Va'Atəŋ 29
29
Yakob aləmək dət Rakel
1Yakob armak tive nawmbat aka dələv net ɗiy nammba pay nampum. 2Haran sek na, vov net iŋkile yaŋ awra. Gazlaŋɗe net gilew tahəŋ hoku adaka, ɗufɗuf a maŋgavani, vi sədaki zəgeɗ adawsaŋ iŋkile. Ya kalaɓ metiŋgin məmpan amani. 3Pay gilew akkalaŋ pak adaka, daski adawkəɗəŋgəlnən kalaɓ səma vov net iŋkile nak kapsitin gilewi. Asna kamsak əmpan kalaɓ a gəlani. 4Yakob assohẽt məzuteɗeŋge na: «Milmiŋgiɗwa, səŋga kənanən di?» Aɓɗaŋ na: «Sə Haran mənani.» 5Aɓsit na: «Kəsənənək Laban, wətən Nahor sa?» Aɓɗaŋ na: «Məsənka.» 6Aɓsit na: «Tay lewlew sa?» Aɓɗaŋ na: «Lewlewi yi, wətən akən Rakel yakəŋ əzzat dit gilew nata.» 7Yaŋ Amna: «Mula! Pay a disiŋgi; pay nakkelet zəgeɗi ɓa. Məpsit iŋkile sit gilewi, məke dəzəmaŋgə.» 8Azlan sənən na: «An gilew dəkkalaŋ gərak ɓa na, məɓap na əkol ma vov net iŋkile, kapsit dəsaŋgən ɓa.»
9Dəɓəl əgrak əpel ndənɗaŋ ɓa, Rakel gap dit gilew na afəta, vi məzutaɗaŋgəktə. 10Səza Yakob awlət Rakel, wətən Laban gəmsəni, dit gilew na Laban gəmsəni, ambat akəɗəŋgəl kalaɓ səma vov net iŋkile naka, apsitik iŋkile sit gilew na Laban, gəmsəni. 11Yakob allamtək Rakel a makrani, ndən həmhəmə. 12Yakob aprəman sətək Rakel na, məlmaŋ də afəta, wətət Rebeka yi. Tənzatək ənah sən afəta. 13Adan Laban aprəm wən na Yakob, wətət məlməni, anzanək ələmsən ləŋgə. Ndən kərəm ərman lalam, mah əkiyən ananda; Yakob aboton sənək an dəgəɗ təɗe'i. 14Laban aɓsən na: «gesiŋ slesleŋ səzet slesleŋɗe nawa, mbel səza gəɓa zu kənani.» Yakob asanək ananda gap təla dəndəni.
Wətəp gil na Yakob
15Laban aɓsən Yakob na: «Vi məlmu kənan dayday na, adahək kan kəgəɗ sugən wəza na makaryam sa? Anah su va nədawfaɗ suko.»
16Ya Laban tay dit kirin muguluŋgit sula, akən daya dawyətən na Le'a, akən sawã tamna, Rakel. 17Le'a birndiffe tə, Rakel, nat ŋgbat ləɗəɗətə aza ula. 18Yakob aŋglutək Rakel, amna: «Wanəgəɗ suk wəza wəzva buhul akat Rakel, wətuk akən sawã.» 19Laban azlan sən na: «Dəɗah əpsukət, ki əpsənət ɗəf ɗarə; asok də iyna.»
20Yakob agəɗək wəza wəzva buhul akat Rakel, ndən ulan na, əvoŋ siɗikke agəɗə, vi aŋglutəka. 21Yaŋ Yakob anah sən Laban: «Apsuwət ɗak nawa. Vi əvoŋ naw aknahka, nəvoŋ dəndəta.»
22Laban akkeletik ɗiy na walaŋgəlas pakə, adə sit waynabaya. 23Adan moskoy agəɗə, Laban agəmət Le'a wətəni, akət sənət Yakob, avoŋ dəndəta. 24Laban agəmət balamək nan Zilpa, apsətət ka balamək nat Le'a, wətəni. 25Təki addaŋ na, mbara Le'a tə! Yaŋ Yakob anah sən Laban: «Miy kəgəɗ suwəŋ di? Akat Rakel nəgəɗ suk wəza ɓa sa? Vimi kəmbəɗaw di?» 26Laban apsən na: «Məssərək əkət akən sawã ammba zil daabəŋ kiyət daya anamda ɓa. 27Agrak lumu taka dət akəŋkə, kapsukut maɓɓat vat, an kəgəɗək wəza wəzva buhul əmpa.» 28Vaski Yakob agəɗə. Agrakək lumu taka dət Le'a, Laban apsənət Rakel, wətən, ka goni. 29Laban apsəttək balamək nan Bilha, sət Rakel ka balamək nata. 30Yakob, avoŋguk dət Rakel anat aŋgəl daykiyit Le'a: agəɗ sənək wəza sən Laban, wəzva buhul əmpa.
Kirtin Yakob
31Adan Yawe awla na, məzelti Le'a, akol sətək uwa, nat Rakel, ɗew ndarzlaykə. 32Le'a təgəmək daway, bok wiyna, təlvan na Ruben: «Vi təmna Yawe awlak əzəmsahã nawa vi kakaŋ na, zəluw waŋgluwu kana.»
33Təɗiyək daway əmpa, bok wiyina, təmna: «Ha'aw, Yawe aprəmək na, məzelwi yi, apsuw aŋkəŋ tamə», yaŋ təlvan na Simeyon.
34Təɗiyək daway əmpa, ndət bok wiyna, təmna: «Kakaŋ kan na, wabay zən azawa, adan nəwə sən kirin mezeŋgleket hoku»; vini məlvan na Levi.
35Təɗiyək daway əmpa, bok wiyna, təmna: «Aŋ na, wanəɗiy ki Yawe!» Vini tiya na Yuda. Ndət ziw də uwa kana.
Currently Selected:
Va'Atəŋ 29: GB
Highlight
Share
ਕਾਪੀ।
Want to have your highlights saved across all your devices? Sign up or sign in
All right reserved