Tetun - 2013 (UBB) NT Non Drama

Tetun - 2013 (UBB) NT Drama

Uluk fohon, Naꞌi Maromak Manfatin iha kedan tiꞌan.
Manfatin nia, manesak no Ema ida.
Nia namutuk no Naꞌi Maromak.
Nia duꞌuk moos Naꞌi Maromak.
Tebes. Hori uluk fohon,
Nia namutuk kedan no Naꞌi Maromak.
Naꞌi Maromak nodi Nia naseꞌi nola hotu-hotu.
La noo saa ida mak Nia la naseꞌi.
Nia, mak Moris Huun.
Nia moos, Kroman maksinak
naroma ema neon.
Kroman nia, naksinak nima-nimak,
toꞌo makukun moos la bele terus.
Noo ema raiklaran ida, naran Yohanis. Naꞌi Maromak solok nia atu foo natene nosi Kroman nia, nebee ema hotu-hotu bele fiar baa Nia.
Yohanis neꞌe, lahoos Kroman nia. Mais Naꞌi Maromak solok nia mai atu katak baa ema nosi Kroman nia. Tan Kroman nia, Kroman malolok mak mai baa raiklaran neꞌe, atu naroma ema hotu-hotu neon.
Masik Naꞌi Maromak nodi Nia naseꞌi hotu-hotu moos, ema la natene Nia baa oras Nia mai nein iha raiklaran neꞌe. Niakaan ema sia moos la noꞌuk simu Nia. Mais ema mak simu Nia nodi fiar baa Nia, Naꞌi Maromak foo beran baa sia atu dadi baa Niakaan oan. Sia dadi baa Naꞌi Maromak oan, la manesak no ema nahoris oan. Lahoos tan mane ida beer netan husar-binan. Lale. Sia dadi baa Naꞌi Maromak oan, tan Nia duꞌuk mak foo moris nunia baa sia.
Naꞌi Maromak Manfatin
dadi baa ema raiklaran.
Nia tuur heik iha itakaan klaran.
Ita hobun Niakaan kabaas, tan Nia,
Naꞌi Maromak Oan mesak mak kabaas manesak no Aman.
Nia natudu laran diꞌak baa ita,
tan lisan nunia tebes.
Nia nanis tebes no loos.
Yohanis foo natene Naꞌi Maromak Manfatin nia see, nodi nahii naꞌak, “Rona mai! Neꞌe, ema mak haꞌu kdale tiꞌan baa emi kaꞌak, ‘Ema ida atu mai. Nia boot liu haꞌu, tan haꞌu ksei la moris dauk, Nia iha kedan tiꞌan!’ ”
Yohanis dale nunia, tan Ema nia beer basuk natudu laran diꞌak baa ita nima-nimak. Uluk aan, itakaan bei uluk sia simu Ukun-badu nosi Bei Musa. Mais oras neꞌe, ita simu matak-malirin no hanorin loos nosi Yesus Kristus. La noo ema ida mak naree Naꞌi Maromak. Oan mesak duꞌuk mak naree. Oan nia bele nalore Naꞌi Maromak baa ita, tan Nia namutuk kedan no Aman.


Dala ida, ema Yahudi ulun sia iha Yerusalem bolu naꞌilulik naꞌin hira, no ema naꞌin hira nosi hunun Lewi mak naliku Naꞌi Maromak Niakaan Uma Hamulak Huun. Bolu nola notu, sia solok ema nia sia baa mota Yordan balu baa, atu nusu Yohanis Mak Sarani Ema naꞌak, “O neꞌe, Kristus mak Naꞌi Maromak nameno tiꞌan atu solok mai ka?”
Rona sia nusu nunia, Yohanis nataa naꞌak, “Lale. Haꞌu neꞌe, lahoos Kristus.”
Hotu, sia nusu tenik naꞌak, “Kalo nunia, o neꞌe see? Bei Elia ka?”
Yohanis nataa tenik, naꞌak, “Lale.”
Hotu sia nusu tenik naꞌak, “Keta toꞌo o neꞌe, Maromak makoꞌan seluk mak ida nia ka?”
Nia nataa naꞌak, “Lale.”
Hotu, sia nusu tenik naꞌak, “Kalo nunia, o neꞌe see? Katak malorek lai, tan ami musti fila baa hasara hikar baa amikaan ulun sia mak solok ami.”
Rona nola nunia, Yohanis nataa sia tuir saa mak Yesaya nakerek kedan hori uluk naꞌak,
“Haꞌu neꞌe, ema mak nahii iha rai fuik naꞌak,
‘Ema hotu-hotu hadiꞌa dalan,
atu simu Naꞌin!
Haweer dalan, hodi simu Nia.’ ”
Baa oras nia, ema naꞌin hira nosi partee Farisi moos mai baa Yohanis. Sia nusu nia naꞌak, “Lia nuneꞌe. Kalo o lahoos Kristus, lahoos bei Elia, no lahoos Maromak makoꞌan seluk nia, tan saa o sarani ema? See mak foo beran nia baa o?”
Yohanis nataa naꞌak, “Haꞌu neꞌe, sarani ema kodi wee dei. Mais noo Ema ida iha emikaan klaran tiꞌan mak emi la hatene. Masik haꞌu kahuluk Nia moos, Nia boot liu haꞌu. Haꞌu kdadi ata baa Nia moos, haꞌu la kfatan.”
Lia neꞌe sia hotu-hotu dadi iha leo Betania, iha mota Yordan balu baa. Yohanis no niakaan maktuir sia sarani ema iha fatin nia.

Baa awan, Yohanis naree Yesus mai baa sia. Hotu Yohanis dale naꞌak, “Mana lai! Bibi malae oan mak Naꞌi Maromak nadiꞌa kedan, Nia mai tiꞌan. Nia mak atu dadi sera, kasu ema raiklaran salan. Ema nia mak hori sehik haꞌu katak kaꞌak, “Ema ida atu mosu mai. Nia boot liu haꞌu, tan oras haꞌu ksei la moris dauk, Nia iha tiꞌan.” Uluk, haꞌu la katene ema neꞌe mak Kristus. Mais Naꞌi Maromak solok haꞌu baa ema Israꞌel sia, atu foo katene nosi lia Kristus. Tan lia nia, haꞌu kmai sarani sia kodi wee.
Uluk, Naꞌi Maromak katak baa haꞌu naꞌak, ‘Ema ida atu mai baa o. Hotu, Haꞌukaan Kmalar Lulik atu tuun mai nein iha Nia. Hotu, Nia nodi Haꞌukaan Kmalar Lulik, foo beran baa Haꞌukaan ema sia.’ Naꞌi Maromak katak kedan nunia, mais baa oras Ema neꞌe mai baa haꞌu, haꞌu la katene Nia mak Kristus. Dau-dau haꞌu ktitu-karee Maromak Kmalar Lulik tuun nosi laleꞌan hanesan lakateu sina, hotu nein baa Nia, foin haꞌu katene kaꞌak, ‘Nia neꞌe, mak Kristus!’ Lia nia, karee kodi matan duꞌuk. Etuk, haꞌu katak baa emi kaꞌak, ‘Ema mak mai neꞌe, Naꞌi Maromak Oan!’ ”

Baa awan, Yohanis noꞌi nariik no niakaan maktuir naꞌin rua. Naree Yesus laꞌo liu, nia katak baa maktuir sia naꞌak, “Mana lai! Ema nia, bibi malae oan mak Naꞌi Maromak nadiꞌa kedan atu dadi baa sera!”
Rona nola nunia, Yohanis niakaan ema maktuir naꞌin rua nia, laꞌo nela nia, baa tuir Yesus. Yesus mana kotuk, naree sia tuir Nia. Hotu Nia nusu sia naꞌak, “Nunabee? Emi tuir Haꞌu baa saa?”
Sia nusu fila baa Nia naꞌak, “Rabi hein iha nabee?” [Iha siakaan lia Aram, sia temi ema boot naꞌak ‘Rabi’. Lia isin naꞌak, ‘ema manorik’.]
Hotu Yesus nataa naꞌak, “Mai, baa haree duꞌuk.” Hotu sia tuir Nia, baa naree Niakaan hein fatin. Toꞌo nebaa, takseer tuku haat loro malirin. Sia moos nein no Nia toꞌo loro monu.
Ema naꞌin rua mak tuir Yohanis, hotu tuir Yesus nia, ida naran Andreas, Simon Petrus alin. Fila no fila, Andreas lai-lais baa buka maun Simon nodi katak naꞌak, “Hei, mau! Ami hasoru Mesias tiꞌan!” [Iha siakaan lia Aram, ‘Mesias’ naꞌak, ‘Kristus.’ Kristus nia, mak Naꞌi Maromak nameno kedan atu solok mai.] Hotu, Andreas no maun baa nasoru Yesus.
Toꞌo baa, Yesus mana Simon nodi katak naꞌak, “O neꞌe, Simon. Okaan aman, mak Yohanis. Nahuu baa oras neꞌe, ema bolu o naꞌak, ‘Kefas’ ” [‘Kefas’ lia isin manesak no ‘Petrus’ mak naꞌak ‘fatuk’].

Iha fatin nia moos, noo ema ida seluk naran Filipus. Niakaan leo huun naran Betsaida. Petrus no Andreas moos huun nosi leo nia.
Baa awan, Yesus nakotu atu baa rai Galilea. Toꞌo baa, Yesus nasoru Filipus, hotu tene naꞌak, “Mai tuir Haꞌu, dadi baa Haꞌukaan ema!”
Rona nola nunia, Filipus baa buka nola ema ida naran Natanel. Nia katak naꞌak, “Mau! Ami hasoru tiꞌan Ema mak ita hoꞌi hei-hein nia. Nia naran Yesus, nosi leo Nasaret. Aman, naran Yusuf. Ema nia mak hori uluk Bei Musa no Maromak makoꞌan seluk sia nakerek nela kedan iha Hakerek Moon.”
Rona nola nunia, Natanel naꞌak, “Ema Nasaret!? Aikee! Leo nia, la noo folin. La noo diꞌak saa mak naksain nosi leo nia.”
Mais Filipus nakahik nia naꞌak, “Hoi! Keta nunia. Mai maree duꞌuk baa!”
Rona nola nunia, Natanel moos nakara, hotu baa. Oras Yesus titu-naree Natanel, Yesus katak naꞌak, “Ema neꞌe, ema Israꞌel isin. Nia ema moon mak la natene tolek.”
Rona nola nunia, Natanel nusu naꞌak, “Nunabee Ita Boot bele hatene haꞌu?”
Yesus nataa naꞌak, “Nuneꞌe. Baa oras Filipus la baa bolu o dauk, o sei tuur iha ai ohak nia, Haꞌu ktitu-karee o tiꞌan.”
Hotu Natanel katak naꞌak, “Ita Boot neꞌe, Naꞌi Maromak Oan tebe-tebes! Ita Boot neꞌe, tebe-tebes Naꞌin bodik ita ema Israꞌel!”
Mais Yesus nusu baa nia naꞌak, “Arumak o fiar baa Haꞌu, tan ohin nia Haꞌu katak kaꞌak, ‘Baa oras o sei tuur iha ai ohak nia, Haꞌu ktitu-karee o tiꞌan.’ Nunia ka? Manoin, tan o atu maree lia mak makaꞌas liu tenik lia neꞌe!
Haꞌukaan dalen neꞌe, tebes no loos. Loron ikus, emi atu haree laleꞌan nakloke no Naꞌi Maromak Niakaan makbukar laleꞌan sia saꞌe-tuun iha Haꞌukaan sorin, tan Haꞌu neꞌe, Ema Raiklaran Isin mak tuun mai nosi laleꞌan.”

Słuchaj Yohanis 1