योहान 6
6
यीशु पाच एजार माणहाह खावाड़ ने
(मत्ती 14:13-21; मरकुस 6:30-44; लुका 9:10-17)
1ज्यु वातुन पासाण यीशु गेलील देरीयान, मतलब तीबीरीयास हेयरान देरीयान ती मीरे गीयो। 2एने माणहान होवटाली गेरदी यीशुन पासाण चाल पोड़नी, काहाकाय दुखाऱ्या माणहान केरता जो चोमेत्कार यीशु केरतालो ता ताह दिखेल एता। 3तेवी यीशु बोयड़ा पोर चेड़ीन तान चेला हिऱ्यो ताहरी बोह गीयो। 4एने यहुदिन फसहान तिवार आहने एतो। 5जेवी यीशु उपेर नेजेर केरीन माणहान होवटाली गेरदीह ता फाय आवतालो दिख्यो, ते फिलीपुसाह केयो, “न्या आखाह खाणेन केरता आपु रोटा कारीन वेचाता लावहु?” 6यीशु ज्यी वात ताह पारेखणेन केरता कियेल, काहाकाय तो सोता जाणतालो काय तो काय किरन्यो ईतो।
7 # 6:7 चांदीन सिक्को; चांदीन एक सिक्को मतलब गावा माय मोंजरी केरनारान एक दिह्यान कामाय हे (देखी मत्ती 20:2।) फिलीपुस यीशुह जापाप आप्यो, “न्या माय रेन एक एक जाण थोड़ो थोड़ो खाती, तीबी दुय होव रूपियान#6:7 दुय होव रूपियान ज्यान किमोत आज ने जोमानाम सेचाड़ीस एजार हे। रोटा पुरती नाय।” 8तान चेला माय रेन शमोन पतरसान बाहख अन्द्रियास यीशुह केयो, 9“न्याहरी एक आत्योच सोरो हे, ता फाय जुवारीन पाच रोटा एने दुय मासा हेते। पुण ता ओला माणहान केरता किहीक पुरती?”
10यीशु केयो, “माणहाह बोहाड़ दिवो।” ता जागाम जुलूम खेड़ एतो। तेवी ताहरी एदम्यान गेणती कोमीत कोमी पाच एजारान एती; ता आखा बोह गीया। 11तेवी यीशु रोटा आथाम देरीन बोगवानान दन्यवाद केरीन बोह रियेल माणहाह वाट दिनो। एने तिहेच केरीन मासाह बी जोलोक ताह जोवतालो, तोलोक वाट दिनो। 12जेवी ता पेट बोरीन खाईन आफरी गीया, तेवी यीशु तान चेलाह केयो, “रोटान उगरेल टुकड़ा टुलो केर लिवो काय बी विरेखणे नाय जुवे।” 13ओवता ता टुलो केऱ्या एने ता जुवारीन पाच रोटान टुकड़ा माय रेन जा आखा खायलीन पासाण उगरेल एता, ता बारा टोपला बोरीन टुलो केऱ्या।
14 # 6:14 जाणकार (देखी 1:21।) यीशु फाय रेन ज्यो चोमेत्काराह देखीन माणहे केणे बाज गीया, “दुनियाम जो जाणाव केरनार आवण्यो ईतो तो खेरीच ज्योस हे!” 15यीशु ज्य जाण गीयो काय ता माहु राजा बाणावणेन केरता देरने होदतेह; तानकेरता यीशु बोयड़ा पोर एखालोच जात रिनो।
यीशुन पाण्या पोर चालनो
(मत्ती 14:22-33; मरकुस 6:45-52)
16जेवी हांज पोड़ गियी, तेवी यीशुन चेला देरीयान दिड़े गीया, 17ता रेन एक डोंडह्या माय बोहीन देरीयान ती मीरे कफरनहूम हेयरान उगे जाणे बाज गीया। तुलबूखे आंदारो पोड़ जायेल एतो, एने ताहुक वोर यीशु ता फाय आयेल नाह ईतो। 18तेवी वादोणान वोजेसे देरीया माय लाटा आवणे बाज गीया, काहाकाय वारो जोरेस आवणे बाजरियेल एतो। 19जेवी चेला डोंडह्याह चालाड़ी चालाड़ीन कोमीत कोमी पाच सोव किलो मिटर सेटी जात रेना, ते ता यीशुह पाण्या पोर चालीन डोंडह्या उगे आवतालो देखीन जुलूम बिय गीया। 20पुण यीशु चेलाह केयो, “मी हे, बिवो मा!” 21तेवी ता यीशुह डोंडह्या माय बोहाड़नेन केरता राजी एना, एने तुलेचबूखे डोंडह्यो ता ईलाका माय पोच गीयो, जाहरी ताह पोचणो एतो।
माणहे यीशुह होदणु
22दिहरे दिह जा माणहे देरीयान ती मीरे एता, ताह ज्यो मालुम पोड़नो काय एक आत्योच डोंडह्यो ताहरी एतो, एने ज्य बी काय यीशु तान चेला हिऱ्यो डोंडह्या माय नाह ईतो, पुण निस्ता यीशुन चेला ओलाच जायेल एता। 23जाहरी मालक्यान दन्यवाद केरीन ओवता ता रोटा खाईल, ती जागान आहने तीबीरीयास हेयराम रेन दिहरा डोंडह्या आवीन थोबना। 24तेवी माणहे देख्या काय ताहरी यीशु एने तान चेला नाह सोता, तेवी ता आत आत्यास डोंडह्या माय बोहीन यीशुह होदतीन कफरनहूम गावाम पोचना।
यीशु जीवायीन रूटो
25देरीयान ती मीरे ता यीशुह मीलना ते केया, “एय गुरू, तु न्या कुलबुखे आवो?”
26यीशु ताह जापाप आप्यो, “मी तुमूह खेरीच केथु, तुमू चोमेत्कार दिखेल केरीन नाह, पुण पेट बोरीन रूटो खाईल केरीन माहु होदतेह। 27खेतेम एण्या खाणान केरता मेहनेत मा किरो; पुण ता खाणान केरता जो जेलेमक्यो जीवाय वोर टिकीन रीथे, जाह माणहान बिटोख तुमूह आपेह। काहाकाय आबोख, मतलब बोगवान तास पोर साप लागाड़ेल हे।”
28ओवता ता यीशुह केया, “बोगवान जो हुदेह तो काम केरनेन केरता आमु काय किरज्यो?”
29यीशु ताह जापाप आप्यो, “बोगवानान काम ज्योस हे काय माहु जो मुकलेल हे ता पोर तुमू बुरहो किरो।”
30तेवी माणहे यीशुह केया, “उवतो तु काल्ली निसाणी देखाड़ेह काय आमु तीह देखीन तार पोर बुरहो किरज्यो? एने एवी तु ओंगाण काय किरहे? 31आमरा बाप दादा उजाड़ी माय मन्ना खाईल एता, जिहकेरीन पुस्तेक माय लिखेल हे, ‘तो ताह हेरगाम रेन रूटो खाणेन आपेल ईतो।’”
32 # 6:32 जो मुसो आपेल तो नाह; नाहते जाह तो तुमूह आपेल तो मुसा नाह ईतो। यीशु ताह केयो, “मी तुमूह खेरीच केथु। तो रूटो मुसो तुमूह हेरगाम रेन नाह आपेल ईतो; पुण मारो आबोख तुमूह हेरगाम रेन खीरलो रूटो आपेह। 33काहाकाय बोगवानान रूटो तोस हे जो हेरगाम रेन उतरीन दुनियाह जीवाय आपेह।”
34तेवी माणहे यीशुह केया, “एय मालीक, ज्यो रूटो आमुह जेलेम आप्या केर।”
35यीशु ताह केयो, “जीवायीन रूटो मी हे, जो मार फाय आवीह तो केदी बुखल्यो नाय रेय। एने जो मार पोर बुरहो मिलेह, तो केदी तिहल्यो नाय रेय। 36पुण मी तुमूह कियेल ईतो काय तुमू माहु देख बी लियेल हेते, तीबी तुमू मार पोर बुरहो नाह केरते। 37जो काय आबोख माहु आपेह तो आखो मार फाय आवी। एने जो कुण मार फाय आवी ताह मी केदी नाय काडु, 38काहाकाय मी सोतान मारी मोरजी पुरी केरने नाह, पुण माहु मोकेलनारान मोरजी पुरी केरनेन केरता हेरगाम रेन उतरेल हे। 39एने माहु मोकेलनारान मोरजी ज्यीस हे काय जो काय तो माहु आपेल हे ता माय रेन मी कुणीह बी नाय टाकु, पुण सेवले दिह ता आखाह पुशो जीवता केर देह। 40काहाकाय मारा आबाख ने मोरजी ज्यीस हे काय जो बेटाख देखीन ता पोर बुरहो किरेह, तो जेलेमक्यो जीवाय सापड़ावी। एने मी ताह सेवले दिह पुशो जीवतो केरूह।”
41“मी हेरगाम रेन उतरेल रूटो हे,” इहकेरीन यीशु कियेल केरीन यहुदि यीशुन बाराम कुरकुर केरने बाज गीया। 42एने ता केया, “ज्यो ते युसूफान बिटोख यीशु हे, ज्यान आईख आबाख आपु ओलेखतेह। ते ज्यो किहीक केय सिकेह काय मी हेरगाम रेन उतरेल हे?”
43यीशु ताह जापाप आप्यो, “तुमू आपसाम कुरकुर मा किरो।” 44कुण बी मार फाय नाह आव सिकेत जाह वोर आबोख जो माहु मुकलेल हे ताह खेच नाय लेय; एने सेवले दिह मी ताह पुशो जीवतो केरूह। 45जाणाव केरनारान पुस्तेक माय इहकेरीन लिखेल हे, “ता आखा बोगवानान उगे रेन हिकाड़ेल रेती।”#यशाया 54:13 जो कुण आबाख ने होमलीन हिकेल हे, तो मार फाय आवीह। 46जो बोगवानान उगे रेन हे तोस आबाख दिखेल हे; ताह सोड़ीन दिहरो कुण आबाख नाह दिखेल सोतो। 47मी तुमूह खेरीच केथु काय जो मार पोर बुरहो किरेह: ताह जेलेमक्यो जीवाय जुड़ेह। 48जीवायीन रूटो मी हे। 49तुमरा बाप दादा उजाड़ी माय मन्ना खाईल तीबी ता मोर गीया। 50हेरगाम रेन उतेरनार रूटो ओहलो हे काय जो कुण ताह खाय तो मोरी नाय। 51हेरगाम रेन उतरेल जीवणान रूटो मी हे। ज्या रोटाह खाणारे जेलेम जीवताला रेती। एने जो रूटो मी दुनियान माणहान जीवायीन केरता आपुह, तो मारो सेरीर हे।
52तेवी यहुदि तान तान लेड़ाणे बाज गीया, “ज्यो माणुह किहीक आमुह तान सेरीर खाणेन केरता आप सिकेह?”
53यीशु ताह केयो, “मी तुमूह खेरीच केथु जाह वोर तुमू माणहान बेटाख ने सेरीर नाय खाहो, एने तान लुय नाय पिहो, ताहार तुमरे माय जीवाय नाह सोतो। 54जो मारो सेरीर खातेह एने मारी लुय पिथे, जेलेमक्यो जीवाय तास ने हे एने सेवले दिह मी ताह जीवतो केरूह। 55काहाकाय मारो सेरीर खेरलो खाणो हे; एने मारी लुय पिणेन खेरली चिज हे। 56जो मारो सेरीर खातेह एने मारी लुय पिथे तो मार माय रीथे, एने मी ता माय रिथे। 57जिहकेरीन जीवतालो आबोख माहु मुकलेल हे, एने मी आबाख ने वोजेसे जीवतालो हे। तिहेच केरीन जो बी माहु खाय तो मार वोजेसे जीवतालो रेय। 58जो रूटो हेरगाम रेन उतरेल तो ज्योस हे, तुमरा बाप दादा मन्ना खाईल तीबी ता मोर गीया। तोहलो नाह, जो बी ज्या रोटाह खाय, तो जेलेम जीवतालो रेय।”
59ज्यु वातु यीशु कफरनहूम गावान एक बोक्ती केरन्या गेरा माय हिकवोण आपणेन टेम माय केयो।
जेलेमक्यी जीवायीन वचन
60तानकेरता यीशुन चेलाम रेन जुलूम जाणे ज्यो होमलीन केया, “ज्यु वातु केठीण हेत्यु। ज्यीह कुण मान सिकेह?”
61यीशु तान मोना माय ज्यो जाणीन काय मारा चेला तान ताच ने ज्यी वाती पोर कुड़कुड़ावतेह, ताह फुशो, “काय मार कियेल वातुम तुमूह ठुकोर लागेह? 62एने केदी तुमू माणहान बेटाख जाहरी तो पेल ईतो, ताहरी उपेर जातालो दिखहो, ताहार काय एय? 63बोगवानान जीव हे; एने माणहान ताकेत काल्लास बी कामान नाह। जो मी तुमूह कियेल हे तो बोगवानान जीव हे एने तोस जीवाय आपेह। 64पुण तुमू माय थोड़ाक ओहला हेते जा बुरहो नाह केरते।” काहाकाय यीशुह पेलुच रेन मालुम एतो काय जा बुरहो नाह केरते, ता कुण हेते एने कुण माहु दुको देय। 65एने यीशु केयो, “मार फाय कुण नाह आव सिकेत जाहुक वोर मारो हेरगावालो आबोख ताह मार फाय आवणेन पारवांगी नाह आपेत।”
66तेवी यीशुन चेलाम रेन जुलूम चेला पासाण पोलटी गीया, एने तान बाद ता हेऱ्या नाह रेना। 67तेवी यीशु ता बारा चेलाह केयो, “काय तुमू बी जाणे होदतेह?”
68 #
मत्ती 16:16; मरकुस 8:29; लुका 9:20 शिमोन पतरस यीशुह जापाप आप्यो, “एय मालीक, आमु कुणी फाय जाज्यो? काहाकाय जेलेमक्यो जीवायीन वातु तारीस फाय हेत्यु। 69एने आमु बुरहो केऱ्या, एने जाण जायेल हेते काय बोगवानान चोखालो एक तुस हे।”
70यीशु ताह जापाप आप्यो, “काय मी तुमूह बारा जाणाह नाह निवाड्यो? तीबी तुमरे माय रेन एक माणुह सैतान हे!” 71इहकेरीन यीशु शिमोन इस्कोरितीन बिटोख यहुदान बाराम केयो। काहाकाय तोस जो ता बाराम रेन एक ईतो, यीशुह देरावण्यो ईतो।
Obecnie wybrane:
योहान 6: NTNii2020
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
