Vilinga vya Miluwa 5

Ananiya na Safila

1Oloni kwakele munalume umo lizina lyendi Ananiya, na munakazi wendi Safila valizivasanene kulandesa vufuko vwavo. 2Oloni akulizivasana na munakazi wendi washwekele litambelo lya vimbongo vimo, co watwalele litambelo limo lya vimbongo kuli miluwa. 3Oloni Petulu wendekele kuli ikeye ngwendi, “Ananiya, omwo vika unatava Satana akovele mu mbunge yove nakwendeka makuli kuli Munzinzime Wakujela akushweka litambelo limo lya vimbongo viwunatambula akulandesa vufuko vwove? 4Omwo ovu vufuko vwapwile vwove omo kanda uvulandese, co nambe omo wavulandesele, vimbongo vyapwile vyove. Omwo vikoni wayongwele kulinga cuma eci? Kuwakwisile vanu embwe, oloni unakwisa Njambi!” 5Aje vene omo Ananiya wazivile majwi awa, wawililile asi watsile, co voshe vacizivile vakele na lyova. 6Vakwenje vakovelele, vazengelele muvila wendi mu nanga, co vamutwalele anja nakumutsinda.

7Omo kwetile maola atatu munakazi wendi lalo wakovelele, kazivukile cuma cije calingiwile. 8Co Petulu wamwihwile ngwendi, “Njileke mwa vushunga nga eyi ikeyo ndando imunalandesele vufuko vweni nove na munalume wove?”

Co Safila wamukumbwile ngwendi, “Eyo, ikeyo ndando vene eyi.”

9Ngecivene, Petulu wendekele kuli ikeye ngwendi, “Omwo vikajo nove na munalume wove mwayongola kweseka Munzinzime wa Shukulu Kalunga? Kenga, vanalume vanakatsindile munalume wove ava vali ku cikolo ololo vene, co vakevo vakakutwala yove lalo!” 10Aje vene Safila wawililile asi ku myanja ya Petulu, co watsile. Omo vaje vakwenje vakovelele vamumwene natsi, co vamutwalele nakumutsinda kuyehi na munalume wendi. 11Co cikungulukilo coshe na vanu voshe vaje vazivile vyuma evi vakele na lyova lyakama.

Vizivukiso na vikomokeso

12Miluwa valingile vizivukiso na vikomokeso vyavingi akati ka vanu. Co vaka-kukulaela voshe vakungulukilile amo mu Mbalanda ya Solomoni. 13Naumo wai walikumbasanene navo, oloni nameme ngoco vanu vavashangazalele manene. 14Co vanu vavangi manene valikumbasanene ku mbunga yavo, mbunga ya vanakazi na vanalume vaje vakulaelele kuli Mwene. 15Ngecivene, a vije vivalingile miluwa, vaka-kuvinja vakele nakuvambata a malili naa manala nakuvatwala ku vitapalo ngeci munzinze wa Petulu wite akamwa ya vamo omo aita kuyehi. 16Co vimbunga vya vanu vavangi vezile kutunda ku membo a kulyata na Yelusalema, vanenele vaka-kuvinja nambe vaje vakele na minzinzime yakujwala, co voshe vavakangwisile.

Miluwa vavayandesa

17Asinoni Muka-kukombelela Wakama na vakwavo vaje va mu munga ya vaSanduki, vazivilile muuka vaje miluwa, co vakele na vutumbe vwakuvalwisa. 18Vakwatele miluwa nakuvaka mu kamenga ka mbunga. 19Oloni ku vutsiki vuje vene kangelo ka Shukulu Kalunga washokolwele vikolo vya kamenga, co watuwile miluwa anja, wendekele kuli vakevo ngwendi, 20“Yeni mukemane mu Njuvo ya Shukulu Kalunga, co mukaleke vanu vyoshe vya mwonyo ou wauha.” 21Co miluwa vononokele, co omo kwakile vakovelele mu Njuvo ya Shukulu Kalunga vashangumukile kulongesa.

Muka-kukombela wakama amo na munga yendi vasanene vakulunu voshe va vaYunda mu cikungulukilo ca Munga yavo, asinoni vatumine lijwi ku kamenga ngeci vanene miluwa ku mesho avo. 22Oloni omo vaje vantwama vetele kuje, kuvawanene vaje miluwa mu kamenga, ngecivene, velukile ku Munga vakambulwile ngwavo, 23“Omo tunetele ku kamenga twawanene kwakupata ngongongo, na vaka-kunyunga voshe valinakunyunga ku vikolo, oloni omo tunashokolwele ku vikolo, tunawanene mukati mwangoco naumo wai alimo!” 24Omo vakulunu va vaka-kukombelela na mukulunu wa vaka-kunyunga Njuvo ya Shukulu Kalunga vazivile vyuma evi, valikomokelele manene ngwavo cuma muka cinalingiwa kuli miluwa. 25Asinoni munalume umo wezile wendekele kuli vakevo ngwendi, “Tolilileni! Vaje vanalume vamunaakele mu kamenga vali mu Njuvo ya Shukulu Kalunga nakulongesa vanu!” 26Ngecivene, uje mukulunu wa vaka-kunyunga Njuvo ya Shukulu Kalunga waile na vanu vendi wakashakele miluwa. Kuvakapangesele nzili omwo vazivile lyova ngwavo amo vanu vavasha mamanya.

27Co vanenele miluwa nakuvemika ku mesho a Munga, co Muka-kukombelela Wakama wavehozwele ngwendi, 28#Mat 27:25 “Twamishikile ngwetu kesi mulongese lalo mu lizina lya munalume ou, oloni kengeni evi vimunalingi! Munashandola laja vilongesa vyeni mu Yelusalema mwoshe, co mushaka lalo mutuwanese mulonga wa kutsa kwendi!”

29Oloni Petulu na miluwa vakwavo vavakumbulwile ngwavo, “Tunapande kwononoka Njambi, kesi vanu. 30Njambi ya vakukulwila vetu ikeye wasangwile Yesu ku vatsi, omo munamutsii laja nakumupameya vimbambo a cilindakano. 31Njambi wamusangwile ku vatsi nakumwaka ku livoko lyendi lya cilyo kumupwisa Ntwama na Muyoyesi, mukwana Isalele simbu yakutenguluka ngeci vavasambese ku vivi vyavo. 32Tuvakaleo va vyuma evi, yetu amo na Munzinzime Wakujela, ikeye wapwa vwana vwa Njambi kuli vaje vamwononoka.”

33Omo vaje vaka-Munga vazivile vyuma evi, valuvalele manene vashakele ngeci vatsiye miluwa. 34Oloni umo wavo, wapwile kaFaliseo lizina lyendi Ngamalyele, wapwile mulongisi wa majwi a Lishiko, co lalo vanu vamusingimikile manene, wemanene akati ka Munga. Washikile ngeci vacituule miluwa anja kasimbu kakandondo, 35Co wendekele ku Munga ngwendi, “Eni vakwetu vaIsalele, nyanyameni a vyuma evi mulinakulinga kuli ava vanu. 36Omwo a myaka ya kunima kwasholokele Teundase uje walipwisile wakama, co vanalume vakupwa 400 valikumbasanene nendi. Oloni vamutsiile, na voshe vaje vamukavele valishandokele, co ije munga yendi yahwile. 37Munima yendi Yundasa kaNgalileya washolokele a simbu yakulava vanu, co wakokele mbunga yakama, oloni nendi lalo vamutsiile, na voshe vaje vamukavele valishandokele. 38Ngecivene, a n̄anda eyi njimileka ngwange, kesi mweseke kulinga cuma cimo ali ava vanalume. Veceleni! Nga evi vanayongola nakuvilinga vinatundu ku vanu, vikahwa vene, 39oloni nga vinatunda kuli Njambi, kumwasa kuvahyana. Mukalimona ngwe mulinakulwisa Njambi!”

Co Munga vakavele kunangula kwa Ngamalyele. 40Ngecivene, vasanene vaje miluwa ngeci vakovele, vavapupile nakuvashika ngwavo kesi vendeke lalo mu lizina lya Yesu, asinoni vavecelele. 41Asinoni omo miluwa vasezele ije Munga, vavwaelelele manene omwo Njambi wavayongwelele kuyanda nakushauka omwo lizina lya Yesu. 42Co a litangwa na litangwa vakele nakulongesa nakwambulula Vin̄anda Vyavivwa vya Yesu Wakuvwavesa mu Njuvo ya Shukulu Kalunga na mu vinjuvo vya vanu.

Currently Selected:

Vilinga vya Miluwa 5: MBB

Highlight

ਕਾਪੀ।