Ɨ̀fàʼà 9
9
Ndwuumə̀ nɨ Nẅùə̀ à lə̀ kẅebə̀nə a Saul
1A lə̀ pə nkwùə̀ ghu la, Saul à lə̀ pirə̀ mmə ndàŋə̀ nɨ mbyə̀ ntàʼà a nɨ zhwuutə̀ ɨ̀zùŋə̀ ndzùmə̀ Ndòʼnə̀mbyə̂. À lə̀ lèrə̀ ambo àtwuə̀ pɨ̀fò màʼà Nẅùə̀, 2nshwəŋə̀ ambo ze lo, â ŋâ e nɨ ɨ̀ŋwàʼnə̀ lo â lèrə̀ amwuə mɨ̀ndâ mɨ àshwatə̀ mɨ pɨ̀Jew mɨ̀tsùmə̀ amwuə àlaʼà Dàmaskòsə̀, mbə̀ʼə a pəla ndzəənə̀ a mə̀ngyə̌ kə̀ a ŋònə̀ mbyàŋnə̀ nɨ à pənə ndzùŋə̀ àlàŋə Ndòʼnə̀mbyə̂, a kô e ndòo nkẅirə̀ nkwə̂ a Yèrusalèmə̀.
3Saul à lə̀ lèrə̀ ntô mmə mbaatə̀ a Dàmaskòsə̀, nkàʼà ɨ̀ furə̀ a nɨ̀pwuurə̀ ŋwàŋə̀ a ɨ̀myə̂ ze. 4A zùŋə̀ nkunə̀ a ɨ̀shyə̂ ndzuʼù ngyə̀ ŋwùə̀ ɨ̀ mə nshwəŋə̀ ambo ze lo, “Saul, Saul, a ghɨ̀rə̀ àkə wə̀ gha ntòmnə̀ mə̀ tyìʼə̀ lə?”
5A kẅùə̀ ambo ze lo, “A ghò ɨ̀wə̌, Ndòʼnə̀mbyə̂?”
A kẅùə̀ ambo Saul lo, “A mɨ̀ŋə̀ Yěsû wa nɨ wə̀ wa nnyàŋə̀ la, 6la lòo a ɨ̀shyə̂ nkwuunə̀ amwuə àlaʼà zə. Ŋònə̀ ɨ̀tse ǎ tiitə̀ o nɨ ànwùə̀ nɨ wə̌ ghɨ̀rə̀.” 7Mɨ̀ntswùə̀ mɨ pànə̀ nɨ pobə pɨ pobə lə̀ pənə ngyìinə̀ lə̀ kaʼà nkwùə̀ nɨ pobə lə̀ zuʼnə ngyə̀ ŋwùə̀ nɨ a lə̀ pənə nshwəŋnə̀ la ka mə zəənə̀ a ghobə a ye. 8Saul a lə̀ lòo a ɨ̀shyə̂ nkwùə̀ ghu ka chi mə zəənə̀ e ɨlyiʼə. Pɨ tyiʼə̀ ngẅìimə̀ àpô e ndòo e nkwuunə̀ amwuə àlaʼà Dàmaskòsə̀. 9A lə̀ chyə̂ ghu njyə̂ ɨtarə tɨ zəənə̀ ɨlyiʼə, ka zɨghə̀ e kə̀ ka nô e àzwuumə̀ àtse. 10Àzùŋə̀ ndzùmə̀ Yěsû yètse a lə̀ pə a Dàmaskòsə̀, nɨ̀linə̀ ɨ̀tse pə Ananias. Ndòʼnə̀mbyə̂ à lə̀ fuŋə̀ e amwuə ndzə̀əmə̀ lo, “Ananias!”
A kẅùə̀ lo, “Ngwə̀ mbǎ Ndòʼnə̀mbyə̂.”
11Ndòʼnə̀mbyə̂ a shwəŋə̀ ambo ze lo, “Lòo a ɨ̀shyə̂ ndèrə̀ amwuə àlàŋə za nɨ pɨ fuŋə̀nə nɨ Straight, mbyiitə̀ alyiʼə nɨ ndâ Yudà ɨ̀ pənə. Ŋwùə̀ a ẅùə̀ amwuə mmə nchàʼtə̀ a Nẅùə̀. 12Lenəla, Saul à lə̀ zəənə̀ a ŋònə̀ nɨ pɨ fuŋə̀nə nɨ Ananias amwuə ndzə̀əmə̀ a kwuunə̀ a ndâ nnùŋə̀ mbô ɨ̀me àtwuə̀ ze njiilo a kẅirə̀ ndzəənə̀ ɨlyiʼə.”
13La Ananias a kẅùə̀ lo, “Ndòʼnə̀mbyə̂, ndzuʼù mə ambo pànə̀ pɨ̀noʼnə mbə̀ʼə mɨ̀nwùə̀ mɨ tɨ̀pòŋə̀ nɨ ŋònə̀ wə̀ a ghɨ̀rə̀ mə aŋunə pə̀ənə̀ ɨ̀pô a Yèrusalèmə̀. 14A kùmə̀ ntô a nɨ̀ghə̂ nɨ ɨ̀tɨ̀ŋnə̀ nɨ ɨ furə̀nə ambo pɨ̀fò màʼà Nẅùə̀ lo kô a ŋwùə̀ ntsùmə̀ nɨ a wə̀ nfuŋə̀ nɨ̀linə̀ ɨ̀tsô.”
15Ndòʼnə̀mbyə̂ a tyiʼə̀ nshwəŋə̀ ambo ze lo, “Lèrə̀, ntiinə ntsoʼò mə e lo a fàʼà ambo mɨ̀ŋə̀, ntyiʼə̀ ngɨ̀rə̀ pànə̀ nɨ ka pɨ pə e pɨ̀Jew, pobə pɨ̀fò ɨ̀pobə nɨ pànə̀ pɨ Israel pɨ zhyə̂ nɨ̀linə̀ ɨ̀tsâ 16Mbɨ nèrə̀ e nɨ mɨ̀nwùə̀ mɨ̀noʼnə nɨ ǎ zəənə̀ ngəʼə̀ aŋunə mbə̀ʼə nɨ̀linə̀ ɨ̀tsâ.”
17Lenəla, Ananias a lə̀ kwuunə̀ amwuə ndâ nɨ Saul a lə̀ pənə amwuə la, nnùŋə̀ mbô ɨ̀me àtwuə̀ ze nshwəŋə̀ lo, “Ndyimə mə̀ Saul, Ndòʼnə̀mbyə̂ Yěsû nɨ wə̀ lə̀ tsirə̀nə e a àlàŋə ndwuumə̀ mmə ntô la, a tsàa mə̀ lo ntô ngɨ̀rə̀ wə̀ kẅirə̀ ndzəənə̀ ɨlyiʼə nkɨ ngɨ̀rə̀ Àzhwùə̀ Nẅùə̀ a lẅenə̀ ntɨŋmə̀ o.” 18Tyìʼə̀ nkwùə̀ ghu, ɨ̀pwuumə̀ pɨ̀tse tsaʼa ɨ̀kòbə̀ mbɨ̀ŋmə̀ ɨ̀swuə̀ furə̀ a ɨ̀myə̂ ze nkuntə̀ a ɨ̀shyə̂, a zùŋə̀ ndzəənə̀ ɨlyiʼə, ndòo a ɨ̀shyə̂ pɨ ŋâ e nɨ àkẅiirə̀ nchyə. Tsaʼnə pɨ lə̀ ŋânə e nɨ àkẅiirə̀ nchyə la, à lə̀ zɨghə̀ mɨ̀zɨghə̀, mɨ̀tɨ̀ŋnə̀ ɨ̀me kẅirə̀ nkwə̂.
Saul a chwìitə̀ ntwuumə̀ Nẅùə̀ a Dàmaskòsə̀
19Saul a lə̀ chyə̂ aŋunə mɨ̀njyə̂ mɨ̀tse pobə ɨ̀zùŋə̀ ndzùmə̀ Yěsû pa a Dàmaskòsə̀, 20ntyiʼə̀ nchwìitə̀ ntwuumə̀ Nẅùə̀ amwuə mɨ̀ndâ mɨ ɨ̀shwatə̀ pɨ̀Jew lo, “Yěsû la Moonə̀ Nẅùə̀.” 21Ŋwùə̀ ntsùmə̀ nɨ a lə̀ zuʼnə ànwùə̀ nɨ a lə̀ mənə nshwəŋə̀ a lə̀ yerə̀ ntyiʼə̀ nshwəŋə̀ lo, “Ka lə pə e ŋònə̀ wa nɨ à lə̀ tòmnə̀nə pànə̀ nɨ pobə lə̀ chàʼtə̀nə a Nẅùə̀ a Yèrusalèmə̀ nfuŋə̀ nɨ̀linə̀ nɨ Yěsû la? À ka tô e a nɨ̀ghə̂ lə a nɨ ghɨ̀rə̀ tyìʼə̀ ànwùə̀ ghu lo kootə̀ a ghobə, lòo ghə̀ ŋâ ambo pɨ̀fò màʼà Nẅùə̀?”
22La Saul a làŋə̀ nɨ mbyə̀ nshwəŋə̀ nɨ ɨ̀tɨ̀ŋnə̀ lo, “Yěsû la Ghù Ndzoʼnə wa,” tə mɨ̀ntswùə̀ mɨ pɨ̀Jew a àlaʼà Dàmaskòsə̀ mɨ kaʼà.
23Mɨ̀njyə̂ mɨ̀tse lə̀ kɨ làŋə̀, pɨ̀Jew tàʼà àlàŋə a nɨ zhwuutə̀ Saul. 24Pobə lə̀ tyiʼə̀ mmə mbyabə̀ mɨ̀ntswùə̀ mɨ nkaʼà nɨ mɨ kwuunə̀nə amwuə àlaʼà nɨ ɨ̀twuʼə̀ pobə njyə̂ a nɨ zhwuutə̀ e. La Saul a zuʼù a pyantə ɨghobə. 25A lə̀ pə nɨ ɨ̀twuʼə̀ ɨ̀tse, ɨ̀zùŋə̀ ndzùmə̀ ɨ̀pe lòo e nkoʼò àtwuə̀ àsǎ nkaʼà nɨ ɨ kamnə̀nə àlaʼà, nchyâ e amwuə nkaamə nshwuʼkə̀ a àpyìinə.
Saul a lèrə̀ a Yèrusalèmə̀
26Nkwùə̀ nɨ Saul à lə̀ kwuunə̀nə a Yèrusalèmə̀, à lə̀ kyiitə̀ a nɨ pwuutə̀ pobə pɨ ɨ̀zùŋə̀ ndzùmə̀ Yěsû, la pobə pə mbô e ntiinə ka pobə lə̀ zhyə̂ a ghobə a ye tsaʼa àzùŋə̀ ndzùmə̀ Yěsû. 27La Barnabas a lə̀ lòo e ngə̀ ntsirə̀ ngàŋə ntwuumə̀ Yěsû ntiitə̀ ambo pobə tsaʼnə Saul a lə̀ zəənə̀nə a Ndòʼnə̀mbyə̂ a àlàŋə ndwuumə̀, nkɨ nchi ntiitə̀ tsaʼnə a lə̀ chwìitə̀nə ntwuumə̀ ghù ɨ̀shìʼnə̀ aŋunə nɨ̀linə̀ nɨ Yěsû a àlaʼà Dàmaskòsə̀. 28Lenəla, Saul a lə̀ pìʼnə̀ a nɨ yìinə̀ pobə pɨ pobə amwuə Yèrusalèmə̀, nchwìitə̀ ntwuumə̀ Nẅùə̀ aŋunə nɨ̀linə̀ nɨ Ndòʼnə̀mbyə̂. 29A lə̀ shwəŋnə̀ ambo pɨ̀Jew pyə̀ nɨ pɨ lə̀ mənə nshwəŋnə̀ àshwəŋnə̀ Greek, la àtànkə̀ a furə̀ a tɨ̀tɨ̀rə̀ pobə, pobə tyiʼə̀ ntàʼà àlàŋə a nɨ zhwuutə̀ e 30Nkwùə̀ nɨ pɨlyimə a ndzùmə̀ Yěsû Kristù lə̀ zuʼnə ànwùə̀ zèrə zə, pobə lə̀ lòo e nshwuʼə̀ ndèrə̀ a Kàsaryà, ntsàa e a lèrə̀ a Tasùsə̀. 31Lenəla, àporə̀porə̀ a lə̀ kwuunə̀ amwuə àshwatə̀ ɨ̀poonə̀ pɨ Kristù nɨ a lə̀ pənə amwuə àlaʼà Judyà, Galìlyə̂ nɨ Sàmariyà, a tyiʼə̀ nkẅùə̀ ndèrə̀ nɨ mbyə̀ tsaʼnə Àzhwùə̀ Nẅùə̀ a lə̀ ghɨ̀rə̀nə, pobə tyiʼə̀ mbə nɨ àkẅàrə̀ Nẅùə̀.
Àfàʼà Pità amwuə Lidà pobə Jopà
32Pità à lə̀ pə nkarə̀ ɨlyiʼə ɨ̀tsùmə̀, nga mbə nkwùə̀ ɨ̀tse ngə̀ a nɨ karə̀ pànə̀ pɨ Nẅùə̀ nɨ pɨ pənə a Lydda, 33ndzəənə̀ a ŋònə̀ ɨ̀tse nɨ nɨ̀linə̀ ɨ̀tse lə̀ pənə Èneyàsə̀, ɨlaamə mbɨ̀ŋmə̀ ɨ̀pe kwɨkə̀ a pə aŋunə ɨ̀kwùunə aŋunə nguʼu nɨ̀fàamə̂. 34Pità a shwəŋə̀ ambo ze lo, “Èneyàsə̀, Yěsû à parə̀ o, lòo a ɨ̀shyə̂ ntsùŋə̀ ɨ̀kwùunə o.” Tyìʼə̀ nkwùə̀ ghu a lòo a ɨ̀shyə̂. 35Pànə̀ pɨ̀tsùmə̀ nɨ pɨ lə̀ pənə a àlaʼà Lidà pobə Sharònə̀ lə̀ zəənə̀ mbə̀ŋə̀ mɨ̀ntɨŋmə̀ ɨ̀mobə mbyiimə̀ a Ndòʼnə̀mbyə̂.
Pità a zhwuumə̀ a Tàbità aŋunə nɨ̀wɨghə̀
36Àzùŋə̀ ndzùmə̀ Yěsû yètse a lə̀ pə a Jopà pɨ mə nfuŋə̀ e nɨ Tàbità (nɨ̀linə̀ tsɨ̀ghu pənə amwuə àshwəŋnə̀ Greek lo Dorcas). À lə̀ mə ngɨ̀rə̀ mɨ̀nwùə̀ mɨ̀shìʼnə̀ nkɨ mmə ngyèmpə̀ ngàŋə àfumə̀. 37A lə̀ pə amwuə nkwùə̀ ghu, mə̀ngyə̌ ghu à lə̀ kunə̀ a nɨ̀ghòonə̀ nkwɨghə̀, pɨ sùu e ngə̀ nnùŋə̀ amwuə ndâ nɨkaŋə. 38Ka ntyə̌ Lidà ɨ lə̀ sàa e a nɨ ghə̀ a Jopà. Lenəla, ɨ̀zùŋə̀ ndzùmə̀ Yěsû zuʼù lo Pità à ẅùə̀ a Jopà, ntyiʼə̀ ntsàa mbyàŋnə̀ ɨpaa lo pɨ ghə̀ ntiitə̀ e lo a fàʼà ngyìinə̀ ntô ntsirə̀ a ghobə. 39Pità a zùŋə̀ ndòo a ɨ̀shyə̂ nshwuʼə̀ ndèrə̀ pobə pɨ pobə. Nkwùə̀ nɨ à lə̀ pyàanə ghu, pɨ lə̀ lòo e nkoʼò a ndâ nɨkaŋə gha. Pɨ̀kwùə pɨ pə̀ngyə̌ pɨ̀tsùmə̀ lə̀ tô nkamnə̀ e ntyiʼə̀ nnèrə̀ mbuurə̀ ɨtsəʼə ɨ̀tsùmə̀ nɨ Dorcas à lə̀ tânə nkwùə̀ nɨ à lə̀ pirə̀nə pobə pɨ pobə. 40Pità à lə̀ tsàa a ghobə pɨ̀tsùmə̀ a àpyìinə ntyiʼə̀ ntə̂ mɨ̀kẅìʼtə ɨ̀me a ɨ̀shyə̂ nchàʼtə̀ a Nẅùə̀, mbə̀ŋə̀ nnaŋə̀ àkwuə̀ mə̀ngyə̌ wa nshwəŋə̀ lo, “Tàbità, lòo a ɨ̀shyə̂!” A zùŋə̀ nnyaʼkə̀ ɨ̀myə̂ ɨ̀me ndzəənə̀ a Pità, ndòo a ɨ̀shyə̂ nnwuunə̀. 41Pità a lə̀ ẅìimə̀ àpô e mbə̀ʼkə̀ e a lòo a ɨ̀shyə̂, ntyiʼə̀ nfuŋə̀ ngàŋə àpyiimə̀ pobə pɨ̀kwùə pɨ pə̀ngyə̌ pa pɨ̀tsùmə̀, ŋŋâ a Tàbità ambo pobə ghù ntɨ̀ŋnə̀. 42Àlyàʼtə̀ ànwùə̀ zèrə zə a lə̀ sìimə̀ amwuə àlaʼà Jopà àtsùmə̀, pànə̀ pɨ̀noʼnə pyiimə̀ a Ndòʼnə̀mbyə̂. 43Pità à lə̀ tyiʼə̀ ngoŋə̀ a Jopà aŋunə ndùnə̀ mɨ̀njyə̂ mɨ̀tse pobə ŋònə̀ ɨ̀tse nɨ pɨ lə̀ mənə nfuŋə̀ e nɨ Shimùnə̀ nɨ a lə̀ mənə ndòo ngòbə̀ ntsùŋə̀ ɨ̀pwuumə̀ ghu.
Obecnie wybrane:
Ɨ̀fàʼà 9: pny
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Cameroon Association for Bible Translation and Literacy
