These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐸᐃᒂᐤ ᐊᓐᒡ ᑲ ᒪᒧᓴᒋᓇᒡ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᒡ ᒋ ᐸᒋ ᓂᑐᑐᐛᐅᒡ ᒋᓴᓴ ᐊ ᐸᒋ ᒥᒐᑎᒡ᙮ ᑭᔭ ᑯᑎᑭᒡ ᐃᔪᒡ ᐊ ᒋᔅᒐᔨᒪᑭᓄᐎᒡ ᐊ ᒥᒐᑎᓯᒡ ᒋ ᐸᒋ ᑎᑯᓯᓄᐅᒡ᙮ ᐸᕆᓯᔨᒡ, ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋ ᐊᔨᒧᒪᐅᒡ ᒋᓴᓴ ᐊ ᐃᔅᒋᔄᒡ, “ᐅ ᓇᐸᐤ ᐎᒐᐛᑭᓂᑐᐛᐤ ᐊᓂᔭ ᑲ ᒥᒐᑎᓯᔨᒋ ᑭᔭ ᐎᒋ ᒥᒋᓱᒪᐤ᙮”
ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᑎᐸᒋᒧᐅᓂᔪᐤ᙮ “ᐃᓯᓇᑯᓯᑦ ᐊᐛᓐ ᐸᐃᑯ ᒥᑕᓯᒥᑎᓄᐤ ᐊᒋ ᐊᔭᐛᑦ ᒪᔭᑕᓂᓴ, ᐸᐃᒄ ᒪᒃ ᐊᓂᔭ ᐅᓂᓯᓂᔨᒋ, ᑕᓐ ᒋᐸ ᐃᑐᐤ ? ᓇᒪᐎᔾ ᐊ ᒋᐸ ᐅᒋ ᓂᑭᑕᐤ ᐊᓂᔭ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒪᔭᑕᓂᓴ ᒐᒋ ᓇᓂᑐᐛᐱᒪᑦ ᐊᓂᔭ ᑲ ᐅᓂᓯᓂᔨᒋ, ᐸᑐᔅ ᒥᔅᑯᐛᒐ ? ᐃᔅᐱ ᒪᒃ ᒥᔅᑯᐛᒐ ᓇᔅᒡ ᑕᑈ ᒋᑭ ᒥᔽᔨᑎᒻ, ᐊᑯ ᐅᑎᑎᒥᓂᒡ ᐊᑯᑕ ᒐ ᑕᑕᔭᑦ, ᒐ ᒋᐛᑕᐊᑦ᙮ ᐊᑯ ᒐ ᐎᓴᒪᑦ ᐎᒐᐛᑭᓇ ᒐ ᐃᑕᑦ, ‘ᐎᒋ ᒥᔽᔨᑎᒧᒥᒄ ᐛᔅ ᓂ ᒥᔅᑯᐛᐤ ᐊᓐ ᓂᒪᔭᑕᓂᓯᒻ ᑲ ᐅᓂᐃᒃ᙮’ ” ᒂ ᐃᔅᒋᔄᑦ ᒥᓐ ᒋᓴᔅ, “ᒋ ᐎᑎᒪᑎᓇᐛᐤ, ᒧᔭᒻ ᐊᐅᑯᓐ ᐊ ᐃᑕᔨᑕᒂᒡ ᒧᒋᒐᔨᑎᒧᐅᓐ ᐊᓐᑕ ᒋᒋᒋᓯᑯᒡ ᐃᔅᐱ ᐸᐃᒄ ᐅᒥᒋᑥᐤ ᐊ ᓇᑕᑦ ᒋᓴᒪᓂᑐᐛ ᐊ ᐎ ᒂᔅᑲᑎᓯᑦ, ᐅᔅᑕ ᐎᔾ ᒧᒋᒐᔨᑎᒥᐃᐛᐤ ᐃᔅᐱᔅ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᑲ ᑯᐃᔅᑯᑕᑎᓯᒡ ᐊᐛᓐᒋ ᓴᔅ ᐊ ᒂᔅᑲᑎᓯᒡ᙮”

ᐊᑯ ᒋᓴᔅ ᒂ ᐎᑎᒧᐛᑦ ᑯᑎᒋᔪᐤ ᒋᔅᒋᓄᐊᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᑕᓐ ᐊ ᐃᑎᑦ ᐃᔎᐤ ᐊ ᐊᔭᐛᑦ ᐸᐃᑯᔪᐤ ᓱᓇᔭᐱᔎ, ᐸᐃᒄ ᒪᒃ ᐊᓂᔭ ᐅᓇᐊᑦ ? ᓯᔅᑲᐊᒻ ᐛᔅᑕᓂᐱᒪᑭᓂᔪᐤ, ᐛᔭᓯᐃᒐᑦ ᑭᔭ ᐊᓐᑕ ᐎᒋᒡ, ᓇᔅᒡ ᓇᓂᑐᐛᐱᒪᐤ ᐸᑐᔅ ᒪᔅᑯᐛᑦ᙮ ᐃᔅᐱ ᒪᒃ ᒪᔅᑯᐛᑦ, ᐊᑯ ᒪᒧᐤ ᐛᓴᒪᑦ ᐎᒐᐛᑭᓇ ᑭᔭ ᐎᐧᑲᓂᓴ ᐊ ᐃᑕᑦ, ‘ᓇᔅᒡ ᑕᑈ ᓂ ᒥᔽᔨᑕᓐ ᐊᒋ ᒥᔅᑯᐅᒃ ᐊᓐ ᓱᓇᔭᐱᔅᒄ ᑲ ᐅᓂᐃᒃ᙮ ᐎᒋ ᒥᔽᔨᑎᒧᒥᒄ ᒪ᙮’ ” ᐊᑯ ᒥᓐ ᒋᓴᔅ ᒂ ᐃᔅᒋᔄᑦ, “ᐊᓂᔭ ᒪᒃ ᑲ ᐃᔅᐱᔅ ᒥᔽᔨᑕᐧᒃ ᐊᓐ ᐃᔎᐤ ᐊᒋ ᒥᔅᑯᐛᑦ ᐊᓂᔭ ᑲ ᐅᓇᐊᑦ ᐅᓱᓇᔭᓂᒪ ᐊᐅᑯᓐ ᐊ ᐃᓯᓇᑯᓯᔨᒋ ᒋᓴᒪᓂᑐᐤ ᐅᑦ ᐊᓐᒋᓇᒪ, ᒥᔽᔨᑎᒥᔪᐛ ᐃᔅᐱᔅ ᐸᐃᒄ ᐅᒥᒋᑥᐛ ᐊ ᒂᔅᑲᑎᓯᔨᒋ᙮”


ᒋᓴᔅ ᒪᒃ ᒥᓐ ᒋ ᐎᑎᒻ ᑯᑎᒋᔪᐤ ᑎᐸᒋᒧᐅᓂᔪᐤ, ᐊ ᐃᔅᒋᔄᑦ, “ᒋ ᑕᐤ ᓇᐸᐤ ᐊᒋ ᓂᓯᔨᒋ ᐅᑯᓴ᙮ ᐊᓐ ᒪᒃ ᐅᓯᒥᒪᐤ ᒋ ᐃᑕᐤ ᐅᑕᐎᔭ, ‘ᓄᑕ, ᐸᒋ ᒥᔾ ᐊᓄᒡ ᐊᓂᔭᔪᐛ ᒐᒂᔪᐛ ᐊᓂᔅᒐ ᒐ ᑎᐱᔨᐛᐅᓯᔭᓐ᙮’ ᐊᑯ ᐅᑕᐎᐛᐛ ᒂ ᑕᑕᐅᓂᒪᑯᒡ ᒥᓯᐛ ᑕᓐ ᑲ ᐃᓯ ᑎᐱᔨᐛᐅᓯᔨᒋ᙮
ᓇᒪ ᓇᐅᔅ ᒂ ᐊᑎ ᑎᒪᒋᓇᐧᒃ ᒥᓯᐛ ᑕᓐ ᑲ ᐃᓯ ᑎᐱᔨᐛᐅᓯᑦ ᐊᓐ ᐅᓯᒥᒪᐤ ᐊᑯ ᐊᓐᑕ ᐛᔪᐤ ᐊᔅᒋᒡ ᒂ ᐃᑐᑕᑦ᙮ ᐊᑯᑕ ᐊᓐᑕ ᑲ ᒪᔅᑎᓇᐧᒃ ᐅᓱᓇᔭᓂᒻ ᐊ ᒋᔎᐱᒪᑎᓯᑦ᙮ ᐃᔅᐱ ᒪᒃ ᒥᓯᐛ ᑲ ᒪᔅᑎᓇᐧᒃ ᐅᓱᓇᔭᓂᒻ ᐊᓐᑕ ᐊᓂᔭ ᐊᔅᒋᔪᐤ ᑲ ᑕᑦ ᒋ ᐱᒥᐱᔪᐤ ᐊ ᐛᐛᓇᐧᑭᑕᓄᐅᒡ᙮ ᒐᒃ ᑲ ᐛᐛᓇᐧᑭᑕᑦ ᑭᔭ ᐎᔾ᙮ ᐊᑯ ᒂ ᐊᑐᔅᑯᐛᑦ ᐸᐃᒄ ᓇᐸᐛ ᐊᓐᑕ ᐊ ᐅᒋᔨᒋ ᐊᓂᔭ ᐅᑕᓇᔪᐤ, ᒂ ᐃᑎᓴᐅᑯᑦ ᒐᒋ ᑭᓄᐛᔨᒪᑦ ᐅᑯᐧᑯᓯᒥᔪᐛ᙮ ᐊᔅᐱᔅ ᓯᐛᔨᑦ ᒪᒃ ᒐᒃ ᓇᔅᒡ ᒋ ᒧᔅᑕᓇᔨᑎᒻ ᒐᒋ ᒋᔅᐳᐃᓱᑦ ᐊᓂᔭ ᑯᐧᑯᓴ ᐅᒥᒋᒥᔪᐤ, ᓇᒪ ᒪᒃ ᐊᐛᔪᐛ ᐅᒋ ᐊᓯᒥᑯᐤ ᒐᒂᔪᐤ᙮
ᒐᒃ ᒪᒃ ᐃᔅᐱ ᑲ ᑯᐃᔅᑯᑯᑕᔨᒡ ᐅᒥᑐᓇᔨᒋᑭᓐ, ᒋ ᐃᑕᔨᑎᒻ, ‘ᐊᑎ ᐊ ᑕᑎᓯᔨᒋ ᓄᑕᐎᔾ ᐅᑦ ᐊᐱᒋᐊᑭᓇ ᒥᓯᐛ ᐊ ᑕᐱᔅᑯᔨᒋ ᐃᔭᐱᒡ ᐊᔪᐱᔨᒡ ᒥᒋᒥᔪᐤ, ᓂᔾ ᒪᒃ ᒐᑲᑦ ᓂ ᑯᐧᑭᑕᓐ᙮ ᓂᑭ ᔅᑐᑕᓐ ᒐ ᓂᑐᐛᐱᒥᒃ ᓄᑕᐎᔾ ᒐ ᐃᑎᒃ, “ᓄᑕ, ᓂᒋ ᒥᒋᑐᑐᐛᐤ ᒋᓴᒪᓂᑐᐤ ᑭᔭ ᒋᔾ ᔅᒋ ᒥᒋᑐᑕᑎᓐ᙮ ᓇᒪ ᓂ ᒋᔅᑕᔨᑕᑯᓯᓐ ᒐᒋ ᐅᑯᓯᑐᑐᐎᔨᓐ, ᐸᒋ ᐊᐱᒋᐃ ᒪᒃ ᒧᔭᒻ ᐊ ᐃᓯ ᐊᐱᒋᐃᑥᐤ ᒋᑦ ᐊᐱᒋᐊᑭᓐᒡ᙮” ’ ᑭᔭ ᒂ ᐱᓯᑯᑦ ᑲᐤ ᒐ ᓂᑐᐛᐱᒪᑦ ᐅᑕᐎᔭ᙮
ᐊᑯ ᒪᒃ ᐊᔅᒄ ᐊ ᐊᔭᐅᓇᑯᓂᔨᒡ ᒐ ᐃᔅᐱᔅ ᑎᑯᓯᐧᒃ ᐊᓐᑕ ᐊ ᑕᒡ, ᒋ ᐛᐱᒥᑯᐤ ᐅᑕᐎᔭ ᐊᑯ ᓇᔅᒡ ᑲ ᒋᔅᑎᒪᒐᔨᒥᑯᑦ ᐊᑯ ᒂ ᐊᑈᔅᑲᑯᑦ, ᒂ ᐛᐛᐅᒋᐱᑎᑯᑦ ᒂ ᓱᐛᔨᒥᑯᑦ᙮
ᒂ ᐃᑕᑦ ᐊᓐ ᐅᑯᓯᓯᒪᐤ ᐊᓂᔭ ᐅᑕᐎᔭ, ‘ᓄᑕ, ᓂᒋ ᒥᒋᑐᑐᐛᐤ ᒋᓴᒪᓂᑐᐤ ᑭᔭ ᒋᔾ ᔅᒋ ᒥᒋᑐᑕᑎᓐ᙮ ᓇᒪ ᓂ ᒋᔅᑕᔨᑕᑯᓯᓐ ᒐᒋ ᐅᑯᓯᑐᑐᐎᔨᓐ᙮’
ᒥᒄ ᒪᒃ ᐊᓂᔭ ᐅᑕᐎᔭ ᑎᐛᒡ ᒋ ᐎᓴᒪᔪᐛ ᐅᑦ ᐊᐱᒋᐊᑭᓂᔪᐛ ᐊᑯ ᒂ ᐃᑕᔨᒋ, ‘ᐎ ᒋᐱᔨᒄ ᒐ ᐸᑕᔭᒄ ᐊᓐ ᓇᔅᒡ ᑲ ᒥᔽᓯᒡ ᐊᑯᑉ ᒐ ᐳᔅᑎᔅᑭᒧᑎᔭᒄ᙮ ᑭᔭ ᑕᐱᒋᒐᐱᓱᓇ ᒐ ᐳᔅᑎᔅᑭᒧᑎᔭᒄ ᑭᔭ ᒥᔅᒋᓇ᙮ ᑭᔭ ᒐ ᓂᐸᐊᒄ ᐊᓐ ᑲ ᑕᒋᐳᐊᑭᓄᐅᑦ ᒥᔅᑐᔅ, ᒐ ᒥᔪᐧᑯᐛᒄ ᑭᔭ ᒐ ᒥᑯᓴᔭᐧᒄ᙮ ᐛᔅ ᐅ ᓂᑯᔅ ᒧᔭᒻ ᐊᒋ ᓂᐱᑦ ᒋ ᐃᓯᓇᑯᓱᐤ ᐊᑯ ᒧᔭᒻ ᒥᓐ ᐊ ᐱᒪᑎᓯᑦ ᐊᐅᒄ ᐊ ᐃᓯᓇᑯᓯᑦ, ᒧᔭᒻ ᐊᒋ ᐅᓂᓯᓂᑦ ᑭᔭ ᒥᓐ ᐊ ᒥᔅᑯᐛᑭᓄᐅᑦ᙮’ ᑭᔭ ᒂ ᒧᒋᒐᔨᑕᒡ᙮
ᐊᓐ ᒪᒃ ᐅᔅᑕᓯᒪᐤ ᐊᓐᑕ ᓂᑕᐅᒋᑕᑭᓐ ᐊᔅᒋᒡ ᒪᒂᒡ ᒋ ᑕᐤ᙮ ᐃᔅᐱ ᑲ ᐸᔄᐸᑕᐧᒃ ᐎᒋᐛᐤ ᒋ ᐸᑎᒻ ᐊ ᒋᔍᐛᐱᒐᓄᐎᒡ ᑭᔭ ᐊ ᓂᒥᓇᓄᐎᒡ᙮ ᒂ ᐎᓴᒪᑦ ᐸᐃᒄ ᐊᓂᔭ ᐊᐱᒋᐊᑭᓇ ᐊᑯ ᒂ ᑯᒂᒋᒪᑦ, ‘ᑕᓐ ᐊ ᐃᑎᓇᓄᐅᒡ ?’ ᐊᑯ ᒂ ᐃᑎᑯᑦ ᐊᓂᔭ ᐊᐱᒋᐊᑭᓇ, ‘ᒋᓯᒻ ᑲᐤ ᒋ ᑎᑯᓯᓄᐤ ᐊ ᒥᔪ ᐱᒪᑎᓯᑦ ᐊᑯ ᒍᑕᐎᔾ ᒂ ᐃᑎᓱᐛᑦ ᒐᒋ ᓂᐸᐊᑭᓄᔨᒋ ᐊᓂᔭᔪᐛ ᒥᔅᑐᓴ ᑲ ᑕᒋᐳᐊᑭᓄᔨᒋ ᒐᒋ ᒥᑯᓴᐊᑭᓄᐅᑦ ᐊᓐ ᒋᓯᒻ᙮’
ᐃᔅᐱ ᒪᒃ ᐱᔭᑕᐧᒃ ᐅᔭ ᐊᓐ ᐅᔅᑕᓯᒪᐤ ᒋ ᒋᔄᓱᐤ, ᐊᑯ ᓇᒪ ᐅᒋ ᐎ ᐱᒐᐤ᙮ ᐅᑕᐎᔭ ᒂ ᐸᒋ ᓂᑐᐛᐱᒥᑯᑦ, ᒂ ᓯᒋᒥᑯᑦ ᒐᒋ ᐱᒐᑦ᙮ ᐊᑯ ᒂ ᐃᑕᑦ ᐅᑕᐎᔭ, ‘ᑭᓄᐛᐸᑕ ᒪ, ᒥᒐᑐᐱᐳᓇ ᐊᑯ ᑲ ᐃᔅᐱᔅ ᐊᑐᔅᑲᑕᓐ ᓇᒪ ᒪᒃ ᓂᑕ ᓂ ᐅᒋ ᐃᑎᓐ ᒐ ᐊᑲ ᒋ ᓂᓇᐃᑎᒪᓐ ᑕᓐ ᑲ ᐃᑎᓱᐛᔨᓐ᙮ ᒐᒂᓐ ᒪᒃ ᐛᒡ ᐊᑲ ᐸᒋ ᒥᔨᓐ ᓂᔾ ᒐᒋ ᐅᒋ ᐎᒋᒥᑯᓴᒥᒂᐤ ᓂᐎᒐᐛᑭᓂᒡ᙮ ᐅ ᒋᑯᔅ ᑲ ᒋᔎᐱᒪᑎᓯᐛᒐᑦ ᒋᓱᓇᔭᓂᒥᔪᐤ ᐃᔎᐛ ᐊᒋ ᒪᔭᔨᒪᑦ, ᐊᓄᒡ ᒋ ᑎᑯᓯᓄᐤ ᑭᔭ ᒋᑦ ᐃᑎᓱᐛᑎᒪᐛ ᒪᒃ ᒐᒋ ᓂᐸᐊᑭᓄᔨᒋ ᐊᓂᔭᔪᐛ ᑲ ᑕᒋᐳᐊᑭᓄᔨᒋ ᒥᔅᑐᓴ ᒐᒋ ᒥᑯᓴᐊᑭᓄᐅᑦ᙮’
ᐅᑕᐎᔭ ᒪᒃ ᒋ ᐃᑎᑯᐤ, ‘ᓂᑯᓴ, ᒧᔅ ᐊ ᑕᔭᓐ ᒋ ᑕᓐ, ᒥᓯᐛ ᐊ ᐃᓯ ᐊᔭᔭᓐ ᒋ ᑎᐱᔨᐛᐅᓯᓐ ᑭᔭ ᒋᔾ᙮ ᐃᓯᓇᑯᓐ ᑕᑈ ᒐᒋ ᒧᒋᒐᔨᑎᒪᐧᒄ ᐛᔅ ᒋᐧᑲᓂᔅ ᒧᔭᒻ ᐊᒋ ᓂᐱᑦ ᒋ ᐃᓯᓇᑯᓱᐤ ᑭᔭ ᐊᓄᒡ ᒧᔭᒻ ᒥᓐ ᐊ ᐱᒪᑎᓯᑦ ᐊᐅᑯᓐ ᐊ ᐃᓯᓇᑯᓯᑦ᙮ ᒧᔭᒻ ᐊᒋ ᐅᓂᓯᓂᑦ ᒋ ᐃᓯᓇᑯᓱᐤ ᑭᔭ ᒥᓐ ᐊ ᒥᔅᑯᐛᑭᓄᐅᑦ ᐊᐅᑯᓐ ᐊ ᐃᓯᓇᑯᓯᑦ᙮’ ”

Słuchaj ᓗᒃ 15