Akha - 2001 Edition (NT) Drama

Akha Bible Revision (Latin Script) © Thailand Bible Society, 2011.

Kʼoeˇ naˇ, Yeˬluˇsaˬlehˬ meuˬ-ahˇ Yuˇdaˆ tsawˇ haˬ-euˬ zahˇ sahˇ kʼoꞈ bawˬ-iˬ gʼeh gaˇ Yeˬsuˇ le-euˬ meh.
Yeˬluˇsaˬlehˬ meuˬ-euˬ Yawˇ lahˇ kʼehˬ dawˬ peh, sehˬ gʼawˆ ngaˬ gʼawˆ gʼawˆ taˬ-euˬ lah tiˬ lah jaˆ-eu meh. Lah kʼoeˇ lah-ahˇ Heˬbyehˇ dawˬ Beˬzaˬdaˬ lehˇ kuˇ-eu meh. Myaˆ behꞈ deuˬ, kuiˇ kuˆ deuˬ, kuiˇ shiˇ laꞈ shiˇ shiˇ-eu deuˬ ahˇ leˇ-ehˇ, naˇ-eu tsawˇ haˬ gʼawˬ mya ni sehˬ gʼawˆ kʼoeˇ deuˬ laꞈ kʼoeˇ yuꞈ luꞈ-eu meh. Smˬ tseˇ yehꞈ kʼoꞈ naˇ keuˆ laꞈ-euˬ tsawˇ haˬ tiˬ gʼaˬ kʼoeˇ gaˇ jawˇ-eu meh. Aˬ yawꞈ kʼoeˇ gaˇ yuꞈ luꞈ gaˇ Yeˬsuˇ mawˇ-awˇ, gʼawˬ mya kʼoꞈ naˇ keuˆ laꞈ-euˬ tsawˇ haˬ ngaˇ lehˇ siˬ nya-euˬ meh. Kʼoeˇ miˇneh, “Nawˬ-ahˇ naˇ gawˇ taˬ leˇ mawꞈ miˇ-a loˇ” lehˇ naˇ haˬ nehˬ-euˬ meh.
Naˇ-eu tsawˇ haˬ kʼoeˇ gʼaˬ ehˇ-eu, “Saˬ laˬ-oˇ, iˇ cuꞈ heu nyeh laˇ ngeh ngaˬ-ahˇ lah laꞈ kʼoeˇ ciˬ uˇ nehˬ laꞈ-eu tiˬ gʼaˬ-iˬ maˬ jawˇ-a. Ngaˇ kʼaˇ uˇ-iˇ-eu lehˇ gʼeh ngeh, aˬ cawˬ ngaˬ-euˬ mehˬ hu uˇ keuˆ-iˇ-eu meh.”
Yeˬsuˇ aˬ yawꞈ-ahˇ ehˇ nehˬ-eu, “Tuˇ-awˇ, nawˬ-euˬ gawˬ pu baꞈ-awˇ cah-awˬ.” Tsawˇ haˬ kʼoeˇ gʼaˬ-euˬ naˇ gawˇ ja pyuˬ ni taˬ leˇ-awˇ, aˬ yawꞈ-euˬ gawˬ pu baꞈ-awˇ cah-euˬ meh.
Kʼoeˇ ngeh nah-aˬ, Jawˇ nah-ahˇ tsaˬ-eu meh. Kʼoeˇ miˇ neh, Yuˇdaˆ tsawˇ haˬ aˬ yuiꞈ aˬ tsu deuˬ naˇ gawˇ taˬ leˇ-euˬ tsawˇ haˬ kʼoeˇ gʼaˬ-ahˇ ehˇ nehˬ-eu,“Iˬ nah Jawˇ nah pyeuꞈ-eu miˇ neh, nawˬ-euˬ gawˬ pu baꞈ-awˇ cah-eu teu zahˇ dawˬ kʼoꞈ dawˬ-ahˇ bahˬ-eu meh.”
Tsawˇ haˬ kʼoeˇ gʼaˬ ehˇ-eu, “Ngaˬ-euˬ gawˬ pu baꞈ-awˇ cah-awˬ lehˇ, ngaˬ-ahˇ naˇ gawˇ laˆ taˬ nehˬ laꞈ-euˬ gʼaˬ ehˇ-eu meh.”
Aˬ yawꞈ maꞈ ehˇ-eu, “Nawˬ-ahˇ gawˬ pu baꞈ-awˇ cah-awˬ lehˇ ehˇ-eu aˬ suˇ gʼaˬ-a.”
Naˇ gawˇ taˬ leˇ-euˬ tsawˇ haˬ kʼoeˇ gʼaˬ, Yeˬsuˇ aˬ geu gʼaˬ pyeuꞈ-eu maˬ siˬ nya-a. Aˬ jeˬ miˇ neh ehˇ naˇ, kʼoeˇ gaˇ tsawˇ haˬ gʼawˬ mya ni jawˇ-eu miˇ neh, aˬ cawˬ-euˬ yaw kaˬ-ahˇ Yeˬsuˇ cah byoˆ-euˬ meh.
Kʼoeˇ naˇ kʼah, Uˬ duˬ tahˬ nymˇ nymˇ ma-euˬ lahˇ laꞈ kʼoeˇ tsawˇ haˬ kʼoeˇ gʼaˬ-ahˇ Yeˬsuˇ paˇ tahˬ puˬ-awˇ ehˇ nehˬ-eu, “Naˇ haˬ sheˇ. Nymˬ-mˇ nawˇ jawˇ saˇ doˆ laˇ-euˬ meh. Teu miˇ neh iˬ baˇ taˬ paˇ mˇ. Maˬ ngeuˇ naˇ yaw beh naˆ maˬ tseˇ nawˇ paˇ ya shaˬ tehꞈ-a.”
Kʼoeˇ naˇ, tsawˇ haˬ kʼoeˇ gʼaˬ doˆ-iˇ-awˇ, aˬ yawꞈ-ahˇ naˇ gawˇ laˆ taˬ nehˬ-euˬ gʼaˬ Yeˬsuˇ pyeuꞈ-eu gaˇ kawˆ, Yuˇdaˆ tsawˇ haˬ aˬ yuiꞈ aˬ tsu deuˬ-ahˇ ehˇ nehˬ-iˇ-euˬ meh. Kʼoeˇ ngeh neh naˇ, aˬ yawꞈ maꞈ Yeˬsuˇ-ahˇ laˆ shaˬ-eu jeˬ aˇ dahˬ beh-euˬ meh. Aˬ jeˬ miˇ neh ehˇ naˇ, Jawˇ nah ngeh nah aˬ yawꞈ aˬ cawˬ-ahˇ naˇ gawˇ laˆ taˬ nehˬ-euˬ meh. Yeˬsuˇ aˬ yawꞈ maꞈ-ahˇ ehˇ nehˬ-eu, “Ngaˬ Da nymˬ-mˇ keuˆ ni maˬ tsehˆ leˇ ni gaˇ mˇ luꞈ-eu miˇ neh, ngaˇ kʼawꞈ ya mˇ meh.”
Aˬ yawꞈ kʼoeˇ loꞈ-ehˇ ehˇ-eu miˇ neh, Yuˇdaˆ tsawˇ haˬ aˬ yuiꞈ aˬ tsu deuˬ aˬ yawꞈ-ahˇ sehꞈ-eu gʼaˇ duˬ noeˬ tsehˆ-euˬ meh. Aˬ jeˬ miˇ neh ehˇ naˇ, aˬ yawꞈ-aˬ, Jawˇ nah-ahˇ maˬ mˇ kʼmˬ-eu jeˬ mˇ-eu tehꞈ-ehˇ maˬ loꞈ ni, Miˬyehˇ-aˬ aˬ yawꞈ-euˬ Aˬ da ma lehˇ ehˇ-eu laꞈ kʼoeˇ, Miˬyehˇ hawˇ-eu aˬ yawꞈ tiˬ kawˆ ma lehˇ ehˇ gaˇ duˇ leˇ-euˬ meh.

Kʼoeˇ miˇ neh, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ kʼoꞈ nehˬ-euˬ meh. “Ngaˇ naw maꞈ-ahˇ maˇ jawˆ ni ehˇ-eu ma. Aˬda kʼaˇ mˇ-eu jeˬ Zaˬmaˇ mˇ nya-eu meh. Aˬ jeˬ miˇ neh ehˇ naˇ, Aˬda-aˬ, Zaˬmaˇ-ahˇ gaˬ-eu miˇ neh, aˬ yawꞈ kʼaˇ mˇ luꞈ-eu yawˬ jeˬ na luꞈ mehˬ -euˬ meh. Heu naˆ maˬ tseˇ huiˬ-eu deuˬ kʼawꞈ mˇ nya ni, aˬ yawꞈ mehˬ tehꞈ-a. Naw maꞈ dawˬ tawˆ luꞈ ya zahˬ leˇ dui dui tehꞈ-a. Aˬda-aˬ, shiˇ-euˬ tsawˇ haˬ deuˬ-ahˇ bi gʼoꞈ dehꞈ laˇ-awˇ, dehꞈ-eu jeˬ biꞈ-eu loꞈ-ehˇ, Zaˬmaˇ kʼawꞈ, aˬ yawꞈ biꞈ mawꞈ-eu tsawˇ haˬ-ahˇ dehꞈ-eu jeˬ biꞈ-eu meh. Aˬda-euˬ mawˇ do yaˇ kʼaˬ maˬ daˇ-a. Yaˇ kʼaˬ daˇ-eu baoˬ dawˬ tawˆ luꞈ aˬ yawꞈ-euˬ Zaˬmaˇ-ahˇ biꞈ jiˇ taˬ-euˬ meh. Kʼoeˇ miˇ neh, tsawˇ haˬ dawˬ tawˆ luꞈ Aˬda-ahˇ taˬ huiˬ taˬ mahˇ-eu loꞈ-ehˇ, Zaˬmaˇ-ahˇ taˬ huiˬ taˬ mahˇ tehꞈ-a. Zaˬ maˇ-ahˇ maˬ taˬ huiˬ-eu tsawˇ haˬ-aˬ, aˬ yawꞈ-ahˇ kʼehˇ gʼeh leꞈ-euˬ Aˬda-ahˇ maˬ taˬ huiˬ gaˇ duˇ-eu meh.
“Ngaˇ naw maꞈ-ahˇ maˇ jawˆ ni ehˇ-eu ma. Ngaˬ-euˬ dawˬ ya gaˬ-awˇ, ngaˬ-ahˇ kʼehˇ gʼeh leꞈ-euˬ gʼaˬ-ahˇ kʼaˇ jah-eu tsawˇ haˬ-aˬ, mˬ maˬ maˬ byaˆ zaˇ ziˇ dehꞈ-eu jeˬ za meh. Miˬyehˇ neh yaˇ kʼaˬ daˇ nehˬ gaˇ maˬ ya daˬ-eu uˬ taꞈ, shiˇ-eu jeˬ-ahˇ neh dehꞈ-eu jeˬ-ahˇ tsehˆ doˆ dzeuˇ-euˬ meh. Shiˇ taˬ-euˬ loꞈ-ehˇ duˇ-eu tsawˇ haˬ deuˬ, Miˬyehˇ Zaˬmaˇ-euˬ dawˬ ya gaˬ-eu aˇ nah keuˆ le luꞈ-awˇ, aˇ nah kʼoeˇ nah heu gaˇ keuˆ le taˬ-euˬ meh. Aˬ yawꞈ-euˬ dawˬ-ahˇ naˇ haˬ geuꞈ-eu tsawˇ haˬ deuˬ yaw dehꞈ ya dehꞈ tehꞈ-a. Aˬda-aˬ, dehꞈ-eu jeˬ doˆ le duˬ pyeuꞈ-eu loꞈ-ehˇ, aˬ yawꞈ-euˬ Zaˬmaˇ kʼawꞈ dehꞈ-eu jeˬ doˆ le duˬ pyeuꞈ ni aˬ yawꞈ jahˇ nehˬ-euˬ meh. Zaˬmaˇ-ahˇ yaˇ kʼaˬ daˇ-eu baoˬ biꞈ taˬ-euˬ meh. Aˬ jeˬ miˇ neh ehˇ naˇ, aˬ yawꞈ-aˬ Tsawˇhaˬ-euˬ Zaˬmaˇ meh. Gaˇ kawˆ heu hmˬ-ahˇ naw maꞈ taˬ zahˬ leˇ. Shiˇ dzeuˇ-euˬ tsawˇ haˬ dawˬ tawˆ luꞈ aˬ yawꞈ-euˬ dawˬ ya gaˬ-eu aˇ nah keuˆ le luꞈ meh. Lmˬ bymˇ laꞈ kʼoeˇ neh aˬ yawꞈ maꞈ doˆ laˇ-awˇ, yaw muiˬ jeˬ mˇ-euˬ tsawˇ haˬ deuˬ-aˬ, dehꞈ-eu jeˬ za tehꞈ-a. Yaw haiˬ jeˬ mˇ-euˬ tsawˇ haˬ deuˬ-aˬ, yaˇ kʼaˬ daˇ nehˬ gaˇ ya daˬ tehꞈ-a.

“Ngaˬ-euˬ baoˬ-ahˇ ngaˇ gʼoe-awˇ yawˬ haˇ yawˬ ha tiˬ jeˬ-iˬ maˬ mˇ nya-a. Miˬyehˇ ngaˬ-ahˇ ehˇ nehˬ laꞈ-euˬ loꞈ-ehˇ ngaˇ yaˇ kʼaˬ daˇ-eu ma. Kʼoeˇ miˇ neh, ngaˬ neh yaˇ kʼaˬ daˇ-euˬ-aˬ, tsaˬ-eu dawˇ-eu meh. Aˬ jeˬ miˇ neh ehˇ naˇ, ngaˬ-euˬ nui kʼahˇ ngaˇ maˬ mˇ-ehˇ, ngaˬ-ahˇ kʼehˇ gʼeh leꞈ-euˬ gʼaˬ-euˬ nui kʼahˇ mˇ-eu ma.
“Ngaˇ yawˬ haˇ yawˬ ha saˇ kiˇ kamˬ naˇ, yawˬ ha ehˇ-euˬ ngeuˇ meh lehˇ maˬ ehˇ nya-a. Ehˇ kʼawꞈ, ngaˬ-euˬ gʼaˇ duˬ saˇ kiˇ kamˬ-eu tiˬ gʼaˬ jawˇ meh. Aˬ yawꞈ ngaˬ-euˬ gaˇ kawˆ saˇ kiˇ kamˬ-euˬ kʼoeˇ tsaˬ meh lehˇ ngaˇ siˬ nya ma. Yoˇ haˬ jawˇ gaˇ naw maꞈ tsawˇ haˬ kʼehˇ gʼeh-awˇ bi naˇ haˬ-iˇ ngeh, aˬ yawꞈ ngaˬ-euˬ gaˇ kawˆ kʼaˇ ngeuˇ-eu loˬ-ehˇ ehˇ mehˬ nehˬ-euˬ meh. Ngaˬ-euˬ gaˇ kawˆ aˬ cawˬ saˇ kiˇ bi kamˬ-eu lehˇ ngaˇ heu loꞈ-ehˇ ehˇ-eu maˬ ngeuˇ. Naw maꞈ ka kʼoꞈ-eu jeˬ bi za ni ehˇ-eu ma. Yoˇhaˬ neh ehˇ-euˬ dawˬ-aˬ, bya cehˆ ni doꞈ luꞈ-eu tsiˇ kʼmˬ-ahˇ duˇ-awˇ, naw maꞈ-ahˇ laˬ kʼaˬ bi cehˇ-eu meh. Naw maꞈ-ahˇ laˬ kʼaˬ bi cehˇ-eu yaw shehꞈ-ahˇ duˇ-eu aˬ yawꞈ-euˬ dawˬ kʼoeˇ-ahˇ, naw maꞈ tiˬ kʼehˬ tiˬ yamˬ ha geuꞈ-euˬ meh. Ehˇ kʼawꞈ, Yoˇhaˬ neh saˇ kiˇ kamˬ-euˬ naˆ maˬ tseˇ huiˬ dzehˬ-eu ngaˬ-euˬ gaˇ kawˆ saˇ kiˇ kamˬ taˬ-euˬ jaˆ ma. Ngaˬ Da neh ngaˬ-ahˇ bi mˇ laꞈ-euˬ ngaˬ neh mˇ-euˬ gaˇ kʼoeˇ deuˬ ngaˬ-euˬ dah zaˇ dawˬ ngehˬ gaˇ duˇ ni, Aˬda neh ngaˬ-ahˇ kʼehˇ gʼeh leꞈ-euˬ meh lehˇ saˇ kiˇ kamˬ-eu jeˬ pyeuꞈ-eu meh. Kʼoeˇ uˬ taꞈ, ngaˬ-ahˇ kʼehˇ gʼeh leꞈ-euˬ gʼaˬ pyeuꞈ-eu Aˬda kʼawꞈ, ngaˬ-euˬ gaˇ kawˆ saˇ kiˇ kamˬ-eu meh. Aˬ yawꞈ-euˬ dawˬ-ahˇ naw maꞈ maˬ gaˬ haw-ehˇ, aˬ yawꞈ-euˬ myaˆ pyawˬ-ahˇ naw maꞈ maˬ mawˇ haw-aˬ. Aˬ yawꞈ neh bi oe-euˬ gʼaˬ-ahˇ naw maꞈ maˬ jah-eu miˇ neh, naw maꞈ aˬ yawꞈ-euˬ dawˬ-ahˇ nui ma laꞈ kʼoeˇ maˬ jeˬ hmˬ taˬ-a. Jaˇ liꞈ laꞈ kʼoeˇ mˬ maˬ maˬ byaˆ zaˇ ziˇ dehꞈ-eu jeˬ-ahˇ poˆ mawˇ nya tehꞈ-a lehˇ naw maꞈ noeˬ-awˇ, Jaˇ liꞈ gui-eu meh. Naw maꞈ gui-eu Jaˇ liꞈ kʼoeˇ-euˬ laꞈ kʼoeˇ, ngaˬ-euˬ gaˇ kawˆ ehˇ taˬ-euˬ meh. Ehˇ kʼawꞈ, maˇ maˇ ni gʼeh-eu dehꞈ-eu jeˬ-ahˇ za ni, ngaˇ jawˇ gaˇ naw maꞈ maˬ laˇ mawꞈ-a.
Tsawˇ haˬ zaˬ neh bi ja ceuˬ-eu jeˬ-ahˇ ngaˇ poˆ luꞈ-eu maˬ ngeuˇ. Ehˇ kʼawꞈ, naw maꞈ aˬ joˆ-ehˇ gʼeh-eu tsawˇ haˬ pyeuꞈ-eu ngaˇ siˬ nya-awˇ, naw maꞈ-euˬ nui ma laꞈ kʼoeˇ Miˬyehˇ-ahˇ gaˬ-eu nui ma maˬ ahˇ-eu ngaˇ siˬ nya ma. Ngaˬ Da-euˬ baoˬ pi-awˇ, aˬ yawꞈ-euˬ dah zaˇ ngaˇ oe-euˬ ma. Ehˇ kʼawꞈ, naw maꞈ ngaˬ-ahˇ maˬ ha geuꞈ-a. Yawˬ ha-euˬ baoˬ pi-awˇ yawˬ ha-euˬ gʼaˇ duˬ tehꞈ-ehˇ ngehˬ le tmˇ le-euˬ gʼaˬ jawˇ naˇ, naw maꞈ ha geuꞈ tehꞈ-a. Naw maꞈ tiˬ gʼaˬ tiˇ gʼaˬ ja ceuˬ nehˬ laꞈ-eu jeˬ-ahˇ geuꞈ mawꞈ-eu meh. Ehˇ kʼawꞈ, aˬ yawꞈ tiˬ gʼaˬ tehꞈ-ehˇ Miˬyehˇ pyeuꞈ-eu gʼaˬ neh bi ja ceuˬ ni naw maꞈ maˬ dehꞈ-a. Kʼoeˇ miˇ neh, naw maꞈ ngaˬ-ahˇ aˬ joˆ-ehˇ jah nya nmˇ. Ngaˇ-aˬ, naw maꞈ-euˬ yaw lehˬ Ngaˬda-ahˇ ja mehˬ leˇ-eu gʼaˬ meh lehˇ taˬ noeˬ. Naw maꞈ noeˬ tmˬ-awˇ nui ma huiˬ taˬ-euˬ Moˇseˬ-aˬ, naw maꞈ-euˬ yaw lehˬ Ngaˬda-ahˇ ja mehˬ leˇ tehꞈ-a. Naw maꞈ Moˇseˬ-ahˇ aˬ diˇ jah law nmˇ-aˬ, ngaˬ-ahˇ kʼawꞈ jah tehꞈ-a. Aˬ jeˬ miˇ neh ehˇ naˇ, aˬ yawꞈ ngaˬ-euˬ gaˇ kawˆ boꞈ-euˬ meh. Ehˇ kʼawꞈ, aˬ yawꞈ neh boꞈ taˬ-euˬ gaˇ kawˆ-ahˇ naw maꞈ maˬ jah-eu-aˬ, ngaˬ-euˬ dawˬ-ahˇ naw maꞈ aˬ joˆ-ehˇ paˇ jah nmˇ.

Słuchaj Yoˇhaˬ 5