मत्ती 2
2
ज्योतिषीतु आगमन
1हेरोदेस रज्ज़ा ऊ राज ओ मुक्का अपेहल यहुदिया प्रदेशो बेतलहम नगरंङ यीशु जन्म शुहते, दंङ पूर्व दिशाज़ि अंयों शुहदा ज्योतिषीज़ि, (बुद्धिमान मीहरे अच़ि कर खंड्रा भविष्यऊ पता लगाएच़ातेर) यरूशलेमङ शहरारिंङ अंज़े रुहक्च़ी लेहतिर, 2“दुह गंङकटु अंऊर तोह अरी यहुदी तु रज्ज़ा बणेक्पिमी थल्जी ज़ेहका? छना कुचे ञेंहच़ी पूर्व दिशारिंङ दोऊ जेह्कपिमी पाहठी कंड्रा कर तंङातंई दंङ ञेंरे दोबि फ्यग लहज़ी अह्न्दंईं।” 3यहूदीतु रज्ज़ाऊ जेह्कपिमी पाहठी रेड्रीरंङ हेरोदेस रज्ज़ा ए यरूशलेम शहरो महसे मीहरे बेऐ इलदोर। 4दंङ दोई मीहतु भत्ते यहुदी मोह्ड़े पुरोहित ए यहुदी शास्त्रीरे ठ्रोहका लेह दोतंङ रुहक्तो कि, मसीहू पाहठी शास्त्रा रिंङ छि च़ेहसी तोह? “कि मसीह अंऊर जेह्कपोतो।” 5दोच़ी दोबि कुहतोर, मसीहू जन्म यहुदिया प्रदेशो बेतलहम नगरंङ शोतो; छना कुचे मीका मिन्दु भविष्यवक्ताज़ि महसे तुहई च़ेहसी तोह अंऊ परमेश्वरे कुहषी तहरे
6“हे यहुदिया प्रदेशो बेतलहम नगरो मीहरे! कांह अरी यहूदा देशंङ तोतोन,
कांह छिला रीतिरंङ यहूदो अधिकारितु बिचंङ भत्ते बे कवचि माह शुनाह;
छना कुचे केहतु बिचंङज़ि इच्च़ा मीह अपतो अंऊ अधिपति बणेक्पोतो,
अच़ि गिऊ प्रजा अंऊ इस्राएलो देशारिंङ देखभाल लोहतो।”
7हेरोदेसे दुह जेह्की गंङकटु उम्र ञेंच़िमी थल्जी शुहप्पन ज्योतिषीरे बुलाके दोतिंङ रूह्कातो कि, दुह कर अंऊ टेमारिंङ तंङातेर। 8दंङ दोई दिह कुचे ज्योतिषीरे बेतलहम नगरंङ चरच़तो, “ईलांई दुह कटु पाहठी रूठेरंङ पता लांई, दंङ दुह खोकसा इलिता छिला केहच़ी तंङातंई दोऊ पाहठी गिह्बी कंड्रुंई ताकि गेह ला इलजे दोबि फ्यग लोहग।”
9-10झांह लेह दोरे अच्च़ा इलिरे, दंङ अमरिंङ दोच़ी दुहए कर तंङरीरे अंऊ पूर्व दिशा रिंङ तंङातेर दुह। अपेहल दोच़ी दुह तंङातेर ता, दोरे महसे खुश शुहचे इलिर! कर दोतु तुहई, तुहई ज़ोज़ाते; दंङ अंऊर दुह कटु तोहई, दुह चुंङो टोईच़ी दुह कर रुमज़ा इलि। 11दोच़ी दुह घरबारंङ पिचे दुह कटु एनोह याह मरियमरंङ साते तंङातोर, दंङ दोबि फ्यग लाहतेर, दंङ अह्म्मो थैलारे अल्ज़े दोबि ज़ंङ, लोबान (रूठे बासारंङ चीज़रे), दंङ गंधरसो तग चढ़ाएतेर। 12दंङ मंङडुंङ दिह चेतावनी खोक्शे कि हेरोदेसो रज्ज़ाऊ कछंङ यह्च़ा था ईलांई, झांह लेह दोरे रज्ज़ाबि पता मेह ऊहई अमज़ि एनातु देशो हखा अच्च़ा इलिरे।
मिस्त्र देशो हखा इबी
13दोतु इलजे थल प्रभुऊ इच्च़ा दूते यूसुफो मंङडुंङ अंज़े कुतेह, “अहच़ु दि कटुऐ दिऊ याह बि कुरच़ा मिस्र देशो हखा पोक्शे इला, दंङ अपेहल तचेक गेह माहकोग दोहथल तचेक दोहरहे तोह, छना कुचे हेरोदेस दि कटुबि सच़िमी थल्जी पेट्री लेहकी तोत।” 14दंङ दुह राता रिंङ यूसुफ कटुऐ दोऊ याह बि रेंज़ा मिस्र हखा अच्च़ा इलि, 15दंङ हेरोदेसो सित्त्तर तचेक दोरे मिस्र देशारिंङ बंङज़ा इलिर। दिऊ थल्जी कि अंऊ वचन प्रभुज़ि होशे भविष्यवक्ताओ दोरच़ी महसे तुहई कुहते पुरे शुहबी जूंस, “गेह घेंङौ योह बि मिस्त्रो दोरच़ी बुलाए केहतग।”
16हेरोदेसाबि महसे रोहष अति अपेहल दोबि महसूस शुई कि ज्योतिषीज़ि दोहरंङ धोखा लहतोर। दंङ दोई सैनिकरे चरच़े ज्योतिषीतु दोरच़ी रुहक्च़े ठीक-ठीक टेमो हिसाबे बेतलहम नगर ए दोऊ देहसी-न्वेसी इलाकाओ भत्ते गंङकटुरे सचे च़रतुंई अंऊ झुह्ट साल ए दोबि कवचि तोतोर। 17दिह दिऊ थल्जी शुई ताकि शास्त्रा रिंङ यिर्मयाह भविष्यवक्ताओ दोरच़ी परमेश्वरे छि कुहते दुह पूरे शोतो;
18“रामाह#2:18 रामाह इच्च़ा झांह ठ्रोह ठहरि तोहई अंऊर रज्ज़ा दाऊदो खानदानो मीहरे बंङज़ातेर नगरंङ मीहज़ी अतुआ क्रपिमी सग थशाते,
राहेल#2:18 राहेल याकूबो मेच़ा तोहई मिन्दु मेच़िमी एनोह कटुतु थल्जी हाऊषेक्पी लेहतिर;
दंङ चुप्पे माह श्वाते
छना कुचे दोरे सिऐ इल्देर।”
मिस्त्र देशंङ ज़ि यह्च़ी
19यूसुफ, मरियम ए दोतु कटु यीशु हेंतेग तचेक मिस्र देशंङ ए तोईर। हेरोदेस रज्ज़ाऊ सीह्मी थल, प्रभु दूते यूसुफो मंङडुंङ अंज़े कुहतो, 20“अहच़ु, कटुऐ दोऊ याह बि रेंज़ा इस्राएल देशो हखा अच्च़ा इला, छना कुचे रज्ज़ा हेरोदेस ए दोऊ मीहरे सीऐ इल्दोर अच़ि कटु सच़िमी तरेहर।” 21दुह अहच़ा, दंङ कटुऐ दोऊ याह्बी रेंज़ा मिस्त्र केट्रा इस्राएल अह्च़ा अति। 22पर अपेहल यूसुफे दिह रेड्रा कि अरखिलाउस एनोह बाह हेरोदेसो रज्ज़ाऊ ठाहरीरिंङ यहुदिया प्रदेशंङ राज लहज़ी लेहकी तोत, दोहर इबिमी थल्जी बेवा इलि। दंङ यह्च़ा मंङडुंङ परमेश्वरो चेतावनी खोकसिरंङ दुह गलील प्रदेशो हखा अच्च़ा इलि, 23दंङ नासरत मिंदंङ नगरंङ इलजे बसेके इलि, ताकि वचन पुरे शुहबी जूंस, अंऊ भविष्यवक्ताज़ि यीशु पाहठी कांहषी तहरेर: “दुह नासरी कहलाहएपोतो।”
Currently Selected:
मत्ती 2: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.