Amainhama 8
8
Omwidhuzo gw'amaadhi gulekera
1Katonda yaidhukira Noa, era n'ensolo edh'omu nsiko, n'edho enfuge dhe yali nadho mu lyato. Katonda yaasindika empewo yaafuuwa ku nsi, amaadhi gaakendeera. 2Enhindo edh'amaadhi ghansi mu itaka dhaasembwa, n'ebituli eby'amaadhi ku igulu byaigalwa. Amaadhi gaalekera okugwa okuva ku igulu 3amaadhi gaatoolera mpolampola okuva ku nsi. Oluvainhuma olw'enaku ekikumi n'ataanu (150), amaadhi gaakendeera, 4era ku lunaku olweikumi n'omusanvu mu mwezi ogwomusanvu, eryato lyatyama ku nsozi edh'e Ararati. 5Amaadhi geeyongera okukendeera, era ku lunaku olusooka mu mwezi ogweikumi, emitwe egy'ensozi gyaboneka.
6Nga ghabiseegho enaku makumi ana, Noa yaigula eidinisa ku lyato lye yakola, 7yaasindika eikoova ku luya. Eikoova lino lyaja nga ligulukira ghano ni ghale, lyaloba kwira, okutuusa amaadhi lwe gaakamuka ni gakala ku nsi. 8Agho yaasindika eighemba okubona oba nga amaadhi gakendeire ku nsi. 9Aye olw'okuba ng'amaadhi gaali gaidhwire woonawoona ku itaka, eighemba tiryafuna gha kugwa. Agho lyairayo ku lyato, Noa yaafulumya omukono yaaligema, yaalingiza munda. 10Yaateega enaku musanvu dhaabitagho, kabiri yasindika eighemba ku luya. 11Eighemba eryo lyaira y'ali eigulo nga liri n'eikaba eibisi ery'oku muti omwoliva. Agho Noa yaamanha ng'amaadhi gaali gakendeire. 12Kabiri yaateega enaku musanvu edhindi dhaabitagho, era yaasindika kabiri eighemba ku luya aye ku mukuzi guno tiryaira y'ali kabiri.
13Mu mwaka ogwolukaaga n'omulala (601) ogw'obulamu bwa Noa, mu mwezi ogusooka, ku lunaku olusooka omwezi ogwo, amaadhi gaakamuka ku nsi. Noa yaaghembula ghaigulu ku lyato, yaalinga ku luya, yaabona nga ku itaka kukalu. 14Mu mwezi ogwokubiri, ku lunaku olwabiri n'omusanvu olw'omwezi ogwo, ensi yaakala bukalamu.
15Agho Katonda yaakoba Noa ati: 16“Fuluma mu lyato iwe ni mukazi wo, ni batabane bo, era ni bakazi baibwe. 17Ja na buli kintu ekiramu ekiri n'omubiri ekiri n'iwe: enhonhi, ensolo n'ebyeghaluliza ku itaka, bisobole okuzaalagana, byale, era bibune ensi.” 18Kale Noa yaafuluma mu lyato ni mukazi we, ni batabane be, era ni baka batabane be. 19Ensolo, n'ebyo ebyeghaluliza ku itaka, n'enhonhi, na buli kintu ekitambula ku nsi, byonabyona byafuluma mu lyato mu bika byabyo.
Noa aghaayo omusengo
20Agho Noa yaazimbira Musengwa Katonda alutaari, era yatoola ku buli nsolo nongoofu, ni ku buli nhonhi nongoofu, yaaghaayo ebigheebwayo ebyokebwa ebiromba ku alutaari. 21Musengwa Katonda yaawunhiza akawoowo, yaasangaala, yaakoba mule ati: “Tikairayo kukolima nsi kabiri olw'omuntu by'akola, kuba omwoyo gwe gwidhwire bubi bwereere okuva mu buto bwe. Tikairayo kabiri kuzikiriza bintu biramu byonabyona nga bwe nkoze. 22Ensi ng'ekaaligho: okusiga n'okukungula, obwinhogovu n'olwota, ebiseera eby'endoboozi n'eby'ekiinhogogo, omusana n'obwire, ebyo byonabyona tibija kuwaagho.”
Obecnie wybrane:
Amainhama 8: Sog
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Baibuli Ekibono kya Katonda © The Bible Society of Uganda, 2014
