Lioka 22

V. NY FIJALIAN’NY TOMPO

Tetika hamelezana an’i Jesoa ary famadihan’i Jodasy

(Jereo Mt 26,1-5; Mk 14,1-2; Jn 11,47-53)

1Efa mby akaiky ny fetin’ny Azima atao hoe Paka, 2ary ny lohandohan’ny mpisorona sy ny mpanora-dalàna dia nikaroka izay hevitra hamonoana an’i Jesoa, fa natahotra ny vahoaka izy ireo.

(Jereo Mt 26,1-16; Mk 14,10-11)

3Nidiran’i Satana kosa i Jodasy, ilay atao hoe IsKariota, anisan’ny roa ambin’ny folo lahy, 4ka lasa izy nankany amin’ny lohandohan’ny mpisorona sy ny manam-pahefana niraharaha ny amin’izay hanolorany Azy amin’izy ireo. 5Dia faly izy ireo ka nanaiky hanome vola azy. 6Ary nanaiky izy ka nikendry izay fotoana tsy hisy olona, hanolorany Azy.

Fanomanana ny sakafo Paka

(Jereo Mt 26,17-19; Mk 14,12-16)

7Dia tonga ny andron’ny Azima izay tsy maintsy hamonoana ny zanak’ondrin’ny Paka, 8ka naniraka an’i Piera sy i Joany i Jesoa nanao hoe: «Mandehana manamboatra ny Paka hohanintsika.» 9«Aiza no tianao hanamboaranay azy?» hoy ireo. 10Dia hoy Izy taminy: «Indro, rehefa miditra ao an-tanàna ianareo, dia hifanena amin’ny lehilahy anankiray mitondra siny feno rano, ka manaraha azy any amin’izay trano hidirany, 11dia lazao amin’ny tompon-trano hoe: ‹Izao no asain’ny Mpampianatra lazaina aminao: Aiza ny efitrano hihinanako ny Paka miaraka amin’ny mpianatro?› 12Dia hotoroany efitrano malalaka àry fanaka ianareo, ka ao no amboary izay ilaina.» 13Dia nandeha izy ireo ka nahita araka izay nolazainy taminy, ary nanamboatra ny Paka.

Ny sakafo Paka

14Nony tonga ny fotoana, dia nipetraka hihinana Izy sy ny Apôstôly roa ambin’ny folo lahy.

15Ary hoy Izy tamin’izy ireo: «Naniry dia naniry hiara-mihinana ity Paka ity aminareo Aho alohan’ny hijaliako, 16fa lazaiko aminareo fa tsy mba hihinana azy intsony aho mandra-pahatanterany#22,16 Mandra-pahatanterany. Mandra-pahatongan’ny Paka mandrakizay any an-danitra. any amin’ny fanjakan’Andriamanitra.» 17Dia nandray kalisy#22,17 Nandray kalisy. Angamba tsy ilay kalisy hohamasinina io; ary raha ohatra ka izy aza, tsy maninona, satria nandray Izy taloha, nefa tatỳ aorian’ny fankamasinana ny mofo vao nanamasina azy kosa. Izy ka nisaotra, ary nanao hoe: «Raiso ity, ka zarao aminareo; 18fa lazaiko aminareo fa hatramin’izao dia tsy hisotro ny vokatry ny voaloboka intsony Aho mandra-pahatongan’ny fanjakan’Andriamanitra.»

Ny namoronana ny Eokaristia

(Jereo Mt 26,26-28; Mk 14,22-24; 1Kôr 11,23-25)

19Raha efa izany, dia nandray mofo Izy, ka nony efa nisaotra dia namaky azy, sy nanome azy ireo nanao hoe: «Vatako ity izay atolotra ho anareo; manaova izany ho fahatsiarovana Ahy#22,19 Ho fahatsiarovana Ahy. Ho fahatsiarovana ny fijaliany sy ny fahafatesany indrindra izany (1Kôr 11,26)..» 20Dia nataony toy izany koa ny kalisy rehefa avy nihinana, ka hoy izy: «Ity kalisy ity no fanekena vaovao amin’ny Rako, izay alatsaka ho anareo.»

Fanambaràna ny hamadihan’i Jodasy

(Jereo Mt 26,20-25; Mk 14,17-21; Jn 13,21-30)

21«Kanefa indro ny tanan’izay mamadika Ahy#22,21 Ny tanan’izay mamadika Ahy. Toa efa voalazan’ny Tompo aloha izany, sady taloha koa izy ireo no niady hevitra, araka ny filazan’ny Evanjely hafa. efa mby eto amiko ambony latabatra. 22Raha ny Zanak’olona, dia mandeha araka ny lahatra; fa loza no hanjò an’izay lehilahy hamadika Azy.» 23Dia nifanontany ny mpianatra hoe iza re no dia hahavita izany amin’izy ireo.

Iza no lehibe indrindra

(Jereo Lk 9,46; Mt 20,25-27; Mk 10,42-44)

24Ary velona koa ny ady hevitra tamin’izy ireo, momba ny hahalalany izay lehibe indrindra amin’izy ireo, 25ka hoy i Jesoa taminy: Amin’ny Jentily ny mpanjaka no mizaka azy rehetra, ary izay mandidy azy no atao hoe mpanao soa; 26fa aminareo kosa tsy mba toy izany, fa aoka izay lehibe aminareo no ho toy ny zandry, ary izay mandidy no ho toy ny mpanompo. 27Fa iza moa no lehibebe kokoa, ny mihinana amin’ny latabatra va sa ny manompo? Moa tsy ny mihinana amin’ny latabatra va? Ary Izaho anefa eto aminareo dia toy ny mpanompo.

Valisoa nampanantenaina ny Apôstôly

(Jereo Mt 19,28)

28Ianareo moa, naharitra nanaraka Ahy tamin’izay nanjò Ahy, 29Izaho kosa hanamboatra fanjakana ho anareo, tahaka ny nanamboaran’ny Raiko fanjakana ho Ahy, 30mba hihinananareo sy hisotroanareo eo amin’ny latabatro any amin’ny fanjakako, ary hipetrahanareo amin’ny seza fiandrianana hitsara ny foko roa ambin’ny folo amin’i Israely.

Fanambaràna ny hiverenan’i Piera sy ny handavany

(Jereo Mt 26,31-35; Mk 14,27-31; Jn 13,26-38)

31Ary hoy ny Tompo: «Ry Simôna, ry Simôna, indro i Satana nitady hikororòka anareo tahaka ny vary, 32fa Izaho nangataka ho anao, mba tsy ho lavo ny finoanao, ary rehefa mibebaka ianao dia hamafiso ny rahalahinao.» 33Ary hoy i Piera taminy: «Vonon-kanaraka Anao aho, Tompoko, na ho ao an-tranomaizina, na ho any amin’ny fahafatesana aza.» 34Fa hoy i Jesoa: «Lazaiko aminao, ry Piera, fa mbola tsy haneno ny akoho anio, dia handà intelo ho tsy mahalala Ahy ianao.»

Ny fotoanan’ny ady hahatapaka ny zavatra rehetra

35Ary hoy koa Izy tamin’ny mpianany: «Raha naniraka anareo tsy nitondra kitapom-bola na kitapom-batsy na kiraro Aho, moa orin-javatra va ianareo?» 36«Tsy orin’inon’inona izahay» hoy izy ireo. Dia hoy Izy taminy: «Fa amin’izao kosa#22,36 Fa amin’izao kosa, sns. Dia hahantra ianareo sy mafy ny hanjò anareo vetivety rehefa mitory ny Evanjely ianareo; teny fanoharana anefa no nilazan’ny Tompo izany, fa diso ny Apôstôly ka nanolotra sabatra roa (and faha-38). izay manan-kitapom-bola aoka hitondra azy; toy izany koa izay manan-kitapom-batsy, ary izay tsy manan-tsabatra aoka hivarotra ny akanjony ka hividy iray; 37fa lazaiko aminareo fa ity teny voasoratra ity koa tsy maintsy ho tanteraka amiko, dia ilay hoe: Natao lasitra iray amin’ny ratsy fanahy Izy; fa efa ho tapitra daholo ny amiko.» 38Dia hoy izy ireo: «Tompoko, indreto misy sabatra roa» Dia hoy i Jesoa taminy: «Ampy izay#22,38 Ampy izay: Aoka izay, fa tsy ilaina. Ho azon’ny Apôstôly mazava izany vetivety rehefa hitany ny Tompony manolo-tena eo am-pelatanan’ny fahavalony..»

Tao an-tendrombohitr’ôliva

(Jereo Mt 26,36-46; Mk 14,32-42)

39Dia nivoaka nankany an-tendrombohitra Oliva araka ny fanaony Izy, ka nanaraka Azy koa ny mpianany. 40Nony tonga tany Izy dia nanao tamin’izy ireo hoe: «Mivavaha mba tsy ho azon’ny fakam-panahy ianareo.» 41Dia nihataka tamin’izy ireo tokony ho tra-toraka Izy ka nandohalika, dia nivavaka, 42nanao hoe: «Raiko ô! raha sitrakao, halaviro Ahy ity kapoaka ity; ny sitraponao anefa no aoka ho tanteraka, fa tsy ny Ahy.» 43Tamin’izay dia nisy Anjely anankiray avy tany an-danitra niseho taminy sy nankahery Azy. Dia voan’ny fiadiana aina Izy, fa vao mainka nivavaka mafimafy kokoa. 44Ary nanjary toy ny ra ny hatsembohany sady nipotrapotraka tamin’ny tany. 45Nony nitsangana avy nivavaka Izy, dia nankeo amin’ny mpianany ka nahita azy matory noho ny alahelo, 46ary nilaza taminy hoe: «Nahoana no matory ianareo? Mifohaza, ka mivavaha mba tsy ho azon’ny fakam-panahy ianareo.»

Ny nisamborana an’i Jesoa

(Jereo Mt 26,47-56; Mk 14,43-50; Jn 18,3-11)

47Raha mbola niteny Izy, dia indro nisy andian’olona maromaro nitranga, ka ilay atao hoe Jodasy, anankiray tamin’ny roa ambin’ny folo lahy, no loha lalana, ary nanatona an’i Jesoa ilay io mba hanoroka Azy. 48Ary hoy i Jesoa taminy: «Ry Jodasy, dia fanorohana lahy no amadihanao ny Zanak’olona?» 49Nony hitan-dry zareo teo amin’i Jesoa izay hanjò, dia hoy izy taminy: «Tompoko, mba hamely amin’ny sabatra va izahay?» 50Dia nasian’ny anankiray taminy tokoa ny mpanompon’ny lehiben’ny mpisorona, ka afaka terỳ ny sofiny ankavanana. 51Fa hoy i Jesoa: «Aoka izay» Dia nanendry ny sofin-dralehilahy Izy, ka nahasitrana azy. 52Ary hoy i Jesoa tamin’ny lohandohan’ny mpisorona sy ny mpandraharaha amin’ny Tempoly ary ny loholona izay tonga teo handray Azy: «Mova tsy ny hisambotra jiolahy izato fiavinareo, mitondra sabatra sy langilangy! 53Teo aminareo isan’andro tao an-Tempoly Aho, nefa tsy nikasi-tanana Ahy akory ianareo; fa izao tonga ny fotoanareo sy ny herin’ny maizina.»

Ny fandavan’i Piera

(Jereo Mt 26,69-75; Mk 14,66-72; Jn 18,15-18, 25-27)

54Dia nisambotra Azy izy ireo ka nitondra Azy tany an-tranon’ny lehiben’ny mpisorona. I Piera izany nanaraka teny lavidavitra eny ihany. 55Ary nampirehitra afo teo afovoan’ny tokotany ny olona, dia nipetraka nanodidina, ka mba niara-nipetraka taminy teo koa i Piera. 56Nisy ankizivavy anankiray kosa nahita azy nipetraka tao akaikin’ny afo, ka nijery azy, dia nanao hoe: «Ity koa niaraka taminy.» 57Fa nandà i Piera nanao hoe: «Ravehivavy, tsy mahalala Azy akory aho.» 58Nony afaka kelikely dia nisy lehilahy anankiray koa nahita azy ka nanao hoe: «Ianao koa lahy naman’irony olona irony.» Fa hoy i Piera: «Ry sakaiza, tsy namany akory aho.» 59Ora iray taorian’izany, dia nisy hafa nilaza tamim-pitokiana hoe: «Tena marina raha tsy namany koa ralehilahy ity, satria Galileanina izy.» 60Dia hoy i Piera: «Ry sakaiza, tsy fantatro izay lazainao.» Niaraka tamin’izay raha mbola niteny izy, dia naneno ny akoho. 61Ary nitodika nijery an’i Piera ny Tompo, ka tsaroan’i Piera ilay tenin’ny Tompo nanao hoe: Alohan’ny maneno akoho anio, dia handà Ahy intelo ianao; 62dia nivoaka tany ivelany izy ka nitomany fatratra.

Ireo faniratsirana voalohany

(Jereo Mt 26,67-68; Mk 14,65)

63Dia nataon’ireo olona nitana Azy fihomehezana i Jesoa sady nokapohiny, 64notampenany ny masony, notehafiny ny tavany, dia hoy izy taminy: «Vinanio hoe izay namely Anao?» 65Ary maro ny teny ratsy hafa nanaratsiany Azy.

I Jesoa eo anatrehan’ny Sanedrìna

(Jereo Mt 26,57-66; 27,2; Mk 14,53-64; 15,1)

66Nony vao maraina ny andro, dia nivory ny loholona sy ny lohandohan’ny mpisorona ary ny mpanora-dalàna, ka nentiny tao amin’ny Sanedrìna i Jesoa, ary hoy izy taminy: «Raha Ianao no i Kristy, dia lazao aminay.» 67Fa hoy Izy taminy: «Na hilaza aminareo aza Aho, tsy hinoanareo akory; 68ary raha hanontany anareo aza Aho, tsy hovalianareo na halefanareo akory. 69Fa hatramin’izao ny Zanak’olona dia hipetraka eo ankavanan’ny herin’Andriamanitra.» 70Dia hoy izy rehetra: «Zanak’Andriamanitra izany Ianao?» Ary hoy Izy taminy: «Voalazanareo, izy Aho.» 71Ka hoy izy ireo: «Inona indray no ilàntsika vavolombelona? Tenantsika no nandre tamin’ny vavany.»

Currently Selected:

Lioka 22: MBC

Highlight

Copy