Mark 12

Àshwəŋnə̀ nàanə nàanə mbə̀ʼə pɨ̀mbyabə̀ ɨ̀swùumə mɨ̀ntàamə mɨ mɨ̀lùʼù

(Mat 21.33-46; Luk 20.9-19)

1Yěsû à lə̀ tyiʼə̀ mbìʼnə̀ a nɨ shwəŋnə̀ ambo pobə amwuə àshwəŋnə̀ nàanə nàanə lo, “Ŋònə̀ ɨ̀tse à lə̀ pə ghu mbyə̀ mɨ̀tɨ̀ghə mɨ mɨ̀ntàamə mɨ mɨ̀lùʼù amwuə ɨ̀swùumə e, nkorə̀ nkaʼà nkamnə̀, ntuŋə̀ àghə̀əmə nɨ mbə̀ʼə pɨ tswuʼə̀ mɨ̀lùʼù ghu nkɨ mboomə̀ ndâ nɨkaŋə nɨ mbə̀ʼə pɨ nwuunə̀ nnaŋə̀ ɨ̀swùumə ghu. À lə̀ ŋâ ɨ̀swùumə wə̀ àpyìinə ambo pə̀ənə̀ lo pobə̂ fàʼà ntyiʼə̀ ŋŋâ e nɨ mɨ̀ntàamə, ndèrə̀ e a àkarə̀ a ndyə̌ sàa. 2Nkwùə̀ nɨ̀kabə̀ mɨ̀ntàamə amwuə ɨ̀swùumə wa ɨ̀ lə̀ kùʼù, a tsàa a ngàŋə̀ àfàʼà e ambo pɨ̀mbyabə̀ ɨ̀swùumə e wa lo pobə̂ ŋâ e nɨ mɨ̀ntàamə mɨ mɨ̀lùʼù mɨ̀ghu mɨ̀tse. 3Pɨ̀mbyabə̀ ɨ̀swùumə wa lə̀ kô a ngàŋə̀ àfàʼà wa mbuʼù e nkẅirə̀ ntsàa e mbô mɨmbaa. 4Lenəla, ngàŋə̀ ɨ̀swùumə wa a kɨ nchi ntsàa a yɨ̀tse ngàŋə̀ àfàʼà, pɨ̀mbyabə̀ ɨ̀swùumə pa kəʼə̀ e nchyâ àlǎ a àtwuə̀ ze nchyâ ɨ̀sɨŋnə̀ a àtwuə̀ ze. 5Ngàŋə̀ ɨ̀swùumə ghu a chi ntsàa a yɨ̀tse, pobə zùŋə̀ nzhwuutə̀ zhwuutə̀nə. Pobə lə̀ tyiʼə̀ nfàʼà a tɨ̀pòŋə̀ aŋunə pɨ̀noʼnə, mbuʼù pɨ̀tse nkɨ nzhwuutə̀ pɨ̀tse. 6Ŋònə̀ nɨ à lə̀ tyiʼnə mbwùʼə̀ a nɨ tsàa à lə̀ pə ndàʼà moonə̀ ngàŋə̀ ɨ̀swùumə wə̀ nɨ à lə̀ kòŋə̀nə. À lə̀ lẅùutə̀ ntsàa a moonə̀ e wə̀ ambo pɨ̀mbyabə̀ ɨ̀swùumə ɨ̀pe pa nshwəŋə̀ amwuə ze lo, ‘Ǹzhyə̂ lo pobə̌ ghuʼtə̀ a moonə̀ mə̀.’ 7La pɨ̀mbyabə̀ ɨ̀swùumə pa lə̀ tyiʼə̀ nshwəŋə̀ amwuə pobə lo, ‘Lə̌ ɨ̀ndzɨ̀ghə̀ ndâ e, nɨ̀ tô pə̀ənə̀ zhwuutə̀ e njiilo ɨ̀pwuumə̀ nɨ lə̀ pənə a nɨ pə ɨ̀pe tyiʼə̀ ɨ̀pə̀ənə̀.’ 8Lenəla, pobə lə̀ tyiʼə̀ nkô a moonə̀ wa nzhwuutə̀ mmàʼà àkwuə̀ e a àpyìinə a ndzùmə̀ nkaʼà.”

9Yěsû a tyiʼə̀ mbyiitə̀ lo, “Nɨ̀ kwàŋə̀ lo mbə̀ʼə ngàŋə̀ ɨ̀swùumə wə̀ a ghɨ̀rə̀ ɨla? Ngàŋə̀ ɨ̀swùumə wə̀ ǎ tô zhwuutə̀ pɨ̀mbyabə̀ ɨ̀swùumə pa pɨ̀tsùmə̀ tyiʼə̀ ŋâ ɨ̀swùumə e ambo pɨ̀mbyabə̀ pɨ̀nyaanə. 10Nɨ̀ pirə̀ a wɨghə alyiʼə Àŋwàʼnə̀ Nẅùə̀ zə tɨ fuŋə̀ lo,

‘Nɨ̀ghòorə tsa nɨ pɨ̀mboomə̀ mɨ̀ndâ lə̀ twuunə̀nə lo ka nɨ pə e nɨ àfàʼà la,

tsèrə lə̀ lẅùutə̀ mbə la nɨ̀ghòorə nɨ nɨ̀lẅuə̀ nɨ ndâ;

11A zèrə zə ànwùə̀ la à lə̀ ghɨ̀rə̀ Ndòʼnə̀mbyə̂, lenəla,

a tyiʼə̀ mbə ànwùə̀ yerə̀nə yerə̀nə a ɨ̀myə̂ pə̀ənə̀?’”

12Pɨ̀lùŋə̀ pɨ mbyə̀ pɨ̀Jew lə̀ zuʼù àshwəŋnə̀ nàanə nàanə nɨ Yěsû à lə̀ shwəŋə̀nə la nzhyə̂ lo à shwəŋə̀ la aŋunə pobə, ntyiʼə̀ ntàʼà àlàŋə a nɨ kô e. Pobə lə̀ pô àpùŋə̀ pə̀ənə̀ nɨ a lə̀ pənə alyiʼə ghu, lenəla mmyàʼtə̀ e.

Ànwùə̀ a nɨ twuə̀ pɨ̀taghə̀ ambo Kaasà

(Mat 22.15-22; Luk 20.19-26)

13Pɨ lə̀ twuumə̀ pɨ̀Farìsî pɨ̀tse nɨ ɨ̀zùŋə̀ ndzùmə̀ Heròdə̀ lo pobə̂ tô nnyoorə̀ e nɨ ɨ̀pyiitə̀ ɨ̀shwəŋnə̀ mbə̀ʼə zəənə̀ àlàŋə a nɨ kô e. 14Lenəla, pobə lə̀ tô ambo Yěsû nshwəŋə̀ lo, “Ɨ̀nèrə̀, pəə zhyə̂ lo ànwùə̀ nɨ wə̀ wə̀ nnèrə̀ la a tyìʼə̀ nkǔŋə nkuŋə, ka à pə e pɨ̀chwìrə̀, wə̀ wa nshwəŋnə̀ ka kɨ mə pô o a ŋwùə̀, la nnèrə̀ àlàŋə Nẅùə̀ nkǔŋə nkuŋə. A kùʼnə̀ lo pɨ̀ twuə̀ a taghə̀ ambo Kaasà kə̀ ngaŋə? 15Pəə twuə̀ kə̀ kò pəə twuə̀?”

La Yěsû à lə̀ zhyə̂ ɨ̀pə̀grə̀ mɨ̀nwùə̀ ɨ̀pobə mbyiitə̀ a ghobə lo, “Nɨ̀ tàʼà kwàʼnə̀ mə̀ lə mbə̀ʼə àkə? Nɨ̀ ŋâ nkabə̀ silbà ambo mɨ̀ŋə̀ n̂dzəənə̀.” 16Pobə lə̀ tô nɨ zèrə, a pyiitə̀ ambo pobə lo, “Lə̌ ɨ̀sɨghə̀ ɨ̀wə̌ ghobə nɨ̀linə̀ ɨ̀wə̌ aŋunə nkabə̀ zə?” Pobə kẅùə̀ lo, “A yɨ̀ Kaasà.”

17Yěsû a tyiʼə̀ nshwəŋə̀ ambo pobə lo, “Nɨ̀ ŋâ ɨ̀pwuumə̀ pa nɨ pənə pɨ Kaasà ambo Kaasà nkɨ ŋŋâ ɨ̀pwuumə̀ nɨ pənə pɨ Nẅùə̀ ambo Nẅùə̀.”

Pobə lə̀ zuʼù ànwùə̀ zèrə zə la, nnaŋə̀ e a kə̀ʼnə̀ a ghobə.

Àpyiitə̀ mbə̀ʼə ànwùə̀ a nɨ zhwuumə̀ a nɨ̀wɨghə̀

(Mat 22.23-33; Luk 20.27-40)

18Pɨ̀Sadducee pa nɨ ka pobə pyiimə̀ a ghobə lo pɨ pa nzhwuumə̀ a nɨ̀wɨghə̀ la lə̀ tô ambo Yěsû mbyiitə̀ e lo, 19“Ɨ̀nèrə̀, Mǔsî à laʼa ŋŋwàʼnə̀ nnèrə̀ ambo pəə lo, ‘Mbə̀ʼə ndyimə ŋwùə̀ à tə nkwɨghə̀ ngwaʼà a ngẅùə e tɨghu à pyə̂ ɨ̀poonə̀, yi ndyimə e ǎ lòo a nkwùə wa pobə ze pyə̂ ɨ̀poonə̀ pɨ ndyimə e wa.’ 20Pɨlyimə pɨ mbyàŋnə̀ laʼa mbə ghu sàmbaa, ghù ntsàambyə̀ a zoʼò a mə̀ngyə̌ ntô nkwɨghə̀ e tɨghu pobə mə̀ngyə̌ wa pyə̂ ɨ̀poonə̀; 21àpaatə̀ a lòo a mə̀ngyə̌ wa nkɨ nkwɨghə̀ e tyìʼə̀ tɨ waʼà a moonə̀. Lenəla, nòmbàa pɨtarə a kɨ ngɨ̀rə̀ tyìʼə̀ a lenə; 22Lenəla, pɨlyimə pa sàmbaa lə̀ kwɨkə̀ pɨ̀tsùmə̀ tɨ waʼà a moonə̀ ɨ̀tse. Mə̀ngyə̌ wa à lə̀ lẅùunə̀ nkɨ nkwɨghə̀ àze. 23Tɨ̀tsòŋə̀ wə̀, mə̀ngyə̌ wə̀ à ghǎ pə yɨ̀ ɨ̀wə̌ njyə̂ nɨ pɨ ghǎ zhwuumə̀ a nɨ̀wɨghə̀, tsaʼnə pobə pa pɨ̀tsùmə̀ sàmbaa lə̀ zoʼnə e la?”

24Yěsû à lə̀ kẅùə̀ ambo pobə lo, “Ka nɨ̀ zhyə̂ a wɨghə lo nɨ̀ fàntə̀ ànwùə̀? Nɨ̀ fàntə̀ ànwùə̀ ntiinə ka nɨ̀ zhyə̂ a wɨghə ànwùə̀ nɨ a pənə amwuə àŋwàʼnə̀ Nẅùə̀, ka kɨ zhyə̂ a wɨghə mɨ̀tɨ̀ŋnə̀ mɨ Nẅùə̀. 25Ntiinə a ghǎ pə nkwùə̀ nɨ pɨ zhwuumə̀ a nɨ̀wɨghə̀ la, ka nɨ̀zoʼò à pə ghǎ chi pə e ghu, pɨ kɨ nchi mmə ŋŋâ e pə̀ngyə̌ a ndâ nɨ̀zoʼò apə̀. Ŋwùə̀ ntsùmə̀ à ghǎ tyiʼə̀ pə la tsaʼa pəngèrə̀ a nɨ̀pwuurə̀. 26La ngə̀ aŋunə pə̀ənə̀ a nɨ zhwuumə̀ a nɨ̀wɨghə̀; nɨ̀ pirə̀ a wɨghə tɨ fuŋə̀ amwuə àŋwàʼnə̀ Mǔsî mbə̀ʼə alyiʼə nɨ a shwəŋə̀nə ànwùə̀ mbə̀ʼə mɨpaʼa, tsaʼnə Nẅùə̀ à lə̀ shwəŋə̀nə ambo ze lo ‘A mɨ̀ŋə̀ Nẅùə̀ Abràhamə̀, mbə Nẅùə̀ Isàkə̀, nkɨ mbə Nẅùə̀ Yàkobə̀’? 27Ka à pə e Nẅùə̀ ɨ̀kwuə̀ pə̀ənə̀, a Nẅùə̀ pànə̀ pɨ tɨ̀ŋnə̀. Nɨ̀ fàntə̀ a maa maa ànwùə̀.”

Tənkoŋə ntə̌

(Mat 22.34-40; Luk 10.25-28)

28Taʼà ɨ̀nèrə̀ mbòomə ghùtse à lə̀ pə a tɨ̀tɨ̀rə̀ pobə ndzuʼù tsaʼnə pobə lə̀ mənə ntànkə̀ pobə nɨ pobə. À lə̀ zəənə̀ lo Yěsû à lə̀ kẅùə̀ a ghobə ɨ̀shìʼnə̀, mbyiitə̀ ambo Yěsû lo, “Amwuə mɨ̀ntə̌ mɨ̀tsùmə̀, ẅùə̀ nɨ ɨ pənə tənkoŋə a ẅèrə?”

29Yěsû a kẅùə̀ lo, “Ntə̌ ghù ntsàambyə̀ chyə̂ lo, ‘Nɨ̀ zuʼù mbǎ pànə̀ pɨ Israel; Ndòʼnə̀mbyə̂ Nẅùə̀koʼò ɨ̀wə̀ənə̀, a tyìʼə̀ ze nɨ ze mbə Nẅùə̀koʼò. 30Lenəla, tyiʼə̀ nkòŋə̀ a Ndòʼnə̀mbyə̂ Nẅùə̀koʼò nɨ ntɨŋmə̀ o ɨ̀tsùmə̀, nɨ nɨ̀chyə̂mbyə̂ o ntsùmə̀, nɨ àzhìʼtə̀ o àtsùmə̀, farə nɨ mɨ̀tɨ̀ŋnə̀ ɨ̀mô mɨ̀tsùmə̀.’ 31Ẅùə̀ nɨ ɨ paatə̀nə pə lo, ‘Tyiʼə̀ nkòŋə̀ a ndyimə o tsaʼa mbɨ̀ŋmə̀ o.’ Ka ntə̌ ɨ̀tse ɨ pə e ghu nɨ ɨ tsàarə̀nə mɨ̀ntə̌ mə mɨmbaa.”

32Ɨ̀nèrə̀ mbòomə wa a shwəŋə̀ ambo Yěsû lo, “Ɨ̀nèrə̀, wə̀ shwəŋə̀ tyìʼə̀ nkǔŋə nkuŋə lo, Nẅùə̀koʼò à chyə̂ moʼo; ka ghùtse a chi mbə e ghu ndàŋə̀ e; 33Tə̂ àtwuə̀ nkòŋə̀ e nɨ ntɨŋmə̀ o ɨ̀tsùmə̀, nɨ àzhìʼtə̀ o àtsùmə̀, nɨ ɨ̀tɨ̀ŋnə̀ o ɨ̀tsùmə̀, nkɨ nkòŋə̀ a ndyimə o tsaʼa mbɨ̀ŋmə̀ o. Zèrə zə a pòŋə̀ ntsàarə̀ a nɨ ŋâ a nyàamə̀ lo pɨ̀ tòonə̀ ntsùmə̀ nchàʼtə̀ a Nẅùə̀ ghu, kə̀ ɨ̀pwuumə̀ ɨ̀tsùmə̀ nɨ pɨ pa mmàʼà a Nẅùə̀ ghu.”

34Yěsû à lə̀ zəənə̀ lo à kẅùə̀ nɨ àzhìʼtə̀, ntyiʼə̀ nshwəŋə̀ ambo ze lo, “Ka wə̀ pə o a ndyə̌ sàa amwuə ànwùə̀ Nɨ̀fò Nẅùə̀.” Tsaʼnə yèghu ànwùə̀ a lə̀ làŋə̀nə la, ŋwùə̀ ntsùmə̀ à lə̀ pô a nɨ chi mbyiitə̀ e nɨ ànwùə̀ àtse.

Àpyiitə̀ mbə̀ʼə Ghù Ndzoʼnə wa

(Mat 22.41-46; Luk 20.41-44)

35Nkwùə̀ nɨ Yěsû à lə̀ pənə nnèrə̀ ànwùə̀ Nẅùə̀ amwuə Ndâ Mɨ̀shwàʼà Nẅùə̀, à lə̀ pyiitə̀ lo, “Mbə̀ʼə pɨ̀nèrə̀ mbòomə shwəŋə̀ lo Ghù Ndzoʼnə wa a moonə̀ Dàfirə̀ lə ɨla? 36Àzhwùə̀ Nẅùə̀ a lə̀ shwəŋə̀ ambo Dàfirə̀ àtwuə̀ ɨ̀pɨ̀ŋmə̀ e a shwəŋə̀ lo,

‘Ndòʼnə̀mbyə̂ à lə̀ shwəŋə̀ ambo Ndòʼnə̀mbyə̂ mə̀ lo,

nwuunə̀ a pàa àpô mɨ̀ŋə̀ yè zɨghə̀nə,

tə mbyàa nkwùə̀ nɨ ǹgǎ chyâ ngàŋə kɨpaanə ɨ̀zô a ɨ̀sùmə mɨ̀kwùə̀ ghò.’

37“Dàfirə̀ àtwuə̀ ɨ̀pɨ̀ŋmə̀ e à lə̀ fuŋə̀ e lo Ndòʼnə̀mbyə̂; mbə̀ʼə Ghù Ndzoʼnə wa a tyiʼə̀ mbə moonə̀ e lə ɨla?” Lenəla, àpùŋə̀ pə̀ənə̀ nɨ a lə̀ pənə a alyiʼə ghu a lə̀ zuʼù àshwəŋnə̀ Yěsû ntyiʼə̀ mbə nɨ nɨ̀ghaʼà.

Yěsû a kwàtə̀ pə̀ənə̀ mbə̀ʼə pɨ̀nèrə̀ mbòomə

(Mat 23.1-36; Luk 20.45-47)

38Tsaʼnə Yěsû à lə̀ mənə nnèrə̀ ànwùə̀ Nẅùə̀ ambo pobə, à lə̀ kwàtə̀ a ghobə lo, “Nɨ̀ zhìʼtə̀ a wɨghə mbə̀ʼə pɨ̀nèrə̀ mbòomə, nɨ pɨ kòŋə̀nə a nɨ yìinə̀ amwuə ɨtsəʼə pɨ̀sàa, mmə ntàʼà lo pɨ̀ chàʼtə̀ a ghobə nɨ àghuʼtə̀ amwuə ɨlyiʼə mɨ̀tàanə. 39Pobə pa nkòŋə̀ a nɨ nwuunə̀ aŋunə ɨləŋə pyə̀ nɨ pèrə pənə a mbyə̀ amwuə Mɨ̀ndâ mɨ ɨ̀shwatə̀ pɨ̀Jew, nkɨ nkòŋə̀ a nɨ nwuunə̀ aŋunə ɨləŋə pànə̀ pɨ̀ẅùunə amwuə ɨlyiʼə nɨ̀ghaʼà. 40Pobə pa ndzə̀ərə̀ ɨ̀pwuumə̀ ɨ̀tsùmə̀ amwuə mɨ̀ndâ mɨ pɨ̀kwùə, ntyiʼə̀ mbwùrə̀ ɨ̀myə̂ ngɨ̀rə̀ ɨ̀chàʼtə̀ Nẅùə̀ pɨ̀sàa. Nẅùə̀ à ghǎ chyâ ngəʼə̀ yɨ̀noʼnə àtwuə̀ mbuurə̀ pànə̀ zə.”

Nkabə̀ nchàʼtə Nẅùə̀ nkwùə mə̀ngyə̌

(Luk 21.1-4)

41Yěsû à lə̀ nwuunə̀ a nɨ̀pwùnə nkwùumə̀ nɨ pɨ lə̀ mənə nchyâ nkabə̀ nchàʼtə Nẅùə̀, mmə nnaŋə̀ tsaʼnə pànə̀ mənə nchyâ nkabə̀ amwuə. Ngàŋə nkabə̀ yɨ̀noʼnə lə̀ làŋə̀ nchyâ nkabə̀ noʼnə amwuə nkwùumə̀ wa. 42La nkwùə mə̀ngyə̌ ɨ̀tse nɨ à lə̀ pənə ngàŋə̀ àfumə̀ à lə̀ tô nchyâ pɨ̀mɨlyiʼə pɨ̀nkabə̀ pɨ kopà pɨpaa nɨ lə̀ pənə tsaʼa taʼà kapà. 43Yěsû à lə̀ fuŋə ɨ̀zùŋə̀ ndzùmə̀ ɨ̀pe nshwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo ngàŋə̀ àfumə̀ nkwùə mə̀ngyə̌ wə̀ à chyâ nkabə̀ amwuə nkwùumə̀ ntsàarə̀ pànə̀ pɨ̀tsùmə̀ nɨ pɨ pənə nchyâ nkabə̀ nchàʼtə Nẅùə̀ la. 44Ntiinə ngàŋə nkabə̀ zə fuukə̀ la amwuə nkabə̀ noʼnə nɨ pobə pənə nɨ zèrə; la nkwùə mə̀ngyə̌ wə̀ nɨ à pənə ngàŋə̀ àfumə̀ la, à chyâ la àzwuumə̀ e àtsùmə̀ nɨ à pənə nɨ zèrə a nɨ chyə̂ e aŋunə.”

Obecnie wybrane:

Mark 12: pny

Podkreślenie

Udostępnij

Kopiuj