ᐅᐸᓓᑭᔅ ᒫᕐᒃ 11
11
ᒋᓴᔅ ᐃᑐᑌᐤ ᒋᕉᓴᓚᒥᒃ ᐸᔅᑭᓚᑫᐎᓂᒃ
(ᒫᑎᐤ 21:1–11; ᓘᒃ 19:28–40)
1ᐃᔅᐱ ᒫᑲ ᑭᔑᐙᒃ ᒋᕉᓴᓚᒥᒃ ᑌᑯᔑᑭᒃ, ᐁ ᐅᑎᑕᑭᒃ ᐯᑦᐯᒋ, ᓀᔥᑕ ᐯᑕᓂ, ᐊᓕᑉᔅ ᐗᒌᒃ, ᑭᒋᑎᔕᐌᐤ ᓂᔓ ᐅ ᑭᔅᑭᓄᐊᒪᐙᑲᓇ, 2ᐃᑌᐤ ᒫᑲ, ᐃᑐᑌᒃ ᓀᒪ ᐃᑖᐎᓂᔑᒃ ᐅᑎᔥᑲᐤ ᑳ ᐃᑕᑾᒃ; ᐎᐸᒡ ᒫᑲ ᑮ ᐱᑐᑫᔦᑴ, ᑭ ᑳ ᒥᔅᑲᐙᐗᐤ ᐋᓯᔑᔥ ᐁ ᒫᑯᐱᓱᑦ, ᐁᑳ ᐎᔅᑳᑦ ᐊᐌᓇ ᐁ ᐅᒋ ᑌᑕᐱᑦ; ᐋᐸᐅᒃ, ᐯᔑᒃ ᒫᑲ᙮ 3ᑮᔥᐱᓐ ᒫᑲ ᐊᐌᓇ ᐃᑎᑖᑴ, ᑖᓀᑭ ᐌᒋ ᐅᒪ ᑐᑕᒣᒃ? ᐃᑗᒃ, ᑌᐯᓕᒋᑫᑦ ᓇᑕᐌᓕᒣᐤ; ᐁᑯ ᒫᑲ ᑣᔦᒃ ᐅᑕ ᑫ ᐯᒋᑎᔕᐙᑦ᙮
4ᑮ ᑭᑐᑌᐗᒃ ᒫᑲ, ᓀᔥᑕ ᑮ ᒥᔅᑲᐌᐗᒃ ᐋᓯᔑᔕ ᐁ ᒫᑯᐱᓯᓕᒋ ᐗᓚᐎᑎᒥᔅᒀᑦ, ᐃᑕ ᓂᔓ ᒣᔅᑲᓇᐗ ᐁ ᓕᑭᑕᐗᒧᑭ; ᐋᐸᐌᐗᒃ ᒫᑲ᙮ 5ᐋᑎᑦ ᒫᑲ ᐊᓂᑭ ᐊᓐᑕ ᑳ ᓂᐹᐎᒋᒃ ᑮ ᐃᑌᐗᒃ, ᑖᓐ ᐁᑐᑕᒣᒃ ᐁ ᐋᐸᐌᒃ ᐋᓯᔑᔥ?
6ᑮ ᐃᑌᐗᒃ ᒫᑲ ᒬᒋ ᑳ ᑮ ᐃᑎᑯᒋᒃ ᒋᓴᓴ; ᑮ ᐸᑭᑎᓀᐗᒃ ᒫᑲ᙮ 7ᐋᓯᔑᔕ ᒫᑲ ᑮ ᐯᑐᐌᐗᒃ ᒋᓴᓴ, ᑮ ᑌᑕᔅᑕᐗᒃ ᒫᑲ ᐅ ᐎᓛᒋᑲᓂᐙᐗ; ᐁᑯ ᒫᑲ ᑎᐁᑕᐱᑦ᙮ 8ᒥᒉᑦ ᒫᑲ ᑮ ᑕᔗᓕᑭᑎᑖᐗᒃ ᐅ ᐎᓛᒋᑲᓂᐙᐗ ᒣᔅᑲᓈᒃ; ᑯᑕᑭᔭᒃ ᒫᑲ ᑮ ᑭᔥᑲᐊᒶᒃ ᐗᑎᑾᓇ ᒥᔅᑎᑯᒃ ᐅᒋ, ᑮ ᐊᓈᔅᑯᑎᑖᐗᒃ ᒫᑲ ᒣᔅᑲᓈᒃ᙮ 9ᐊᓂᑭ ᒫᑲ ᑳ ᓂᑳᓄᑌᒋᒃ, ᐊᓂᑭ ᓀᔥᑕ ᑳ ᓄᔅᐱᓇᔑᐌᒋᒃ, ᑮ ᑌᐺᐗᒃ, ᐁ ᐃᑗᒋᒃ, ᐦᐅᓵᓇ; ᔕᐌᓕᑖᑯᓯᐤ ᐊᓇ ᑳ ᐯᒋ ᐃᑐᑌᑦ ᐅᑎᐯᓕᒋᑫᐗ ᐅᑦ ᐃᔑᓂᑳᓱᐎᓂᓕᒃ: 10ᑲᑕ ᐎ ᔕᐌᓕᑖᑾᓂᓕᐤ ᐅᑦ ᐅᑭᒫᐎᐎᓐ ᑯᑖᐎᓇᐤ ᑌᐱᑦ, ᑳ ᐯᒋ ᐃᑐᑌᒪᑲᓂᓕᒃ ᐅᑎᐯᓕᒋᑫᐤ ᐅᑦ ᐃᔑᓂᑳᓱᐎᓂᒃ: ᐦᐅᓵᓇ ᒫᐗᒋ ᐃᔥᐱᒥᒃ ᑳ ᐃᑖᑦ᙮
11ᒋᓴᔅ ᒫᑲ ᑮ ᐱᑐᑫᐤ ᒋᕉᓴᓚᒥᒃ ᓀᔥᑕ ᑭᒋᐋᔭᒥᐁᐎᑲᒥᑯᒃ: ᐃᔅᐱ ᒫᑲ ᐙᔅᑲ ᑳ ᑮ ᑲᓇᐙᐸᑕᒃ ᒥᓯᐌ ᑫᒀᓇ, ᐋᔕᔾ ᒫᑲ ᐁᑎ ᐅᑖᑯᔑᒃ, ᐯᑕᓂᐃᒃ ᐃᔑ ᑮ ᐃᑐᑌᐤ ᐊᓯᒋ ᐊᓂᑭ ᓂᔓᔖᑉ᙮
ᒋᓴᔅ ᒪᒐᑭᒣᐤ ᐸᑫᓵᒥᓈᑎᑯ
(ᒫᑎᐤ 21:18–19)
12ᐎᐋᐸᓂᓕᒃ ᒫᑲ, ᐃᔅᐱ ᐱᐁᒋ ᑭᐌᒋᒃ ᐯᑕᓂᐃᒃ ᐅᒋ, ᑮ ᐎ ᒥᒋᓱ: 13ᐙᓚᐤ ᒫᑲ ᐁ ᐅᒋ ᐙᐸᒫᑦ ᐸᑫᓵᓇᒥᓈᑎᑾ, ᐁ ᓂᐱᔑᐎᓕᒋ, ᑮ ᐯᒋ ᐃᑐᑌᐤ, ᑫᑲ ᒦᔅᑲᐤ ᐁᑯᑕ ᑫ ᒥᔅᑲᒧᑴ ᑫᒀᓕᐤ: ᐃᔅᐱ ᒫᑲ ᐱᐁᒋ ᓇᑖᑦ, ᓇᒪᐎᓚ ᑫᒀᓕᐤ ᑮ ᒥᔅᑲᒻ ᐱᔑᔑᒃ ᓃᐱᔕ: ᐌᓴ ᓇᒪᐎᓚ ᐁᔥᑾ ᐅᑎᒋᐸᓕᓕᐤ ᑭᒋ ᒥᓂᔑᐎᑦ᙮ 14ᒋᓴᔅ ᒫᑲ ᑮ ᐋᔭᒥᐤ ᓀᔥᑕ ᑮ ᐃᑌᐤ, ᐁᑳᐎᓚ ᐊᐌᓇ ᑲᑕ ᒥᒋᐤ ᒥᓂᔕ ᑭᓚ ᑫ ᓂᑖᐎᑭᑖᔭᓐ ᐊᓄᒡ ᐅᒋ ᑳᑭᑫ᙮
ᐅ ᑭᔅᑭᓄᐊᒪᐙᑲᓇ ᒫᑲ ᑮ ᐯᑕᒥᓕᐗ᙮
ᒋᓴᔅ ᐃᑐᑌᐤ ᑭᒋ ᐊᔭᒥᐁᐎᑲᒥᑯᒃ
(ᒫᑎᐤ 21:12–17; ᓘᒃ 19:45–48; ᒑᓐ 2:13–22)
15ᑮ ᐯᒋ ᐃᑐᑌᐗᒃ ᒫᑲ ᒋᕉᓴᓚᒥᒃ: ᒋᓴᔅ ᒫᑲ ᑮ ᐱᑐᑫᐤ ᐋᔭᒥᐁᐎᑲᒥᑯᒃ, ᓀᔥᑕ ᑮ ᒫᒋ ᐗᓚᐎᐌᐱᓀᐤ ᐊᓂᐃ ᑳ ᐊᑖᐙᑫᓕᒋ ᓀᔥᑕ ᐊᓂᐃ ᑳ ᐊᑖᐌᓕᒋ ᐱᒋ ᑭᒋᐋᔭᒥᐁᐎᑲᒥᑯᒃ, ᑮ ᑴᑎᐱᐌᐸᐊᒬᐤ ᒫᑲ ᐅ ᒥᒋᓱᓈᑎᑯᓕᐗ ᐊᓂᐃ ᑳ ᒦᔅᑯᒋᓇᒫᑫᓕᒋ ᔔᓕᐋᓇ, ᓀᔥᑕ ᐅ ᑌᑕᐱᐎᓂᓕᐗ ᐊᓂᐃ ᑳ ᐊᑖᐙᑫᓕᒋ ᐅᒥᒥᐗ; 16ᓇᒪᐎᓚ ᒫᑲ ᑮ ᐁᓕᓇᐌᐤ ᐊᐌᓕᐗ ᑭᒋ ᐱᒧᑕᑖᓕᒋ ᐊᓱᐗᒋᑲᓂᓕᐤ ᔖᐳ ᑭᒋᐋᔭᒥᐁᐎᑲᒥᑯᒃ᙮ 17ᑮ ᑭᔅᑭᓄᐊᒫᑫᐤ ᒫᑲ; ᐁ ᐃᑖᑦ, ᓇᒪ ᓈ ᐃᑕᓯᓇᐃᑳᑌᐤ, ᓂ ᐙᔅᑳᔨᑯᓂᒻ ᐋᔭᒥᐁᐎᑲᒥᒃ ᑲᑕ ᐃᔑᓂᑳᑕᒶᒃ ᒥᓯᐌ ᐁ ᐃᑕᔅᑳᓀᓯᒋᒃ ᐃᓕᓕᐗᒃ? ᒫᑲ ᑭᓚᐗᐤ ᑭᒧᑎᔅᑲᒃ ᐅ ᐙᑎᐗᐤ ᑭ ᑮ ᐃᔑᑖᓂᐗᐤ᙮
18ᐅᒪᓯᓇᐃᑫᐗᒃ ᓀᔥᑕ ᑭᒋ ᓵᓴᑭᐎᓕᐌᐎᓕᓕᐗᒃ ᑮ ᐯᑕᒶᒃ, ᓀᔥᑕ ᑮ ᓈᓇᑕᐌᓕᑕᒶᒃ ᑮ ᐃᔑ ᓂᔑᐗᓈᒋᐋᒋᒃ: ᐌᓴ ᑮ ᑯᔅᑌᐗᒃ, ᒥᓯᐌ ᐃᓕᓕᐗ ᐁ ᒫᒪᔅᑳᑕᒥᓕᒋ ᐅ ᑭᔅᑭᓄᐊᒫᑫᐎᓂᓕᐤ᙮
19ᐃᔅᐱ ᒫᑲ ᐁᑎ ᐅᑖᑯᔑᒃ, ᐃᑖᐎᓂᒃ ᑮ ᐅᒋ ᐗᓚᐎᐤ᙮
ᑳ ᑭᔅᑭᓄᐊᒪᑫᒪᑲᒃ ᐸᑫᓵᒥᓈᑎᑯᒃ
(ᒫᑎᐤ 21:20–22)
20ᐁ ᑭᑭᔐᐹᔮᒃ ᒫᑲ, ᐁ ᐊᑎ ᐱᒧᑌᒋᒃ, ᑮ ᐙᐸᒣᐗᒃ ᐸᑯᓵᓂᒥᓈᑎᑾ ᐁ ᐹᓯᓕᒋ ᐅᒉᐱᑯᒃ ᐅᒋ᙮ 21ᐱᑕᕐ ᒫᑲ, ᐁ ᑲᓄᑭᔅᑭᓯᑦ, ᐃᑌᐤ, ᑫᔅᑭᓄᐊᒫᑫᔭᓐ, ᒫᑎᑲ, ᐊᓇ ᐸᑫᓵᓂᒥᓈᑎᒃ ᑳ ᑮ ᒪᒐᑭᒪᑦ ᐋᔕᔾ ᐹᓱ!
22ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᐃᑌᐤ, ᑖᐺᔦᓕᒥᒃ ᑭᒋᒪᓂᑐ᙮ 23ᐌᓴ ᑖᐺ ᑭᑦ ᐃᑎᓇᐗᐤ, ᐊᐌᓇ ᑫ ᐃᑕᒧᑴ ᐅᒣᓕᐤ ᐗᒌᓕᐤ, ᐋᒋᐸᓕᐃᑎᓯ, ᑭᒋᑲᒥᒃ ᒫᑲ ᐃᔑ ᐌᐱᓂᑎᓱ, ᐁᑳ ᒫᑲ ᑫ ᐹᔨᑕᐌᓕᑕᒧᑴ ᐅᑌᐃᒃ, ᑫ ᑖᐺᑕᒧᑴ ᐊᓂᐃ ᑫᒀᓇ ᑳ ᐃᑗᑦ ᑭᒋ ᐃᑭᓂᓕᑭ; ᑲᑕ ᐋᔭᐤ ᑫᒀᓕᐤ ᑫ ᐃᑗᑴ᙮ 24ᐁᐗᑯ ᐌᒋ ᐃᑎᑕᑾᒃ, ᐱᑯ ᑫᒀᓐ ᑫ ᓇᑕᐌᓕᑕᒧᐌᑴ ᐃᔅᐱ ᐁ ᐋᔭᒥᐋᔦᒃ, ᑖᐺᑕᒧᒃ ᐁ ᒥᓕᑳᐎᔦᒃ, ᐁᑯ ᒫᑲ ᑫ ᐋᔮᔦᒃ᙮ 25ᐃᔅᐱ ᒫᑲ ᓂᐃᐹᐎᔦᑯ ᐁ ᐋᔭᒥᐋᔦᒃ, ᐌᐯᓕᑕᒫᑫᒃ ᑮᔥᐱᓐ ᐊᐌᓇ ᐙᔦᔥ ᓈᔦᑕᐌᓕᒣᒃ; ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ ᑭᒋ ᐌᐯᓕᑕᒫᑖᒃ ᑮ ᐗᓂᑎᐎᓂᐙᐗ᙮ 26ᒫᑲ ᑮᔥᐱᓐ ᐁᑳ ᐌᐯᓕᑕᒫᑫᔦᑴ, ᓇᒪᐎᓚ ᓀᔥᑕ ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ ᑭ ᑳ ᐌᐯᓕᑕᒫᑯᐗᐤ ᑭ ᐗᓂᑎᐎᓂᐙᐗ᙮
ᒋᓴᔅ ᑲᑴᒋᒫᑲᓂᐎᐤ ᑖᓐᑌ ᐅᑲᔥᑭᐅᐎᓐ ᐌᒋᒪᑲᓂᓕᒃ
(ᒫᑎᐤ 21:23–27; ᓘᒃ 20:1–8)
27ᒥᓇ ᒫᑲ ᑕᑯᔑᓋᒃ ᒋᕉᓴᓚᒥᒃ: ᒣᒀᒡ ᒫᑲ ᐁ ᐱᒧᑌᑦ ᑭᒋᐋᔭᒥᐁᐎᑲᒥᑯᒃ, ᑮ ᐯᒋ ᓈᑎᑯ ᑭᒋ ᓵᓵᑭᐎᓕᐌᐎᓕᓕᐗ, ᓀᔥᑕ ᐅᒪᓯᓇᐃᑫᐗ, ᓀᔥᑕ ᑳ ᓂᑳᓀᓕᑖᑯᓯᓕᒋ, 28ᐃᑎᑯ ᒫᑲ, ᑫᑯ ᑳᔥᑭᐅᐎᓐ ᐌᒋ ᑐᑕᒪᓐ ᐅᐅ ᑫᒀᓇ? ᐊᐌᓇ ᒫᑲ ᑳ ᒥᓕᔉ ᐅᐅ ᑭᒋ ᑐᑕᒪᓐ?
29ᒋᓴᔅ ᒫᑲ ᑮ ᓇᔥᑴᐗᔑᐁᐤ ᐁ ᐃᑖᑦ, ᓂᓚ ᓀᔥᑕ ᑭ ᑳ ᑲᑴᒋᒥᑎᓇᐗᐤ ᐯᔭᒃ ᑫᒀᓐ, ᓇᔥᑴᐗᔑᐃᒃ, ᐁᑯ ᒫᑲ ᑫ ᐎᑕᒫᑕᑾᒃ ᑖᓐᑌ ᐌᒋ ᑲᔥᑭᑖᔮᓐ ᐅᐅ ᑫᒀᓇ ᑭᒋ ᑐᑕᒫᓐ᙮ 30ᒑᓐ ᐅ ᓯᑲᐋᑖᑫᐎᓐ, ᑭᒋᑭᔑᑯᒃ ᓈ ᑳ ᐅᒋᐸᓕᓕᐤ, ᓀᔥᑕᐱᑯ ᐃᓕᓕᓈᒃ? ᓇᔥᑴᐗᔑᐃᒃ᙮
31ᑮ ᐋᔭᔭᒥᐃᑐᐗᒃ ᒫᑲ, ᐁ ᐃᑗᒋᒃ ᑮᔥᐱᓐ ᐃᑗᔭᑴ, ᑭᒋᑭᔑᑯᒃ ᐅᒋ, ᑲᑕ ᐃᑗᐤ, ᑖᓀᑭ ᐌᒋ ᒫᑲ ᐁᑳ ᑮ ᑖᐺᑕᐌᒃ? 32ᒫᑲ ᑮᔥᐱᓐ ᐃᑗᔭᑴ, ᐃᓕᓕᓈᒃ ᐅᒋ; ᑮ ᑯᔅᑌᐗᒃ ᐃᓕᓕᐗ: ᐌᓴ ᒥᓯᐌ ᐃᓕᓕᐗᒃ, ᑖᐺ ᐅᑭᔅᑭᐙᐃᑫᐎᐤ ᒑᓐ, ᑮ ᐃᑌᓕᑕᒶᒃ᙮ 33ᐁ ᓇᔥᑴᐗᔑᐋᒋᒃ ᒫᑲ, ᑮ ᐃᑌᐗᒃ ᒋᓴᓴ, ᓇᒪᐎᓚ ᓂ ᑮ ᐎᑌᓋᓐ᙮
ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᐃᑌᐤ, ᓂᓚ ᓀᔥᑕ ᓇᒪᐎᓚ ᑭ ᑳ ᐎᑕᒫᑎᓈᐗᐤ ᑖᓐᑌ ᑳ ᐅᒋ ᑲᔥᑭᑖᔮᓐ ᐅᐅ ᑫᒀᓇ ᑭᒋ ᑐᑕᒫᓐ᙮
Currently Selected:
ᐅᐸᓓᑭᔅ ᒫᕐᒃ 11: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.