मत्ती 2
2
दिह उगता उगेवाला पावणा
1हेरोदेस राजान काला माय जेवी बेथलेहेम गावाम यहुदिया ईलाका माय यीशुन जेल्मो एनो, ते दिह उगता उगे रेन तारान बाराम मालमात केरनारे जाणकार माणहे यरूशलेम देसा माय आवीन फुसणे बाज गीया। 2“यहुदिन राजा जान जेल्मो एनोह, तो काहरी हे? काहाकाय आमु दिह उगता उगे तान तारो दिखेल हेते, एने तान पाया पोड़ने आयेल हेते।”
3ज्य होमलीन हेरोदेस राजा, एने ता हेऱ्या आखा यरूशलेम माय रेणारे माणहे गाबराय गीया। 4तेवी राजा आखा माणहान मुखी चाकऱ्याह, एने देरेमगुरू न्याह सोबाह एकठा केरीन ताह फुशो, “मसीन जेल्मो काहरी एणे जुवे?”
5ता राजाह केया, यहुदि देसाम बेथलेहेम गावा माय, काहाकाय जाणकारान उगे रेन ज्य लेखायेल हे:
6“एय बेथलेहेम, तु जो यहुदान देस,#मीका 5:2
तु किहीक बी केरीन यहुदान आदिकारी माय आखाम रेन आत्यो नाय मिले;
काहाकाय तार माय रेन एक आदिकारी निकली,
तो मारा इस्राएली माणहान राखवाली केरी”
7तेवी हेरोदेस राजा मालुमात केरनारा माणहाह मोनेस हादिन फुशो, तारो ठिख काल्ला टेम माय देखायेल ईतो। 8एने राजा ताह ज्य केयीन बेथलेहेम गावा माय मुकल्यो, “जावो ता सोरान बाराम हास केरीन पोतो किरो, एने जेवी तो सापड़ी जाय तेवी माहु बी आवीन खोबेर दिज्यो। काहाकाय मी बी आवीन तान पाया पोडु।”
9ता राजान वात होमलीन जात रेना, एने जा ताराह ता पुर्व माय दिखेल एता तोस तारो तान ओंगाण ओंगाण चालनो; एने जाहरी सोरो एतो, ता जागा पोर जाईन उबरेय गीयो। 10ता ताराह देखीन ता जुलूम खुस एय गीया। 11एने ता आखा गेराम जाईन ता सोराह तान आईख ने खोलाम देख्या, एने ता पाया पोड़ीन ताह वोंद्या, एने जान तान जोलो उगाड़ीन ताह होनो, एने लोबान, एने मोग मोग गेंदाण्यो तेल बेट केऱ्या।
12ओवतो ताह होपना माय बोगवाना उगे रेन चेतावणी आपी, काय पोशा फिरीन हेरोदेसा फाय मा जाहो, केरीन ता दिहरी वाटे रेन तान देसाम जात रेना।
युसूफ सोराह एने सोरान आईख लेन मीस्र देसाम जाणे
13ताह जाणेन पासाण बोगवानान एक हेरोगदुत होपना माय आवीन युसूफाह केयो, “उठ ज्या सोराह एने ज्यान आईख लेन मीस्र देसाम नाह जा; एने जाह वोर मी नाय केव ताह वोर ताच रिजे, काहाकाय हेरोदेस ज्या सोराह हुदेह काय ज्याह माराव देव।”
14तेवी युसूफ रातीच उठीन सोराह एने तान आईख लेन मीस्र देसा माय जात रिनो। 15एने हेरोदेस राजा मोरता वोर ताच रेना। ज्य ज्यानकेरता एनो काय तो वचन जो बोगवानान जाणकारान उगे रेन कियेल एतो, तो पुरो एय: “मी मारा सोराह मीस्र देसाम रेन हादेल हे।”#होशे 11:1
सोराह मारने
16जेवी हेरोदेस राजाह ज्य मालुम पोड़नो काय इकेल वाला माणहे माहु दुको दियेल हेते, तेवी ताह जुलूम राग आवो, एने माणहाह मोकलीन ग्यानी माणहे कियेल तो तारो देखायेल तोलेक वोर बेथलेहेम गावान, एने आहने पाहनेन गावान आखा सोराह जा दुय वोरह्याह रेन आत्या एता, ता आखाह माराव दिनो।
17तेवी जो यिर्मया जाणकारान उगे रेन कियेल एतो तो वचन पुरो एनो।
18“रामा माय दुखाम बोरायेल एक बोल होमलाय गीयो;#यिर्मया 31:15
राहेल तीन सोरान केरता रेड़ताली;
एने ठावकी रेणे नाह होदताली,
तीन ते आखा सोरा मोर जायेल एता।”
मीस्र देसा माय रेन वोलना
19हेरोदेस राजाह मोरनेन पासाण, बोगवानान एक हेरोगदुत मीस्र देसा माय युसूफाह होपना माय देखानो एने केयो, 20“उठ, सोराह एने ज्यान आईख लेन इस्राएल देसा माय जातरे, काहाकाय जा माणहे सोरान जीव लेणे होदताला, ता मोर जायेल हेते।” 21युसूफ जाग उठनो, एने सोराह एने तान आईख लेन इस्राएल देसा माय आवो।
22पुण ज्य होमलीन काय अरखीउलास तान आबाख ने हेरोदेसान जागे यहुदिया पोर राज केरने बाजरिनोह, केरीन ता जाणेन बिनो। उंजु ताहरी ताह बोगवान होपना माय सुचना आप्यो काय ता मा जाहे, ओवतो युसूफ गेलील देसाम जात रिनो। 23एने नासरत नावान गावा माय जाईन रेणे बाज गीयो, काय तो वचन पुरो एय जो जाणकारान द्वारे कियेल एतो: “तो नासरी गावान केवाय।”#मरकुस 1:24; लुका 2:39; योहान 1:45
Obecnie wybrane:
मत्ती 2: NTNii2020
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
