लुका 20
20
यीशुन आदिकार पोर सावाल
(मत्ती 21:23-27; मरकुस 11:27-33)
1एक दिह यीशु मोंदिर माय माणहाह हिकवोण देणे बाजरियेल ईतो एने हाजाली खुबेर होमलाड़तालो, ते मुखी चाकर्यो एने देरेमगुरू, डायडाया हेऱ्या आहने आवीन उबरी गीया; 2एने केणे बाज गीया, “आमुह के, तु ज्या कामाह काल्ला आदिकार माय किरेह, एने कुण हे जो तुवाह ज्यो आदिकार आपेल हे?”
3यीशु ताह जापाप आप्यो, “मी बी तुमूह एक सावाल फुसथो; माहु किवो, 4योहानाह बपतीस्मा केरनेन आदिकार हेरगान उगे रेन एतो काय माणहान उगे रेन एतो?”
5तेवी ता तान तान केणे बाज गीया काय जापाप आपुह, “केदी आपु केहु, ‘हेरगान उगे रेन,’ ते तो केय, तुमू ता पोर बुरहो काहा नाह केऱ्या? 6एने केदी आपु केहु, ‘माणहान उगे रेन,’ ते आखा माणहे आपुह देगड़ा केरीन देती, काहाकाय माणहे खेरीच जाणतेह काय योहान जाणकार ईतो।” 7ओवता ता जापाप आप्या, “आमुह नाह मालुम काय ताह आदिकार कुणीन उगे रेन जुड़ेल।”
8यीशु ताह केयो, “ते मी बी तुमूह नाह केत काय मी ज्य काम काल्ला आदिकार माय केरथु।”
बाकता किरसाणान किस्सो
(मत्ती 21:33-46; मरकुस 12:1-12)
9तेवी यीशु माणहाह ज्यो किस्सो केणे बाज गीयो, “एगदो माणुह अंगुर ने खेत केऱ्यो, एने किरसाणाह तो गोवांद्यो आपीन मोकता दिह्यान केरता दिहरा देसाम जात रिनो” 10जेवी टेम आवो ते मालीक किरसाणा फाय एक पावराह मुकल्यो काय ता अंगुर ने खेतान थोड़ाक फोलान ईसो ताह आपी, पुण किरसाणे ताह देन एने ठाल्ले आथे मोकेल देना। 11ओवतो तो दिहरा पावराह मुकल्यो, एने किरसाणे ताह बी देना एने ताह लाजवाड़ीन ठाल्ले आथे मोकेल देना। 12ओवतो तो तीसरा पावराह मुकल्यो, एने ता ताह बी गायलो केरीन खेताम रेन बाहेर टाक देना। 13तेवी अंगुर ने खेतान मालीक केयो, मी काय केरू? मी मार मोंगाल्ला बेटाख मोकलुह, एय सेकी ता तान मान मेलती? 14पुण किरसाणे मालक्यान बेटाख देखीन आपसा माय विचार केरने बाज गीया, “ज्यो ते वोच हे, चालो आपु ज्याह मार देता तेवी ज्यी मालदेन आपणी एय जाय! 15एने ता ताह अंगुर ने खेताम रेन बाहेर निकालीन मार टाक्या। केरीन एवी खेतान मालीक ता हिऱ्यो काय केरी? 16‘मालीक आवीन किरसाणाह खेतेम केरी, एने अंगुर ने खेत दिहराह होप देय।’” ज्य होमलीन ता यीशुह केया, “बोगवान केरीन इहकेरीन नाय एणे जुवे।”
17यीशु तान उगे देखीन केयो, “पुस्तेक माय ज्य काय लेख मेल्योह? ‘जा देगड़ाह मिस्तऱ्या बिगेर कामान सोमजीन जुगार दियेल, तोच दिगोड़ पायान खास दिगोड़ बोण गीयो।’ 18जो कुण ता देगड़ा पोर पोड़ी तो टुकड़ा एय जाय, एने चुरा वोल जाय, एने जा पोर तो पोड़ी, ताह देल देय।”
केसराह फालो आपणे
(मत्ती 22:15-22; मरकुस 12:13-17)
19ती टेम देरेमगुरू एने मुखी चाकऱ्या यीशुह देरने होद्या, काहाकाय ता सोमजी जायेल एता काय यीशु आपणे बाराम ज्यो किस्सो कियेल हे, पुण ता माणहाह बिना। 20ता यीशुन ताक माय रेना, एने वोकल्याह मोकल्यो काय जा देरमी बोणनेन नेट केरीन तान काल्लान काल्ला सावाला माय फासाड़ सेकी, काहाकाय यीशुह यहुदि आदिकारीन आथाम एने रोमन आदिकारा माय होप देहु। 21ता वोकल्या यीशुह ज्यो फुशा, “एय गुरू, आमु जाणतेह काय तु ठिख किथे एने हिकाड़ेह बी, एने काल्लाह नेचो नाह किरेत, पुण बोगवानान वाट खेराय माय देखाड़ेह। 22काय आमुह रोमन आदिकारीह फालो आपणे हाजो हे काय नाह?”
23पुण यीशु तान चेतराय जाणीन ताह केयो, 24“माहु एक चांदीन सिक्को देखाड़ो। ज्या पोर कुणान साप एने नाव हे?” ता केया, “रोम ने राजा केसर ने।”
25यीशु ताह केयो, “ते जो केसरान हे, तो केसराह आपो; एने जो बोगवानान हे, तो बोगवानाह आपो।”
26ता माणहान सामने ज्यी वाती माय यीशुह फासाड़ नाह सेक्या, पुण तान जापाप रेन बोंगलायीन ठावकाच एय गीया।
पोशो जीव उठणे एने वाराड़
(मत्ती 22:23-33; मरकुस 12:18-27)
27 #
प्रेरितान काम 23:8
ओवता सदुकी जा केतेह काय मुरेलान जीव उठणो सोतोच नाह, ता माय रेन थोड़ाक जाणे यीशुन आहने आवीन फुशा, 28“एय गुरू, मुसान नेम माय इहकेरीन लिखेल हे काय: ‘केदी एगदान बाहख तान बायकु जीवतालीच ने बिगेर सोरान मोर जाय, ते तान बाहख तान बायकु हिऱ्यो वाराड़ केर लेय, एने तान बायाख ने केरता वोच पायदा केरी।’ 29हात बाहख एता, पेल्लो बाहख वाराड़ केरीन बिगेर सोरान मोर गीयो। 30उवतो दुसरो, 31एने तीसरो बी ती बायकु हिऱ्यो वाराड़ केर लिदो। एने इहीचकेरीन हातु बिगेर सोरान मोर गीया। 32सेवली बुखेत ती बायकु बी मोर गियी। 33केरीन जीव उठणेन पासाण ती ता माय रेन कुणीन बायकु रेय? काहाकाय ती हेऱ्या हातु बी बाहख वाराड़ किरेल एता।”
34यीशु ताह केयो, “ज्यी दुनियान सोरा माय ते वाराड़ ईथे, 35पुण जा माणहे ज्यान लायेक रेती काय ता कालाह एने मुरेल माय रेन जीव उठणेन आत केरती, ता नाय वाराड़ केरती एने नाय वाराड़ केरने होपाती। 36ओवता ता मोरती बी नाय। काहाकाय ता हेरोगदुतान गेत रेती, एने मोरीन जीव उठणेन कारेण बोगवानान सोरा बोणीन रेती। 37पुण ज्यी वातुह काय मुरेल जीव उठतेह, मुसो बी हेलेगताला जाड़ान उदारण माय देखाड़ेल हे, काय तो बोगवानाह अब्राहाम ने बोगवान, एने इसहाक ने बोगवान एने याकुब ने बोगवान किथे। 38बोगवान ते मुरदान नाह पुण जीवतालान बोगवान हे, काहाकाय तान आहने आखा जीवताला हेते।”
39तेवी ज्य होमलीन देरेमगुरू माय रेन थोड़ाक इहकेरीन केया, “एय गुरू, तु खेरीच केयो।” 40एने सदुकीह उंजु यीशुह काह फुसणेन ईमोत नाह एनी।
मसी कुणान बिटोख हे?
(मत्ती 22:41-46; मरकुस 12:35-37)
41ओवतो यीशु ताह फुशो, “मसी दाऊद ने खानदानान काहा केतेह?” 42दाऊद खुद बजन सहितान पुस्तेक माय किथे; मालीक मार मालीकाह केयो, मार जीवड़े उगे बोह! 43जाह वोर काय मी तारा दुसमोनाह तारे पायान बुंदे नाय केर देव। 44दाऊद ते मसी मालीक किथे; ते ओवतो तो तान वोच किहीक एय सेकी?
देरेमगुरूह रेन जोगवीन रिज्यो
(मत्ती 23:1-36; मरकुस 12:38-40)
45जेवी आखा माणहे होमेलने बाजरियेल एता, ते यीशु तान चेलाह केयो, 46“देरेमगुरूह रेन जोगवीन रिज्यो, ताह लाम्बा लाम्बा फाड़का पेरीन फिरने हाजो लागेह, उंजु आटा माय नमस्कार एने आदार केरनु एने बोक्ती केरन्या गेराम मुखी जागे बोहणु एने खाणान पोंगेत माय हाजो जागो ताह हाजो लागेह। 47ता रांडायेल बायकुन फायदो उखलीन त्युन पोयशा सांडाड़ लेतेह, एने माणहाह देखाड़नेन केरता जुलूम वार वोर विन्ता केऱ्या केरतेह। ताह होवटोह डेंड जुड़ी।”
Obecnie wybrane:
लुका 20: NTNii2020
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
