Jẹnẹsisi 6
6
Isi Nke Isin
Eje-obibi Ịhịan A Waye
1Ogẹn ịhịan gi bama ụba elu-ụwa, a mụzịkwọ ikpoho, 2Eje-mmọn nọ hụn nị ikpoho ndịnị wẹ a maka mma, ya kẹ eje-mmọn ndị ahụn nọ lụrụ hụn ọwụlẹ wẹ chọ. 3Ya kẹ Osolobuẹ nọ sị, “Mmọn m anọferikọzị imẹ ịhịan, makẹni ịhịan mmaka k'ọ wụ — ufiri ẹ, ahụa ọgụn isin sụọ kẹ ịhịan sikọ d'a tọru elu ụwanị.”
4Kete mgbe ahụn kẹ ndị adụn-aran, ndị Nẹfilim, rịma imẹ ụwa — makẹni, eje-mmọn ndị ahụn mẹgụ mgba ikpoho ndị ahụn ịhịan mụ, a mụnị wẹ wẹ ụmụ, uwẹ wụ ndị ahụn kpa ikẹn mbụ-mbụ hụn wẹ gi a kọ akịkọ.
Osolobuẹ A Kwan Mmanị O Gi Ke Ịhịan
5Osolobuẹ a hụn a nị eje-ihiẹn hụn rị imẹ ịhịan rị a waye elu-ụwa lẹni eje-ihiẹn kẹ w'e ro ogẹn ile, 6ya kẹ Osolobuẹ nọ kwan mmanị o gi ke ịhịan imẹ ụwa; ọ fụru ẹ akpobi! 7Ya kẹ Osolobuẹ nọ sị, “M k'e kpọnchanpụ ịhịan elu-ụwa, ịhịan hụn m gi ẹka m ke; m k'e kpọnchanpụ ịhịan lẹ anụmanụ lẹ ihiẹn ndị hụn a rịhunmẹni lẹ ndị e fe elu. K'ọ rị m, ekeni m wẹ.”
8Kanị Osolobuẹ nọ gi ẹnya rị mma lee Nụa.
Nụa Lẹ Ihiẹn Osolobuẹ Sị A Mẹ
9Ọnwan wụ akịkọ Nụa: Nụa wụ onyẹ ezi-omumẹ, ịya nwọnlẹni nkọrịanị ogẹn nke wẹ. Nụa e sọn Osolobuẹ.
10Nụa mụ ikẹnnyẹ ẹtọ wụ: Shẹm, Ham lẹ Jafẹtị.
11Ogẹn ahụn, ụwa a rụọlẹ ẹnya Osolobuẹ, ẹka-ikẹn ẹka-ikẹn jun imẹ ụwa. 12Osolobuẹ a hụngụọ a nị ụwa rụ arụ, makẹni ịhịan ile a mẹrụchanrịngụọ enwẹn wẹ imẹ ụwa. 13Ya Osolobuẹ nọ sị Nụa, “A kwademẹgụọ m nị m jẹnkọ d'e kpọnchanpụ ịhịan ile, makẹni, ẹka-ikẹn e jungụọ ụwa makẹ ufiri wẹ. M jẹnkọ nwan d'e tikpọ wẹ lẹ ụwa.
Kẹ Nụa K'a Dọn Rụn Ụgbọ Pụ-ichẹn
14“Rụnrụn nwan ụgbọ mirin pụ-ichẹn. Gi osisi saịprẹsị wụ akashịa rụn a. Rụnyesọnmẹ mmughẹ imẹ ẹ, y'e gi korota nyan a imẹ lẹ azụụn — kẹ imẹ ẹ kẹ azụụn a, makẹ mirin gha a banye ẹ. 15Lee nwan kẹ y'e dọn rụn a: usue ẹ k'a wụ ụbụkụ iri kwasị ọgụnnaị kwasị nnụ; ụshịa a k'a wụ ụbụkụ mmisẹn kwasị ọgụn-ẹtọ, ojijẹn-elu ẹ k'a wụ ụbụkụ isẹn kwasị ọgụnnaị. 16Rụn okpukpu ye elu ụgbọ hụ pụ-ichẹn, y'a latọ oghe ẹgbata ibe osisi wẹ gi mẹmẹ ẹhụ a lẹ okpukpu ẹ — oghe ahụn k'a wụ ụbụkụ ohu lẹ nkirishi; rụn ọnụmụzọ ye ẹhụ a; rụn ụgbọ ahụn pụ-ichẹn n'o nwọn agba ẹtọ nọkẹ ụlọ-elu.
17“Lee ẹ, m shikọ d'e zihẹ okẹn mirin imẹ ụwa, gi ẹ tikpọ ihiẹn ile e kwọnni rị okpuru igwere; ihiẹn ile rị imẹ ụwa sikọ d'a nwụnhụn. 18Kanị m k'e mẹmẹ nkwerigbama m ẹgbata mmẹ lẹ yụ; ị k'a banye ụgbọ ahụn pụ-ichẹn, yụ lẹ ụmụ ị lẹ nwunyẹ i lẹ inyẹnmẹ ụmụ ị.
19“Werisọnmẹ ihiẹn ile rị ndụn elu-ụwa ẹbụọ-ẹbụọ, okẹn lẹ onyẹnnyẹ; onyẹ-lẹ-ụdị-a onyẹ-lẹ-ụdị-a. Webanhan wẹ imẹ ụgbọ ahụn pụ-ichẹn, kẹni wẹ sọn i rị ndụn: 20kẹ ụdị nnụnụ ichẹn-ichẹn kẹ ụdị anụ ichẹn-ichẹn kẹ ụdị ihiẹn ichẹn-ichẹn a rịhunmẹ alị — onyẹ-lẹ-ụdị-a, onyẹ-lẹ-ụdị-a; ẹbụọ-ẹbụọ imẹ wẹ ile jẹnkọ d'e buruhẹ i, kẹni i dọnmẹ wẹ ndụn. 21Werizikwọ ihiẹn-oriri ile rị ichẹn-ichẹn butọ, hụn yụ lẹ wẹ k'e ri.”
22Ya Nụa nọ mẹ ẹrịra; o mẹchanrịn ihiẹn ile Osolobuẹ sị a mẹ.
Obecnie wybrane:
Jẹnẹsisi 6: ikkBI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.