Эклц 6
6
Усна аюл
1Һазр деер әмтн тооһарн өсәд, күүкд төрдг болв. 2Бурхна көвүд әмтнәс төрсн күүкдин сәәхнинь үзәд, күн болһн эврәннь седкл туссан шүүҗ, герг кеҗ авдг болв.
3– Мини Сәкүсн күүнд мөңкинд бәәшго, яһад гихлә күн үкнә. Терүнә җирһл 120 җилин кемҗәтә болтха, – гиҗ Деед Эзн келв.
4Бурхна көвүд күүнә күүкд үрдиг эзләд, үрд олддг болв. Тер цагт болн түүнә хөөн теднә үрд һазр деер әвр ик-ик улс бәәҗ, хуучн цагас нернь туурсн баатрмуд бәәҗ.
5Деед Эзн һазр деерк улс йир цалдң хуульч бәәдлтә бәәхинь, теднә седклнь мел хар саната болдгинь үзв. 6Деед Эзн һазр деер кү үүдәсндән харм төрәд һундрхна:
7– Һазр деерәс Эврән үүдәсн улсан тохмарнь уга кенәв – әмтиг, малмудыг, мөлкдгүдиг, теңгрин шовудыг – яһад гихлә, тедниг үүдәсндән Би харм төрҗәнәв, – гиҗ Тер келнә.
8Болв Ноах Деед Эзнә цаһан сананд күртв.
9Ноахин туск келвр эн. Ноах үннч күн билә, эврәннь үйдән һаң уга: тер Бурхнла өөрхн холвата бәәв. 10Ноах һурвн көвүтә билә: Шем, Хам, Япет.
11Һазр деерк улс андрсиг Бурхн үзв, йир күчр болв. 12Һазр деерк цуг улс эврәннь җирһлин хаалһан андрулснас көлтә һазр бузрдсиг Бурхн үзв.
13Тер цагт Бурхн Ноахд иигҗ келнә:
– Би әмтиг уңг-тохмарнь уга кенәв. Яһад гихлә теднәс көлтә һазр деер йир күчр бәәдл тогтҗана. Тедниг Би цуг һазр деер бәәх әмтә-киистә тоотла хамднь уга кенәв. 14Бийдән кипарис модар керм ке. Дотран хорастаһар ке, кермән дотраснь болн һазаһаснь салмд. 15Терүг чи иигҗ кех йостач: керм утдан 300 тоха, өргндән 50 тоха, өндртән 30 тоха болх зөвтә#6:15 Утдан 140 м, өргндән 23 м, өндртән 13,5 м шаху.. 16Эргндән герл орулх нег тоха#6:16 0,5 м шаху. дүңгә орм терүндән һарһ. Кермин хәврһднь үүд һарһ, дора бәәх, дунд бәәх, деер бәәх давхрмуд ке. 17Би теңгр дор бәәх, зүсн-зүүл әмтә-киистә тоотыг уга кехин төлә, һазр деер усна аюл орулнав. Һазр деер бәәсн цуг юмн кевтән үкх. 18Болв Би чамла бооца кенәв, чи кермдән орхич – чи, чини көвүд, чини гергн, көвүдинчн гергд. 19Кермдән эр болн эм әмтә-киитә цуг тоотас хошаһад юм ав, тедн чамла хамдан әмд үлдтхә. 20Әмд үлдхәр чам тал шовудын зүсн болһнас, малмудын зүсн болһнас, һазр деерәһүр мөлкдг юмна зүсн болһнас хошадар ирх. 21Зүсн-зүүл хот-хол хоршаһад, бийдән цуглулад авчк. Терүгәр чи чигн, тедн чигн эдлвр кецхәх.
22Бурхна заавриг Ноах цугинь күцәв.
Obecnie wybrane:
Эклц 6: ХКО_ӘБ
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Институт перевода Библии, 2002-2023
