Гелип чыкыш 12
12
12‑нҗи бап
Реб Ыбрамы сайлаяр
1Реб Ыбрама шейле дийди: «Өз юрдуңы, ковумдашларыңы ве атаңың хоҗалыгыны ташла-да, Мениң саңа гөркезҗек үлкәме гит.
2Сенден бейик миллет ярадып,
Мен сени ялкарын,
адыңы арша гөтерерин,
башгалар сен аркалы ялканарлар
бири-бирлерине пата берерлер.
3Сени ялканы ялкарын,
сени нәлетләни-де нәлетләрин;
Ер йүзүндәки әхли миллетлер
сен аркалы пата аларлар».
4Ыбрам Реббиң айдышы ялы ёла дүшди. Лут хем онуң билен биле гитди. Харандан чыкып гайданда, Ыбрам етмиш бәш яшындады. 5Ол аялы Серайы, доганының оглы Луты хем-де Харандакы әхли мал-мүлкүни ве гулларыны алып, Кенган юрдуна тарап ёла дүшди. Олар Кенгана гелдилер. 6Ыбрам Кенганың ичи билен Шекемиң голайындакы Моредәки дуб агаҗына ченли гитди. Ол дөвүрлерде кенганлар шол ерде яшаярдылар.
7Реб Ыбрама гөрнүп: «Мен шу юрды сениң неслиңе берҗек» дийди. Ыбрам ол ерде өзүне гөрнен Реббе гурбанлык сыпасыны ясады. 8Соңра ол ерден Бейтелиң гүндогарындакы даглыга тарап гитди. Ол гүнбатардакы Бейтел ве гүндогардакы Ай галаларының арасында өз чадырыны дикди. Ыбрам ол ерде Реббе гурбанлык сыпасыны ясап, Реббе ыбадат этди. 9Соңра ол бир ерден башга ере гөчүп-гонуп, гүнорта тарап ёлуны довам этдирди.
Ыбрам билен Серай Мүсүрде
10Кенганда газаплы ачлык башланды. Шоңа гөрә, ачлык гутарянча, Ыбрам вагтлайын Мүсүре гитди. 11Олар Мүсүре голайланларында, Ыбрам аялы Серая: «Мен сениң җуда овадан аялдыгыңы билйәрин. 12Мүсүрлилер сени гөрүп: „Бу онуң аялы“ диерлер; онсоң олар мени өлдүрерлер, сени болса дири галдырарлар. 13Оларың сен үчин маңа ягшылык эдерлери ве сениң үстүң билен мениң җанымың халас болары ялы, сен олара: „Мен онуң аял доганы“ дий» дийди.
14Ыбрам Мүсүре геленде, мүсүрлилер Серайың җуда овадандыгыны гөрдүлер. 15Серайы гөрен фараоның көшк эмелдарлары фараона Серайың гөзеллигини тарыпладылар. Хатын көшге әкидилди. 16Серайың хатырасына фараон Ыбрама ягшылык этди. Ол Ыбрама доварлар, өкүзлер, эшеклер, гул-гырнаклар ве дүелер берди. 17Реб Ыбрамың аялы Серай себәпли фараон ве онуң көшгүндәки адамлара элхенч кеселлер билен эҗир чекдирди. 18Шонда фараон Ыбрамы янына чагырып: «Мени нә гүнлере салдың?! Серайың өз аялыңдыгыны нәме үчин маңа айтмадың? 19Нәме үчин сен „Ол мениң аял доганым“ дийдиң? Мен Серайы өзүме аяллыга алдым-а! Ине, сениң аялың, оны ал-да, гүмүңи чек!» дийди. 20Фараон Ыбрам барада өз адамларына буйрук берди. Олар Ыбрамы аялыдыр бар эмләги билен Мүсүрден өз ёлуна угратдылар.
Obecnie wybrane:
Гелип чыкыш 12: TukCyr16
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Мукаддес Китап Терҗиме Институты, 2016
