Lúkàs 1
1
Yààr nyindíí
1Tèwòfîl, nɨ̀vɨ́tɨ̀b ví̧i̧ yi kəktɨ́ tɨ̀nnɨ nɨ́ɨ́b yi ndóŋ mvókín nɨ́mè. 2Ŋgáb ya tɨnnaá nɨ́m nɨ́ɨ́b kɨ́ hàrák ɓe nɨ́ɨ́b nùb ya du mɨ̀náméé yi pə́ɓa ɓe íí yàwòó yàllì yi átɨna nɨ́mè. Nùb kɨ́ yaá ɓwê ɓe ə́r tatee kìn Mèèín. 3Àm kɨ́ á, mɨ ɓwê, mɨ ya fɔ́nyaaŋɓa mîn nɨ́ɨ́b lâs ya ndóŋ yàwòó yàllì ru. Tá, á mɨ ta mɨ átɨ̀nàyè wu nɨ́ɨ́b mɨ ya óknyaaŋndé láár. 4Mɨ ndɨŋ u̧ àm wu a ɗə̀ə̀ŋmèɓà ɨnayâna tɔ̀ɔ́ wu ya ók lè àmɨɨr á na á.
Dùgal Mèèín gewotɨ́ kìn kùb ɓa fènnɨ Jâŋ nò kɔhɨ kùb kɔ ə́mní
5Ɓwâ kɨ́ Hèrôdə̀ a kɨ́kce Jùdê bɨ̂ŋ, nɨ̀ŋgwá kù ɨ́r yi du Càkɨ́ríyàà yaá kpáín nùb na satɨgàà Àbìyàà yi kɨ́kkomndé no. Gwi noò Èlísàbèt yɨɨ́m nyȩ nɨ̀gáŋ satɨgàà kù ɨ́r yi du Àrɔ́ɔ̀ŋ á. 6Ŋgáb bɨrɨ́b lâs yaá ɗɨ́ɗɨ̧́ Mèèín íhín. Ŋgáb yaácè jə̀ŋɓànɨ ɓíhɨ̀b Kékéé, nɨ́m yɨ̀tíí no ɗàà. 7Ɨ́dù ŋgáb ya bɨ́ mwin fèìnwá, ɓetí Èlísàbèt ya nɨ́ mámmgbu̧ á. Ŋgáb bɨrɨ́b lâs yaácè bɨ́ kwéhɨ́b.
8Ye kù, Càkɨ́ríyà yaá ə́r na satɨgàà Mèèín tíí ə́nnɨ, ɓetí yɨɨ́m jíìb ə́ré kpáín ŋgə́ ya du nóò á. 9Hȩ ɗɨ́m ŋgáb nùb na satɨgàà, dùr ya ndóbléé Càkɨ́ríyà ya ye kɨ́. Ŋgə́ ɨ́ lê yɨ́ sarîn. Ŋgə́ ɨ́ gì yíìnɨ nyuŋ múbí. 10Mvókín Càkɨ́ríyà ya du nyuŋ ndè yíìniì, nɨ̀vɨ́tɨ̀b ví̧i̧ yaácè lúu Mèín yóŋnɨ. 11Hȩ Càkɨ́ríyà ya du yó tə̧ə̧́ kwe, á dùgal Mèèín kù ya túumna ŋgə́ síí. Dùgal kɨ́ yaá ə́ŋhîn tə́bə̀rè múbí kɨ́ ya ŋgáár lame. 12Ɓwâ Càkɨ́ríyà yi pə́ ŋgéé, njɔ̧̀ ɨ́ vɨ̀ndɨ̀rê ŋgə́ ɓɔ̧ɔ̧; vùù ɨ́ bì ŋgə́. 13Ɨ́dù dùgal Mèèín ɨ́ tànà ŋgə́: «Wu wu vùù ô Càkɨ́ríyà, ɓetí Mèín óktɨ́ mɨ̀yú̧ wóò. Gwi woò Èlísàbèt ɓa fènnɨ mwin nɨ̀ŋgwá á, wu a bɨ́nà ŋgə́ ɨ́r ‹Jâŋ›. 14Wu ɓa ókɓànɨ mɨ̀tù cei á, nɨ̀vɨ́tɨ̀b ví̧i̧ a tɔ̀k àm kùb fein ŋgéé. 15Kékéé íhín, ŋgə́ ɓa dùɓà nɨ nò dɨɨ́m á. Súm kù tɨ̀ nɨ ŋgə́ ɓɔ̧ɔ̧ lə́ɓàr; dùgɨ̀ kɨ́ tamnì, dùgɨ̀ kɨ́ njéin. Ŋgə́ ɓa dùnɨ yúklîn ɓe Nyéhè Sarîn yàhô̧ yà nóò ɓɔ̧ne á. 16Ŋgə́ ɓa ndɨ̀ŋnɨ munɨ́b Ísràyéèl ví̧i̧ ɓàndɨ̀cùré Kéké nò du Mèín ŋgábè no á. 17Ŋgə́ nɨ̀mɨr ɓa gɨ̀séɓànɨ Mèèín tíí ɓe Nyéhè ɨ́ nyòm yi ɗə́əŋkom Èlî tɨ́kìn Mèèín ndɨ á, ɓe ɨ́r ŋgə́ nyaŋcu táàb ɓe munɨ́bí, ŋgə́ a ndɨ̀ŋ nùb ŋgób ɓáŋhɨ́bí dùcù ɓe kɨ̀cáàb nùb ɗɨ́ɗɨ̧́ɨ̧́; àm nyaaŋkɨ́na Kéké gbàŋ du kə́sə́k ŋgə́ ə́nnàniì.»
18Á Càkɨ́ríyà ta: «I̧ á cè mɨ ɓa ɗə̀ə̀ŋmèɓànɨ ɓè àm kɨ́ du àmɨrìí; ɓetí nɨ́me gwi moò maá nɨ rè gbòkjòk.»
19Kí á dùgal Mèèín tacuna ŋgə́ ɨnè: «Mɨ Gábɨríyà á, mɨ á dùnɨ gín Mèèín àm ə́nna ŋgéé. Ŋgə́ ɨ́ tómwo mɨ, mɨ gò wu nyìnnànɨ, mɨ a tànà wu kìn nyɔ̧ɔ̧́ kɨ́ ru. 20Ɨ́dù hȩ wu du wú ə́ə̀mwá nɨ́m mɨ nyinna wu ɓace ndɨ̀ŋmènɨ jíì Mèín ɓwállé no kɨ́ rèé, wu á sènnɨ mùkà, wu a dù wú ɓɔ̧ wòr há̧á̧ hȩ nɨ́m kɨ́ ɓa ndɨ̀ŋniì.»
21Mvókín kɨ́ no, nɨ̀vɨ́tɨ̀b yaácè móŋhánɨ Càkɨ́ríyà lúu, ŋgáb a fɔ́ce àm níì á ŋgə́ meré nɨ́ yɨ́ sarîn ku. 22Ɨ́dù ɓwâ ŋgə́ ya fó̧cuworé, wènàá ŋgáb ɓɔ̧ ɨ́ yɔ̂ ŋgə́. Á nùb kɨ́ ɗəŋhȩ ɨnayânaá ŋgə́ péé nɨ́ nɨ́m kù yɨ́ sarîn ku. Ŋgə́ yi nyinnakom hácɨ nɨ ŋgáb ɓe yáhèé ŋgállí.
23Ɓwâ Càkɨ́ríyà yi cáŋhȩ jíìb ə́ré noò Dúú Jíri Mèèín noò, ŋgə́ ɨ́ gɨ̀cù no yó. 24Cùr kɨ́ no, jíìb kù no, á gwi noò Èlísàbèt ya gam ɓur. Ŋgə́ ɨ́ yà yòòtèènɨ síí há̧á̧ njumi ŋgiì. Ŋgə́ yaá tàkòmnɨ: 25«Nɨ́m Kéké ndɨŋna mé á rè: ŋgə́ pə́wúgií mɨ íí ya ákɨ́nɨ mɨ sə̀ré ŋgwéé nɨ̀vɨ́tɨ̀bì tíí.»
Dùgal Mèèín gewotɨ́ kìn kùb ɓa fènnɨ Yésùù
26Jâŋ á cè só njumi tínmwi̧, á Mèín tómge dùgal noò Gábɨríyà ŋgə́ gɨ̀ Nàsàrêt, ɗɔ̀ɔ́b Gàlìléè no, 27yɨ́ mɨkóóme máyɨr kù yi du kóóm Yòsə̂b, nyȩ Dàvíìt. Ɨ́r mɨkóóme kíì yaá Màríyà. 28Dùgal Mèèín ɨ́ lə́sò ŋgéé yó, ŋgə́ ɨ́ tànà ŋgə́ ɨnè: «Ók mɨ̀tù, Kéké yúutɨ́ wu ɓe ndɨ̀ŋnyàáŋ noò, ŋgə́ á ɓe wu.»
29Kɨ̀cáàb ɨ́ tùklɨ̀ɓà Màríyà ŋgwȩ́ȩ́, á ŋgə́ ya mánɨ njàb nyindí kíì. 30Dùgal Mèèín ɨ́ tànà ŋgə́: «Wu wu vùù ô Màríyà, ɓetí Mèín túumnatɨ́ wu nyàŋnjɔ̧̀ noò. 31Wu ɓa gàmnɨ ɓur á, wu a fèìn mwin nɨ̀ŋgwá; wu a bɨ́nà ŋgə́ ɨ́r Yésù. 32Ŋgə́ kwá du nò jíri, kùb kwá ɓé ŋgə́ Mwin Mèín nò ndóŋ nɨ́ɨ́b lâs. Mèín nò du Kékéé ɓa ndɨ̀ŋnɨ ŋgə́ dù mvèìn hȩ tákɨ̀r noò Dàvît á. 33Ŋgə́ kwá ŋgáŋ gbàŋ Ísràyéèl ya ŋgɔ̧́ɔ̧̀ gwìí mwi̧í̧ kwá duce nɨ́ cɔ̧́re.» 34Kí á Màríyà fɔ́ dùgal Mèèín ɨnè: «Nɨ́m kɨ́ tɨ̀ ndɨŋce ɨna, hȩ mɨ duye mɨ́ máyɨr lè?» 35Á dùgal Mèèín ya piina ŋgə́ ɨnè: «Nyéhè Sarîn ɓa wu ya sówònɨ á, ɗà nyòm Mèín nò du jíri ndóŋ nɨ́ɨ́b lâs a fúhè wu ɓe cɔ̧̀ noò. Àm kɨ́ á mwin wu ɓa fènnɨ kɨ́, kùb kwá ɓé ŋgə́ nò járkɨ́ták, mwin Mèèín ɓwê ru. 36Péye Èlísàbèt nò wo gbàŋné kùb ya takom mámmgbu̧ rɨ́ á ɓwê ɓe mwin só, á cɨ̀ njumi tínmwi̧, dugɨ hȩ ŋgə́ du kwéhɨ́nne. Mwin kɨ́ nɨ̀ŋgwá á. 37Ɓetí nɨ́m yɔ́k Mèèín nɨ ɗàà.» 38Kí á Màríyà ta: «Mɨ du mɨ nɨ̀kɨ̧́ɨ̧ Kékéé á, nɨ́ɨ́b lâs ndɨ̀ŋ hȩ wu ta kɨ́.» Á dùgal Mèèín éímbɨ́kkɨ́so ŋgə́.
Màríyà gií lɨ́ŋnɨ Èlísàbèt
39Jíìb kɨ́ no, Màríyà ɨ́ ə́llê gɨ̀kɔ́ɔ̀nɨ ti Jùdê kwɨ́í kù no, ɗɔ̀ɔ́b ɓəbì. 40Ŋgə́ ɨ́ lê Càkɨ́ríyàà yó, ŋgə́ ɨ́ nyìndè Èlísàbèt. 41Ɓwâ Èlísàbèt yi ók nyìndí Màríyàà, mwin nó ɓɔ̧ne ɨ́ tɨ̀ŋ; ɗà Nyéhè Sarîn ɨ́ lê no só. 42Á Èlísàbèt taɓa kúu còóm ɨnè: «Mèín famɓatɨ́ wu ndóŋtɨ́ nɨ̀gub lâs, mwin wó ɓɔ̧ɔ̧ ɗàrɨ́ á ɓwê ɓe faám kɨ́. 43Mɨ macè na, kɨ́ yà Kéké móò goce mɨ lɨ́ŋniì? 44Ɓetí ôó mɨ ók nyìndí wóò, mwin mó ɓɔ̧ɔ̧ rè ɨ́ tɨ̀ŋɓà nɨ́ ɓe mɨ̀tù. 45Mɨ̀tù á ɓe wu, wu nò ə́mne ɨnayâna nɨ́m Kéké tana wé ɓa ndɨ̀ŋnɨ á rè!»
Wàì Màríyà ya soŋndé
46Kí á Màríyà tagi:
I̧i̧, á mè àmɨrì, Kéké á jíri, á ɗúnɨ mɨ ŋgə̀m ŋgə́,
47njɔ̧̀ moò á ɓà ɓe mɨ̀tù ɓe ɨ́r Mèín nò du Tɨ́ɓə́r moò;
48ɓetí ŋgə́ ŋgeesówotɨ́ íí mwàmí mɨ nò du nɨ̀kɨ̧́ɨ̧ ti nóò ya.
I̧i̧, yàrénɨ ɗàrò, nùb lâs kwá talɨ́ŋ mɨ á ɓe dɨmɨɨr.
49Ɓetí Mèín nò du ɓe nyòme lâs ndɨŋnatɨ́ mɨ nɨ́ɨ́b kàtɨ́b nyɔ̧ɔ̧́,
ɨ́r noò á ɓe sɨr sɨsaréé.
50Ŋgə́ ɓa dùnɨ ɓwâ lâs njɔ̧̀ nyɔ̧ɔ̧́
ɓe péín nùb du ŋgə́ jə̀ŋniì á.
51Ŋgə́ ndɨŋɓatɨ́ ə́rɨ́b kàtɨ́b ɓe nyòm kpɨ́ŋgí ŋgáár noò,
ŋgə́ teekíí nùb wúte síhé.
52Ŋgə́ ákíí mvènnɨ́b kò mvènnì ŋgábè ya,
ŋgə́ ɨ́ bɨ̀cùwû nùb saai.
53Ŋgə́ naɓatɨ́ nùb ók cɨ̧̀ɨ̧́ nɨ́ɨ́b nyɔ̧ɔ̧́ cei,
ɗà ŋgə́ ɨ́ jùcùcê nùb njɔdìì ŋgáár sam.
54-55Ŋgə́ kpɔ́ktɨ́ gbàŋ Ísràyéèl nò du nò no ə́ré,
ŋgə́ nɨ ìyɔ̀kwá túùmnànɨ
Àbɨ̀ràhâm ɓe nyȩrɨ́b nyàŋnjɔ̧̀ noò kɨ́ gwìí mwi̧í̧.
Hȩ ŋgə́ ya ɓwáína tákɨ̀rɨ́b nɨ́mè.
56Màríyà ɨ́ gwîn yɨ́ Èlísàbèt sàmàìn njumi taarɨ́b, ŋgə́ ɨ́ gɨ̀cù no kwé.
Fin Jâŋ nò kɔhɨ kùb kɔ ə́mní
57Ɓwâ Èlísàbèt yi ɓa fènniì ɨ́ ɗóhè, ɗà ŋgə́ ɨ́ fèìn mwin nɨ̀ŋgwá. 58Nùb Èlísàbèt gín síhé ɓe nùb no gbàŋné ɨ́ ô hȩ Mèín ya túumna ŋgə́ lɨ̀m nyàŋnjɔ̧̀ kàm kíì, ŋgáb ɨ́ yà tɔ̀kɓáànɨ ɓe ŋgə́. 59Hȩ náná kɨ́ ya féín jíì sə́rì, kùb ɨ́ gò ŋgə́ ndɨ̀ lə́nànɨ; kùb yi ɗú ŋgə́ lòndɨ̀nɨ tá noò Càkɨ́ríyà. 60Ɨ́dù, yà nóò ɨ́ tà: «Ɗàà, ɨ́r noò ɓa nɨ dùnɨ Jâŋ á.» 61Á ŋgáb ta: «Nò kù ma nɨ wo gbàáŋ ɓe ɨ́r kɨ́ ɗàà ye!» 62Ŋgáb ɨ́ yáànà tá muní ŋgáár fɔ́nɨ ŋgə́ ɨ́r ŋgə́ ɗú bɨ́nànɨ muní. 63Càkɨ́ríyà ɨ́ yáàcùnà ŋgáb ŋgáár ɓwèìnɨ nɨ́m ŋgə́ tɨnndé ɨ́r muní ya kwe, ɗà ŋgə́ ɨ́ tɨ̀ìn: «Ɨ́r noò á Jâŋ.» Vùùm ŋgábè lâs ɨ́ gbɨ̀ŋnè àm kɨ́. 64Ɓè mu̧u̧ ɓɔ̧ Càkɨ́ríyàà ɨ́ kùùmcù, ŋgə́ ɨ́ yà wáàhó̧nɨ nyindí, ŋgə̀mnɨ Mèín. 65Kí á nùb yi du gɨ́ní ɓèé lâs ókɓa vùù. Kùb ɨ́ yà átɨ̀tèènɨ sà̧à̧ nɨ́ɨ́b tɨ ndóŋ kíì ŋgɨ̀ŋgɨ́ŋ ɗɔ̀ɔ́b ɓəb Jùdéè lâs. 66Nùb lâs ya du óknɨ sà̧à̧ kíì yaá mánɨ ɗə̀ə̀ŋnɨ njàb nɨ́m yi ndóŋ kɨ́, ŋgáb a fɔ́teece: «Mwɨi lè kwá duye i̧?» Nyòm Kékéé taámèɓà ɓe ŋgə́.
Càkɨ́ríyà á ŋgə̀mnɨ Mèín
67Kí á Nyéhè Sarîn yi lə́ Càkɨ́ríyà nò yi du tá muní só, ɗà ŋgə́ ɨ́ yàrê nyìnnɨ hȩ tɨ́kìn Mèèín ɨnè:
68Dɨmɨɨr dùɓà ɓe Kéké nò du Mèín gbàŋ Ísràyéèl,
hȩ ŋgə́ pə́wú íí gbàŋ noò ya, ŋgə́ ɨ́ gò ŋgə́ cénniì.
69Kpáín nyȩrɨ́b Dàvíìt nò du nò ə́ré noò,
Ŋgə́ nahó̧tɨ́ nɨ́m Tɨ́céín du ɓe nyòmeè.
70Nɨ́m ŋgə́ ya tawo tɨ́kɨ̀nɨ́b sarɨ́b noò ɓɔ̧ɔ̧ kúríí á.
71Ŋgə́ ya ɓwáttɨ́ nɨ́m ɓátɨ̀hó̧nɨ nyòm nùb ɓəndɨ nɨ́mè,
ɓe nùb ji nɨ́mè no.
72Ŋgə́ ɨ́ tà ní ɓa túùmnànɨ tákɨ̀rɨ́b nɨ́mè nyàŋnjɔ̧̀ á,
ní a vùùŋcù jin nyàáŋ níì.
73Ɓetí Mèín ya gunaá Àbɨ̀ràhâm tákɨ̀r nɨ́mè ndùtì ndútí ɓɔ̧, ŋgə́ ɨ́ tà,
74ní kwá céínhó̧ nɨ́m nyòm nùb ɓəndɨ nɨ́mè no,
àm nɨ́m a ə́nnà ní, nɨ́m vùù kù lùwáá,
75nɨ́m a dùɓà sarɨ́b, nɨ́m a dùkwà ɗɨ́ɗɨ̧́ no tíí,
mè nɨ́mè no ye lâs.
76Mwin móò, kɨ́ woò cè, kùb ɓa wu ɓénɨ tɨ́kìn Mèín nò ndóŋ nɨ́ɨ́b lâs á,
ɓetí wu ɨ́ ɓa gɨ̀ɓànɨ Kéké nɨ̀mɨrí tíí,
àm wu nyaaŋkɨ́ jɨ̀r ŋgéé,
77wu a ndɨ̀ŋkwà gbàŋ noò ɗə̀ŋhɨ̀ ɨnayâna Mèín ɓátií vúm,
ɓe tɨ́rèé ŋgə́ tɨ́í cum vúmè.
78Ɓetí Mèín nɨ́mè á ɓe njɔ̧̀ ɓwéin, ɓe njɔ̧̀ nyɔ̧ɔ̧́,
ŋgə́ ɓa ndɨ̀ŋnɨ mwa kù ɓə̀ə̀só nɨ́m ya hȩ mvii fó̧ fó̧ne á.
79Àm ɓəəna nùb du sɨ́mnɨ̀rí ɓe nùb du óknɨ vùù cwéé,
àm ɗə́əŋndé gurub gùrí nɨ́mè ju ɗóóŋ noò.
80Mutí ɨ́ yà hàmnɨ, nyéhè noò a tamce. Ŋgə́ ɨ́ yà dùtèènɨ yɨ́ nɨ̀vɨ́tɨ̀b ya du ɗàwáá há̧á̧ hȩ ye ŋgə́ ya túumna gbàŋ Ísràyéèl síhé.
Currently Selected:
Lúkàs 1: NTV
Highlight
Share
ਕਾਪੀ।
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
