मर्कुस् 1
1
येशुगी गोम जेप्पे ले घयेत् १:१–३:३५
युहन्ना बप्तीस् थो़न्न युङ १-८
1को़न्ज्योक्की ॱरेबु येशु ख्रीष्ट्की ढीक्की केच्च्य ॱनेम्बु हीगो हीनी मल्ल थो़ङ्गेन् बेत्। 2कलुङ् ॱस्यो़क्केन् यशैयागी ढीबे ॱसुङ्रप्ल
ङे लो़न् टो़क्केन् च्यीक् रङ्गी एल्ला लम् ॱसेदु तोङ्गेन्। 3पक्क झ्यङ्दङ्दु केत् ज्यक्केन् च्यीक् थो़न्न हुगी केच्च्य दील चोव ज्यीन्दक् झ्यो़न्से लम् दीन्दीक्म ॱसेन ठोक्क सो़ज्यीत् सीन्न को़न्ज्योक्की ॱसुङे केच्च्य थो़ङ्गेन् बेत्। (मलाकी ३:१)
4ॱनी हस्सो़त् हुगो सीक्केन् दी पक्क झ्यङ्दङ्दु युहन्ना बप्तीस् थो़न्न युङ्न मी घयेत्ल दीक्प धक्च्ये यो़प्पल खीत्रङ् घयेत् ॱएङ्गी लम्नी ॱसीम् ज्युर्ल बप्तीस्ल स्यु सीन्न केच्च्य ॱस्येप्प बेत्। 5हुनी हुदु युहन्ना च्येल्ल यहुदीया लुङ्बनी धङ् यरुशलेम्नी मी गज्येन् युङ बेत्। हुब घयेक्की रोरङ्सो़ दीक्पे ढीक्ल को़न्ज्योक्ल ॱस्युस्स्या पुन युङ्नी, हुनी युहन्नागी हुब घयेत् चङ्बु यर्दन्ल बप्तीस्ल ॱलुक्प बेत्। 6युहन्नागी घो़ दील ॱमुक्मु घमे भागी घो़ धङ् कीप्प दील कोदक् कीङ्गो़प्प बेत्। ॱनी सम दील पीज्येक्प धङ् भेरङ्मे डङ् सगो़प्प बेत्। 7ॱनी युहन्नागी हीन्दुक् सीन्न केच्च्य ॱस्येप्प बेत्। ङे तीङ्ला ङले गज्येङ्गी ज्यीक्पा च्यीक् युङ्गेन् बेत्। ॱनी ङ गुक् झ्यीन खोङ्जो़ जुत्ते लेस् ॱस्यीक्केन्जो़त्ल आक् ॱमीत् ॱनेब यो़त्। 8ङे त खीत्रङ् घयेत् छ्यी़ बप्तीस्लरङ् क ॱलुक्को़त्। ॱनी खोङ्गी क हस्सो़त् खीत्रङ् घयेत् धम्बे थुगी बप्तीस्ल ॱलुक्केन् बेत् सीन्न ॱस्येप्प बेत्।
येशु बप्तीस्ल ॱलुक्प धङ् खोङ्ल छो़त्लीन् युङ ९-१३
9ॱनी हुगी धी़गी यङ्ल गालीलागी नासरत्नी येशु चङ्बु यर्दन्दु झ्यो़न्नी, हुदु युहन्नागी खोङ् बप्तीस्ल ॱलुक्प बेत्। 10हुनी खोङ् छ्यु दीनी थो़न्नी, इगी तेङ् यी़ भीन इगीनी मल्ल धम्बे थु पुक्मु डस्सील युङ्न खोङ् रोरङ्ल घप्न युङ खोङ्गीरङ् थोङ बेत्। 11हुनी इगी तेङ् यी़नी मल्ल रङ् ङे झ्यम्बे भु हीन्। रङ्ल ङ गुव दुक् सीक्केङ्गी ॱसुङ्गेत् च्यीक् युङ बेत्।
12हुनी ॱस्यर्च्यक् धम्बे थुगी खोङ् पक्क झ्यङ्दङ्ल तङ बेत्। 13ॱनी हुदु खोङ्ल स्यक्पु स्यीप्च्यु थुक्की नङ्ल शैतान्गी छो़त्लीन् तेब बेत्। ॱनी खोङ् हुदु रीगे ॱसीम्ज्येन् घयेत्तङ् दल देप्प बेत्। हुगी यङ्ल तेङ् यी़नी मल्ल भङ्ज्येम्ब घयेत् युङ्न खोङ्ल स्यप्च्यी़ ज्युब बेत्।
येशुगी गोम केच्च्य ॱनेम्बु ॱस्यो़क्केन् १४-२०
14हुनी युहन्ना बप्तीस् चो़ल्ल ॱस्योर्नी, येशु गालीलाल को़न्ज्योक्की केच्च्य ॱनेम्बु ॱस्यो़त्तु युङ बेत्। 15खोङ्गी हीन्दुक् ॱसुङ बेत्। ह धी़ ॱलीस्सोङ्। को़न्ज्योक्की ज्यागक् ॱस्यच्चल ॱलीत् छर बेत्। खीत्रङ् घयेत् ह ॱएङ्गी लम्नी ॱसीम् ज्युर्न केच्च्य ॱनेम्बुल छ्य स्योक्च्यीत् सीन्न ॱसुङ बेत्।
16ॱनी लेन् च्यीक् येशु गालीलागी छो़ छीगनल गीरे यङ्ल खोङ्ल मी नबा ॱङी शीमोन् धङ् हुगी पी़न् अन्द्रीयस् सीक्केन् ॱङी छोल जाली ॱयुक्पदङ् ठेप्प बेत्। 17हुब ॱङीबुल येशुगी खीत्रङ् ङदङ् दल डो। हुन्दो खीत्रङ्गी न सीङ्गेन् हीगो डस्सी थरे लम्ल मी घयेत् सीन्न ठीक्केल्ल खीत्रङ् सोगेन् झ्यीब बेत्। 18हीनी ॱस्यर्च्यक् हुबे रोरङ्सो़ जाली घयेत् दी हुदु च्यम् स्यक्न येशुगी ॱलोप्टुक्ल खोङ्दङ् दल टप्नर बेत्।
19हुनी येशु फच्चो़त् च्यीक्ल फीन्नी यङ् नबा पी़न् ॱङी ढी़ नङ्दु जाली चीम्गीन् झ्यीप्पदङ् ठेप्प बेत्। हुब ॱङीबु जब्दी सीक्केन् च्यीक्की भु, मीङ् दील याकुब् धङ् युहन्ना सीगो़प्प बेत्। 20ॱनी ॱस्यर्च्यक् हुब ॱङीबु खोङ्गी ॱलोप्टुक्ल भो़ब बेत्। हुबे रोरङ्सो़ पब धङ् ॱयोक्पु घयेत् दीब हुदु ॱलो़ तङ्न रोरङ्सो येशुगी ॱलोप्टुक्ल खोङ्दङ् दल टप्नर बेत्।
ॱनो़प्प दीप्पे तम् २१-२८
21हुनी खोङ्जोसो कफर्नहुम् सार्ल फीम्ब बेत्। ॱनी ङीत्तुव ॱलीबे ङीन् दी खोङ्जोसो छ्यो़गी छोगङ्ल स्युन हुदु जोम्न युङे मी घयेत्ल ॱलोप्स ज्यप्न टेप्प बेत्। 22खोङ्गी ॱलोप्स ज्यक्लु दील मी घयेत् दी ॱह लेब बेत्। घन्ड हीन् सीन्न खोङ्गी ॱलोप्स ज्यक्लु दी छ्यो़डीम्गी चयेलम घयेक्की लेमु डस्सी मेम्ब, कवङ् छ्यीम्मु यो़प्प डस्सी ॱह घोव बेत्। 23ॱनी हुगी यङ्ल उन ॱनो़प्प स्यीलोक्पोक्म स्यीन्नरे मी च्यीक् यो़प्प बेत्। ॱनी हुगी केत् ज्यप्न येशुल 24ॱवे नासरत्की येशु, खो़त् ङीत्तङ् डीक् दीरङ् मीत् डीक्पे, ङीत् खरप्ल तोङ्दु युङ हीम्ब? रङ् इगी को़न्ज्योक् च्यानी युङे चङ्म हीम्ब च्येम्म बेत्। रङ् ङे ङु ॱस्यीज्युङ् झ्यीब बेत्। 25ॱनी हुल येशुगी ॱहरक्प दो़त्। रङ् हुनी थो़ल्ल ज्युक् सीन्न कगो़त् तङ बेत्। 26हुनी हुगी ॱनो़प्प दीगी मी दी गन्दीक्म टुन, हुनी ओ़लोक् ज्यप्न थो़न्न खुर बेत्। 27ॱनी हील मी घयेत् दी ॱह लेन हुब रोरङ्सो नङ्दु हीगो कवङ् छ्यीम्मु च्येम्मे छ्यो़लु ॱसम्ब च्यीक् हीम्ब न घन्ड ब अक्? हुगी कगो़त्ल ॱनो़प्प स्यीलोक्पोक्म घयेक्की इक् नेन्न डोगुक् सीन्न झ्यीब बेत्। 28हुनी खोङ्गी ढीक्की केच्च्य घयेत् गालीलागी लुङ्बल घल अक् ढीम्सी धर्न खुर बेत्।
नेप्प गज्येन् ढक्तु ची़प्प २९-३४
29हुनी खोङ्जोसो छोगङ् दीनी थो़न्नी शीमोन् धङ् अन्द्रीयस्की खीम्ल स्युङ्ज्योङ् फीम्ब बेत्। ॱनी याकुब् धङ् युहन्ना अक् फीम्ब बेत्। 30ॱनी उन शीमोन्गी ज्युक्मु दी ढो़त् बर्न नगो़प्प बेत्। ॱनी हुगी ढीक्ल मीजङ् दीबे ॱस्यर्च्यक् येशुल ॱस्येप्प बेत्। 31ॱस्येत्नी, खोङ् नेप्प दीगी लोल फीन्न नेप्प दीगी लक्प दीनी खोङ्गी सीन्न ॱलोङ्नी, ढो़त् दी छ्यक्न खुर बेत्। हुनी हुगी खोङ्जोसोल स्यप्च्यी़ ज्युब बेत्।
32ॱनी हुगी ङीन् दी गोङ्ज्यो नम् ॱरो़जो़त्ल हुदु येशु च्याल नेप्प घयेत् धङ् ॱनो़प्प अयेक्प स्यीन्नरे मी गज्येन् ठीक्न युङ बेत्। 33ॱनी हुदु गोक्केक्की ॱये धङ् ॱयेन्दु सार्की मी घयेत् दी इक् जेङ् जोम्न युङ बेत्। 34ॱनी खोङ्गी हुदु मी नगेङ्गी नज ॱनम्ब गज्येन् ढक्तु ची़प्प बेत्। ॱनो़प्प अयेक्प स्यीन्नरे ॱनो़प्प आक् गज्येन् तो़न्न दीत् तङ बेत्। ॱनी ॱनो़प्प घयेत् दीगी येशु ङु ॱस्यीगेन् झ्यीनी, खोङ्गी हुबल तम् ॱस्यो़त्तु ॱमत् ची़प्प बेत्।
येशु पक्कल ॱसुव तोप्तु फीम्बे तम् ३५-३९
35ॱनी हुगी नेम्बेत् दी येशु ॱङेन्ज्याल नम् मत् लोङल लोङ्न छ्यील थो़न्न मी मीस्स पक्कल ॱसुव तोप्तु फीम्ब बेत्। 36हुनी शीमोन् धङ् रोरङ्गी दगु दीब येशु ॱयेङ्दु फीम्ब बेत्। 37ॱनी येशु ॱङीत्नी, हुबे खोङ्ल मी कुरीक्की नीज्यरङ् ॱयेङ्गुक् सीन्न ॱस्येप्प बेत्। 38ॱनी हील येशुगी ह हज्यरङ् हीगी सार् हीगी छीग ॱनमी़ युगङ् घयेत्ल अक् केच्च्य ॱस्यो़त्तु डो। ङ युङ्ज्येगी धो़न् दी इक् हीगी ढीक्ल क युङ हीन् सीन्न ॱसुङ बेत्। 39हुनी खोङ्जोसो गालीलागी लुङ्ब घल अक् गीर्न यहुदीगी छ्यो़गी छोगङ् घयेत्ल स्युन केच्च्य ॱस्येप्प बेत्। ॱनो़प्प अयेक्प स्यीम्बे मी घयेत् च्यानी ॱनो़प्प तो़न्न दीत् तङ बेत्।
जीस्सो़ च्यीक् ढक्पे तम् ४०-४५
40हुनी जीस्सो़ च्यीक् येशु च्येल्ल युङ्न खोङ्गी ढुङ्दु हुगी पीमुङ् चुन खोङ्ल हीन्दुक् झ्यीब बेत्। नीज्यरङ्गी थुल यो़त्न, ङे नज हीगो ढक्न चङ्मल सो छुगेन् बेत् सीन्न स्यी़ब बेत्। 41ॱनी हुगी जीस्सो़ दील येशु ॱङीङ् छय बेत्। हुनी खोङ्गी रोरङ्गी लक्प दी च्यङ्न हुगी जीस्सो़ दील रेक्न रङ् ढक्तु ची़च्च्ये ॱनो़ब यो़त्। रङ् हीगी नज हीनी ढक्न चङ्मल ज्युक्च्यीत् सीन्न ॱसुङ बेत्। 42हीनी ॱस्यर्च्यक् हुगी जी नज दी जेङ् ढक्न चङ्मल ॱसोङ बेत्। 43हुनी खोङ्गी हुगी मी दील रङ् ह लोक्ल ज्युक्। 44ॱनी रङ् ढक्पे केच्च्य हीगो मी ॱसुल आक् ॱमत् ॱस्यो़प्प, स्युङ्ज्योङ् छ्यो़प्पो़न् च्याल ज्युक्ल रङ् दीम्बरङ् ढक्प दी मी कुरीक्की ॱह घोज्ये यो़प्पल रङ्गी सी़बु दी छ्यो़प्पो़ल्ल तो़ल्लेत्। हुनी मोशागी कल यो़प्पल रङ्गी नज ढक्न चङ्मल झ्युङे ढीक्ल को़न्ज्योक्ल छ्यो़प्प पुलेत् सीन्न गन्दीक्म ॱङान तङ बेत्। 45ॱनी तङ्न आक्, हुगी मी दीगी हुनी फीन्नी हीगी केच्च्य हीगो घल अक् ॱस्येत्न टम्ब बेत्। हुनी म दीरङ् येशु मीमङ्गी थोङ्सल सार् घयेत्ल स्युक् ॱमत् छुब, रीगल डो गो़ ॱस्यर बेत्। ॱनी रीगदु उक् खोङ् च्याल मी गज्येन् घनी इक् च्यीनी इक् जोम्न युङ बेत्।
Currently Selected:
मर्कुस् 1: LHM
Highlight
Share
ਕਾਪੀ।
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society