Matiyò 22
22
Ŋmàna mò e ndèma ya lìhwa
(Luk 14.15-24)
1Yerzù à mà kpɛ̀ɛyà hwatò mò hvɛhvɛ ŋmàna nanù ema, 2“Lìkànèyà là ŋmanyu yà lohwà lì hwèlì ndi nàa Kiŋgɛ hvɔ̀kɔ ema è mà òhweyà hwàgbèèlì hwa eni ema hwa rzèkeya e ndèma ya lìhwa la ama e ŋmanà wa eni wa mùnyanà. 3Eŋge kiŋgɛ e ma òma hwàgbèèlì hwa eni ò lì ɛ̀ndɛ lì hwɛlɛ hwaŋga hwatò ema, hwà mà yòhwɛhwɛ ò eŋge ndèma ya lìŋgi lìhwa, ema hwa ùkeya. Ndi wɔ̀ hwa rzi imanɛlɛ ò lì ùkeya ò eŋge ndèma. 4Eŋge kiŋgɛ rzi e òma hvɛ hwahvɛhvɛ hwàgbèèlì na mònò ŋmɛ̀ndì ema hwa òhweyà hwaŋga hwatò nanù ema, ‘È òhweyà hwaŋga ema nà mà yòhwɛ nanù ema nà mà wòŋgirzɛnɛ e ndèma. Nà ma òŋwa nyàkà ndɛnɛ na hwehvɛhvɛ hwèembè. Nà ma wòŋgirzɛnɛ hweyà hwe arzɛ e jèe ò e ndèma ya lìhwa naŋgɛ.’ 5Ndi hwaŋga hwatò ema hwà mà yòhwɛhwɛ, wɔ̀ hwa rzi wòwe eŋge ndèma nàa tɔ̀ eyà. Wɔ̀ hwà mà ɛ̀ndɛ ndi ò lì gbeyà hwèwòlò hwe awu, lòŋgò ò i wàŋga ja awu, hwanɛyi hvɛ ò hwehvɛhvɛ hwèwòlò. 6Hwanɛyi hwatò hvɛ ema hwà mà yòhwɛhwɛ, hwà mà lɛmbɛ hwaŋga hwàgbèèlì hwa ama eŋge kiŋgɛ. Hwa hwà gbiyɛ hvònji natɛ̀ɛ hwa hwà òŋwa. 7Eŋge kiŋgɛ e ma òhva hwetàtò hwe ndɛnɛ. Rzi a òma hwàànèlì hwa eni hwa njùma, ema hwa ɛ̀ndɛ hwa òŋwe hwaŋga hwatò ema hwa òŋwi hwatò na lì rzɛlɛ eŋge mbòwà ya awu ya arzɛ. 8Eŋge kiŋgɛ rzi e òhweyà hwàgbèèlì hwe eni nanù ema, ‘È ndèma ya lìhwa e ma wòŋgirzɛnɛ, ndi hwaŋga hwatò ema nà mà yòwɛ hwa rzi kanɛ̀ ò lì ùkeya ò e ndèma ya ami. 9È ɛ̀ndɛ rzɔ naŋgɛ ò ma njiya e yòhwɛ ndi tɔ̀ njɛnɛ ema e ɛni a jèe ò ndèma ya ami.’ 10O èŋgànɛ̀lɛ̀ rzɔ, hwaŋga hwàgbèèlì hwà mà ɛ̀ndɛ ò ma njiyà mà arzɛ, hwa rzaŋga hwatò hwa arzɛ, e wɔ̀ hwa gbamù, tɔ̀ e wɔ̀ hwa wòhwe. Nàtɛ̀ɛ e ndawò ya ndèma e ma ònda.
11“Eŋge kiŋgɛ e ma kpèeyà ò eŋge ndawò ò lì ɔ̀ŋgɔ hwatò ema hwà mà yòhwɛhwɛ ò eŋge ndèma. Nà òma à mà kpèeyà rzìi a ɛnɛ mòtò aŋga ema a rzi wɔte lìhwatù la lìhwa. 12À mà mò ijòwa nanù ema, ‘Ìi mbunda wa ami, nɛ ò wa ò kpɛlɛlɛyi anù òma ema ò rza wɔtɛ lìhwatù la lìhwa e?’ Oŋgò mòtò a rza òhve tɔ̀ eyà ya lì òhwa. 13O èŋgànɛ̀lɛ̀ e kiŋgɛ rzìi e òhweyà hwàgbèèlì ema hwà mà hwɛ lì gbèeyà hwàyɛ̀nì hwa eŋge ndèma nanù ema, ‘È mò kake màa na matàŋgà, e mò hvimbe ò èwòka, ò tenì ya jììtìtì. Aŋga ndi à eeya na lì kɔ̀kɔ̀ mehvehve.’” 14Yerzù rzì a umbana mònò ŋmàna nanù ema, “Lohwɛ̀ a hwɛlɛyi rzayì-rzayì ja hwatò ò lì hwɛ ò rze ya lìkànèyà la eni ndi ŋgurzu ndi i hvɔ̀rzɔ̀hwì.”
Mìijòwelì me lì taŋgà e njàŋge yà lìkànèyà
(Mak 12.13-17; Luk 20.20-26)
15O ma hwɛ wùnyà wɔ̀kɔ ema Ihvàlìrzàyì i ma lìya ò wòlìya wò lì weka ŋmanò mò lì lɛ̀mbɛ Yerzù ò nyòla hwèyòhwèlì hwe eni. 16Hwàŋga hwatò hwà mà òmeya Yerzù Hwà-òkòwèlì hwa awu, mòndeŋge na hwatò hwa èhvèhva yà ama Hɛ̀rɔ̀dì. Hwanu hwatò rzi hwa ijòwa Yerzù nanù ema, “Ìi Mòòkòlèlì, i hwi nanù ema ò òhwa e jɔ̀kɛ̀. Ndèŋgànà i hwi hvɛ nanù ema hwèyòkòlèlì hwe aŋgɔ̀ lì hvòmɛ̀nɛ̀ imbenda ja ama Lohwɛ̀ hwe hwèlì ndi jɔ̀kɛ̀. Màlùteyà ma hwatò na hwèhwɛ̀ɛlì hwe hwèhvòlò hwe awu hwe rza eŋgòwa hwèyòkòlèlì hwe aŋgɔ̀. 17O jò òhweyà rzɔ nɛ ò wa ò ɛni ene eyà. È mbenda ya arzu e òhwa ndi nanù ema i rzaweya Kayirzà e kiŋgɛ ya Ròmànì è njàŋge ya lìkànèyà e?” 18Ndi Yerzù à mà hwiye màlùtèyà ma awu ma wòhwe, rzi a hwa timbirzɛlɛlɛ nanù ema, “Inyɔ hwatò hwa mèhvìlì, mamɛ ndeŋgatɛ e arza ndi lì nò kɔ̀hweyà e? 19È nò uŋmɛ̀lɛ̀ e kahvà ema e gbeyànɛhwɛ ò lì tàŋgana e njàŋge ya lìkànèyà.” Hwà mà mò jàneyà e kahvà ya ɛ̀ɛkɛ̀ ema e hwɛ̀lɛ̀hwɛ̀ dìnalìyɔ̀rzì. 20Yerzù rzi a hwa ijòwa nanù ema, “Èlìŋgɛ̀ na lìinà la ama njɛnɛ lì lùutahwì anù nanù e?” 21Hwà mà mò alàhwɛ̀ nanù ema, “È la ama Kayirzà.” Yerzù rzi a hwa òhweyà nanù ema, “È ŋgbe Kayirzà mamɛ e hwèlì e ya ama Kayirzà. È ŋgbe hvɛ Lohwɛ̀ mamɛ e hwèlì e ya ama Lohwɛ̀.” 22Hwàŋga hwatò hwà mà hweye nanù, rzìi hwa tàmà. Hwà mà mò rzɔnjɛ̀lɛ̀ aŋga, rzìi hwa ɛ̀ndɛ e ya awu.
Mìijowelì lì hvòmɛ̀nɛ̀ hwèhvùmùwelì
(Mak 12.18-27; Luk 20.27-40)
23O wòŋgò wùnyà mɛnɛ, lòŋgò la i Rzadurzi hwà mà jèeya Yerzù. I Rzadurzi i lòkɛ̀ nanù ema ò rza enje tɔ̀ hwèhvùmùwelì. 24Rzìi wɔ̀ hwa òhwa nanù ema, “Ìi Mòòkòlèlì, e mbenda ya ama Mòrzè e òhwà nanù ema, ‘Mòtò a hwàyi tɛ mòlanà rzìi òŋgò mòtò a ŋwa e rzi hwɛ nanù ema mɔ̀ na òŋgò mòlanà hwa ŋyàyɛnɛ̀ tɔ̀ ŋmanà, òŋgò mòtò ŋmanyàŋgò wa enì hwa lùuŋga lɔ̀kɔ a hwɛni lì hwaa mòŋgò mòkurze aŋga nanù lìinà la ama ŋmanyàŋgò wa eni lì rza wɔ̀ɔ̀.’ 25Wa ɔ̀ŋgɔ tɛ, ò ma hwɛ hwàna hwa wunyanà lìrzamba, ema hwà mà wurza lùuŋga lɔ̀kɔ. È wà wòrzò à mà hwaa mòlanà rzìi a ŋwa e rzi hwɛ ema mɔ̀ na òŋgò mòlanà hwa ŋyàyɛnɛ̀ tɔ̀ ŋmanà. Rzìi ŋmanyàŋgò wa eni ema a mò nɔ̀ŋgɔ a rzàŋgòwa òŋgò mòlanà. 26Oŋgò mɔ̀ hvɛ rzìi a ŋwa e rzi hwɛ ema a nyayi ŋmanà na òŋgò mòlanà. Mòlemilemi mò eyà mɛnɛ hvɛ ndi mò ma gbèyɛ̀nɛ e mɔ̀ ema à mà ùkirzɛ̀ hwàyàwò, natɛ̀ɛ na e mɔ̀ ema à mà òndìrzɛ̀ lìrzamba. 27O lìrzukù òŋgò mòlanà mɔ̀ hvɛ à mà ŋwa. 28Nàŋgɛ rzɔ ò e hvònda ya hwèhvùmùwelì, òŋgò mòlanà a ò hwɛ ndi e jòjìyɛ̀ ya ama njɛnɛ e? Èhwanja lìrzamba la arzɛ lì ma mò hwaa.” 29Yerzù rzi a hwa alàhwɛ̀ nanù ema, “È hwèlì ndi ò matòna, èhwanja e rza rzɔ̀ŋgìtɛ̀nɛ̀ mamɛ Èya ya Lohwà e òhwa ndèŋgànɛ̀lɛ̀ e rza rzɔ̀ŋgìtɛ̀nɛ̀ hvɛ nɛ e ŋginyà ya ama Lohwɛ̀ e hwèlì. 30Ò è hvònda ya hwèhvùmùwelì hwatò hwa rza ò hwaa tɔ̀ lì ŋgbààhwà ò mahwaa. Wɔ̀ hwa ò hwɛ ndi nàa i aŋgèlì ja ŋmanyu yà lohwà. 31Ndi, ò lì hvòmɛ̀nɛ̀ hwèhvùmùwelì hwe kpelì, inyɔ è rzìi laŋgi mamɛ Lohwɛ̀ à mà è òhweyà e? 32Mɔ̀ à mà òhwa nanù ema, ‘Nà hwèlì ndi Lohwà là ama Abràhamù, Irzàkì, nà Jèkɔ̀bù.’ Lohwɛ̀ à rza enje Lohwà là hwatò ema hwa mà ŋwɛ̀ɛ̀, à hwèlì ndi Lòohwà là hwatò ema hwa hwèlì lòŋgɛ.” 33È ŋgìndì è mà hweye nanù, rzìi è tàmeyà hwèyòkòlèlì hwe ama Yerzù.
Imbenda jà ahwakɛ ema jò òhvi wòlìtò rzayi-rzayi
(Mak 12.28-34; Luk 10.25-28)
34Nà òma ema hweyàhwè na Ihvàlìrzàyì ema Yerzù à mà umba i wàna ja i Rzadurzi, rzi hwa arzàŋganɛ èki yɔ̀kɔ. 35Mɔ̀kɔ wa awu ema à mà hwɛ ndi mòòkòlèlì wa e mbenda, rzìi a kèkirzɛ Yerzù na mene miijòwelì nanù ema, 36“Ìi Mòòkòlèlì, ò tenì ya imbenda ja arzɛ ima yɔ e hwèlì wòlìtò lì aka ja arzɛ e?” 37Yerzù rzìi a mò alàhwɛ̀ nanù ema, “‘Lìŋgàna Rzàŋgò, Lòohwà la aŋgɔ̀ na mèèmà mò aŋgɔ̀ mò arzɛ, na èlìŋgɛ̀ ya aŋgɔ̀ ya arzɛ, na màlùtèyà ma aŋgɔ̀ ma arzɛ.’ 38Ene mbenda yɔ ndi e hwèlì e mbenda ya wòrzò, yɔ hvɛ ndi e hwèlì wòlìtò lì aka ja arzɛ. 39È mbenda ema e ùkirzɛ̀ ihwàkɛ ema yɔ̀hvɛ e òhvi wòlìtò nà è mbenda ya wòrzò, nanù ema, ‘Lìŋgàna e mòtò ema à ò kòmbɛ̀nɛ̀ na òma ò alìŋgànɛ̀yi ò wà witi.’ 40È mbenda ya arzɛ ya ama Mòrzè na hwèyòkòlèlì hwe arzɛ hwe hwà-òhwèlì hwa hwèlìŋgɛ̀ hwe rzɛmelì ndi ò ini mbenda ja ahwakɛ.”
Mìijowelì lì hvòmɛ̀nɛ̀ è Mɔ̀ ema à Ɔ̀kirzɛ̀hwɛ̀yi
(Mak 12.35-37; Luk 20.41-44)
41Yerzù rzìi a ijòwa Ihvàlìrzàyì ema i ma arzàŋganɛ èki yɔ̀kɔ nanù ema, 42“Mamɛ inyɔ e ɔ̀ŋgɛ̀lɛ̀ lì hvòmɛ̀nɛ̀ è Mɔ̀ ema à Ɔ̀kirzɛ̀hwɛ̀yi e? Ima nyɔ̀ŋgɔ̀nì ema mɔ̀ à uhwɛlɛlɛyi e?” Hwà mà mò alàhwɛ̀ nanù ema, “A uwɛ̀lɛ̀lɛ̀yi ndi ò e nyɔ̀ŋgɔ̀nì ya ama kiŋgɛ Dàhwitì.” 43Yerzù rzìi a hwa òhweyà nanù ema, “Mamɛ ndeŋgatɛ èlìŋgɛ̀ è mà kànèyà Dàhwitì ò lì mò hwɛlɛ ‘Rzàŋgò,’ e hvònda ema à mà òhwe nanù ema,
44‘Rzàŋgò Lohwà à mà òhweyà Rzàŋgò ya ami ema,
Lìya ò lìyà la ami la mòme,
natɛ̀ɛ na e hvònda ema na gbeyà ema ò làale hwakɔ̀èlì hwa aŋgɔ̀ na matàŋgà ma aŋgɔ̀.’
45È hwèlì tɛ ema Dàhwitì mɔ̀ à mò hwɛlɛ ‘Rzàŋgò,’ nɛ rzɔ è Mɔ̀ ema à Ɔ̀kirzɛ̀hwɛ̀yi a tànɛyi lì hwɛ e ŋmanà wa eni wa mùnyanà e?” 46Tɔ̀ mòtò tɔ̀ mɔ̀kɔ a rzìi tànɛyi lì mò alàhwɛ̀. Lìwòteya wòŋgò wùnyà lì ɛ̀ndɛ ò wòrzò, tɔ̀ mòtò tɔ̀ mɔ̀kɔ a rzìi mò ijòwa hvɛ tɔ̀ miijòwelì.
Obecnie wybrane:
Matiyò 22: bri
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, CABTAL
