Va'Atəŋ 39
39
Yosef ana mə Eziptə Potifar da
1Yas məka Yosef a Eziptə, Potifar mə Eziptə, daya aba Farawən, ndəni daya net məgaŋ gəla na məlĩ Farawən, albəhək səvet mə Ismayelɗe məs dəkiynən adaka. 2#WNM 7:9Yawe asanək də Yosef, an adaɗɗa pak tay əhhar ammbani. Asanək ana mə Eziptə da ɗəf daya nan naka. 3Daya nan awlak na Yawe tay dəndəni, an adaɗɗa pak Yawe tay əɓaygən ammba vani. 4Yosef arahək kinenek ava ɗəf daya nani, aɗiyək aka wəza nani. Aɗiyək ka daya naka gəla nan də arya nan pak ammba vani yi. 5Səza aɗi Yosef aka gəla nan ləŋgə, yas Yawe aki əzaɓ nan aka gəla na mə Eziptə naka; əzaɓ na Yawe asanək aket aryeɗ nan pakə, eŋgili, va awra. 6Yaŋ appan arya nan pak ammba va Yosef, zəga tay adaɗɗum akan əmpa adəbər ki peŋ nawka aman ɓa.
Yosef dət guluk na ɗəf daya nani
Yosef, ziw nan na, gawla lelew nawla azani yi, 7dərɓaga wənəs na, harat ga ɗəf daya na Yosef askələk akani, təmna: «Avoŋguwa.» 8Yaŋ aɓoŋgu, aɓsət ga ɗəf daya nak na: «Awla ɗəf daya naw aɗiwək abani, zəga neŋgil tay adagəkgrəŋ akan əmpa ɓa. Zəga nan pak ammba vaw apsuwa. 9Ɗəf tay daykiyu addəv gəlaŋ ɓa, tay məs ataku səkan an istə ɓa ɓa, vi kəsok gulkuni. Mbarmbar kan nədaɗɗa zəga daryaw gbas, in kaɗɗa mbərayən aka Maŋgəlva di?» 10Va təki addaŋ pak, tədawnah sən Yosef, ya nan aprəm mat nawvoŋ a maŋgavat vi kawsan ndəndət ɓa.
11Pay mbərəni, atoŋguk eŋgil aka wəza nani, ɗəf taka neŋgil tay adak ɓa, 12ndət fiw ərman aza lukut nan dawnəh na: «Avoŋguwa!» Ndən lukut nan nak mbagən avata, ɓak ənzan vit appaka. 13Adan tula appan lukut nan avata, anzan appaka, 14yaŋ təye ɗiy məɗɗaŋ wəza neŋgil neki, təɓsit dawnəh na: «Mula aki səmək mə Ibri vi kasmaygəmə! Ade azaw kawvoŋguwa, yaŋ nəŋgəsl vaŋvəl dayadaya. 15Ya adan aprəm nəslan wəlaw, nədawya, appanək lukut nan a maŋgavaw, ndən ɓak vit appaka.»
16Təɗiyək lukut na Yosef nak a maŋgavat ta', hã gap pay zələt ade eŋgili. 17Təpel sənək zev əpeləŋka, də wənah na: «Balam mə Ibri kəki səmən adek azaw vi kasmayawa. 18Səza nəŋgəsl vaŋvəl dayadaya dawya ɗiy, ndən mbagən lukut nan a maŋgavawa, ndən ɓak appaka.» 19Adan ɗəf daya nak aprəm an gon tənah sən na: «Vaŋki zəga an balam nok agəɗ suwa», gədəvən adək sawɓa. 20Ɗəf daya na Yosef nak aɗi addəv təzoŋ, təki net məfərsəneɗ na məlyã.
Yosef a Fərsəna
Gala asan a təzoŋ na. 21#WNM 7:9Yawe tay də Yosef. Arban sənək moggon nan də ərah sən ulasahã na daya na Fərsəna. 22Daya net məgaŋ məfərsəneɗ appetik məfərsəneɗ pak ammba va Yosef; an adaɗɗaŋ adak pak, ndəni məzədawgəni. 23Daya net məgaŋ məfərsəneɗ zəga tay adawla ɓa zəga pak ammba vani, vi Yawe tay dəndəni; an adaɗɗa pak Yawe tay ədawgən də tiveni.
Currently Selected:
Va'Atəŋ 39: GB
Highlight
Share
ਕਾਪੀ।
Want to have your highlights saved across all your devices? Sign up or sign in
All right reserved