Éxodo 10
10
Mbaesusere tuku reta rewa
1Jaɨkue rupi Tumpa jei Moisés pe: “Ekua ye mburuwicha wasu jowai, echa’ä amɨtäta ye chuwi ipɨa jare imborɨa umbɨarakuaa wae reta ipɨa chuwi wi. Echa’ä aipota aikuaaka chupe reta chembaepuere mbaembae kɨyete pewa ayapo aï wae rupi,” jei chupe. 2“Jare pe reta pemiärita pesambiaɨ reta pe jare perumɨmino reta pe kërái aiporaraka ɨwɨ Egipto pewa reta pe. Jare pemiärita wi chupe reta mbaembae kɨyete pewa joko pe ayapo wae rewa. Jukuärái pikuaata che ko jae Tumpa aikoño mái wae,” jei Tumpa Moisés pe.
3Jayawe Moisés jare Aarón yuraa reta mburuwicha wasu jowai, jare jei reta chupe: “Ore hebreo reta nduiko wae, oreTumpa ikoño mái wae jei ndewe kuärái: “¿Marái ramo ndipota’ä ñeño niñemɨmichi cherowai? Emaeño aiparawo wae reta re oë yuraa cheree umbutuicha reta waerä. 4Erëi ndipota’ä ñeño yawe, kuriye woi ambouta tuku reta ndeɨwɨ pe. 5Uyekuaata’ä ɨwɨ, echa’ä jetaete yeta ko tuku reta jese ramo. Tenonde jokua amandau opa seri urükumewa ndeɨwɨ wi opaete temitɨ reta. Erëi tuku reta opata jou opaete temitɨ reta amandau wi jembɨre wae. Jouta wi opaete ɨwɨra reta jokɨ ye ramo ñonoï wae. 6Tuku reta opata tɨnee nerëta reta japɨpe rupi, jare nemborɨa nembɨarakuaa wae reta jëta japɨpe rupi, jare jae nunga wi opaete ɨwɨ Egipto pewa reta jëta japɨpe rupi. Nderamɨkue reta uecha mbaei kua nunga mbaesusere tuku pewa uyembɨpɨ wiwe ɨwɨ Egipto añawe rewa.’ Jukuärái jei oreTumpa ndewe,” jei Moisés mburuwicha wasu pe.
Jare opa uyemɨngeta yawe, Moisés oë oo ye mburuwicha wasu jowai wi. 7Jare jupiwoiño mburuwicha wasu imborɨa umbɨarakuaa wae reta yuweru mburuwicha wasu jowai, jare jei reta chupe: “¿Kërái yawe rewa ra nemaeñota jokua kuimbae re imeño yanderukuasɨ oï waerä?” jei reta. “Emaeño mii Israel iñemoñaa reta re oë yuraa iTumpa jee umbutuicha reta waerä. ¿Nde ndikuaa’ä yerá neï opa ma ikumewa yandeɨwɨ Egipto wae?” jei reta chupe.
8Jayawe mburuwicha wasu uenika yewɨ Moisés jare Aarón, jare jei chupe reta: “Jaekawi. Pekua pembutuicha peTumpa jee. Erëi pere chewe rani kía nunga reta etei yuraata ñonoï wae,” jei chupe reta.
9Moisés jei chupe: “Opaetei ko ndoota. Kunumi reta wiwe jare indechi wae retawe, jare opaete kuimbae reta jare kuña reta yuraata. Opaete orerɨmba retawe nduraata wi ore ndiwe. Opaete ore nduyapota ko yemɨmandúa tembiu pewa oreTumpa jee numbutuicha waerä,” jei Moisés chupe.
10Jayawe mburuwicha wasu pochɨ rewe jei Moisés pe: “¡PeTumpawe ndarau ipuere pemborɨ peraa waerä kua wi pekuña reta jare pesambiaɨ reta, echa’ä amaeñota’ä etei aï peré peraa reta waerä! ¡Añawe aikuaa pe reta pipota ko chembɨtawɨ piko wae!” jei chupe. 11“¡Kuña reta jare sambiaɨ reta ndarau etei yuraa! Kuimbae retaño ipuere oë yuraa peTumpa jee umbutuicha reta waerä, echa’ä jukuärái piyerure chewe tenonde yawe,” jei mburuwicha wasu Moisés pe. Joko wi mburuwicha wasu onoeka jëta wi Moisés jare Aarón.
12Jaɨkue rupi Tumpa jei Moisés pe: “Eupi ndepo ɨwɨ Egipto kotɨ, jare jupiwoiño outa tuku reta ɨwɨ Egipto pe. Tuku reta opata jou opaetei temitɨ jembɨre wae amandau wi,” jei chupe.
13Jare Moisés upi ipopoka yawe ɨwɨ Egipto kotɨ, Tumpa uipeyuka warasɨ oë wae kotɨ wi ɨwɨtu pe opaete ɨwɨ Egipto rupi. Ɨwɨtu uipeyu upɨta mbae opaete jokua ara jare jokua pɨ̈tu wi. Pɨarewe ndimboweasɨ, jokua ɨwɨtu ueru tuku reta. 14Jetaete ye ye tuku reta yuweru jare opa umbɨyasoi opaete ɨwɨ Egipto rupi tatäti rami. Jokua nunga mbaesusere tuku pewa uyeyapo mbaei ɨwɨ Egipto pe uyembɨpɨ wiwe wae ko, jare añawe wiwe ndaraúi ma uyeyapo ye. 15Jayawe uyekuaa’ä ye ɨwɨ jeta ye ye tuku reta iko jese ramo. Opa jou reta wi opaetei temitɨ reta jare ɨwɨra ía reta amandau wi jembɨre wae. Jáeramo opaetei ɨwɨ Egipto rupi upɨta’ä mbae awe jowɨ wae ɨwɨra re jare ɨwɨ re.
16Jayawe mburuwicha wasu jawoi pewa uenika yewɨ Moisés jare Aarón, jare jei chupe reta: “Ayawɨ ma peTumpa kotɨ jare pekotɨ wi. 17Pëti wese ye awɨye pemandúa mii chewe kachi ayapo wae, jare piyerure mii cheré peTumpa ikoño mái wae pe umbɨsɨrɨ waerä chewi kua mbaesusere mano pewa,” jei mburuwicha wasu chupe reta.
18Jayawe Moisés oë oo mburuwicha wasu jowai wi jare uyerure jese Tumpa pe. 19Jáeramo Tumpa umɨñatimaka ye ɨwɨtu täta rupi uyepeyu wae warasɨ uike wae kotɨ wi, jare jokua ɨwɨtu opa ye wɨraa tuku reta Mar Pɨ̈ta jee wae kotɨ.
20Erëitu Tumpa umɨtäta yewɨ mburuwicha wasu ipɨa chuwi. Jáeramo mburuwicha wasu umaeño’ä Israel iñemoñaa reta re oë yuraa waerä.
Mbaesusere pɨ̈tumimbi rewa
21Jayawe Tumpa jei Moisés pe: “Eupi ndepo ara kotɨ, jare uyeyapota pɨ̈tumimbiete ye opaete ɨwɨ Egipto rupi,” jei chupe. 22Jayawe Moisés upi ipo ara kotɨ yawe, uyeyapo opaete ɨwɨ Egipto rupi pɨ̈tumimbi kɨyete pewa mbapɨ ara jare mbapɨ pɨ̈tu rupi. 23Jokua mbapɨ ara jare mbapɨ pɨ̈tu rupi kiawe ɨwɨ Egipto pewa reta uyecha’ä etei jare oë'ä etei reta jëta wi. Erëi Israel iñemoñaa reta ñonoï wae rupi jekuaeño ime iko tembipe tenonde rami.
24Jayawe mburuwicha wasu uenika Moisés jare jei chupe: “Pekua pembutuicha peTumpa jee. Peraa wi pekuña reta jare pesambiaɨ reta. Erëi perɨmba reta tupɨtaño,” jei chupe.
25Jayawe Moisés jei chupe: “Ndarau orepuere ndueya reta,” jei. “Nemaeñota ko oreré nduraa waerä orerɨmba reta wi nduyuka numee waerä oreTumpa ikoño mái wae pe. 26Nduraata ko opaetei orerɨmba reta. Pëti awe ndarau upɨta, echa’ä nduiparawota ko kuri orerɨmba reta ipɨte wi nduyuka numee waerä oreTumpa pe. Jare nduikuaa’ä noï mbae nunga mbaemɨmba reta etei ra oreTumpa uipotata numee chupe waerä ndoo nuwäe ɨwɨtini wasu pe rewa,” jei Moisés mburuwicha wasu pe.
27Erëi Tumpa umɨtäta yewɨ mburuwicha wasu ipɨa chuwi. Jáeramo mburuwicha wasu umaeño’ä jese reta oë yuraa waerä. 28Jare pochɨ rewe jei Moisés pe: “¡Ekua ye chewi kua wi! ¡Aipota’ä ye ma aecha nderowa! ¡Iyandareko ndiyé, echa’ä ndeyu ye yawe cherowai, che nduyukakata aï kuri!” jei chupe.
29Jáeramo Moisés jei mburuwicha wasu pe: “Jaekawi ndere jukuärái. Ndarau ye ma ayu nderowai,” jei chupe.
Obecnie wybrane:
Éxodo 10: gnwPB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Ethnos360 (New Tribes Mission). All rights reserved.
