Maciu 22
22
Na Vosa Vakatautauvata ni Magiti ni Vakawati
(Luke 14.15-24)
1Sa qai vosa tale tiko vei ira o Jisu ena vosa vakatautauvata ka kaya, 2“E rawa ni vakatautauvatataki na matanitu vakalomalagi kei na dua na tui sa cakava na magiti ni vakawati nei luvena tagane. 3Sa qai talai ira yani na nona tamata me ra sa la'ki kacivi ira mai era sureti ki na kana magiti ni vakawati, ia era sa qai sega ni via lako mai. 4Sa qai talai ira tale eso, ka kaya, ‘La'ki kaya vei ira na sureti, Raica, sa vakarautaki oti tu na kakana; sa vakamatei kina eso na noqu bulumakau, kei na manumanu uro, ka sa vakarau tu na ka kecega, dou lako sara mai ki na magiti ni vakawati.’ 5Ia era sa vakawaletaka ga, ka dui lako, e dua ki na nona i teitei, ka dua ki na nona cakacaka ni veivoli; 6ia o ira na kena vo era sa qai tauri ira na nona tamata, ka vakacacani ira, ka vakamatei ira. 7Sa cudru sara kina na tui, ka qai tala yani na nona mataivalu ka vakamatei ira na daulaba o ya, ka vakama na nodra koro. 8Sa qai kaya o koya vei ira na nona tamata, ‘Sa vakarau oti tu na magiti ni vakawati, ia sa sega ni ganiti ira era a sureti, 9o koya oqo, dou lako yani ki na i bili ni koro, ka sureti ira kece mai dou sota kaya ki na magiti ni vakawati.’ 10Era sa qai lako yani o ira na tamata oqori ki na veigaunisala, ka vakasoqoni ira kece mai era sa kunea, se ra vinaka se ra ca, ka sa sinai na vale levu ni vakawati vei ira na tamata.
11“Ni sa curu mai na tui me raici ira na nona vulagi sureti, sa qai raica kina e dua na tamata ka sega ni vakaisulu tu ena i sulu ni vakawati, 12ka sa qai kaya vua, ‘Noqu i tau, o curu vakacava tu mai ki ke ni sega vei iko na i sulu ni vakawati?’ Ia, sa vagagalu toka ga o koya. 13Sa qai kaya na tui vei ira na nona tamata, ‘Dou vesuka na yavana kei na ligana ka biuti koya ki na butobuto e tautuba; ena dau tagi kina ka vakasequruquru bati.’#Maciu 8.12; 25.30; Luke 13.28
14“Ni ra sa kacivi e lewe vuqa, ia sa lewe lailai ga era sa digitaki.”
Na Taro me Baleta na Saumi i Vakacavacava
(Mari 12.13-17; Luke 20.20-26)
15Era sa qai lako na Farisi, ka ra bosea me ra coriti Jisu vaka e vei ena nona vosa. 16Era sa mani talai ira yani na nodra tisaipeli kei ira na i lawalawa i Eroti, ka kaya, “Vakavuvuli, keimami kila ni o sa dau tukuna na ka dina. O ni sa vakavuvulitaka na ka dina me baleta na lewa ni Kalou ena vukudra na tamata, ka o ni sega ni bau lomaleqataka na veika era nanuma na tamata baleta ni sa ka wale vei iko na nodra i tutu na tamata. 17Mo ni tukuna mada kina vei keimami se cava na nomuni vakasama? Sa dodonu li me da saumi i vakacavacava vei Sisa, se segai?”
18A raica rawa na ca ni yalodra o Jisu, ka kaya, “A yavu tamata dauveivakaisini oi kemudou! Na cava dou sa via veretaki au kina? 19Dou vakaraitaka mai vei au e dua na i lavo ni soli vakacavacava!”
Era sa qai kauta mai e dua na i lavo siliva. 20Sa qai tarogi ira o koya, “A mata i cei kei na yaca i cei e volai tu oqo?”
21Era sa kaya, “A nei Sisa.”
Sa qai kaya vei ira o Jisu, “Dou solia vei Sisa na ka sa nei Sisa, ki vua na Kalou na ka sa nona na Kalou.”
22Ia ni ra sa rogoca, era sa kurabui ga ka biuti koya ka lako yani.
Na Taro me Baleta na Tu Cake Tale Mai na Mate
(Mari 12.18-27; Luke 20.27-40)
23Ena siga vata o ya, era sa lako mai vei Jisu eso na Setoki, ka ra mai kaya voli ni ra na sega ni tucake tale mai na mate na tamata, ka ra sa tarogi Jisu ena dua na taro, ka kaya,#Caka 23.8 24“Vakavuvuli, e kaya o Mosese ni kevaka sa mate e dua na tagane ka sega na luvena, me qai vakawatitaka na nona yada o tacina, me rawa ni vakawa kina ka me wili na luvena vua na tuakana.’#Vrua 25.5 25Ia e ratou dau bula voli eke e ratou lewe vitu na veitacini; sa vakawati o koya na i matai, ka mate; ia a sega na luvena ka laiva tu mai na watina vua na tacina. 26E a vakakina na i karua, kei na i katolu, me yacovi koya sara na i kavitu. 27A sa qai mate duadua e muri na yalewa. 28Ni sa gauna ni tucake tale mai na mate, ena qai wati cei vei iratou na lewe vitu o koya? E ratou a watina kece sara.”
29Sa sauma o Jisu, ka kaya vei ira, “Dou sa qai cala sara! Baleta ni dou sa lecava ga na i Vola Tabu, se na kaukauwa ni Kalou. 30Ni ra sa na tucake tale mai na mate, era sa na sega ni vakawati, se veimusumusuki, ka ra sa na vakataki ira ga na agilosi mai lomalagi.#Ym 5.5 31Ia me baleta na nodra tucake tale na mate, dou sa sega li ni wilika na ka sa tukuna na Kalou vei kemudou? Ni a kaya, 32‘Oi au na Kalou i Epara-ama, na Kalou i Aisake, kei na Kalou i Jekope.’ O koya e sega ni nodra Kalou na mate, sa nodra ga na bula.”#Lako 3.6
33Ni ra sa rogoca na lewe vuqa, era sa kurabui sara ena nona i vakavuvuli.
Na i Vakaro Levu
(Mari 12.28-34; Luke 10.25-28)
34Ia ni ra sa rogoca na Farisi ni sa vagalui ira na Setoki o koya, era sa qai soqoni vata mai, 35ka dua vei ira, e dua na daunilawa, sa qai taroga me vakatovolei koya, ka kaya; 36“Vakavuvuli, na cava na i vakaro levu duadua ena Lawa?”
37Sa qai kaya vua o Jisu, “Mo lomana na Turaga na nomu Kalou ena lomamu taucoko, kei na yalomu taucoko, kei na nomu vakasama taucoko.#Vrua 6.5 38Sa i koya oqo na i matai ka i vakaro levu duadua. 39Na i karua e vakaoqo: Mo lomana na kai nomu me vakataki iko.#Vsoro 19.18 40Sa vakatau ki na i vakaro e rua oqo na Lawa kecega kei ira na parofita.”#Luke 10.25-28
Na Taro me Baleta na Mesaia
(Mari 12.35-37; Luke 20.41-44)
41Ni ra sa vakasoqoni vata tikoga na Farisi, sa qai tarogi ira o Jisu, 42ka kaya, “A cava dou sa nanuma me baleta na Mesaia? Na luve i cei o koya?”
Era sa qai kaya vua, “Na luve i Tevita.”
43Sa qai kaya vei ira o koya, “Ia sa qai vakatokai koya rawa ga vakacava o Tevita ena Yalo Tabu, me Turaga? Ni a kaya,
44‘Sa kaya na Turaga ki vua na noqu Turaga,
Ni mai dabe ena yasaqu i matau,
Me yacova ni'u sa vakatikori ira na nomu meca ena ruku ni yavamu.’#Same 110.1
45Kevaka sa vakatokai koya vakaoqo o Tevita me Turaga, me qai kawa i Tevita vakacava li na Mesaia?”
46E sega e dua me kaya rawa vua e dua na ka, ka sega tale e dua e doudou me tarogi koya tale me tekivu mai na siga o ya.
Currently Selected:
Maciu 22: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.