Mwanduso 13
13
Abulamu na Lutu woigola
1Abulamu kabwela kulawa Misili kengila ubanzi wa Negebu. Kakala na muke wake na vinhu vake vose hamwe na Lutu. 2Abulamu kakala tajili ng'hani. Kakala na fugo na hela na zahabu. 3Kagendelela kugenda kulawa hanhu ha Negebu mbaka Beseli, kafika hanhu hoyakalile kasimika hema baho haichanduso hagati ya Beseli na Ayi, 4hanhu hoyakalile yazengile lupango. Baho Abulamu kamtambikila Mndewa Mulungu.
5Iviya Lutu yoyagendile na Abulamu, kakala na ng'ombe na ng'hondolo na mahema. 6Isi haiwafaiye wose waidi kukala hamwe kwaviya wakala na fugo nyingi. 7Kwa ivo kulawilila ndwagi hagati ya wadimaji wanyama wa Abulamu na wadimaji wa Lutu. Chipindi icho Wakanaani na Wapelizi wakala wokala muna iisi ija.
8Maabaho Abulamu kamulongela Lutu, “Cheye cha ndugu, sekechigombe, hebu wadimaji wako sekewagombe na wadimaji wangu. 9Lola isi ino yose haulongozi wako, chiigole. Uhahita ukumoso niye nizahita ukulume, hebu uhahita ukulume niye nizahita ukumoso.”
10Lutu kenula meso yake na kadiwona bawe da lwanda lwa Yoludani, kawona dina mazi ya kufaya chila hanhu, fana viya mgunda wa Mndewa Mulungu na iviya fana isi ya Misili ubanzi wa Soali. Mndewa Mulungu kakala hanayananga mabululu ya Sodoma na Gomola. 11Kwa ivo Lutu kasagula bawe jose da lwanda lwa Yoludani, na kahita ubanzi wa ulawilo wa zua. Ivo waigola. 12Abulamu kakala muna iisi ya Kanaani, mbali Lutu kakala muna yamabululu yaja ya dibawe na kahamila Sodoma. 13Wanhu wa Sodoma wakala weha na wamuhasanya Mndewa Mulungu.
Abulamu kohamila Hebuloni
14Abulamu viyakomeleze kwiigola na Lutu, Mndewa Mulungu kamulongela, “Inula chihanga chako ulole banzi zose. 15Isi ino yose yowiiwona, nizakwing'ha weye na welesi wako siku zose. 16Welesi wako wizakuwa fana msanga, habule munhu yondayadahe kuupeta. 17Lelo hita na ukaizunguluke isi ija, kwaviya nizakwing'ha.” 18Ivo Abulamu kahamiza hema jake, kahita kukala habehi na mibiki mikulu ya Mamule kuja Hebuloni, na uko kamzengela lupango Mndewa Mulungu.
Obecnie wybrane:
Mwanduso 13: Ching'hwele
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
NT © 2014 Pioneer Bible Translators and The Word for the World
OT © 2019 Pioneer Bible Translators
