Matthieu 4
4
Yabédé amakanéga Jésus gôémôbôméda
(Bono na Marc 1:12–13, Luc 4:1–13)
1Gédidi SaNzambé gématôma Jésus gôékea na gô tsenge émagasani mbe akekanégu na yabédé. 2Gô nzima dinayi yapitsi Jésus amakina môyakô gôévovo na Nzambé na pitsi n’omanda. Vane amookô nzaa. 3Yabédé amawesea na gôndé Jésus na amamôkanéga mbe: Okô mbe éwe na gô pie Muana ANzambé, koa mataé mema maka mipemba. 4Jésus amaabéa angô mbe: Matendeo MaNzambé matônigôa mbe: Môma asadônga gô mipemba mitévo. Adônga te gô mabégô metso mavovo Nzambé.
5Yabédé amakea na Jésus na gô Jérusalem, môsenge ônyôngéô Nzambé. Yabédé amabata na Jésus na gô ngongo eba aNzambé. 6Amavovo n’edi mbe: Okô mbe éwe na gô pie Muana ANzambé, tséda na gô tsina. Matendeo MaNzambé matônigôa mbe:
Nzambé angavigéda asi g’ôba, ayanzi edi gôékenea éwe.
Dingagôtsua gô mogo maô.
Kabaga makôdô moo mooka ébaku.
7Jésus amamônikéda mbe: Ematendu dôta mbe: Ombiakanéga Kumu Nzambé éoo gôémôbôméda.
8Yabédé amakea na Jésus na gô ngongo amôkôdi ôtôngôni. Amamôtubéda tsengeye yetso yava tsina na dikumakaye yaô. 9Amavovo n’edi mbe: Nangagôétsa yômee yetso édué éena éwe, ôkô ôsibi mabongome moo va tsina gôéneegeda me.
10Vane Jésus amamônikéda mbe: Satan, nôtôga vane. Matendeo MaNzambé matôbeenda mbe: Neegeda Kumu Nzambé éoo na ôyanzéa te angô môtévo.
11Vane yabédé amanôtôga vandé Jésus. Asi g’ôba amavigédu na Nzambé na va kôbangô aJésus gôémôwedéa.
Jésus amabandôa gésaô sedi gô Galilée
(Bono na Marc 1:14–15, Luc 4:14–15)
12Vamookô Jésus mbe Jean eengédio gô eba atsôgôô, amakea na gô Galilée. 13Jésus amanôtôga gô Nazareth na amaviga gôédigaa gô môsenge ôtetu mbe Capernaüm, vapévapé na mubu ôtetu mbe Galilée éndé gô tsengeye diindô mbe Zabulon na Nephtali. 14Jésus amakea na wangô gôédugéda mabégô mamavovo Esaïe, môpandôédie amatasa maNzambé. Esaïe mbe:
15Asi tsenge aZabulon, na dôta asi tsenge aNephtali,
Gô nzéa éamôgôgu amubu, gô dipo tsényé yaJourdain,
na gô Galilée gôdigaa ane asaba Ajuif,
16Asi tsengeye dine amadigaaka gô tsina evitsi,
Ameena gévede gévôni.
Gévedege gévoni gématsiga gôndé ane
Ahmadigaaka gô évitsi éowa na gô tsina otômu owa.
17Va géyénzage géne Jésus amabandôa éékéda. Amavovo mbe: Koani mitéma mianyô gôéba wene mônongo gôébégô ôkumu aNzambé ôweseyi na gôndé anye.
Jésus amabambéa agunyi anayi ambusa
(Bono na Marc 1:16–20, Luc 5:1–11)
18Vamakea Jésus gô nzéa éamôgôgu amubu ôtetu mbe Galilée, ameena oma abaé. Môvo te Simon, amatetuku mbe Pierre. Na môvo te muanayedi André. Ahmabaka gôégunya mbusa yaô gô mubu. 19Jésus amabambéa ahngô mbe: Vigani, ôkani nzéepo n’ami. Anye agunyi ambusa, gavooto anye nyama, me nanganôkoa avooti oma na gôndé me. 20Tsina na tsina amatsika mbusa yaô na amakea géômbé gévo na Jésus.
21Vamoombahngô ékea, Jésus ameena avo oma abaé, te Jacques na muanayedi Jean. Ahngô te ana aZébédée. Ahmabaka digaa gô mbôngô na tétaô Zébédée gôétata mbusa yaô. Jésus amabambéa ahngô mbe: Okani n’ami. 22Tsina na tsina ahmatsika tétaô na mbôngône na amakea na Jésus.
23Jésus amakénga gô Galilée nyetso. Ameekéda gô yeba yewanyéô. Ameekéda Tsangô Eamôsôba éokumu aNzambé. Amadôngéda oma amabaka na mabeea maminongo mietso. 24Tsangô éedi émookanô gô tsenge nyetso éaSyrie. Oma amavigaka na gôndé Jésus n’abeeyi amabeeaka mabeea maminongo mietso. Avo amabaka na édidi ébévani. Avo amabeeaka tsiiga. Avo amabeeaka yôtô yaô dimakatani. Jésus amadôngéda ahngô. 25Géômbé gévôni gémaanda Jésus. Ahngô te asi Galilée, n’asi Décapole, n’asi Jérusalem, n’asi Judée na dôta asi dipo tsényé yaJourdain.
Currently Selected:
Matthieu 4: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983