First published in Fraser script in 1938. 

ꓮ ꓘꓪꓲ ꓧꓰ ꓖꓴ ꓡꓰ ꓐꓪꓲ ꓠꓲ ꓕꓥ ꓬꓥ ꓖꓶ ꓗ˗ꓑꓰ˗ꓣ˗ꓠꓴꓟ ꓒꓬꓥ ꓪꓥ ꓡꓳ ꓡꓪꓲ꓾ ꓧꓮꓴ ꓬꓴꓟ ꓟ ꓬꓥ ꓠꓲ ꓰ ꓡꓰ ꓪꓳ ꓖꓬꓳ ꓐꓴꓟ ꓗꓳ ꓰ꓿ ꓧꓮꓴ ꓟꓴ ꓐꓬꓴ ꓟꓬꓳ ꓟꓬꓳ ꓜꓴꓑ ꓟꓶꓥ ꓠꓲ ꓡꓪꓲ꓾ ꓘꓴꓟ ꓓꓳꓥ ꓟ ꓡꓥ ꓬꓥ ꓟꓳ ꓟ ꓔꓴ ꓪꓥ ꓣ ꓙꓥ ꓮ ꓙꓳ ꓫꓳ ꓟꓴ ꓠꓲ ꓮ ꓗꓳ꓿ ꓬꓥ ꓖꓶ ꓧꓮꓴ ꓓꓥ ꓠꓬꓳ ꓟꓳ ꓫꓲꓔ ꓠꓲ ꓰ꓿ ꓧꓮꓴ ꓘꓴꓠ ꓖꓴꓥ ꓙꓴꓟ ꓫꓲ ꓰ ꓐꓬꓴ ꓣ ꓬꓴ ꓡꓰ ꓐꓬꓴ ꓟꓲ ꓬꓴ ꓬꓥ ꓚꓥ ꓫꓴꓔ ꓪꓼ ꓡꓰ ꓗꓳ ꓰ꓿ ꓐꓬꓴ ꓡꓴꓟ ꓐꓲꓥ ꓡꓪꓲ ꓧꓮꓴ ꓬꓴ ꓡꓰ ꓬꓥ ꓚꓥ ꓫꓴꓔ ꓮ ꓪꓳ ꓡꓳ ꓧꓥ ꓙꓥ꓾ ꓬꓥ ꓟꓳ ꓖꓶ ꓧꓮꓴ ꓬꓴꓟ ꓘꓴꓥ ꓡꓑ ꓕꓳꓥ ꓡꓪꓲ꓾ ꓖꓴꓥ ꓙꓴꓟ ꓫꓲ ꓢꓴ ꓡꓰ ꓬꓥ ꓰ ꓬꓴꓑ ꓙꓳ ꓪꓳ ꓰ ꓣ ꓧ ꓘꓬꓳ ꓗꓔ ꓗꓳ ꓰ꓿ ꓬꓰ˗ꓢꓴ ꓖꓶ ꓬꓥ ꓟꓳ ꓰ ꓡꓴꓟ ꓰ ꓲ ꓟꓲꓔ ꓡꓰ ꓟꓬꓥ ꓙꓥ꓾ ꓥ ꓜꓳ ꓰ꓾ ꓠꓥ ꓰ ꓬꓴ ꓐꓗ ꓘꓬꓴꓔ ꓑꓬꓟ ꓐꓲ ꓐꓰ꓾ ꓖ ꓡꓪꓲ꓾ ꓖꓴꓥ ꓙꓴꓟ ꓫꓲ ꓢꓴ ꓡꓰ ꓔꓮꓲ ꓰ꓿ ꓧꓮꓴ ꓟ ꓟꓮꓴ ꓢꓮꓴ ꓗ ꓢ ꓣ ꓣ ꓪꓟ ꓜꓴꓥ ꓔꓳ ꓮ ꓗꓳ꓿ ꓧꓮꓴ ꓐꓥ ꓖꓶ꓾ ꓫꓲ ꓬꓴ ꓖꓶ ꓧꓮꓲ ꓟꓴꓺ ꓲ ꓢꓴ ꓖ ꓔꓮꓲ ꓡꓰ ꓡꓲ꓾ ꓬꓥ ꓖꓶ ꓡꓴ ꓟꓴ ꓓꓥ ꓔꓮꓲ ꓥꓴꓔ ꓡꓰ꓿ ꓗ˗ꓣꓮꓲ ꓗ˗ꓢꓥ ꓜ ꓮ ꓥꓴꓔ ꓡꓰ ꓖꓶ ꓬꓴ ꓐꓗ ꓪꓳ ꓘꓬꓴꓔ ꓑꓬꓟ ꓐꓲ ꓰ ꓖꓶ ꓳ ꓪꓼ ꓥꓴꓔ ꓔꓳ ꓡꓰ ꓡꓴ꓾ ꓖ ꓡꓪꓲ꓾ ꓬꓥ ꓟꓳ ꓬꓴꓟ ꓢꓶꓥ ꓲ ꓟꓲꓔ ꓘꓮꓴ ꓟ ꓟꓲꓔ ꓔꓳ ꓮ ꓗꓳ꓿ ꓬꓥ ꓟꓳ ꓖꓶ ꓬꓴꓟ ꓢꓶꓥ ꓴꓥ ꓘꓮꓴ ꓧꓮꓴ ꓢꓴ ꓖ ꓟꓲꓔ ꓰ ꓡꓰ ꓬꓰ˗ꓢꓴ ꓢꓰ ꓡꓪꓲ꓾ ꓬꓥ ꓖꓶ ꓬꓥ ꓟꓳ ꓡꓰ꓾ ꓠꓴꓥ ꓟꓳ ꓧꓮꓲ ꓟꓴ ꓡꓪꓲ ꓧꓮꓴ ꓢꓴ ꓖ ꓟꓲꓔ ꓔꓳ ꓮ ꓗꓳ ꓡꓴ꓾ ꓧꓮꓴ ꓖꓴꓥ ꓙꓴꓟ ꓫꓲ ꓢꓴ ꓡꓰ꓾ ꓠꓥ ꓰ ꓬꓴ ꓐꓗ ꓘꓬꓴꓔ ꓑꓬꓟ ꓐꓲ ꓐꓰ꓾ ꓮ ꓥꓴꓔ ꓙꓥ꓾ ꓔꓳ ꓮ꓾ ꓠꓥ ꓰ ꓬꓴꓑ ꓙꓳ ꓪꓳ ꓬꓴ ꓡꓪꓲ꓾ ꓡꓟ ꓡꓳ ꓮ꓾ ꓲ ꓢꓴ ꓥꓴ ꓰ ꓓꓥ ꓔꓮꓲ ꓖꓶ꓾ ꓘ ꓡꓴꓟ ꓔꓮꓲ ꓡꓰ ꓙꓰ ꓡꓪꓲ ꓣ ꓡꓴ꓿ ꓥꓴꓔ ꓗꓳ ꓡꓥ ꓐꓬꓴ˗ꓬꓥ˗ꓜꓳ ꓖꓶ ꓟꓲ ꓓꓟ ꓕꓳ ꓟ ꓬꓴ ꓐꓗ ꓘꓬꓴꓔ ꓑꓬꓟ ꓐꓲ ꓣ ꓮ ꓘꓥ ꓪꓳ ꓰ ꓡꓰ ꓠꓴꓥ ꓟꓳ ꓢꓰ ꓠꓲ ꓣ ꓟ ꓔꓴ꓾ ꓬꓥ ꓖꓶ ꓧꓮꓴ ꓖꓴꓥ ꓙꓴꓟ ꓫꓲ ꓢꓴ ꓡꓰ꓾ ꓥꓳ ꓖꓶ ꓠꓥ ꓡꓰ ꓔꓮꓲ ꓗꓬꓳ ꓡꓰ꓾ ꓔꓳ ꓮ꓾ ꓠꓥ ꓰ ꓬꓴꓑ ꓙꓳ ꓪꓳ ꓬꓴ ꓡꓪꓲ ꓠꓥ ꓰ ꓬꓴꓟ ꓒꓬꓥ ꓡꓳꓹ ꓮ꓾ ꓖ ꓡꓪꓲ꓾ ꓔꓮꓲ ꓐꓲ ꓰ꓿ ꓧꓮꓴ ꓘꓴꓠ ꓙꓥ ꓬꓥ ꓔꓳ ꓡꓪꓲ꓾ ꓬꓥ ꓬꓴꓑ ꓙꓳ ꓪꓳ ꓡꓰ ꓬꓴ ꓡꓪꓲ꓾ ꓡꓴꓥ ꓡꓥ ꓐꓥ ꓰ ꓧꓶ ꓟ ꓕꓳ ꓡꓳ ꓐꓰ꓾ ꓧꓮꓴ ꓟꓴ ꓡꓪꓲ ꓡꓴꓥ ꓡꓥ ꓐꓥ ꓟꓮꓴ ꓧ ꓠꓲ ꓐꓴꓟ ꓡꓪꓲ꓾ ꓗ˗ꓣꓮꓲ ꓗ˗ꓢꓥ ꓡꓰ ꓘꓬ ꓳꓠ ꓴ ꓚꓥ꓾ ꓥ ꓟꓳ ꓖꓶ ꓧꓮꓴ ꓢꓴ ꓓꓴꓔ ꓰ ꓡꓰ ꓘ ꓠꓟ ꓡꓰ ꓮ ꓟꓬꓥ ꓪꓴ꓾ ꓖ ꓮ ꓗꓳ꓿

ꓬꓥ ꓖꓶ ꓧꓮꓴ ꓠꓳꓥ ꓬꓟ ꓒꓬꓥ ꓓꓴꓟ ꓕꓳ ꓰ ꓰ꓾ ꓫꓶʼꓪ ꓐꓬꓴ ꓖꓶ ꓬꓥ ꓚꓥ ꓫꓴꓔ ꓙꓰ ꓡꓰ ꓐꓴꓟ ꓡꓪꓲ꓾ ꓬꓥ ꓟꓳ ꓡꓰ ꓠꓬꓳ ꓟꓳ ꓐꓲ ꓐꓰ꓿ ꓧꓮꓴ ꓟꓮꓲ ꓡꓟ ꓡꓳ ꓡꓮꓲ ꓡꓰ꓾ ꓮ˗ꓡ˗ꓒꓰ ꓬꓥ ꓜꓳ ꓡꓰ˗ꓪꓲ꓾ ꓗꓥ ꓘꓬꓪꓲ ꓜꓴꓟ ꓟ ꓜꓴꓥ ꓔꓳ ꓰ ꓡꓰ ꓬꓥ ꓟꓬꓥ ꓡꓪꓲ꓾ ꓧꓮꓴ ꓬꓴ ꓡꓰ꓾ ꓥ ꓚꓥ ꓛꓥ ꓡꓰ ꓮ꓾ ꓖ ꓡꓪꓲ꓾ ꓧꓮꓴ ꓙꓥ꓾ ꓧꓮꓴ ꓬꓴ ꓔꓳꓸ ꓡꓪꓲ꓾ ꓬꓥ ꓕꓥ ꓛꓮ ꓐꓰ꓿ ꓧꓮꓴ ꓕꓥ ꓡꓰ ꓬꓥ ꓖꓶ ꓧꓮꓴ ꓬꓴ ꓬꓴꓟ ꓟ ꓜꓥ ꓜꓳ ꓜꓴꓥ ꓠꓲ ꓣ꓾ ꓗꓥ ꓘꓬꓪꓲ ꓐꓥ ꓰ ꓬꓴ ꓐꓗ ꓪꓳ ꓰ ꓐꓥ ꓰ ꓬꓰ˗ꓢꓴ ꓰ ꓬꓥ ꓡ ꓖꓬꓳ ꓪꓲ ꓣ ꓧ ꓜꓴꓥ ꓔꓳ ꓮ ꓗꓳ꓾ ꓘ ꓢꓴ ꓟꓴ ꓖ ꓡꓰ ꓲ ꓢꓴ ꓐꓬꓴ ꓟꓬꓳ ꓟꓬꓳ ꓥꓴꓔ ꓡꓰ ꓟꓴ ꓬꓥ ꓟꓳ ꓬꓥ ꓕꓥ ꓛꓥ ꓮ ꓗꓳ꓿ ꓬꓥ ꓬꓴ ꓐꓗ ꓪꓳ ꓐꓥ ꓰ ꓗꓥ ꓘꓬꓪꓲ ꓐꓥ ꓰ ꓣ ꓧ ꓜꓥ ꓜꓳ ꓠꓲ ꓰ ꓡꓰ ꓒ˗ꓣꓲ˗ꓫꓰ ꓑꓰ ꓰ ꓟꓮꓴ ꓢꓮꓴ ꓗ ꓢ ꓣ ꓑꓰ ꓟꓬꓥ ꓙꓥ꓾ ꓗꓥ ꓘꓬꓪꓲ ꓐꓥ ꓰ ꓬꓴ ꓐꓗ ꓪꓳ ꓐꓥ ꓰ ꓬꓥ ꓖꓶ ꓜꓥ ꓑꓳꓥ ꓜꓳ ꓣ ꓠꓴꓥ ꓡꓲ꓾ ꓖ ꓡꓪꓲ꓾ ꓬꓥ ꓰ ꓡ ꓖꓬꓳ ꓪꓲ ꓡꓰ ꓔꓮꓲ ꓡꓴꓟ ꓠꓲ ꓮ ꓗꓳ꓿ ꓬꓰ˗ꓢꓴ ꓖꓶ꓾ ꓧꓮꓴ ꓘꓬꓳ ꓡꓰ ꓪꓳ ꓖꓬꓳ ꓙꓥ꓾ ꓪꓴꓟ ꓐꓳ ꓐꓥ ꓖꓶ ꓛꓶ ꓢ ꓣ ꓮ ꓳ ꓗꓳ꓾ ꓠꓳ ꓐꓥ ꓜ ꓳ ꓮ ꓗꓳ꓿ ꓬꓴ ꓐꓗ ꓮ ꓪꓳ ꓐꓥ ꓡꓰ ꓪꓴꓔ ꓣ ꓟ ꓔꓴ ꓙꓰ ꓡꓰ ꓰ ꓮ ꓥꓴꓔ꓾ ꓬꓴ ꓐꓗ ꓪꓳ ꓐꓥ ꓡꓰ ꓪꓴꓔ ꓣ ꓟ ꓔꓴ ꓫꓰ ꓙꓰ ꓡꓰ ꓡꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓗꓬꓳ ꓰ꓿

ꓮ ꓘꓪꓲ ꓬꓳ˗ꓧꓠ ꓰ ꓡ ꓖꓬꓳ ꓪꓲ ꓰ ꓒ˗ꓣꓲ˗ꓫꓰ ꓑꓰ ꓜꓳ ꓫꓴ ꓖꓟ ꓠꓲ ꓮ ꓗꓳ꓿ ꓧꓮꓴ ꓟꓴ ꓡꓪꓲ ꓬꓥ ꓟꓳ ꓖꓶ ꓬꓥ ꓚꓥ ꓙꓰ ꓡꓰ ꓡꓪꓲ꓾ ꓬꓳ˗ꓧꓠ ꓰ ꓡ ꓖꓬꓳ ꓪꓲ ꓰ ꓒ˗ꓣꓲ˗ꓫꓰ ꓑꓰ ꓖꓶ ꓜꓳ ꓫꓴ ꓖꓟ ꓖ ꓮ ꓗꓳ ꓪ꓾ ꓠꓥ ꓰ ꓡ ꓖꓬꓳ ꓪꓲ ꓖꓶ ꓜꓳ ꓫꓴ ꓧꓮꓲ ꓟꓴ ꓮ ꓖꓟ ꓗꓳ ꓰ ꓡꓴ꓾ ꓖ ꓡꓪꓲ꓾ ꓟꓲ ꓗꓳ ꓰ꓿ ꓬꓰ˗ꓢꓴ ꓖꓶ꓾ ꓡꓥ ꓢꓶꓗ ꓖꓶ ꓬꓥ ꓐꓲꓠ ꓛꓥ ꓪꓲ ꓰ ꓠꓲ ꓔꓳ ꓮ ꓫꓲ ꓡꓰ ꓜꓳ ꓫꓴ ꓖꓟ ꓮ ꓗꓳ ꓡꓴ꓾ ꓡꓥ ꓢꓶꓗ ꓬꓥ ꓟꓳ ꓰ ꓣ ꓧ ꓠꓲ ꓔꓳ ꓴ ꓡꓰ ꓬꓥ ꓟꓳ ꓜꓳ ꓫꓴ ꓖꓟ ꓡꓰ ꓮ ꓥꓴꓔ꓿ ꓥꓴꓔ ꓗꓳ ꓡꓥ꓾ ꓡꓥ ꓢꓶꓗ ꓡꓰ ꓬꓥ ꓟꓳ ꓚꓥ ꓟꓮꓲ ꓫꓪꓲ ꓖꓥ ꓡꓳ ꓣ ꓐꓪꓲ ꓠꓲ ꓙꓰ ꓡꓳ ꓣ꓾ ꓧꓮꓴ ꓐꓪꓲ ꓠꓲ ꓡꓰ ꓬꓥ ꓟꓳ ꓜꓳ ꓫꓴ ꓖꓟ ꓐ ꓗꓳ ꓣ꓿ ꓐꓴ ꓞꓮꓴ ꓡꓰ ꓑꓠ ꓢꓶꓗ ꓰ ꓳ ꓡꓰ ꓮ ꓒꓳ ꓪꓴ ꓗꓳ꓾ ꓧꓮꓴ ꓢꓴ ꓗꓴꓔ ꓙꓥ꓾ ꓧꓮꓴ ꓑꓠ ꓢꓶꓗ ꓖꓶ꓾ ꓑꓠ ꓞꓮꓴ ꓡꓰ ꓡꓥ ꓛꓰ ꓑꓬꓟ ꓡꓪꓲ ꓙꓰꓽ ꓙꓰꓺ ꓗꓳ ꓡꓳ ꓡꓰ꓿ ꓝꓶʼꓐꓲ ꓪꓴꓥ ꓢꓶꓗ ꓡꓰꓺ ꓡꓰꓽ ꓫꓳ ꓗꓴ ꓕꓴꓸ ꓞꓮꓴ ꓟ ꓳ ꓡꓰ ꓮ ꓗꓔ ꓗꓳ꓾ ꓧꓮꓴ ꓢꓴ ꓗꓴꓔ ꓡꓰ ꓝꓶʼꓐꓲ ꓪꓴꓥ ꓫꓳ ꓗꓴ ꓕꓴꓸ ꓖꓶ ꓖꓳꓼ ꓐꓬꓴ ꓣ꓾ ꓝꓶʼꓐꓲ ꓪꓴꓥ ꓰ ꓫꓳ ꓗꓴ ꓕꓴꓸ ꓢꓴꓟ ꓐꓬꓴ ꓣ꓾ ꓝꓶʼꓐꓲ ꓪꓴꓥ ꓢꓶꓗ ꓡꓰ ꓫꓳ ꓗꓴ ꓕꓴꓸ ꓢꓶꓗ ꓟ ꓗꓔ ꓮ ꓗꓳ꓿

ꓧꓮꓴ ꓬꓴ ꓐꓠ ꓠꓲ ꓡꓰ ꓬꓰ˗ꓢꓴ ꓖꓶ ꓟꓴꓗ ꓬꓳ ꓟ ꓡꓮꓲ ꓡꓳ ꓘꓴꓠ꓾ ꓬꓥ ꓰ ꓡ ꓖꓬꓳ ꓪꓲ ꓮ ꓫꓲ ꓫꓑ ꓬꓴ ꓗꓳ ꓰ꓿ ꓧꓮꓴ ꓟꓴ ꓡꓪꓲ ꓒ˗ꓣꓲ˗ꓫꓰ ꓑꓰ ꓖꓶ꓾ ꓪꓴ ꓮ꓾ ꓮ ꓪꓳ ꓗꓴꓔ ꓰ ꓮ ꓟꓴ ꓡꓰ ꓬꓥ ꓟꓳ ꓬꓴ ꓐꓠ ꓠꓲ ꓡꓰ ꓧꓮꓲ ꓟꓴ ꓡꓪꓲ ꓗꓴꓔ ꓮ ꓗꓳ ꓕ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ ꓧꓮꓴ ꓘꓴꓠ ꓬꓥ ꓖꓶ꓾ ꓓ˗ꓪꓲ ꓰ ꓬꓥ ꓰ ꓣ ꓧ ꓠꓲ ꓰ ꓐꓥ ꓗ ꓔꓳ ꓡꓪꓲ ꓜꓥ ꓟꓴꓔ ꓧꓪꓲ ꓠꓲ ꓗꓳ ꓘꓴꓠ꓾ ꓘꓶꓠ ꓙꓳꓥ ꓟꓳ ꓮ˗ꓐꓲ˗ꓕ ꓰ ꓑꓬꓔ ꓡꓰ ꓗ˗ꓣꓮꓲ ꓗ˗ꓢꓥ ꓰ ꓬꓴꓟ ꓘꓮꓴ ꓒꓬꓥ ꓪꓥ ꓡꓪꓲ꓾ ꓘꓶꓠ ꓙꓳꓥ ꓑꓰ ꓜ ꓮ ꓥꓴꓔ ꓡꓰ ꓖꓶ꓾ ꓳ ꓡꓰ ꓮ ꓖꓰ ꓜꓳ ꓰ ꓫꓲꓔ ꓔꓳ ꓰ ꓟꓴꓗ ꓡꓰ ꓜꓳ ꓰ ꓘꓬꓳ ꓡꓰ ꓠꓴꓥ ꓟꓳ ꓣ ꓡꓲꓥ ꓡꓥ ꓮ ꓥꓑ ꓪꓴ ꓗꓳ ꓡꓴ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿ ꓓꓴꓟ ꓬꓥ ꓖꓶ꓾ ꓬꓴ ꓐꓠ ꓠꓲ ꓖꓶ ꓐꓬꓴ ꓰ ꓟ ꓔꓴ ꓓꓴꓔ ꓡꓳ ꓐꓰ꓾ ꓐꓬꓴ ꓚꓮꓴ ꓖꓶ ꓬꓴ ꓐꓠ ꓠꓲ ꓟ ꓔꓴ ꓓꓴꓔ ꓡꓰ ꓮ ꓥꓴꓔ꓿ ꓧꓮꓴ ꓟꓴ ꓡꓪꓲ ꓐꓬꓴ˗ꓬꓥ˗ꓜꓳ ꓖꓶ ꓬꓴ ꓐꓠ ꓠꓲ ꓰ ꓬꓴꓟ ꓢꓶꓥ ꓥꓴꓔ ꓔꓳ ꓡꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓗꓬꓳ ꓰ꓿

Słuchaj ꓟ˗ꓗꓴ ꓟꓮꓴ ꓢꓮꓴ 2