema, “Ò hwèlì ndi è Ŋmanà wà àma Lohwɛ̀!” 12Yerzù à mà kòkòwɛ̀lɛ̀ hwaŋga hwatò nɔ̀ke-nɔ̀ke àma hwa rzi kèka lì òhweyà tɔ̀ mòtò njɛnɛ mɔ̀ à hwèlì.
Yerzù à mà hvɔ̀rzɔ̀ lìyòmɛ̀ la Hwà-òkòwèlì nà hwàhwàkɛ̀
(Mat 10.1-4; Luk 6.12-16)
13Yerzù rziì a àgba ò ŋmanyu yà mòòlì, rzìi a hwɛlɛ hwatò ema mɔ̀ à mà arze, hwa mà mò jèeya. 14Rzìi à hvɔ̀rzɔ̀ lìyòmɛ̀ la hwatò nà hwàhwàkɛ̀ ò lì hwɛ nà mɔ̀. Wɔ̀ ndi mɔ̀ à mà hwɛlɛ i àpɔ̀rzìtòlò ja eni. Rzìi à hwa òma ò lì òhwa Eyà ya ama Lohwɛ̀. 15À mà hwa ŋgba è ŋginyà ò lì hvàya hwèlìŋgɛ̀ hwe wòhwe, ò nyò ja hwatò. 16Lìŋgi lìyòmɛ la hwatò nà hwàhwàkɛ̀ hwa mà hwɛ ndi: Rzìmɔ̀nì ema Yerzù a mà kpɛ̀ɛ̀ lìinà Pètrò; 17Jèmìrzì nà ŋmanyàŋgò wà èni Yòwanìrzɛ̀, hwàànà hwa ama Rzɛ̀bɛ̀dì (e ma Yerzù a mà kpɛ̀ɛ̀ lìinà àma Bòwànègèrzì, jànda ì hwèlì ndi hwààna hwa e ŋgàlà lohwà). 18Àndèlè, Hvìlìpì, Bàtòlomìyò, Màtìyò, Tɔ̀màrzì, Jèmìrzì è ŋmanà wà àma Alìhvɔ̀rzì, Tàdìyòrzɛ̀, Rzìmɔ̀nì mòtò ema lì emeyà la eni lì rza àyèŋgòwɛ̀, 19nà Jùdàrzì Ìrzìkarìyɔ̀tɛ̀ ema à ma àhwirzɛ̀ Yerzù.
Yerzù a hwɛ̀lɛ̀hwɛ̀yi Bɛ̀lrzɛ̀bùlì
(Mat 12.22-23; Luk 11.14-23; 12.10)
20Yerzù rziì a kpèeyà ndawò hvɔ̀kɔ. Ŋgindi ndɛnɛ̀ è mà arzàŋganɛ aŋga. Ène ŋgàna è mà gbeyà ema mɔ̀ nà Hwà-òkòwèlì hwa eni hwa rzi hwɛnɛ hvònda ò lì làa. 21Nà òmà lìtumba lì eni lì ma hweye nanù, lì mà ɛ̀ndɛ lì mò aŋgòhweyà èhwanja hwa mà hwèya hwatò hwa òhwà nanù ema, “Mɔ̀ à rza ènje gbamù.” 22Lòŋgò la Hwà-òkòlèlì hwa mbenda ema hwà mà uhwɛlɛlɛ ò mbòwà yà Jèrurzalɛ̀mù rzìi hwa òhwa nanù ema, “À òhvì Bɛ̀lrzɛ̀bùlì ò nyò yà èni. Èŋge kiŋgɛ̀ yà hwèlìŋgɛ̀ hwe wòhwe yɔ ndi è mò ŋgba èŋgè wònjà ò lì hvayànà hwèlìŋgɛ̀ hwe wòhwe ò hwatò.” 23O èŋgànɛ̀lɛ̀ rzɔ Yerzù à ma hwa hwɛlɛ rzìi a hwa kpɛ̀ɛyà meyàna nanù ema, “Nɛ Mòkarzɛ̀ à tànɛyi lì hvayà Mòkarzɛ̀ e? 24È hwèlì tɛ ema hwatò hwa èkòmè yɔ̀kɔ hwa akahwanɛ tɛ, ema hwa rzà òhwa eyà yɔ̀kɔ èŋge èkòmè e rzà tanɛ̀ lì tɛ̀mɛ̀. 25È hwèlì tɛ ema ndawò ya akahwanɛ tɛ ema e rza òhwa Eyà yɔ̀kɔ, èŋge ndawò e rza tànɛyi lì tɛ̀mɛ̀. 26Ndèŋgàna hvɛ, Mòkarzɛ̀ à ateŋgɛ̀nɛ̀yi tɛ tɔ̀ mɔ̀ ŋmìti, rzìi à akahwanɛ, à rza tanɛ̀ lì tɛ̀mɛ̀. Ò mà lìrzukù la eni lì mà ukà.” 27“Inyɛ̀ nà è òhweyà, ò rza tànɛyi lì kpèeyà ò ndawò ya mòtò ema a imbami rzìi ò mò hvùmana erzaŋgò ya eni ema ò rza lòmɛ̀ lì mò kakà. O ma kùlɛ̀ tɛ lì mò kakà, lìŋgi lìrzàkò ɔ̀ndi ò mò wòwànà erzaŋgò ya eni ya arzɛ. 28Nà è òhweyà è jɔ̀kɛ̀ nanù ema, wòhwe wò àrzɛ nà ìrzìlàkò hwatò hwa òhwa, Lohwɛ̀ à hwa làkìrzɛ̀, 29ndi è mɔ̀ ema à òhwani Èlìŋgɛ̀ yà Wòtani lìhwena a rza ò làkìrzɛ̀hwɛ̀ tɔ̀ wùnyà, à gbèyi wòhwe wò rza làkìrzɛ̀hwɛ̀.” 30Yerzù à ma òhwa ndi nanù èhwanja hwatò hwa mà hwɛ lì òhwà nanù ema, “À òhvì èlìŋgɛ̀ ya wòhwe.”
Yerzù nyàŋgɛ nà wònyànyàŋgò hwa eni
(Mat 12.46-50; Luk 8.19-21)
31Yerzù nyàŋgɛ nà wònyanyàŋgò hwa eni rzìi hwa jà aŋga. Nà òmà hwà mà tɛ̀mɛ̀ aŋga èwòka ya èŋge ndawò, rzìi hwa òmɛnɛ ŋmɛ̀ndì ò tenì yà èŋge ndawò ema hwa mò hwɛlɛ. 32È ŋgìndì è mà mò tòŋga. Mòtò mɔ̀kɔ rziì a mò òhweyà nanù ema, “Nyàŋgɛ, nà wònyanyàŋgò hwa àŋgɔ, hwa hwèlì ò èwòkà hwa ò hwɛlɛ.” 33Yerzù rzìi à hwa alàhwɛ̀ nanù ema, “Njɛnɛ à hwèlì nyàŋgò wa ami, hwa njɛnɛ hvɛ hwa hwèlì wònyanyàŋgò wa amì e?” 34Yerzù rzìi a ɔ̀ŋgɔ hwaŋga hwatò ema hwà mà lìya lì mò tòŋga, rzìi a òhwa nanù ema, “È ɔ̀ŋgɔ tɛ, nyàŋgò hwa ami na hwa wònyanyàŋgò hwa ami wɔ̀ hwa anù! 35Tɔ̀ ima mɔ̀ ema à gbèyi lì emeyà la ama Lohwɛ̀, mɔ̀ ndi à hwèlì nyàŋgò wa ami, nà wònyanyàŋgò hwa amì.”
Obecnie wybrane:
Makòrzì 3: bri
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, CABTAL
