মানুচ্চুনে যেক্কে পিত্‌থিমীয়ান উগুরে নিজোর সংখ্যেগুন বাড়েই নেযাদন্‌ আর তারা ভিদিরে বোউত্‌ মিলের্‌অ জর্ম অলঅ সেক্কে গোজেন পুয়োগুনে এ মিলেগুনোরে দোল্‌ দেগিনে যে যিবেরে মনে কয় তারে লোয়া ধুরিলাক্। এ অবস্থা দেগিনে লগেপ্রভু কলঅ, “মর্ আত্মাগানে জনম্‌ ভুরি মানুচ্চুনো ইধু ন-থেবঅ, কিত্তে মানুচ্‌ মরনর্‌ অধীন। মুই তারারে একশঅ কুড়ি বজর সময় দোঙর্।”
গোজেন পুয়োগুন লগে এ মিলেগুনোর মিজেনার কারনে যে পুয়োগুনোর্ জর্ম অলঅ তারা এলাক্ পুরোণি দিনোর নাঙ্‌ গিন্যে বোলী মানুচ্‌। সে সময়োত্‌ আর তা পরেদিয়ো পিত্‌থিমীত্‌ নেফিলীয় নাঙে এক জাদর মানুচ্‌ এলাক্।
লগেপ্রভু দেগিলোদে পিতথিমীত্‌ মান্‌জ্যর্ ভান্ন্যেইয়ানি অমকদ বাড়ি যেইয়্যে, আর তারা মনর্ বেক্‌ চিদে-সজ্জানি নিত্য বানা ভান্ন্যেইয়ন্দি লুঙি পোজ্যে। সেনে লগেপ্রভু মনত্‌ দুখ্‌ পেলঅ। তে পিতথিমীয়ানত্‌ মানুচ্‌ বানেয়্যে বিলি দুখ্‌ পেইনে কলঅ, “মর্ বানেয়্যে মানুচ্চুনোরে মুই পিত্‌থিমীগান উগুরেত্তুন্ তুলি দিম; আর তা লগে বেক পরাণবলাগুন, বুগেদি-আঢি বেড়েয়্যে প্রাণী আর আগাজ পেক্কুনো তুলি দিম্‌ । ইগুনোরে বানেয়োং বিলিনে মঅ মনত্‌ কষ্ট অর্‌।” মাত্তর্ নোহ উগুরে লগেপ্রভু হুজি এলঅ।

ইয়েন অলঅ নোহ জীংকানির্ কধা। নোহ এক্কো গম্‌ মানুচ্‌ এলঅ। তা সময়ানত্‌ মানুচ্চুনো ভিদিরে তেয়ই এলঅ গম্‌। গোজেন লগে তার দোল্‌ উদো-লোলি এলঅ। শেম, হাম আরঅ যেফৎ নাঙে নোহর তিন্‌নো পুয়ো এলাক্। সে সলাবোত্‌ গোজেন ইধু গোদা সংসারান পাপর্‌ পজাবাজে আর অত্যেচার-অবিচারে ভরা এলঅ। গোজেনে পিত্‌থীমিয়ান ইন্দি রিনি চেইনে দেগিলোদে, সিয়েন পজাবাজ্ ওই যেইয়্যে, কিত্তে দুনিয়ের মানুচ্চুনো খাচ্চ্যদত্‌ পচা ধোজ্যে।
এ অবস্থাগান দেগিনে গোজেনে নোহরে কলঅ, গোদা মান্‌জ্য জাদতোরে মুই শেজ্ গুরি ফেলেম্‌ বিলিনে ঠিগ্ গোজ্যং। মানুচ্চুনোত্তে পিত্‌থিমীয়ান অত্যেচার-অবিচারে ভুরি উঠ্যে। মানুচ্চুনো সমারে পিত্‌থিমীর বেক্কানি মুই শেজ্ গুরিবাত্তে যাঙর্‌। তুই গম্ তক্তালোই তর্ নিজোত্ত্যে এক্কান জাহাজ বানেই-লঅ। সিয়েন ভিদিরে কয়েক্কো গুদি থেবাক্; আর সে জাহাজ বারেদি আর ভিদিরেদি মাত্যেতেল্‌লোই লিবি দিবে। জাহাজ্‌চান্‌ তুই এধোক্ক্যেনগুরি বানেবে, সিয়েন লাম্বায় অবঅ তিনশ আত্‌, পাদাজ্যে পঞ্চাশ আত্‌, আর সিয়েনর্ অজলান্ অবঅ ত্রিশ আত্‌। জাহাজ্‌চান ছালত্তুন্‌ তলেন্দি এক আত্‌ সং চেরোকিত্তে এক্কান খুলো জাগা রাগেবে আর দোরান্‌ অবঅ জাহাজর্ এক ডাগেন্দি। জাহাজ্‌চানত্‌ এক, দুই আর তিন তালা সং থেবঅ। আর দেগিবে, মুই পিত্‌থিমীত্‌ এন্‌ এক্কান পানি বান্ গুরি দিম্‌ যেনে আগাজ তলে যে বেক্‌ প্রাণীগুন নিজেস্‌ ফেলেনে বাঁজি আগন্‌ সিগুন বেক্কুন শেজ্ ওই যেবাক্। পিত্‌থিমীর বেক্‌ প্রাণীগুন সেক্কে মুরি যেবাক্।
“মাত্তর্ মুই তত্তে মর্‌ সুদোমান ঠিগ্ গুরিম। তুই যেইনে জাহাজত্‌ উদিবে আর তঅ লগে তর্ পুঅগুন, তঅ মোক্কো আর তঅ পূদবোগুন্ থেবাক্। তঅ লগে বাজে রাগেবাত্ত্যে তুই পত্তি জাদর্ জেদা প্রাণীত্তুন্ মিলে-মরদ মিলেইনে এক জোড়া গুরি জাহাজত্‌ তুলি নেযেবে। পত্তি জাদর পেক্‌, পত্তি জাদর য়েমান আর বুগেদি আঢি বেড়েয়্যে প্রাণী এক জোড়া গুরি তইধু এবাক্‌ যেনে তুই তারারে বাজেই রাগে পারচ্‌; আর তুই নানান্ বাবোত্যে হেবার জিনিস জুক্কুলে থুবেই রাগেবে। সিয়েনি অবঅ তর্‌ আর তারার হানা।”
নোহ সেবাবোত্যে গুরিলো। গোজেনর্ উগুম মজিম্‌ তে বেক্কানি গুরিলো।

Słuchaj পত্থম 6