Génesis 4
4
Cain ha Abel
1Adan oiko hembireko Éva ndive. Ha’e hyeguasu ha imemby Cain, ha he’i: Ñanderuete rupi chememby peteĩ mitãkuimba’e.
2Ha upéi Éva imemby Cain ryvy, Abel. Abel oiko ovecha rerekua ramo, ha Cain ñemitỹhára ramo.
3Ha ohasa ohóvo umi ára, Cain ogueru ikógagui ikuave’ẽmby Ñanderuetépe g̃uarã.
4Ha Abel ogueru ijovecha ra’ykuéra apytégui, peteĩ ikyra porãva. Ha Ñanderuete oma’ẽ torypápe Abel ha ikuave’ẽmbýre;
5ha ndoguerohorýi Caínpe ni ikuave’ẽmby, upévare Cain ipochyeterei, ha tova pukúpe oiko.
6Upémarõ Ñanderuete he’i Caínpe: Mba’érehepa ndepochyeterei, ha mba’érehepa nde rova puku.
7Rejapo rire iporãva remopu’ãva’erãmo’ã nde rova, rejapo vaígui uvei, pe tembiapo vai nera’ãrõma ne renonderãme, nde katu, embopoguy pe jepy’ara’ã nera’ãrõva.
8Ha Cain he’i ityvýra Abélpe: Ñasẽmína ñúre. Ha oĩ jave hikuái ñúre, Cain oñemoĩ ityvýra Abel rehe, ha ojuka ichupe.
9Ha Ñanderuete he’i Caínpe: Mamo piko oime nde ryvy Abel. Ha ha’e ombohovái ichupe: Ndaikuaái. Chéiko che ryvy rerekua mba’e.
10Upéramo Ha’e he’i ichupe: Mba’éiko rejapóra’e. Nde ryvy ruguykue ningo osapukái asy yvy guive chéve.
11Upévare nde reikóta maldecído ramo yvy apére, pe yvy ojejurupe’a rupi ha omboy’úgui nde ryvy ruguykue, nde po rupi omanova’ekue.
12Remba’apo ramojepe nde kokuépe nde neremono’õmo’ãvéi mba’eve ha reikóta kañyháme yvy apére ha nanerendamo’ãvéima mamove.
13Ha Cain he’i Ñanderuetépe: Nde chembuepoti pohyietereígui che ndaikatumo’ãi aropu’aka.
14Péina ko árape Nde chemosẽ ko yvýgui, ha ne renondégui akañýta, ha aikóta kañyháme tetã ambueygua ramo yvy apére; ha oimeraẽva chejohúva ikatu chejuka.
15Ha Ñanderuete ombohovái ichupe ha he’i: Nahániri, oimeraẽva ndejukáta, 7 jevy ojehavirava’erã. Upéramo Ñanderuete omoĩ Cain rehe peteĩ márca, ani hag̃ua avave ojuka ichupe ohug̃uaitĩ ramo ichupe.
16Ha Cain osẽ Ñanderuete renondégui, ha oiko Nod retãme, Edéngui kuarahyresẽ gotýo.
17Ha Cain oiko hembireko ndive, ha ha’e hyeguasu ha imemby Enoc; ha Cain omopu’ã peteĩ táva, ha ombohéra pe táva ita’ýra rérape, Enoc.
18Ha Enoc ra’y réra Irad, ha Irad ra’y réra Mehujael, ha Mehujael ra’y réra Metusael, ha Metusael ra’y réra Lamec.
19Ha Lamec oñemohembireko mokõi; peteĩ héra Ada, ha ambue Zíla.
20Ha Ada imemby Jabal, ha pévagui ou umi oikóva óga tymba pirekueguiguápe ha omoñemoñáva tymbakuéra.
21Ha ityvýra réra Jubal, ha péva umi mbarakaguasu ha mimby ombopu ypyva’ekue ru.
22Ha Zíla imemby Tubalcain, ha’e ikatupyry opaichagua tembiapo cóbre ha hierroguiguáva rehe; Tubalcain reindy Naama.
23Ha Lamec he’i hembirekokuéra, Ada ha Zílape: Pehendúke che ñe’ẽ, Lamec rembirekokuéra, pehendúke che ha’étava: Ajukákuri peteĩ kuimba’épe chekutu haguére, ha ajuka avei peteĩ mitãrusúpe ha’e chenupã haguére.
24Caínpe oñevengáta ramo 7 jevy (véces), añetehápe Lamécpe oñevengáta 77 jevy.
25Ha Adan oiko jevy hembireko ndive, ha ha’e imemby peteĩ mitãkuimba’e, ha ombohéra ichupe Set: Éva he’ígui, Ñanderuete omyengovia chéve che memby Abel, Cain ojukava’ekue.
26Ha Set ita’ýra avei ha ombohéra ichupe Enos. Ha upe guive yvyariguakuéra oñepyrũ omomba’eguasu Ñanderuetépe.
Obecnie wybrane:
Génesis 4: ÑÑP2015
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
