Mat 7

Yesu abasi bidɔ ni Onemi Lipɔ kububu su

1“Mlakixwa litsi nì ɔnɔ, tɔ Aya kyɛ aʋáxwa litsi nì mlɔ. 2Lɛ ese linu si, Aya aaxwa litsi ni mlɔ kiliɛ gi mlɛxwa litsi nì banima ɛ. Lɛ isãɛ nɛ gi mlɛkɔ ɛxwa litsi nì banima ɛ, lɛ ké aakɔ̀ xwa litsi ni mlɔ fɛ. 3Ege lɛ loso woevu aŋu ní kumlu uliɔ gi kulí ní wonemi ye kimbi ye aʋa xe wɔyurɔ kanyikpea trɔ ní wɔ tutɔ wɔ kimbi ye aʋa na a? 4Lɛ kítɛmɛ wɔɛsi wonemi ye si, ‘Di, kítɔ mibu simlu se ní wɔ kimbi ye aʋa,’ ní lipoe lɛ klɔ mɛ gi kanyikpea katini ní wɔ tutɔ wɔ kimbi ye aʋa na a? 5Wɔ ɔnɔ ɔŋumɛboebitɛ, ti kanyikpea ní wɔ kimbi ye aʋa kɔ wɔɛmɔ mumɔ kɔ wɔtani simlu se kuti ní wonemi ye yɛ kimbie aʋa ɛ.

6“Mlakíyurɔ bidɔ gi bɛsu bidra ɛplɛ akí kudroʋio; tɔ kwíakyi iku mlɔ aʋa a, Mlakíŋwia mlɔ ihwia kpakpa lɛ aplɛ ki iha lɛ, xegi aní te e, iafanya lɛ nì lɛ ikli lɛ.

Yesu abasi bidɔ ni bidɔʋiʋi dɔni Aya kɔ su u

7“Mleʋi bidɔ tɔ biaki mlɔ, mlapɛ bidɔ tɔ mlaamɔ; mlasa opupo lo, tɔ biadra lɔ ɔki mlɔ. 8Lɛ ese linu si, ɔnɔ kakaa gi eeʋi bidɔ ɛ, bizɛki yɛ, lɛ ɔnɔ kakaa gi ɛɛpɛ bidɔ ɛ, aamɔ ʋɛ ɛ, ɔnɔ kakaa gi aasa opupo lo e, biadra lɔ ɔki yɛ. 9Obika woli Yebi aaʋi ye lìklã xe aakɔ̀ likla ɔki yɛ na a? 10Aloo xe eʋi ye lìkpa ɛ, aakɔ̀ ɔgblaga ɔki yɛ na a? 11Lɛ xegi mlɔ gi mlenu banɔ zimizi ba, mlete kiliɛ gi mlaki mlɔ bebi ba bidɔ gbã ɛ; kitɛ xe mlɔ Ɔka yɛ ní lifunu ne ɔ́traki banama gi beʋi ye bidɔ gbã ʋɛ na a.

12“Lɛ loso kiliɛ gi mlɛpɛ si babitɛ akí mlɔ ɛ, mlɔ fɛ mlábitɛ nite aki ba a! Lɛ linu Ɔsã nɔ ese kununu yo ni Aya yɛ beboedoplɛ ba bidɔbasɛbasɛ ʋɛ ɛ.

Kudɔbasɛ ní kevunu pɔpɔa ni kevunu nènea su u

13“Mleti eku gani kevunu pɔpɔa mɛ; lɛ ese linu si kifu monimoni ye me kevunu ya kɔ ɛ, keenè, lɛ ka kudeo aʋa kugaga ɛ, kúma ɛ gagla a; lɛ banama gi batini ní kɔ aʋa ɛ, bɛsrɛ ɛ. 14Pɔ̀ ligbã́ nɛ kevunu ya kɔ ɛ, kɛpɔ; lɛ ka kudeo aʋa kugagaa ɛ, kuli i gagla a, niteme si banɔ sisami atɔ ko bizɛmɔ kɔ.

Aŋuzeze ní asia beboedoplɛ ba su u

15“Mleze ní aŋuplɛplɛ mɛ ní asia na beboedoplɛ ba su, lɛ ese linu si biaba mlɔ klɔ ŋwisi iʋesi kinɛ ní aŋu mɛ. Pɔ̀ ní kimɛ mɛ ɛ, banyraga ɔtutɔ benu u. 16Mlatè ba gani ba kiboebitɛɛ mɛ. Ɔdɔ̃ nɔ liho le liʋíyo wain yɛ ɛ, nite ke fife e oʋí yo esebi ŋaŋa a. 17Lɛ loso e ose gbã izeyo esebi gbã, pɔ̀ ose nyani nyani izeyo esebi nyani nyani. 18Lɛ ose gbã ɔ́tratani esebi nyani nyani kuyo, nite ke ose nyani nyani ɔ́tratani esebi gbã kuyo o. 19Lɛ ose kakaa gi óʋiyo esebi gbã ɛ, biatsa lɔ kukɔ ŋwia kpɛ́ ní kifu mɛ. 20Nite si mlaate ba gani ba kiboebitɛɛ mɛ ɛ.

Litsixwawe le su bidɔ basɛbasɛ

21“Aní ɔnɔ kakaa gi ɛɛxwa mɛ si, ‘Ɔka, Ɔka’ ɛ, yɛ aati uku ní lifunu ne Kaʋaŋaa mɛ ɛ, pɔ̀ banama gi bɛɛbitɛ ní mɛ Ɔka yɛ ní lifunu ne yɛ kupɛpɛɔ aʋa ɛ, ba ko biati uku. 22Ní litsixwawe le aʋa ɛ, banɔ glegle biaŋwlɛ isu ya litukpo si, ‘Ɔka, Ɔka! Wɔ línyi ne me kwipani wɔ Liboe le e, lɛ wɔ linyi ne me kwikpikpini ifuɛfuɛ zimizi glegle e dono o, lɛ wɔ linyi ne me kwibitɛ enugutseboe glegle la!’ 23Nite si maasi ba wee si, “Méte mlo liwewe e, Mlasɛ ní mɛ su, mlɔ banɔ dovo ba!”

Bagbawa tiaʋa ba a

24“Lɛ loso e, ɔnɔ kakaa gi izeenu mɛ eboe la xe izɛɛbitɛ ní la aʋa ɛ, ɔlɛ ko ŋwisi oboete, gi awa yɛ ligba lɛ ní liklakpɔ aʋa kinɛ ɛ. 25Lɛ gi dzeni ye adɔ, xe inipe le iyi igbigba a, xe liwɔ gagla lɛ lifu ihali ligba lɛ ɛ, líkpa a, lɛ ese linu si bɛwa lɛ ɛtrɔ ní liklakpɔ aʋa a.

26“Pɔ̀ ɛ, ɔnɔ kakaa gi izeenu mɛ eboe la xe ɔ́ʋibitɛ ní la aʋa ɛ, asrɔ ni ɔga gi awa yɛ ligba lɛ atrɔ ní siklami se aʋa ɛ. 27Lɛ gi dzeni ye adɔ xe inipe le iyi i igbigba a, xe liwɔ gagla lɛ lifu i ihali ligba lɛ ɛ, liki si ligba ɛlɛ klɔ ʋa likpa gbloo.”

Yesu abasi bidɔ ni kigagla a

28Agi Yesu agu yɛ eboe la ɛ, anɔkpi la inugu itse ní yɛ kudɔbasɛ yɔ su u. 29Lɛ ese linu si abasi ba bidɔ ŋwisi ɔniliɛ gi kigagla kilí yɛ awla kinɛ ɛ, aní ŋwisi ba Ɔsã nɔ badɔbasɛ ba kiniɛ ɛ.

Obecnie wybrane:

Mat 7: avn

Podkreślenie

Udostępnij

Kopiuj