Vilinga vya Miluwa 8

1Co Saulu watavele kutsa kwa Setefano.

Saulu apakesa cikungulukilo

A litangwa lije vene cikungulukilo ca mu Yelusalema cashangumukile kuyanda na mapakeso. Vaka-kukulaela voshe, kuvanga lika miluwa, vashandokelele mu mafuti a Yundeya na Samaliya. 2Vamo vanalume va kulongwa vatsindile Setefano, vamulilile manene.

3 # Vil 22:4-5; 26:9-11 Oloni Saulu wesekele kunyongesa cikungulukilo, waile ku njuvo na njuvo, wakokangeyeye vaka-kukulaela, vanalume na vanakazi, co wavaakele mu kamenga.

Vin̄anda Vyavivwa vavyambulula mu Samaliya

4Vaka-kukulaela vaje vashandokele vaile kwoshe-ikwoshe nakwambulula lijwi. 5Filipu waile ku nganda ya Samaliya nakwambulula lijwi lya Wakuvwavesa kuli vanu vaje vakele kuje. 6Co mbunga ya vanu vatolililile vije vyendekele Filipu, co vamwene vizivukiso vije vyalingile. 7Omwo minzinzime yakujwala yatundile muli vanu vavangi yatambekele na lijwi lyakama, vavangi vaka-tulepa na vilema vakangukile. 8Ngecivene, mu nganda ya Samaliya mwakele kujolela kwakama.

9Oloni mu nganda ije mwakele munalume umo lizina lyendi Simoni, uje a simbu yakama wakomokesele vaka-Samaliya na manseno endi. Walimwesele ikeye vavenya kupwa umo wakama, 10co vanu voshe muje mu nganda, vanu va vulemu na vaje kesi va vulemu, vatolililile kuli ikeye, vendekele ngwavo, “Ou ikeye vene nzili ya Njambi uje ivatumbula ngwavo, ‘Nzili Yakama.’ ” 11Co vakele nakumutolilila omwo a simbu yakama wavakomokesele na manseno endi. 12Oloni omo vakulaelele lijwi lyendekele Filipu kuli vakevo lya vin̄anda vyavivwa vya Vumwene vwa Njambi na vya Yesu Kilistu, co vavambwitikile, voshe vanalume na vanakazi. 13Nameme Simoni vene nendi lalo wakulaelele, co omo vanamumbwitika, wakele amo na Filipu, co walikomokelele manene omo wamwene vikomokeso na vizivukiso vije vyakele nakulinga.

14Miluwa vaje vakele mu Yelusalema omo vazivile ngwavo vanu va mu Samaliya vanatambula lijwi lya Njambi, ngecivene, vavatuminine Petulu na Yowano. 15Omo vetele kuje, valombelelele vaje vaka-kukulaela ngeci vatambule Munzinzime Wakujela. 16Omwo Munzinzime Wakujela te kanda ashulukile ali vakevo, oloni vavambwitikile lika mu lizina lya Mwene Yesu. 17Asinoni Petulu na Yowano vavakambekele mavoko, co vatambwile Munzinzime Wakujela.

18Simoni wamwene ngeci Munzinzime vanawana kuli vaka-kukulaela omo miluwa vakambekele mavoko avo ali vakevo. Ngecivene, waanene vimbongo kuli Petulu na Yowano, 19co wendekele ngwendi, “Nange lalo njaneniko nzili eyi, ngeci woshe injikakambeka mavoko ange akatambula Munzinzime Wakujela.”

20Oloni Petulu wamukumbulwile ngwendi, “Nove vene na vimbongo vyove munyonge amo, omwo yove uyongola ngwove amo wasa kulanda vwana vwa Njambi na vimbongo! 21Yove kuwesi na mutambela nambe mwela mu vipangi vyetu, omwo mbunge yove kuyesi mwamuvwa ku mesho a Njambi. 22Ngecivene, tenguluka utunde ku viyongola vyove vyavivi, co lomba kuli Mwene ngeci akusambese ku viyongola vyove ngwe evi. 23Omwo njinamono ngwange yove unashulu na cipululu cacivi, co unapu u cinzinda ca vuvi.”

24Co Simoni wendekele kuli Petulu na Yowano ngwendi, “Njilombeleleniko kuli Mwene ngeci vyuma evi vimunendeka kesi vilingiwe kuli yange.”

25Omo vamanesele kwana vukaleo vwavo nakwambulula muzimbu wa Mwene, Petulu na Yowano velukile ku Yelusalema. Mu ngila yavo vambulwile Vin̄anda Vyavivwa mu membo amangi a mu Samaliya.

Filipu na mukulunu wa ku Isopya

26Oloni kangelo ka Shukulu Kalunga wendekele kuli Filipu ngwendi, “Katuka uye ku mbwela ku ngila ije itunda ku Yelusalema iya ku Ngaza.” (Ngila eyi yapwa ya mambo kuvesi kuyipangesa matangwa ano.) 27Ngecivene, Filipu wakatukile waile waliwanene na kayunuke umo kaIsopya, wapwile mukulunu wa vulemu muka-kunyunga vufuko vwa vamwene wa ku Isopya. Co waile ku Yelusalema nakulemesa Njambi. 28Co omo welukile watumbamene mu litemba lyendi wakele nakulava livulu lya Isaya muka-kwimanena. 29Co Munzinzime Wakujela wendekele kuli Filipu ngwendi “Shwenya kuyehi na litemba lije.” 30Ngecivene, Filipu washatukilileko wamuzivile alinakulava mu livulu lya Isaya muka-kwimanena. Co wamwihwile ngwendi, “Ulinakuzivisisa ovyo ulinakulava ndi?”

31Uje mukulunu wamukumbulwile ngwendi, “Vati njasa kuzivisisa kuvanga umo anjilumbunwinevyo?” Co walombele Filipu alonde atumbame amo nendi mu litemba. 32Co majwi a mu visoneka alavele akewo awa,

“ Wafwile ngwe manga uje vatwala nakumutsiya,

ngwe muna manga uje oloka kuluu kuli vaka-kumuteula,

oloni wolokele kuluu.

33 # Isa 53:7-8 Vamuzivisile shwamwa, co kuvamusompelele vushunga.

Naumo wai asa kwambulula naanga yendi,

omwo kuyoya kwendi ano asi kwetele na ku shongo.”

34Co uje mukulunu wehwile Filipu ngwendi, “Njileke, muka-kwimanena natumbula iya omo nendeka ngeci? Walyendekele ikeye vavenya nambe mukwavo weka?” 35Asinoni Filipu washangumukile kwendeka, washangumukile na visoneka evi, wamulekele Vin̄anda Vyavivwa vya Yesu. 36Co omo vakele nakushelumuka mu ngila, co vetele ku mutambela umo kuje kwakele mema, co uje mukulunu wendekele ngwendi, “Kenga, mema awa. Vika lalo vyasa kunjivindika kunjimbwitika?” 37Filipu wamukumbulwile ngwendi, “Citava kukumbwitika nga unakulaela na mbunge yove yoshe.” Ikeye wamukumbulwile ngwendi, “Mwa vushunga vene njinakulaela, njinakulaela ngeci Yesu Kilistu ikeye Muna Njambi.”#8:37 FILIPU WAMUKUMBULWILE NGWENDI...MUNA NJAMBI: Kunungulula kumo vesi 37 yaimo.

38Co uje mukulunu washikile ngeci vemike litemba, co voshe vavali, Filipu na uje mukulunu vashelumukile mu mema, co Filipu wamumbwitikile. 39Omo vajavulukile mu mema, Munzinzime wa Shukulu Kalunga watwalele Filipu kweka. Co uje mukulunu kamumwene lalo, oloni waile vungenzi vwendi nakuvwaelela manene. 40Oloni Filipu waliwanene ikeye vavenya ali ku Azotase, co waile ku Sesaliya, mu ngila mwoshe waile nakwambulula Vin̄anda Vyavivwa mu vinganda vyoshe.

Currently Selected:

Vilinga vya Miluwa 8: MBB

Highlight

ਕਾਪੀ।