Vilinga vya Miluwa Cizivukiso
Cizivukiso
Livulu lya Vilinga vya Miluwa lyapwa lyamucivali lyasonekele Luka. Livulu lya Luka lyakulivanga valitumbula ngwavo Vin̄anda Vyavivwa vyasonekele Luka. Mu livulu eli Luka asoneka “vyuma vyoshe vije vyalingile Yesu nakulongesa kwendi kwoshe kutunda a simbu ije washangumukile vipangi vyendi nakweta a litangwa lije vamutwalele mwilu (1:1,2).”
Mu livulu eli, Luka alinakulumbununa vukalu vumo vuvamwene vandongisi omo vononokele mashiko a Yesu. “Mukapwa vakaleo vange mu Yelusalema na mu Yundeya na mu Samaliya mwoshe na ku mamaneselelo a asi (1:8).”
Mafuti amangi akuliseza-seza vanawatumbula mu livulu eli kumwesa ngeci livulu eli valisonekelele kuleka muzimbu wakushandola Vin̄anda vya Yesu. Ukewo lika muzimbu ou. Omo Yesu nai laja mwilu, vukalu vwakama vakele navwo vandongisi va Yesu vwapwile vwakuyongola veya vaje vanapande kupwa vanu va Njambi. Omo Yesu na vandongisi vendi vakulivanga vapwile vaYunda, eci capwile cisemwa lika kuli vavangi, kuyongola ngeci majwi a Yesu apwile akwovola vaYunda na vaje kesi vaYunda, omwo Njambi ashaka vandongisi vakutunda ku miyati yoshe kupwa vanu vendi.
Kulilwisa kwakulivanga akati ka vaka-Yesu na vaYunda kwalingiwile omo vantwama va vaYunda vamo vavyanene majwi a vukaleo vwa Yesu (4:1-31; 7:1-59). Oloni vukalu vwakama vwa cikungulukilo cakulivanga vwasholokele omwo miluwa va Yesu vamo vendekele ngwavo uje kesi kaYunda kasa kupwa muka-Yesu akujeneka kupwa kaYunda akulivanga. Vyuma vyatengulukile omo Filipu wasimpile mukutwala muzimbu kuli vaka-Samaliya (8:7-25), na Petulu omo waile kwimbo lya Kolonelyu, mukulunu wa mashwalale va vaLoma (10:1-48).
Akukotoka Petulu walisholwele ku cikungulukilo mu Yelusalema, (11:1-18) co kuje waliwanene na vakulunu (15:3-35) kusimutwiya a cihula ca veya vaje vanapande kupwa vandongisi va Yesu. Simbu kanda valishandoke vanu voshe vatavele ngeci Munzinzime Wakujela wavatwamenene kwetesa Vin̄anda Vyavivwa vya Yesu kuli vaje kesi vaYunda na kuli vaYunda.
Paulu walingile cuma cakama cakushandola muzimbu wakukulaela, co vukama vwa livulu eli vunapu kwendeka akwambulula kwa Paulu akati ka vaje kesi vaYunda. Akukotoka Paulu watwalele muzimu ku Loma, nganda ya seo yakama mu kaye a simbu ije vene. (28:16-31). Cuma cakama canasoneka Luka mu livulu eli cinapu kumwesa ngeci nacimo cai civindika kushandola muzimbu wa Yesu ku mitambela kwoshe.
Paulu wakele mu njuvo yakufwetela vimbongo a myaka ivali, co watambwile vanu voshe vaje vakele nakuya kuli ikeye. Wambulwile nakusimpa vya Vumwene vwa Njambi nakulongesa vya Mwene Yesu Kilistu, co naumo wai wamuvindikile.
Kulumbununa vyuma vili mu livulu
Kwambulula Vin̄anda Vyavivwa mu Yelusalema 1:1–8:3
Kwambulula Vin̄anda Vyavivwa mu Yundeya na mu Samaliya 8:4–12:25
Vungenzi vwa Paulu vwakulivanga mukwambulula Vin̄anda Vyavivwa 13:1–14:28
Kulikungulula kwakama mu Yelusalema 15:1-35
Vungenzi vwa Paulu vwamucivali mukwambulula Vin̄anda Vyavivwa 15:36–18:22
Vungenzi vwa Paulu vwamucitatu mukwambulula Vin̄anda Vyavivwa 18:23–21:15
Paulu vamukwata mu Yelusalema 21:17–23:22
Paulu vamutwala kuli Nguvulu Wakama 23:23–26:32
Paulu vamutwala ku Loma 27:1–28:31
Currently Selected:
Vilinga vya Miluwa Cizivukiso: MBB
Highlight
Share
ਕਾਪੀ।
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006