Vilinga vya Miluwa 3

Munalume wa cilema akanguka

1A litangwa limo Petulu na Yowano vaile ku Njuvo ya Shukulu Kalunga a simbu yakulombela, yapwile simbu ya maola atatu ku cingwezi. 2Co kuje ku cikolo civatumbwile ngwavo Cikolo Cacivwa ca Njuvo ya Shukulu Kalunga, kwakele munalume umo wapwile cilema tunde kukusemuka kwendi. Vakele nakumutwala-twala ku cikolo a litangwa na litangwa ngeci alombe vwana kuli vanu vaje vakovelele mu Njuvo ya Shukulu Kalunga. 3Omo wamwene Petulu na Yowano valinakukovela, wavalombele vwana. 4Petulu na Yowano vamukengele shwii, co Petulu wendekele kuli ikeye ngwendi, “Tukenge!” 5Ngecivene, wavakengele shwii, wayongwele ngwendi amo atambula cuma kuli vakevo. 6Oloni Petulu wendekele kuli ikeye ngwendi, “Kunjesi na vimbongo, oloni eci njilinaco cikeco cinjikwana, mu lizina lya Yesu Kilistu wa ku Nazaleta njikushika ngwange katuka wende!” 7Asinoni wamukwatele ku livoko lyendi lya cilyo wamukatwile. Aje vene vitsiya vya ku vilyato vyendi na vya mu tusendengele twendi vyakele na nzili, 8co watumbukile, wemanene, co washangumukile kwenda. Asinoni wakovelele amo navo mu Njuvo ya Shukulu Kalunga, wendele nakutumbozoka nakushangala Njambi. 9Co vanu voshe kuje vamumwene alinakwenda nakushangala Njambi, 10co omo vamuzivukile ngeci ikeye uje watumbamene ku cikolo cije civatumbwile ngwavo Cikolo Cacivwa ca Njuvo ya Shukulu Kalunga nakulomba vwana, co voshe valikomokelele a cuma cije calingiwile kuli ikeye.

Muzimbu wa Petulu mu Njuvo ya Shukulu Kalunga

11Omo uje munalume wakakateyeye Petulu na Yowano mu Mbalanda ya Solomoni, vanu voshe valikomokelele, co vashatukilile kuli vakevo. 12Omo Petulu wamwene vaje vanu, wendekele kuli vakevo ngwendi, “Yeni vakwetu vaIsalele, vikajo munalikomokela a cuma eci? Nambe vikajo mutukengela shwii? Mwayongola ngweni eci cinalingiwa mu nzili yetu nambe mu vushunga vwetu mukemwo tunakangwisa ou munu ndi? 13#Kut 3:15 Njambi ya Avilahama na Isake na Yakomba, Njambi ya vakukulwila vetu, ikeye naana vumpau kuli Ngamba yendi Yesu. Oloni yeni mwamwanene kuli vaka-kushwana, co mwamuvyanene ku mesho a Pilato nameme Pilato te nayongola kumwecela. 14#Mat 27:15-23; Mak 15:6-14; Luk 23:13-23; Yow 19:12-15 Oloni wapwile wakujela, wa vushunga, oloni mwamuvyanene, mwalombele Pilato amyecelele uje lipwepwe. 15Co mwatsiile uje ikeye vavenya mwonyo, oloni Njambi wamusangwile ku vatsi, co yetu tunapu tu vakaleo va cuma eci. 16Co yapwile nzili ya lizina lyendi ikeyo inakangwisa munu ou. Evi vimunamono nevi vimunazivuka vinalingiwa akukulaela mu lizina lyendi, kukulaela kuli Yesu kukekwo kunamukangwisa, ngwe mumunamono yeni voshe.

17“Co ololo vakwetu, njinazivuka ngeci vije mwalingile kuli Yesu yeni na vantwama veni vyapwile nzimba. 18Njambi wavisholwele laja kuli vaka-kwimanena voshe ngwendi Wakuvwavesa wendi akayanda, co capwile ca vushunga mu ngila eyi. 19Tengulukeni, asinoni ilukeni kuli Njambi, ngeci amisambese ku vivi vyeni. Nga mulingamo, 20simbu ya nzili ya munzinzime ikaija kutunda kuli Shukulu Kalunga, co akatuma Yesu, ikeye Wakuvwavesa uje yanamyangwila laja. 21Napande kukala mwilu noo simbu ikaija omo vyuma vyoshe vikapwa vyaviha, ngwe mwendekele Njambi ali vaka-kwimanena vendi vakujela vakeleko laja. 22#Kwi 18:15,18 Omwo Mosesa wendekele ngwendi, ‘Shukulu Kalunga Njambi yeni akamitumina muka-kwimanena, ngwe muje mwatumine yange, akapwa umo wakutunda akati ka vanu veni. Mukononoka vyuma vyoshe vije vyakamileka kulinga. 23#Kwi 18:19 Co woshe kakononoka uje muka-kwimanena vakamwangununa kuli vanu va Njambi, co vakamunyongesa.’ 24Co vaka-kwimanena voshe vaje vakele na muzimbu, kutunda kuli Samwele na vaje vezile munima yendi, navo lalo vambulwile vije vinalingiwa matangwa ano. 25#Kus 22:18 Vikulaeso vya Njambi ali vaka-kwimanena vinapu vyeni, co muli na mutambela mu lizivasano lije lyalingile Njambi na vakukulwila veni. Ngwe mwendekele kuli Avilahama ngwendi, ‘Ku mbuto yove miyati yoshe ya ano asi vakavezika.’ 26Co Njambi waangwile Ngamba yendi, co wamutumine kuli yeni akulivanga, mukumivezikisa ngeci munu woshe atunde ku vingila vyendi vya kupenga-penga.”

Currently Selected:

Vilinga vya Miluwa 3: MBB

Highlight

ਕਾਪੀ।