ᒪᕐᒃ 16
16
ᒋᓴᔅ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ
ᒪᑎᔪᐤ 28.1-8; ᓗᒃ 24.1-12; ᒠᓐ 20.1-10
Mark 16.1-8 (Easter Sunday Year B)
1ᐃᔅᐱ ᑲ ᐎᒪᐱᔨᒡ ᒍᐤ ᐃᔪᒡ ᐅᑦ ᐊᔭᒥᐊᐅᒋᓯᑲᒧᐛᐤ, ᒪᕆ ᒪᒃᑕᓕᓐ, ᑭᔭ ᒪᕆ ᒋᒥᔅ ᐅᑲᐎᔭ, ᑭᔭ ᓴᓗᒥ ᒋ ᐅᑎᓂᒧᒡ ᓂᓇᐧᑯᐤ ᐊ ᐃᓯᓇᑯᓂᔨᒋ ᐊ ᐎᒋᒪᑯᓂᔨᒋ ᑐᒥᓂᑭᓇ ᒐᒋ ᑐᒥᓂᒺᒡ ᒋᓴᓴ ᐎᔭᔪᐤ᙮ 2ᐎᐱᒡ ᒪᒃ ᒋᔭᒋᓴᐸᔭᔨᒡ, ᓂᔅᑎᒻ ᐊ ᒋᓯᑲᔨᒡ ᐊᓂᔭᔪᐤ ᒥᓐ ᒐ ᐊᑎ ᒥᓇᔅᑕᑭᓄᐎᒡ, ᐃᔅᐱ ᐱᔭᒋ ᓴᑲᔅᑐᐛᔨᒋ ᐱᓯᒺ, ᒋ ᐃᑐᑕᐅᒡ ᐊᓐᑕ ᑲ ᐛᑎᒂᐱᔅᑲᐃᑭᓄᐎᒡ᙮ 3ᐊᓂᔭ ᒪᒃ ᐊ ᐊᑎ ᐱᒧᑕᒡ ᒋ ᐃᑎᑐᐅᒡ, “ᐊᐛᓐ ᒐ ᐃᒐᑎᑎᐱᓂᒪᑕᐧᒄ ᐊᓂᔭ ᐊᓯᓂᔭ ᑲ ᒋᐱᓯᒪᑭᓄᔨᒋ ᐊᓐᑕ ᐊ ᐱᑯᓇᔭᔨᒡ ?”
4ᐃᔅᐱ ᒪᒃ ᐊᑕᐱᒡ, ᒋ ᐛᐸᑎᒧᒡ ᐊᓯᓂᔭ ᐊ ᐃᒐᑎᑎᐱᓇᑭᓄᔨᒂᓂ, ᐛᔅ ᓇᔅᒡ ᒋᒥᒐᐱᔅᒋᓯᔪᐛ ᐊᓂᔭ ᐊᓯᓂᔭ᙮ 5ᒂ ᐱᒐᒡ ᐊᓂᔭ ᑲ ᐛᑎᒂᐱᔅᑲᐃᑭᓄᐎᒡ᙮ ᒋ ᐛᐱᒪᐅᒡ ᐅᔅᒋᓂᒋᓱᐛ ᐊᐱᔨᒋ ᒥᔪᓂᒡ ᐃᑕᒐ, ᐊ ᒋᔅᑭᒥᔨᒋ ᐊ ᐛᐸᔨᒡ ᐊ ᒋᓏᑭᓂᔨᒡ ᐊᑯᐱᔪᐤ, ᒋ ᓴᒋᓱᐅᒡ ᒪᒃ᙮
6ᒋ ᐃᑎᑯᐅᒡ ᒪᒃ, “ᐊᑲᐎᔾ ᓴᒋᓯᒄ᙮ ᒋ ᓇᓂᑐᐛᔨᒪᐛᐤ ᒋᓴᔅ ᓇᓴᕆᑎᒡ ᑲ ᐅᒋᑦ, ᐊᓐ ᑲ ᒋᔅᑕᔎᑕᑭᓄᐅᑦ ᒋᐱᔭᑎᑯᒡ᙮ ᒋ ᐅᓂᔅᑲᐤ, ᓇᒪ ᑕᐤ ᐅᑕ᙮ ᑭᓄᐛᐸᑎᒺᐧᒄ ᒪ ᐊᓐᑕ ᑲ ᐱᒥᓯᒪᑭᓄᐅᑦ᙮ 7ᒪᒋᒄ ᒪᒃ, ᐎᑎᒧᒪᐧᑯ ᐅᒋᔅᒋᓄᐊᒧᐛᑭᓇ ᑭᔭ ᐱᑕᕐ ᐎᑎᒧᐛᐧᒄ, ᐊ ᓂᑲᓄᑕᔨᒋ ᒋᓴᓴ ᑲᓕᓕᒡ ᐊ ᐃᑐᑕᔨᒋ᙮ ᐊᑯᑕ ᐊᓐᑕ ᒐ ᐛᐱᒪᒄ, ᒧᔭᒻ ᑲ ᐃᑎᑕᒄ᙮”
8ᐊᑯ ᒂ ᐎᐎᐸᔨᑐᒡ ᐊᓐᒡ ᐃᔎᐅᒡ ᐊᓂᔭ ᑲ ᐛᑎᒂᐱᔅᑲᐃᑭᓄᐎᒡ ᐊ ᓂᓇᒥᐱᔨᒡ ᑭᔭ ᐊ ᓴᒋᓯᒡ᙮ ᓇᒪ ᐊᐛᔪᐛ ᐅᒋ ᐃᔨᒥᐊᐅᒡ ᑲ ᐃᔅᐱᔅ ᒋ ᑯᔅᑕᒋᒡ᙮
ᒋᓴᔅ ᑲ ᓄᑯᓯᔅᑐᐛᑦ ᒪᕆ ᒪᒃᑕᓕᓇ
ᒪᑎᔪᐤ 28.9,10; ᒠᓐ 20.11-18
9ᐃᔅᐱ ᒋᓴᔅ ᑲ ᐅᓂᔅᑲᑦ ᓂᐳᐅᓂᒡ ᐅᒡ ᐎᐱᒡ ᐊ ᒐᒋᓴᐸᔭᔨᒡ ᐊᓂᔭ ᓂᔅᑎᒻ ᐊ ᒋᓯᑲᔨᒡ ᒥᓐ ᒐ ᐊᑎ ᐱᒥᐱᔨᒡ ᒪᕆ ᒪᒃᑕᓕᓇ ᓂᔅᑎᒻ ᒋ ᓄᑯᓯᔅᑐᐛᐤ᙮ ᐊᔪᐅᒄ ᐅᔭ ᐃᔎᐛ ᑲ ᐎᐎᑎᓴᐅᒪᑦ ᓂᔄᐅᑕᒡ ᒥᒋ ᐊᒐᒂ ᐊᒋ ᐱᒋᔅᑲᑯᔨᒋ᙮ 10ᒪᕆ ᒪᒃᑕᓕᓐ ᒪᒃ ᒋ ᐎᑎᒧᐛᐤ ᐊᓂᔭ ᐊᐛᔪᐛ ᑲᒋ ᐛᐎᒐᐛᔨᒋ ᒋᓴᓴ᙮ ᒋ ᓇᐧᑲᒋᒧᔪᐛ ᑭᔭ ᒋ ᒪᔪᐛ ᒋ ᑯᓯᑯᑕᔪᐛ ᑲ ᐅᑎᑕᑦ᙮ 11ᐃᔅᐱ ᒪᒃ ᐱᔭᑐᐛᒡ ᐅᔭ ᐃᔎᐛ ᐊ ᐃᔅᒋᔄᔨᒋ ᐊ ᐱᒪᑎᓯᔨᒋ ᒋᓴᓴ ᑭᔭ ᐊᒋ ᐛᐱᒪᔨᒋ ᓇᒪ ᐅᒋ ᐎ ᑕᑈᑐᐛᐅᒡ᙮
ᒋᓴᔅ ᑲ ᓄᑯᓯᔅᑐᐛᑦ ᓂᓱ ᐅᒋᔅᒋᓄᐊᒧᐛᑭᓇ
ᓗᒃ 24.13-35
12ᐸᑎᒪ ᒪᒃ ᒋᓴᔅ ᒋ ᓄᑯᓯᔅᑐᐛᐤ ᓂᓱ ᐅᒋᔅᒋᓄᐊᒧᐛᑭᓇ ᒪᒂᒡ ᐊ ᐱᒧᑕᔨᒋ ᐎᐎᑎᒥᒡ ᐊᓂᔭ ᒋᕈᓯᓕᒥᔪᐤ᙮ ᐃᔭᒡ ᒋ ᐃᓯᓇᑯᓱᐤ ᐊᓂᔭ ᑲ ᓄᑯᓯᔅᑐᐛᑦ᙮ 13ᐃᔅᐱ ᑲ ᒋᐛᒡ, ᐊᑯ ᒂ ᐎᑎᒧᐛᒡ ᐊᓂᔭ ᑯᑎᑲ ᒋᔅᒋᓄᐊᒧᐛᑭᓇ ᒥᒄ ᒪᒃ ᓇᒪ ᐅᒋ ᐎ ᑕᑈᑕᑯᐅᒡ᙮
ᒋᓴᔅ ᑲ ᓄᑯᓯᔅᑐᐛᑦ ᐊᓂᔭᔪᐛ ᐸᐃᑯᓴᑉ ᐅᒋᔅᒋᓄᐊᒧᐛᑭᓇ
ᒪᑎᔪᐤ 28.16-20; ᓗᒃ 24.36-49; ᒠᓐ 20.19-23; ᐊᑈᔅᑕᓇᒡ 1.6-8
14ᐸᑎᒪ ᒪᒃ, ᒋᓴᔅ ᒋ ᓄᑯᓯᔅᑐᐛᐤ ᐊᓂᔭ ᐸᐃᑯᓴᑉ ᒪᒂᒡ ᐊ ᒪᒧᒥᒋᓱᔨᒋ ᒥᒋᓱᐛᑭᓇᑎᑯᒡ᙮ ᒋ ᐊᓏᔨᒪᐤ ᒪᒃ ᐊᓂᔭ ᐊ ᐊᓏᑎᒥᔨᒋ ᑭᔭ ᐊ ᒥᔅᑯᐅᑕᐊᔨᒋ, ᐊᑲ ᐅᒋ ᐎ ᑕᑈᑐᐛᔨᒋ ᐊᓂᔭ ᒋᔅᒋᓄᐊᒧᐛᑭᓇ ᐊᓂᔭᔪᐛ ᑲ ᐛᐱᒥᑯᔨᒋ ᐸᑎᒪ ᑲ ᐅᓂᔅᑲᓇᑭᓄᐅᑦ᙮ 15ᐊᑯ ᒂ ᐃᑕᑦ, “ᒪᒋᒄ ᒥᓯᐛ ᐊ ᐃᔅᐱᑎᔅᑭᒥᑲᒡ ᐅ ᐊᔅᒋᔾ ᒐ ᑭᒐᔅᒋᒧᔭᒄ ᐊ ᐛᐎᑎᒪᒄ ᐅ ᒥᔽᒋᒧᐅᓐ ᒥᓯᐛ ᐊᐛᓐ ᒐᒋ ᐸᑕᐧᒃ᙮ 16ᐊᓐ ᐊᐛᓐ ᒐ ᑕᑈᑎᒧᒂ ᑭᔭ ᓯᑲᐃᑐᐛᑭᓄᒐ ᒋᑭ ᐱᒪᒋᐊᑭᓄᐤ, ᐊᑯ ᐊᓐ ᐊᐛᓐ ᒐ ᐊᑲ ᑕᑈᑎᒧᒂ ᒋᑭ ᓂᓱᐅᓇᒋᒪᑭᓄᐤ᙮ 17ᑲ ᑕᑈᑕᒡ ᒋᑭ ᒥᔭᑭᓄᐎᒡ ᓱᐧᑲᑎᓯᐅᓂᔪᐤ ᒐᒋ ᐃᑐᑕᒡ ᓂᓇᐧᑯᐤ ᒪᒥᔅᑲᒡ ᐛᐸᑎᔨᐛᐅᓇ᙮ ᒥᒋ ᐊᒐᒂ ᒋᑭ ᐎᐎᑎᓴᐛᐅᒡ ᓂᑦ ᐃᓯᓂᐧᑲᓱᐅᓂᔪᐤ ᐊ ᐊᐱᒋᑕᒡ ᑭᔭ ᓂᓇᐧᑯᐤ ᐃᔨᒧᐅᓇ ᒋᑭ ᐃᓯ ᐃᔨᒧᐅᒡ᙮ 18ᐅᑎᓇᑥᐛ ᒋᓇᐱᒂ, ᒪᒃ ᒥᓂᑥᐛ ᒐᒂᔪᐤ ᐊ ᒥᒋᓂᑐᐧᑯᓄᐎᒡ ᓇᒪ ᒋᑭ ᐅᒋ ᐎᔭᔅᑐᑕᑯᐅᒡ᙮ ᑲ ᐊᐧᑯᓯᔨᒋ ᐊᐛᔪᐛ ᒋᑭ ᓴᒥᓇᐅᒡ ᑭᔭ ᒐ ᒥᓏᑎᓯᔨᒋ᙮”
ᒋᓴᔅ ᑲ ᐅᐱᔨᑦ
ᓗᒃ 24.50-53; ᐊᑈᔅᑕᓇᒡ 1.9-11
19ᐸᑎᒪ ᒪᒃ ᒋᓴᔅ ᑲᒋ ᐃᓯ ᐃᔨᒪᐊᑦ ᐅᒋᔅᒋᓄᐊᒧᐛᑭᓇ, ᒋᒋᒋᓯᑯᒡ ᒋ ᐃᓯ ᐅᐱᔪᐤ᙮ ᐊᓐᑕ ᒋᓴᒪᓂᑐᐛ ᐅᒥᔪᓂᔨᒡ ᐃᑕᒐ ᐊᑯᑕ ᑲ ᐃᓯ ᐛᐛᔨᐱᑦ᙮ 20ᐊᑯ ᒪᒃ ᒋᔅᒋᓄᐊᒧᐛᑭᓐᒡ ᒥᓯᐛ ᒋ ᐃᑐᑕᐅᒡ ᐊ ᑭᒐᔅᒋᒧᒡ᙮ ᐅᑎᐸᔨᒋᒐᐛ ᒋ ᐎᒋᐃᑯᐅᒡ ᑭᔭ ᒋ ᐛᐸᑎᔨᐛᔪᐛ ᐊ ᑕᑈᒥᑭᓂᔨᒡ ᑕᓐ ᐊ ᐃᓯ ᑭᒐᔅᒋᒧᒡ ᐊᓂᔭ ᐅᒋ ᓂᓇᐧᑯᐤ ᒪᒥᔅᑲᒡ ᐛᐸᑎᔨᐛᐅᓇ ᐊᒋ ᐃᑐᑕᒡ᙮ ᐊᒥᓐ᙮
Obecnie wybrane:
ᒪᕐᒃ 16: ᓇᔅᑲᐱ
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
