IMBOMBO SYA BATUMIGWA 9
9
Ukupinduka kwa Sauli
(Imbo 22.6-16; 26.12-18)
1Umwene Sauli bo akali ikutuyanika nubukalale bwa kubogofya nukubagoga abafundigwa ba Ntwa, alinkubuka kumputi unkulumba, 2alinkwakusuma bakalata aba kubuka nabo nnyumba syakwiputilamo isya nkaya ka Damaska, ukuti linga ikubaga bamo aba njila yiyiyi, abanyambala nabakikulu, abapinyege nukubatwala nkaya ka Yerusalemu. 3Lelo bo ali munjila ikusegelela nkaya ka Damaska, nakalinga ulumuli ulufuma kumwanya lulinkummulika kosakosa; 4umwene alinkugwa pasi, alinkupilika ilisyu Ukuti, “Gwe Sauli, gwe Sauli, kumfwima fiki une?”
5Loli umwene Sauli alinkulalusya alinkuti, “Gwe ani, gwe Ntwa?” Umwene alinkumwamula alinkuti, “Yo une Yesu ne kufwima. 6Loli sumukaga ubukege nkaya, mo kwakubuligwaga isi fikuti ubombege.” 7Abene loli abandu aba bendaga nagwe, balinkwima bo sisobile nisyakuyoba, namanga ilisyu lyo balipilike, loli balinkusita nukumbona yumo umundu. 8Popapo Sauli alinkusumuka ukufuma pasi, lelo bo ikuti ngete, alinkwaga atikuketa. Popapo balinkunkola ikiboko, balinkuntetesya ukubuka nkaya ka Damaska. 9Alinkugona amasiku matatu kisita kuketa, alinkusita nukulya nukunwa.
10Lelo alimo umfundigwa yumo nkaya ka Damaska, uyu ali yo Anania ingamu; yo uNtwa alinkuyobela nagwe nkisetuka alinkuti, “Anania!” Umwene alinkuti, “Al'une gwe Ntwa.” 11Popapo uNtwa alinkumbula alinkuti, “Sumukaga ubukege mumpulo ugu bikuti Ngolofu, mo ukandondege munyumba ya Yuda umundu gwa nkaya ka Tarisi uyu bikuti Sauli ingamu. Buno ali pakwiputa, 12kangi ikumbona umundu nkisetuka uyu bikuti Anania ingamu, ikwingila nukumbikapo amaboko ukuti aketege kangi.”
13Umwene loli Anania alinkwamula alinkuti, “Gwe Ntwa, mbilike ukufuma kubandu ba bingi isya mundu yuyuyu, nububibi bosa ubu ababombile abikemo bako nkaya ka Yerusalemu; 14mope na munomuno apegigwe amaka ukufuma kubaputi abakulumba, aga kubapinyila bosa aba bikuyiyoba ingamu yako.” 15Loli uNtwa alinkumbula Anania alinkuti, “Bukaga, buno umundu yuyuyu kibombelo kyangu ikisunguligwa, ikya kubatwalilamo ingamu yangu abapanja, nabanyafyale kangi nabanyaIsraeli; 16buno nisakunnangisyaga yuyune syosa ingubilo isi fikuti akubilwege panongwa ya ngamu yangu.”
17Popapo Anania alinkubuka, alinkwakwingila nnyumba muno alimo Sauli, alinkumbikapo amaboko alinkuti, “Gwamyitu Sauli, uNtwa Yesu, uyu akusetukile munjila bo kwisa, andumile kumyako ukuti uketege kangi, nukuti gwisulege Mbepo Mwikemo.” 18Nakalinga itolo utundu utu tuliti makakala tulinkusatuka ukufuma mmaso gake, alinkwenda nukuketa. Alinkusumuka alinkosigwa. 19Popapo alinkulya ifyakulya nukukaba amaka.
Sauli ikulumbilila nkaya ka Damaska
Umwene Sauli alinkuya pamopene nabafundigwa aba nkaya ka Damaska amasiku manandi. 20Nakalinga itolo alinkwanda ukumfumusya Yesu nnyumba sya kwiputilamo, ukuti yo yu Mwana gwa Kyala. 21Bosa aba bapilikaga sisisi, balinkuswiganika balinkuti, “Akaya yo uyu abapalaganiaga nkaya ka Yerusalemu aba bayiyobaga ingamu yiyiyi? Kangi sikaya syo isi alisile na muno, ukuti abapinye nukubatwala kubaputi abakulumba?”
22Ubwene ubulumbilili bwa Sauli bulinkongelapo ukukaba amaka, alinkubatobesya abaYuda aba bali nkaya ka Damaska, bo ikusisimikisya ukuti Yesu yo yu Kristi.
23 #
2 Kor 11.32-33
Lelo bo gakindilepo amasiku mingi, popapo abaYuda balinkwitikana ukuti bangoge, 24loli Sauli alinkusimanya isi balitikene. Abene balinkunsigila mfipata pamusi na pakilo ukuti bangoge; 25loli ilisiku limo pakilo abafundigwa bake balinkumwega, balinkunsolokesya pitubulo lya pimato, balinkunsololosya nkitundu.
Sauli ali nkaya ka Yerusalemu
26Sauli alinkufika nkaya ka Yerusalemu, alinkugela ukongana nabafundigwa; loli bosa balinkuntila, balinkusita nukwitika ukuti yope mfundigwa. 27Popapo Barnaba alinkumwega, alinkuntwala kubatumigwa, alinkubapangila na muno Sauli alimbwene uNtwa munjila, nukuti uNtwa ayobile nagwe, alinkubapangila na muno Sauli ayifumukisyaga ingamu ya Yesu pabwelu itolo nkaya ka Damaska. 28Popapo Sauli alinkuya nabo nkaya ka Yerusalemu bo ikusyungutila kosakosa, alinkuyiyoba ingamu ya Ntwa kisita kutila; 29alinkuyoba nukukanikana na baYuda ba mbaGriki, loli abene balinkuti tungoge. 30Bo abitiki basyagenie, balinkwakumbika nkaya ka Kaisaria balinkuntuma ukubuka nkaya ka Tarisi.
31Popapo ikipanga kyosa kya nkisu kya Yudai nikya nkisu kya Galilai nikya nkisu kya Samaria, kilinkutengana nukwiyenga, kilinkuya nubumi bwa kungindika uNtwa; kangi kilinkubala ndusubisyo lwa Mbepo Mwikemo.
Peteri ali nkaya ka Lida na ka Yope
32Lelo bo Peteri ikwembela mosamosa, popapo alinkusuluka ukubuka kubikemo aba bayengile nkaya ka Lida. 33Mo alinkwakumwaga umundu uyu ali yo Eneya ingamu, uyu ali nimbungo ya bukokonyale, alambalele pakitala ifyinja fihano na fitatu. 34Umwene Peteri alinkuyoba nagwe alinkuti, “Eneya, Yesu Kristi ikukubumbulusya, sumukaga, gwitengelege ikitala kyako.” Nakalinga itolo alinkusumuka. 35Balinkumbona bosa aba bayengile nkaya ka Lida, na ka Saroni, balinkupindukila kuNtwa.
36Lelo alimo yumo umfundigwa unkikulu nkaya ka Yope, uyu ingamu yake ali yo Tabita, ko kuti Dorkasi#9.36 Dorkasi: ko kuti akasya. unkikulu yuyuyu ali nimbombo inunu si nyingi, kangi apaga nifyabupe. 37Mmasiku gago Tabita alinkubina, alinkwenda nukufwa. Lelo bo bamosisye mumbili, balinkumbika kunyumba ya kwiyulu. 38Papo akaya ka Lida kali pipi na kaya ka Yope, abafundigwa balinkupilika ukuti Peteri ali mumo; popapo balinkubatuma abandu babili aba kwakumpyelesya, balinkuti, “Ungakabilaga Ukwisa kumyitu.” 39Popapo Peteri alinkusumuka, alinkubuka nabo. Lelo bo ayilekufika, balinkufyuka nagwe kunyumba ya kwiyulu. Popapo abakikulu bosa abafwilwe balinkusegelela kumyake, balinkulila nukunnangisya Peteri imiselekesye nimyenda, igi Dorkasi abasonile, bo akali ali nabo. 40Peteri alinkubasosya bosa panja, alinkufugama alinkwiputa, alinkusanukila kumfimba alinkuti, “Tabita, sumuka.” Popapo umwene alinkwigula amaso gake; lelo bo ambwene Peteri, alinkusumuka alinkutugasya. 41Popapo Peteri alinkunkola ikiboko, alinkunsumusya; alinkubabilikila abikemo nabakikulu abafwilwe, alinkubapa umumi itolo. 42Syo silinkufumuka mosa nkaya ka Yope, ba bingi balinkwenda nukumwitika uNtwa. 43Popapo Peteri alinkuya nkaya ka Yope amasiku ga mingi nnyumba ya Simoni umfugutangubo.
Currently Selected:
IMBOMBO SYA BATUMIGWA 9: NNBII
Highlight
Share
ਕਾਪੀ।
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
