Surgujia -WBT (NT) Drama

Surgujia -WBT (NT) Non Drama

नीकुदेमुस नांव कर एक झन यहूदी नेता रहीस, जेहर फरीसी दल कर रहीस। ओहर राती जुआर ईसू कर लिघे आए के कहीस, “ए गुरुजी, हमरे जानथी कि तंए परमेस्वर कती ले हमके सिखाए बर आए हस, काबरकि जे चिन्ह चमत्कार ला तंए देखाथस, अगर परमेस्वर तोर संगे नई रतीस, त तंए देखाए बर नई सकते।”
ईसू हर ओके जबाब देहीस, “मंए तोके फूरोंच में कहथों, अगर ककरो नांवा जनम नई होही, त ओहर परमेस्वर कर राएज ला देखे बर नई सकही।” नीकुदेमुस हर ओकर जग पूछीस, “जब मईनसे हर बाएढ़ जाही, त फेर कईसे जनम ले सकथे? का ओहर अपन महतारी कर पेट में, दुबारा जाए के जनम ले सकथे?” ईसू हर जबाब देहीस, “मंए तोके फूरोंच में कहथों, जब तक कोनो मईनसे हर पानी अऊ आत्मा ले नई जनमही, तब तक ओहर परमेस्वर कर राएज में ढुके बर नई सकही। काबरकि जेहर देंह ले जनमीसे, ओहर देंह हवे अऊ जेहर पबितर आत्मा ले जनमीसे, ओहर आत्मा हवे। तंए अचमहों झईन कर कि मंए तोके कहे हों, कि तोके ला नांवा जनम लेहे बर जरूरी हवे। मंए एक ठे अहना बताथों, हवा हर जीते चाहथे, ओही कती चलथे अऊ तंए ओकर आरो भर ला सुनथस, बकिन ओला नई समझस, कि ओहर कहां कती ले आथे अऊ कहां कती जाथे। सबेच मईनसे जेमन पबितर आत्मा ले जनम लेथें, ओमन कर संगे अईसनेच होथे।” नीकुदेमुस हर पूछीस, “ए सब हर कईसे होए सकत हवे?”
एला सुईन के ईसू हर ओके जबाब देहीस, “अरे भई, तंए इसराएली मन कर गुरू लागस, तबो ले ए बात मन ला नई समझस? मंए तोके फूरोंच में कहथों कि हमरे जेला जानथी, ओला कहथी अऊ जेला हमरे देखथी, ओकरे गवाही देथी। अऊ तुमन हमर गवाही ला नई अपनावा। जब मंए तुमन के संसार कर बात ला कहें, अऊ तुमन बिस्वास नई करा, त अगर मंए तुमन जग सरग कर बात मन ला बताहूं, त तुमन कईसे बिस्वास करीहा? मंए मईनसे कर बेटा जेहर सरग ले उतेर के आए हवों, मोर छोंएड़ कोनो सरग में नई चघीस हवे। जेकस मूसा हर सुनसान जघा में पीतल कर सांप ला ऊपरे चड़हाईस, ओही कस मंए मईनसे कर बेटा मोके ला, मईनसे मन जान ले मारे बर कुरूस में चघाहीं। तेमेकि जे कोनो मोर ऊपर बिस्वास करहीं, ओमन अमर जिनगी पाहीं।”
“काबरकि परमेस्वर हर, दुनिया कर मईनसे मन जग एतना मया करीस, कि ओहर अपन एकेच ठे बेटा ला दे देहीस, तेमेकि जे कोनो ओकर ऊपरे बिस्वास करही, ओहर नास नई होही, बकिन अमर जिनगी पाही। परमेस्वर हर अपन बेटा ला संसार में एकर बर नई भेजीस, कि ओहर संसार ला दंड दे, बकिन एकरले भेजीस कि संसार हर ओकर द्वारा उद्धार पाए। जे कोनो हर परमेस्वर कर बेटा कर ऊपरे बिस्वास करथे, परमेस्वर ओके दोसी नई ठहराही, बकिन जेमन ओकर ऊपरे बिस्वास नई करें, ओमन दोसी ठहेर चुकीन हवें, काबरकि ओमन परमेस्वर कर एकेच ठे बेटा कर ऊपरे, बिस्वास नई करीन। अऊ ओमन कर दोसी ठहरे कर कारन एहर हवे, कि सचा इंजोर हर संसार में आईस, बलकि संसार कर मईनसे मन अंधार ला इंजोर ले ढेर सुघर जानीन, काबरकि ओमन कर काम हर घिनक रहीस। जेमन घिनक काम करथें, ओमन इंजोर ला नई पतियाएं अऊ इंजोर में आए बर नई करें, काबरकि ओमन ला डर रहथे, कि ओमन कर घिनक काम हर उजागर होए जाही। बकिन जेहर सचाई में चलथे, ओहर इंजोर कर लिघे आथे, ताकि एहर दिख जाथे कि ओकर काम हर, परमेस्वर कती ले करल गईस हवे।”

तनिक दिन कर पाछू ईसू अऊ ओकर चेला मन यहूदिया जिला में आईन, अऊ उहां ईसू हर चेला मन कर संगे रहिके, मईनसे मन ला बतिस्मा देहे लागीस। जब ले यूहन्ना ला जेहल में नई डाले रहीन, तब ले मईनसे मन ओकरो जग बतिस्मा लेहे बर आवत रहीन। ओहर सालेम सहर कर लिघे, एनोन नांव कर गांव में जाए के बतिस्मा देहत रहीस, काबरकि ऊहां ढेरे बगरा पानी रहीस। ओजग यूहन्ना कर चेला मन कर, एगोट यहूदी कर संगे सुध होए कर बारे में बहस होए लागीस। अऊ ओमन यूहन्ना ठन जाए के कहीन, “ए गुरुजी, ओ मईनसे जेहर एरदन नदी कर ओ पार तोर संगे रहीस, अऊ जेकर बारे में तंए गवाही देहे रहे कि ओहर मसीह लागे, देख, ओहू हर बतिस्मा देहत हवे अऊ ढेरे झेमन ओकर जग जात हवें।”
यूहन्ना हर ओमन ला जबाब देहीस, “जब तक कोनो ला परमेस्वर हर सरग ले कांही करे कर अधिकार नई देही, तब तक ओहर कांहीच नई कएर सके। तुमन खुद मोर गवाह हवा, कि मंए आगूवेच कहे रहें, ‘मंए मसीह ना लागों’ बलकि ओकर बर डगर बनाए बर ओकर ले आगू भेजल गए हों।” दुलहा ओही हवे, जेके ला दुलही भेंटाथे, बकिन मंए तो एगोट ढेंड़हा कस हों, ओहर दुलहा कर गोएठ ला सूईन के ढेरेच खुस होथे, ओहीच कस तुमन जग ले ईसू कर बारे में सुईन के, अब मोर ए खुसी हर पूरा होए गईस हवे। एहर जरूरी हवे कि ओ बढ़े अऊ मंए घटों।

“ईसू जेहर ऊपर ले आथे, ओहर सबले महान हवे। जेहर संसार ले आथे, ओहर संसार ले जूड़ल रथे, तेकर ले ओहर संसार कर गोएठ गोठियाथे, बकिन जेहर सरग ले आथे, ओहर सबले बएढ़ के हवे। जे जाएत ला ओहर सरग में देखीस हवे अऊ सुनीस हवे, ओहीच ला बताथे, बकिन ओकर ओ गवाही ला कोनो नई मानें। जेहर ओकर गवाही ला मानथे, ओहर ए साबित करथे कि परमेस्वर सचा हवे। परमेस्वर हर ओके ला पबितर आत्मा ले भरपूर कएर के भेजीस हवे, तेकर ले ओहर परमेस्वर कर गोएठ ला गोठियाथे। दाऊ परमेस्वर हर अपन बेटा ले मया करथे, अऊ ओहर सबेच जाएत ला ओकर अधिकार में देहीस हवे। जेहर परमेस्वर कर बेटा ऊपरे बिस्वास करथे, ओहर परमेस्वर कर संगे अमर जिनगी पाथे, बकिन जेहर बेटा कर गोएठ मन ला नई माने, ओके अमर जिनगी नई भेंटाही, बलकि परमेस्वर कर दंड ओकर ऊपरे बनल रही।”

Słuchaj यूहन्ना 3