Lúkàs 3
3
Ə́r Jâŋ nò kɔhɨ kùb kɔ ə́mní
(Góòmɓwê Mt 3.1-12; Mk 1.1-8; Jŋ 1.19-28)
1Tìbéèr, mvèìn kàm jíri á cè dáín cóóŋ ɨ́ ŋgibì ŋgɔ̧́ɔ̧̀ nóò no, á nɨ́m kɨ́ ya ndóŋ. Póŋsə́ Pìlât yaá gómnà ti Jùdéè, Hèrôdə̀ a ŋgáŋce ɗɔ̀ɔ́b Gàlìléè. Mwin yàá noò Fɨ́lɨ̂b a kɨ́kce ɗɔ̀ɔ́b Ìtìréè ɓe Tɨ̀ràkòníìt. Lìsàníyâs á cè ŋgáŋnɨ ɗɔ̀ɔ́b Àbìléèn. 2Ánà ɓe Kàyîf á cè nɨ̀gááŋ satɨgàà. Á Kìn Mèèín ya lə́ Jâŋ, mwin Càkɨ́ríyàà ɓɔ̧ɔ̧, ŋgə́ a cè ŋgwàì ndɨ̀ŋnì. 3Ŋgə́ ɨ́ yà gèrɨ̀tèènɨ ŋgɨ̀ŋgɨ́ŋ ɗɔ̀ɔ́b yi du gín Jùrdə̧́ə̧̀ no, ŋgə́ a tanace nɨ̀vɨ́tɨ̀b ɨnè: «Ɓandɨnáam sum, nyí a ndɨ̀ŋ kùb kɔ̀ɔ̀ nyí kɔ ə́mní ɗà Mèín a tɨ́ínà nyí cum nyínè.»
4U̧ á nɨ́m Èsáyà, tɨ́kìn Mèèín yi tɨnndé no káàtà̧nè yi fó̧ hàrák. Ŋgə́ yi taá ɨnè:
«Kúu nɨ̀ŋgwá kwè á kɨ́ŋɓéwo ŋgwàì ndɨ̀ŋnì ɗàrɨ́:
nyaaŋkɨ́náam jɨ̀r Kékéé
nyaaŋnáɓam jìíb ɗɨ́ɗɨ̧́!
5Njaŋnjɨ̧ bɨ lâs dù njákkí̧i̧,
ɓəb ɓe ŋgòme lâs, nyí a njwìnkî.
Nyí a ɗə́ə̀ŋcù jìíb ŋgəmkɨ́ni,
kɨ́b ɓáŋhɨ́b nyí a nyààŋcù.
6Ɗà nùb lâs a pə́gì ɓə́r Mèín ɗú nɨ́m ɓátɨ̀niì.»
7Nɨ̀vɨ́tɨ̀b yaá gáíwònɨ Jâŋ, ŋgə́ kɔ̀ɔ̀ vúm kɔ ə́mní. Ŋgə́ yaá ŋgáb tànànɨ ɨnè: «Nyí, kpááŋwɔ̧ bɨ rè, nò tana nyí, nyí ɓa ɓáíhó̧nɨ ŋgwìn Mèèín ŋgóble rè noò ma na? 8Nyí ma dùhácɨ̀ ɓe ɗɨ́m nò ɓandɨ sumí du ɓe kíí kà. Nyí nɨ gíí sə̀ŋkɨ̂r nyí a tà: ‹Nɨ́m nɨ nyȩrɨ́b Àbɨ̀ràháàm yóò á› na, ɓetí mɨ tànàɓà nyí wááŋ, Mèín á ɓe nyòm ndɨŋ nyȩrɨ́b Àbɨ̀ràháàm fó̧ sɨɨ bɨ rè noò. 9Kùb ɓóobcií bɨ́ fár àm sárɨkɨ́ yɨ̀bí: yɔ̀ lâs du gum nyɔ̧ɔ̧́ jáàbwáá, kùb ɓa ŋgə́ téínlèèrékɨ́nɨ wa̧á̧ á.»
10Nɨ̀vɨ́tɨ̀b ɨ́ fɔ́gì ŋgə́ ɨnè: «Nɨ́m ma ndɨ̀ŋcé ɨna?» 11Ŋgə́ ɨ́ pììnà ŋgáb ɨnè: «Nò du ɓe júk bɨrɨ́b lɨ, nà nò du ɓe kí ɗàwáá mwi̧. Nò duce ɓe cɔɔ̀ŋ, a nàɓwê nò du ɓe kí ɗàwáá.»
12 Nùb ɓáhɨ làmpóò ɨ́ gòɓwê yɨ́ Jáàŋ, ŋgə́ kɔ̀ɔ̀ɓwê vúm kɔ ə́mní. Á ŋgáb fɔ́ ŋgə́: «Tá tɔ̀hí, nɨ́m ndɨ̀ŋ i̧?» 13Ŋgə́ ɨ́ tànà ŋgáb: «Mwèìn làmpóò ɓíì ya ɓwállé, nyí kɨ́ kù ya kpɔ̀ɔ̀wúwa.»
14Sójààb ɨ́ fɔ́ɓwê ŋgə́ ɨnè: «Kɨ́ nɨ́mè cè, nɨ́m ndɨ̀ŋ i̧?» Á ŋgə́ tana ŋgáb: «Nyí nò kù mòné ŋgáré gàwá, kɨ́ kù téínwúnɨ ŋgə́ kààŋ só àm pɨɨmhó̧ mwèìn no kíì. Gàmɗóònáhá nɨ mwèìn nyínè njumií.»
15Hȩ gbàŋ lâs ya móŋkomɓa Mèsî ɓe gíí sumí rèé, ŋgáb ɨ́ yà lə́ə̀mnɨ ɓo sumí Jâŋ ɓa nɨ dùnɨ Mèsî* kɨ́ kè. 16Jâŋ ɨ́ tànàgì ŋgáb lâs ɨnè: «Kɨ́ moò, mɨ kɔɔ nyí kɔ ə́mní ɓe mvúm á; nɨ́m mwi̧ nò kù ɓa mɨ tùwònɨ cùrì á, ŋgə́ ɓa nyí kɔ̀ɔ̀nɨ ɓe Nyéhè Sarîn ɨ́ wa á. Ŋgə́ á nɨ tamnì cei ŋgə́ ndóŋtɨ́ mɨ; mɨ ɓàcéyè mɨ ɗóhîn njèìkɨ́nànɨ ŋgə́ tə́b gure ɗàɓàwá. 17Ŋgə́ á ɓe tɨmwà no ŋgáré àm fɨ́í mvénní. Ŋgə́ ɓa kɨ́klénɨ mvéín kɨ́ no kárȩ́ȩ́ á, ŋgə́ a tòŋkɨ́cè orɨ́b kɨ́ wa du lɨ́ɨ̀mnɨ lɨ́mîn ɗàwáá no.»
18Ɓe sóóŋ bɨ kù ví̧i̧ á Jâŋ ya ɓéenakom nɨ̀vɨ́tɨ̀b Kìn Nyɔ̧ɔ̧́. 19Ɨ́dù Jâŋ ɨ́ yètè Hèrôdə̀ nò yi du mvèìn jírií ɓe àm ŋgə́ yi ɓucu Hèròdìyâdə̀, gwi mwin yàá noò, ɓe àm ŋgə́ ya ndɨŋɓwée nɨ́ɨ́b ɓáŋhɨ́b kù ví̧i̧. 20Hèrôdə̀ ɨ́ ndɨ̀ŋndóŋɓàgì ɓáŋhîn ji ɓe kɨ́ ŋgə́ yi kɨ́klé Jâŋ nìrì rè.
Kɔ ə́mní Yésùù
(Góòmɓwê Mt 3.13-17; Mk 1.9-11)
21Cùr Jâŋ ya kɔɔcáŋhȩ nɨ̀vɨ́tɨ̀b kɔ ə́mní, ŋgə́ ɨ́ kɔ̀ɔ̀ɓwê Yésù. Mvókín Yésù yi du Mèín yóŋniì, á ɓɨɨr ya nəte. 22Nyéhè Sarîn ɨ́ sô ŋgə́ ya hȩ mbɨmbɨm ndɨ u̧. Á kúu nyindíí tasówo ɓɨllin ɨnè: «Wu mwin ɗûnɨ́mí moò mɨ caré á, mɨ̀tɔ̀k moò lâs á wu ya.»
Tákɨ̀rɨ́b ndùtì ndútí Yésùù á rè
(Góòmɓwê Mt 1.1-17)
23Ɓwâ Yésù yi yaré ə́r nóò, ŋgə́ yaá sàmàìn du ɓe dáín vɨríí ɨ́ cóóŋ. Kùb yaá lə́ə̀mnɨ ŋgə́ nɨ mwin Yòsə̂b nò yi du mwin Hèlíì á. 24Hèlî yɨɨ́mndóŋcè mwin Màtáàt á. Màtât cè mwin Lèvíì, Lèvî cè mwin Mèèlkíì, Mèèlkî cè mwin Jànáyì, Jànáyì cè mwin Yòsə́ə̀b. 25Yòsə̂b cè mwin Màtàtíyàs, Màtàtíyàs cè mwin Àmóòs, Àmôs cè mwin Nàhúùm, Nàhûm cè mwin Èslíì, Èslî cè mwin Nàgáyì, 26Nàgáyì cè mwin Máàt, Mât cè mwin Màtàtíyàs, Màtàtíyàs cè mwin Sèmééìn, Sèméìn cè mwin Jòsə́ə̀k, Jòsə̂k cè mwin Jòdáà. 27Jòdâ cè mwin Jwànáàŋ, Jwànâŋ cè mwin Résàà, Résà cè mwin Jòròbàbéèl, Jòròbàbêl cè mwin Sàlàtíyèèl, Sàlàtíyèl cè mwin Nérìì, 28Nérì cè mwin Mèèlkíì, Mèèlkî cè mwin Àdíì, Àdî cè mwin Kòsáàm, Kòsâm cè mwin Èlmàdáàm, Èlmàdâm cè mwin Éèr, 29Éèr cè mwin Yésùù, Yésù cè mwin Èlìyèséèr, Èlìyèsêr cè mwin Jòríìm, Jòrîm cè mwin Màtáàk, Màtâk cè mwin Lèvíì, 30Lèvî cè mwin Sìmèyóòŋ, Sìmèyôŋ cè mwin Jùdáà, Jùdâ cè mwin Yòsə́ə̀b, Yòsə̂b cè mwin Jònáàm, Jònâm cè mwin Èlìyàkíìm, 31Èlìyàkîm cè mwin Mèlèyáà, Mèlèyâ cè mwin Mènnáà, Mènnâ cè mwin Màtátàà, Màtátà cè mwin Nàtáàŋ, Nàtâŋ cè mwin Dàvíìt, Dàvît cè mwin Jèséè, 32Jèsê cè mwin Jòbéèd, Jòbêd cè mwin Bòwáàs, Bòwâs cè mwin Sàláà, Sàlâ cè mwin Nàsóòŋ, 33Nàsôŋ cè mwin Àmìnàdáàb, Àmìnàdâb cè mwin Àdɨ̀míìn, Àdɨ̀mîn cè mwin Àrníì, Àrnî cè mwin Èsróòm, Èsrôm cè mwin Fàréès, Fàrês cè mwin Jùdáà, 34Jùdâ cè mwin Yákòòb, Yákòb cè mwin Ìsáàk, Ìsâk cè mwin Àbɨ̀ràháàm Àbɨ̀ràhâm cè mwin Tàráà, Tàrâ cè mwin Nàkóòr, 35Nàkóòr cè mwin Sèrúùk, Sèrûk cè mwin Ràgóò, Ràgô cè mwin Fàléèk, Fàlêk cè mwin Èbéèr, Èbéèr cè mwin Sàláà. 36Sàlâ cè mwin Kàyìnáàm, Kàyìnâm cè mwin Àrfàksâd, Àrfàksâd cè mwin Séèm, Sêm cè mwin Nòwéè, Nòwê cè mwin Làméèt, 37Làmêt cè mwin Màtùsálàà, Màtùsálà cè mwin Hèróòk, Hèrôk cè mwin Jàréèd, Jàrêd cè mwin Màlèléèl, Màlèlêl cè mwin Kànáàm, 38Kànâm cè mwin Ènóòs, Ènôs cè mwin Séèt, Sêt cè mwin Àdáàm, Àdâm cè mwin Mèèín.
Currently Selected:
Lúkàs 3: NTV
Highlight
Share
ਕਾਪੀ।
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
