मर्कुस 9
9
1कालाउ इसु एम्बालाइहेङ दोअ्हि, “जातिङको, का नेलाइहेङ दोअ्खा, इता जाअ्तेङ हिकालाइता आधेमि हि, जाइ सादेलको सारभि सरबङता लोका मातिम्पाधाउ हिदिङ किसिमसो मास्यावा।”
इसुको आकार फेरिन्हाका
(मत्ति १७:१-१३; लुका ९:२८-३६)
2इङकोको तुनिन्हुअ्सो इसु पत्रुस, याकुब रो युहन्नाहेङ वाको दोसा चुमपुतेङ एलोङ झाउका आर्दाङता चुमपुहि। इन्ता ओबालाइ खिनिङ हिघाहि, कालाउ एम्बालाइको आगाता इसुको आकार फेरिन्हाहि।#२ पत्रुस १:१७-१८ 3कालाउ वाको धाबा जेल्हालातेङ चोल्हि, जाइ सुमिङता हासु बुङ फेअ्तेङ इङकोझोको जेपालि माद्वावा।
4इङको पहर इन्ता एम्बालाइकोता एलिया रो मोसा देखाल पिहि रो ओबालाइ इसुदोफा काथा पालि तेङहि। 5पत्रुस इसुहेङ दोअ्हि, “मास्टर केलाइ इता हिका रेम्काङ जेङहि। केलाइ सुम्लोङ हिकाथामे बान्हाइने: एलोङ नाङको भाअ्सिङ, एलोङ मोसाको भाअ्सिङ रो एलोङ एलियाको भाअ्सिङ।” 6एम्बालाइ हेन्जाङ थिनाङसिङ हाइ दोअ्लि इङको पत्रुस मागिहि। 7कालाउ एलोङ मुआलोतेङ इङकोको स्याइर्हेहोइ एम्बालाइहेङ थुम्हि। कालाउ बादेल लिअ्तासो इसिका गाला ओल्हेहि, “या काङको दायाका चान हि, नेलाइ वाको कथन हिङसु!”#मत्ति ३:१७; मर्कुस १:११; लुका ३:२२ 8कालाउ ओदोङघरि इसोउसो खाङलाउ एम्बालाइदोसा इसु खिनिङ हिघाहि।
9ओबालाइ आर्दाङसो खुअ्काताङ पालाउ इसु एम्बालाइहेङ दोअ्हि, “का द्याङको चान सिकासो मासिन्हुपाधाउ नेलाइ जे तिङका हिसुन्हा इङको हासुहेङ मादोअ्सु।”
10एम्बालाइ इङको काथा ताइको मनता ताअ्हि, कालाउ बुङ सिकासो सिन्हुलि दोअ्का हाइ दोअ्तेङ ताताइमिता काथा पालि तेङहि। 11कालाउ एम्बालाइ इसुहेङ एसा दोअ्तेङ हिअ्हि, “लाम्फा एलिया लोलिगोयाङ दोअ्तेङ धरममास्टरगेलाइ हाइपालि दोअ्खे?”#मलाकि ४:५; मत्ति ११:१४
12इसु दोअ्हि, “जातिङकोङ, एलिया लाम्फा लोतेङ गोताङ काथा मिलिपावा। एन्सा जेङनु का द्याङको चान हेन्जा पिर भोगितेङ झाराङसो लाअ्न्हालि गोयाङ दोअ्तेङ हेसापा धरमकिताबता लेखेन्हाका हि कुनु? 13कालाउ बुङ का नेलाइहेङ दोअ्खा, एलिया लोलिदोहोइ रो वाको बारेता लेखेकाभाइपा द्याङगेलाइ वाकोदोफा जे मन जेङहि, एन्साङ पाहि।”
इसु मासान खोअ्का जामालहेङ एल्पाका
(मत्ति १७:१४-२१; लुका ९:३७-४३)
14ओबालाइ बो चात्यागेलाइकोता घुरितेङलोलाउ कोरबितिङ द्याङगेलाइ जोम्तेङ हिघाखे रो धरममास्टरगेलाइ चात्यागेलाइदोफा गालाबाजि पातेङ हिका ओबालाइ तिङहि। 15इसुहेङ तिङतेङसाङ जोम्तेङ हिका द्याङगेलाइ भारभुसाइतेङ वाकोता धाअ्तेङ हानेहि रो वासेहेङ सेउपाहि। 16इसु चात्यागेलाइहेङ हिअ्हि, “नेलाइ हाइको बारेता एबालाइदोफा गालबाजि पादोङ सुखेना?” 17द्याङको चेअ्सुमेअ्सुकासो एमि इसुहेङ सेउपातेङ दोअ्हि, “मास्टर, का काङको चानहेङ नाङकोता चुमाघा हिघा। मासान खोअ्का हिनाङसिङ वा धुइलिङ मादोखे। 18जेलाउ मासान काङको चानहेङ रिम्खे, वा भोनोता लोङखे, नुइसो फिजाना ओल्हेपाखे, तासि रेअ्खे रो तिराराइखे। का नाङको चात्यागेलाइहेङ इङको मासानहेङ ओल्हेपापिसु दोअ्तेङ बिम्ति पाघा, कालाउ बुङ एम्बालाइ मादोहि।” 19इसु एम्बालाइहेङ दोअ्हि, “ओइ अखान्धुर खाल, का हेअ्लाउथिकापा नेलाइदोफा ह्याङका? नेलाइहेङ हेथे सह्याङका? इङकोहेङ काङकोता चुमासु।” 20एम्बालाइ इङको वाजानहेङ वाकोता चुमाहि। इसुहेङ तिङतेङसाङ इङको मासान वाजानहेङ झाकालोम्पहि रो इङको भोनोता लोङतेङ फिजाना ओल्हेपातेङ लोताइलि तेङहि। 21इसु इङकोको आबाहेङ हिअ्हि, “यासेहेङ इसिका जेङका हेथे जेङहि?” आबा दोअ्हि, “जामाल्सोङ इसिका जेङका हि। 22मासान यासेहेङ मुअ्पालि घरिघरि मे रो चिता बुङ थालाका हि। ना दोन्हा पानु, दाया पातेङ केलाइहेङ मदत पापि” 23इसु वासेहेङ दोअ्हि, “‘ना दोन्हा’ पानु हाइ दोअ्का? खान्धुर पाकालाइको भाअ्सिङ ते गोताङ काथा जेङलि दोखे।” 24इदोइ हिङतेङ आबा र्हिकाइतेङ दोअ्हि, “का खान्धुर पाखा। आरोङ हेन्जा खान्धुर पालि दोका जेङलिको भाअ्सिङ कासेहेङ मदत पा।”
25द्याङगेलाइ ताइमिभारि धाअ्तेङ लोका तिङतेङ इसु इङको मासानहेङ एसा दोअ्तेङ हाकाराइहि, “ओइ लाटा रो बोहिरा आत्मा, का नासेहेङ हुकुमा पाखा, इदोइ वाजानसो ओल्हितेङ लोउ रो आरोङ हेअ्लाउ इङकोलिअ्ता मादुल।” 26कालाउ इङको मासान र्हिकाइतेङ वाजानहेङ झाका लोम्पातेङ ओल्हितेङ हानेहि। वाजान सिनाङ भाइपाङ जेङहि रो हेअ्मि इङको सिहोइ दोअ्तेङ दोअ्लि तेङहि। 27कालाउ बुङ इसु इङकोको खुर चातेङ ल्होपाहि रो इङको ल्होहि।
28जेलाउ इसु साअ्ता हानेहि कालाउ वाको चात्यागेलाइ सिपापा वासेहेङ एसा दोअ्तेङ हिअ्हि, “केलाइ इङकोहेङ हाइपालि ओल्हेपालि मादोन्हाहि?” 29इसु एम्बालाइहेङ दोअ्हि, “इसिकाहेङचाहिँ पुकार बिना बो हिदिङ जुक्तिसो गिलगिल्लि मादोखे।”
इसु आरोङ ताइको सिका कथन पाका
(मत्ति १७:२२-२३; लुका ९:४३-४५)
30इसु रो वाको चात्यागेलाइ इङको थामे लाअ्तेङ गालिल जेङतेङ हानेहि। इदोइ काथा हासुङ माग्याको दोअ्का वाको लाल्सा हिघाहि। 31हाइपानु इसु ताइको चात्यागेलाइहेङ खिनिङ हिङपालि भोघाहि। वा एम्बालाइहेङ दोअ्हि, “का द्याङको चान द्याङगेलाइकोङ खुर्ता प्यावा। एम्बालाइ वासेहेङ सेअ्तावा रो वा सेअ्काको सुम्नि दिनान्हुसो आरोङ सिन्हुतेङ ल्होकावा।” 32कालाउ बुङ वाको दोअ्का इदोइ काथा एम्बालाइ मागेहि रो वासेहेङ हिअ्लि बुङ थिहि।
झाराङखान्तेङ बाराका हासु?
(मत्ति १८:१-५; १०:४२; लुका ९:४६-५०)
33ओबालाइ कफर्नहुमता लोहि रो वा सिता हिलाउ इसु चात्यागेलाइहेङ हिअ्हि, “दामाता नेलाइ हाइ काथा पाघासुन्हा?” 34कालाउ बुङ एम्बालाइ हाइदोङ माधुइहि, हाइपानु दामाता एम्बालाइ “केलाइता झाराङखान्तेङ बाराका हासु?” दोअ्तेङ ताताइमिता काथा पाका हिघाखे।#लुका २२:२४ 35कोलाउ इसु योम्हि रो तेन्हेमिङ चात्यागेलाइहेङ काइहि रो एम्बालाइहेङ दोअ्हि, “हासुङ द्याङ बारालि लाल्सा पाखे पानु, इङको झाराङखान्तेङ म्हुइका जेङतेङ झाराङको सेवापाका जेङलि गोयाङ।”#मत्ति २०:२६-२७; २३:११; मर्कुस १०:४३-४४; लुका २२:२६ 36कालाउ एमि म्हुइका जामालहेङ चुमातेङ वा इङकोहेङ एम्बालाइको माझाता ताअ्हि रो इङकोहेङ कोल्हेता ताअ्तेङ चात्यागेलाइहेङ दोअ्हि, 37“जाइ काङको मिङता इसिका म्हुइका जामालता एमिहेङ र्हुखे, इङको कासेहेङ दोङ र्हुखे। जाइ कासेहेङ र्हुखे इङको कासेहेङ माको, कालाउ बुङ कासेहेङ दिङगिल्काहेङ र्हुखे।”#मत्ति १०:४०; लुका १०:१६; युहन्ना १३:२०
38युहन्ना इसुहेङ दोअ्हि, “मास्टर, एमि द्याङ नाङको मिङता मासानगेलाइ ओल्हेपातेङहिका केलाइ तिङन्हाहि। केलाइ इङकोहेङ एन्सा पालि मापिन्हाहि, हाइपानु इङको केलाइहेङ पिताइका द्याङ माको।” 39कालाउ बुङ इसु दोअ्हि, “इङकोहेङ मारोकेसु, हाइपानु काम मिङता सरबङको काम पाका ओदोङघरि काङको खिलापता मारेम्का माधुयावा। 40हाइपानु जाइ केलाइको खिलापता मान्थु, वा केलाइ पाहाङ हि।#मत्ति १२:३०; लुका ११:२३ 41जातिङकोङ का नेलाइहेङ दोअ्खा, जाइ नेलाइ ख्रिस्टको हिसुन्हा दोअ्तेङ नेलाइहेङ काङको मिङता एगिलास चि खिनिङ आम्लि पिलाउ बुङ इङको इनाम निनावा।”#मत्ति १०:४२
कुकरमसो हेसा बान्चेलि?
(मत्ति १८:६-९; लुका १७:१-२)
42इसु आरोङ दोअ्हि, “जाइ कार्हुता खान्धुर पाका इदोइ आतुइकालाइता एमिहेङ खिचोला प्यावा, इङकोको भाअ्सिङ भुरुङ एलोङ बाराका जान्ता निरघाता तोइपितेङ इङकोहेङ जाहादिता थाइपिगिल्लि रेम्का जेङधावा। 43आरोङ नाङको खुर नासेहेङ खिचोला पिनु इङकोहेङ पालगिल। हाइपानु न्हेलोङ खुर हितेङ पातेलको हेअ्लाउ मासिका मेता दुल्काखान्तेङ भुरुङ एलोङ खुर मान्थुतेङ ज्यानता दुल्लि नाङको भाअ्सिङ रेम्का ज्यावा।#मत्ति ५:३० 44[इङको पातेलता ते ना पेअ्सागेलाइ सिखे, ना मे दोङ स्यावा।]#९:४४ इदोइ दाराजा आधे पुर्ना स्रोत बाइबलता मान्थु। 45कालाउ नाङको खोकोइ नासेहेङ खिचोला पिनु इङकोहेङ पालगिल। हाइपानु न्हेलोङ खोकोइ हितेङ पातेलता थालन्हाकाखान्तेङ भुरुङ नेङगारा जेङतेङ ज्यानता दुल्लि नाङको भाअ्सिङ रेम्का ज्यावा। 46[इङको पातेलता ते ना पेअ्सागेलाइ सिखे, ना मे दोङ स्यावा।]#९:४६ इदोइ दारजा आधे पुर्ना बाइबलता मान्थु। 47आरोङ नाङको मिँ नासेहेङ खिचोला पिनु इङकोहेङ होअ्तेङ थाल्गिल। हाइपानु न्हे मिँ हितेङ पातेलता थालगिन्हाकाखान्तेङ भुरुङ ए मिँ चुमतेङ सादेलको सारभिता दुल्लि नाङको भाअ्सिङ रेम्का ज्यावा।#मत्ति ५:२९ 48[इङको पातेलता ते ना पेअ्सागेलाइ सिखे, ना मे दोङ स्यावा।]#यसैया ६६:२४ 49हाइपानु देसेहोइ भोकहेङ चोखो पाका भाइपा मेहोइ झाराङ द्याङगेलाइहेङ चोखो पाखे।
50“देसे रेम्का चिज कालाउ बुङ देसेको ताइका राम्नु इङको हाइहोइ ताइका बान्हाइलि? नेलाइ ताताइमिता हिका देसेहेङ जोगाइतेङताअ्सु रो ताताइमिता मिलितेङ हिसु।”#मत्ति ५:१३; लुका १४:३४-३५
Currently Selected:
मर्कुस 9: DHIM
Highlight
Share
ਕਾਪੀ।
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.