Мәтта 13
13
Мәсәла тʼохьмрʼәш
(Марԛос 4:1-9; Луԛа 8:4-8)
1Ԝе рʼоже Иса жь мале дәркʼәт, ль дәве голе рʼуньшт. 2У һаԛас әʼлаләт һатә щәм Ԝи, кӧ Әԝ кʼәрба кʼәтә ԛәйьке рʼуньшт у тʼәмамийа әʼлаләте дәве голе сәкьни. 3Әԝи гәләк тьшт бь мәсәла әԝ һин кьрьн у гот: «Тʼохьмрʼәш рʼабу чу кӧ тʼохьм бьрʼәшинә. 4Гава дьрʼәшанд, һьнәк жь ԝан кʼәтьнә дәве рʼе, тәйрәдә һатьн у әԝ хԝарьн. 5Һьнәкед дьн кʼәтьнә сәр әʼрде кәвьри, кӧ ль ԝьр хԝәли кем бу. Әԝ зу шин бун, чьмки тәлаше хԝәлийе нә кʼур бу. 6Ле чахе тәʼв дәркʼәт, әԝ чʼьлмьсин у чьмки рʼаԝед ԝан тʼӧнәбун, һʼьшк бун. 7Һьнәкед дьн кʼәтьнә нава стьрийа, стьри рʼабун у әԝ хәньԛандьн. 8Ле һьнәкед дьн жи кʼәтьнә нава әʼрде ԛәнщ у бәр дан, йе сәд, йе шест у йе си. 9Гӧһе кʼе һәйә бьра бьбьһе!»
Иса чьма бь мәсәла хәбәр дьдә
(Марԛос 4:10-12; Луԛа 8:9-10)
10Ԝе гаве шагьртед Ԝи незик буне у готьне: «Чьма бь мәсәла Тӧ ԝанарʼа хәбәр дьди?» 11Әԝи ль ԝан вәгәрʼанд у гот: «Ԝәрʼа һатийә дайине кӧ һун сӧрʼед Пʼадшатийа Әʼзмана бьзаньбьн, ле ԝанарʼа нәһатийә дайине. 12Чьмки кʼерʼа кӧ һәйә, ԝе һе ле зедә бә у сәрда бьрʼьжә у кʼерʼа кӧ тʼӧнә, чь һәйә жи ԝе же бе стандьне. 13Әз бона ԝе йәке бь мәсәла ԝанрʼа хәбәр дьдьм, кӧ әԝана дьньһерʼьн у набиньн, дьбьһен, ле гӧһе хԝә надьнә сәр у фәʼм накьн. 14Ль сәр ԝан пʼехәмбәртийа Ишайа те сери кӧ дьбежә:
‹Һуне бьбьһен у гӧһ бьдьне, ле фәʼм нәкьн,
һуне бьньһерʼьн у дина хԝә бьдьне, ле нәбиньн.
15Чьмки әва щьмәʼта сәрһʼьшк ә,
бь гӧһа гьран дьбьһен
у чʼәʼвед хԝә гьртьнә,
ԝәки бь чʼәʼва нәбиньн,
бь гӧһа нәбьһен
у бь һʼьш фәʼм нәкьн, вәнәгәрʼьн,
кӧ Әз ԝан ԛәнщ кьм›#13:15 Ишайа 6:9-10. .
16Ле хԝәзи ль чʼәʼвед ԝә, кӧ дьбиньн у гӧһед ԝә, кӧ дьбьһен. 17Әз рʼаст ԝәрʼа дьбежьм, гәләк пʼехәмбәр у мәрьвед рʼаст һʼьзрәта дитьна ван тьшта бун чь кӧ һун дьбиньн, ле нәдитьн у бьбьһистана чь кӧ һун дьбьһен, ле нәбьһистьн.
Шьровәкьрьна мәсәла тʼохьмрʼәш
(Марԛос 4:13-20; Луԛа 8:11-15)
18Ньһа һун шьровәкьрьна мәсәла тʼохьмрʼәш бьбьһен. 19Һәр кәсе кӧ хәбәра Пʼадшатийе дьбьһе у фәʼм накә, йе Хьраб#13:19 Бь готьнәкә дьн: «Мирещьн». те тʼохьме дьле ԝида чанди дьрʼәвинә. Әва әԝ ьн кӧ дәве рʼе һатьнә чандьне. 20Әԝед ль әʼрде кәвьри һатьнә чандьне әԝ ьн, кӧ чахе хәбәре дьбьһен, әԝ зу бь әшԛ у ша ԛәбул дькьн. 21Ле рʼаԝ кӧ нава ԝанда тʼӧнәнә, дьреж тʼаԝ накьн. Гава бона хәбәре рʼасти тәнгасийа йан зерандьне тен, әԝ зу жь рʼе дькʼәвьн. 22Әԝед ль нава стьрийада һатьнә чандьне әԝ ьн, кӧ хәбәре дьбьһен у хәмед ве дьнйайе у дәрәԝед дәԝләтийе хәбәре дьхәньԛиньн, әԝ бе бәр дьминьн. 23Ле әԝед ль нава әʼрде ԛәнщда һатьнә чандьне әԝ ьн, кӧ хәбәре дьбьһен, фәʼм дькьн у бәр дьдьн, һьнәк сәд, һьнәк шест у һьнәк си».
Мәсәла гәньм у зиԝане
24Иса мәсәләкә дьн жи ԝанарʼа пешда ани у гот: «Пʼадшатийа Әʼзмана мина ве йәке йә: Мәрьвәки нав әʼрде хԝәда тʼохьме ԛәнщ чанд. 25Гава һʼәму рʼазайи бун, дьжмьне ԝи һат у ль нав гәньмда зиԝан жи чанд у чу. 26Гава гәньм гьһишт бәре хԝә да, һьнге зиԝан жи перʼа кʼьфш бун. 27Хӧламед хԝәйе әʼрде незики ԝи бун у готьне: ‹Ахайе мә! Тә нава әʼрде хԝәда тʼохьме ԛәнщ нәчанд? Ле әв зиԝан жь кʼӧ һатьн?› 28Әԝи ль ԝан вәгәрʼанд у гот: ‹Дьжмьнәки әв тьшт кьрийә›. Хӧлама жи готә ԝи: ‹Ньһа тӧ ԛайл и кӧ әм һәрʼьн ԝан рʼакьн?› 29Әԝи гот: ‹На, нәбә чахе һун зиԝане рʼакьн, геньм жи перʼа дәрхьн. 30Бьһельн бьра һәр дӧ жи һәврʼа бьгьһижьн һʼәта рʼожа нандьруне. Рʼожа нандьруне әзе пʼаларʼа бежьм, пешийе зиԝане бьчьньн, гӧрʼз-гӧрʼз гьредьн бона шәԝате, ле геньм бькьнә әʼмбара мьн›».
Дӧ мәсәлед ль сәр Пʼадшатийа Хԝәде:
(Марԛос 4:30-32; Луԛа 13:18-21)
31Мәсәләкә дьн жи ԝанарʼа пешда ани у гот: «Пʼадшатийа Әʼзмана мина ве йәке йә: Мәрьвәки һʼәбәкә тʼохьме хәрдале һьлда, нав әʼрде хԝәда чанд. 32Әԝ жь һʼәму тʼохьма һуртьр ә, ле гава дьгьһижә, жь һʼәму пʼьнщарʼа мәстьр дьбә у дьбә дар, ӧса кӧ тәйрәдед әʼзмен тен һелинед хԝә сәр чʼьԛьлед ԝе чедькьн».
33Иса мәсәләкә дьн жи ԝанарʼа гот: «Пʼадшатийа Әʼзмана мина һәвиртьрʼшк ә, кӧ кʼӧлфәтәке һьлда, нава се код#13:33 Се кодед щьһуйа дькьр ԛаси 25 килограма. арда стьра, һʼәта кӧ һʼәму һьлат».
Иса бь мәсәла хәбәр дьдә
(Марԛос 4:33-34)
34Иса әв һʼәму тьшт бь мәсәла әʼлаләтерʼа готьн у бе мәсәлә тʼӧ тьшт ԝанарʼа нәдьгот. 35Әв йәк аһа бу, кӧ әԝ готьна бь заре пʼехәмбәр бе сери:
«Әзе бь мәсәла ԝанрʼа хәбәр дьм,
тьштед жь ԝәхте әʼфьрандьна дьнйайеда вәшарти гьли кьм»#13:35 Зәбур 78:2. .
Шьровәкьрьна мәсәла гәньм у зиԝане
36Һьнге Иса әʼлаләт һьшт, һатә мал. Шагьртед Ԝи һатьнә щәм Ԝи у готьне: «Мәсәла гәньм у зиԝане мәрʼа шьровәкә». 37Әԝи ль ԝан вәгәрʼанд у гот: «Әԝе кӧ тʼохьме ԛәнщ чанд, Кӧрʼе Мерьв ә. 38Әʼрд дьнйа йә, тʼохьме ԛәнщ жи мәрьвед пʼара Пʼадшатийе нә, ле зиԝан мәрьвед пʼара йе Хьраб ьн. 39Дьжмьне кӧ әԝ чанд, мирещьн ә. Нандьрун ахьрийа дьнйайе йә, пʼалә жи мьлйакʼәт ьн. 40У чаԝа кӧ зиԝане тʼоп дькьн дьшәԝьтиньн, ахьрийа ве дьнйайе жи ԝе ӧса бә. 41Кӧрʼе Мерьв ԝе мьлйакʼәтед Хԝә бьшинә у әԝе жь Пʼадшатийа Ԝи һʼәмуйед кӧ мәрийа жь рʼе дәрдьхьн у нәһәԛийе дькьн бьбьжерьн 42у бавежьнә кʼура агьр. Ль ԝьр ԝе бьбә гьри у чʼьркә-чʼьрка дьрана. 43Һьнге мәрьвед рʼаст ԝе Пʼадшатийа Баве хԝәда мина тәʼве шәԝԛ бьдьн. Гӧһе кʼе һәйә бьра бьбьһе!
Мәсәлед хьзна вәшарти у дӧрʼе ԛимәт
44Пʼадшатийа Әʼзмана мина ве йәке йә: Әʼрдәкида хьзнәкә вәшарти һәбу. Мәрьвәк ԝе дьбинә, вәдьшерә, шабуна дьчә һʼәму һәбука хԝә дьфьрошә у ԝи әʼрди дькʼьрʼә.
45Диса Пʼадшатийа Әʼзмана мина ве йәке йә: Мәрьвәки базьргани дӧрʼед рʼьнд дьгәрʼә. 46Гава дӧрʼәки пʼьрʼ ԛимәт дьбинә, дьчә һʼәму һәбука хԝә дьфьрошә у ԝи дӧрʼи дькʼьрʼә.
Мәсәла тʼорʼа авити
47Диса Пʼадшатийа Әʼзмана мина ве йәке йә: Тʼорʼәк те авитьне нава бәʼре у һʼәму щурʼә мәʼси дькʼәвьне. 48Гава тʼорʼ тʼьжи дьбә, дькʼьшиньнә дәве бәʼре у рʼудьнин мәʼсийед кер дьбьжерьн дькьнә дәрдана, ле йед бекер ԝеда давежьн. 49Ахьрийа дьнйайе жи ԝе ӧса бә. Мьлйакʼәте дәркʼәвьн хьраба жь нав ԛәнща бьбьжерьн 50у бавежьнә кʼура агьр. Ль ԝьр ԝе бьбә гьри у чʼьркә-чʼьрка дьрана».
Рʼастийед кәвьн у ну
51Иса жь ԝан пьрси: «Ԝә әв һʼәму тьшт фәʼм кьрьн?» Ԝана жерʼа гот: «Бәле». 52Әԝи жи ԝанарʼа гот: «Бона ве йәке һәр ԛанунзанәк кӧ Пʼадшатийа Әʼзмана һин буйә, мина мәрьвәки хԝәйимьлкʼ ә, кӧ жь хьзна хԝә тьштед кәвьн у ну дәрдьхә».
Бажаре Ньсрәте, ль кʼӧ Иса мәзьн бьбу, Ԝи ԛәбул накә
(Марԛос 6:1-6; Луԛа 4:16-30)
53Гава Иса әв мәсәлә хьлаз кьрьн, жь ԝьр чу 54һатә щи-мьскʼәне Хԝә, кʼьништа ԝанда әԝ һин дькьрьн. Әԝ жи зәндәгьрти дьман у дьготьн: «Әв сәрԝахти у ԛәԝата кʼәрәмәта жь кʼӧ гьһиштийе? 55Нә Әв кӧрʼе нәщар ә? Нә наве дийа Ԝи Мәрйәм ә? Нә Аԛуб, Усьв, Шьмһʼун у Щьһуда бьред Ԝи нә? 56Нә һʼәму хушкед Ԝи щәм мә нә? Әв һʼәму тьшт жь кʼӧ гьһиштьнә Ԝи?» 57Бь ви аԝайи әԝ жь Ԝи чун, ле Иса ԝанарʼа гот: «Пʼехәмбәр тʼӧ щийи нә беԛәдьр ә, пештьри мала хԝә у щи-мьскʼәне хԝәда». 58Әԝи ль ԝе дәре гәләк кʼәрәмәт нәкьрьн, чьмки баԝәрийа ԝан тʼӧнәбу.
Obecnie wybrane:
Мәтта 13: KmrNTC
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Институт перевода Библии, 2000, 2011
