創世記 46
46
雅各全家落去埃及
1 雅各導全家出發，去到別是巴，佇遐獻祭互伊的老父以撒的上帝。 2暝時上帝佇異象中給雅各講：「雅各！雅各！」
伊講：「我佇遮。」
3上帝講：「我是上帝，是你的老父的上帝。你欲落去埃及，毋免驚，因為我欲互你佇遐成做大族。 4我欲及你做夥落去埃及，嘛一定會導你倒來。你過身的時，約瑟會佇你的身邊侍候你，給你安葬。」
5 雅各對別是巴出發；雅各許個子，互𪜶的老父雅各，及𪜶的子兒、𪜶的某攏坐佇埃及王派來欲載𪜶的車。 6雅各及伊攏總的子孫，帶𪜶的牲生，以及佇迦南地所得著的財物，落去埃及。 7雅各帶伊的後生、查某子、查甫孫、查某孫，及伊所有的後代，攏去埃及。
8下面是落去埃及的以色列人，雅各後代的名單：雅各的大子呂便。 9呂便的子以諾、法路、希斯崙、迦米。 10西緬的子耶慕利、雅憫、阿轄、雅斤、瑣轄；及迦南女子所生的子掃羅。 11利未的子革順、哥轄、米拉利。 12猶大的子珥、俄南、示拉、法勒斯、謝拉；珥及俄南死佇迦南地。法勒斯的子希斯崙、哈慕勒。 13以薩迦的子陀拉、普瓦、約伯、伸崙。 14西布倫的子西烈、以倫、雅利。 15以上是麗亞佇美索不達米亞給雅各生的子；閣有伊的查某子底拿；雅各及麗亞生的子孫，男女共三十三人。
16 迦得的子洗非芸、哈基、書尼、以斯本、以利、亞羅底、亞列利。 17亞設的子音拿、亦施瓦、亦施韋、比利亞；閣𪜶的小妹西拉。比利亞的子希百、瑪結。 18以上是拉班互伊的查某子麗亞的女婢悉帕給雅各生的子孫，共十六人。
19 雅各的某蕾潔的子約瑟及便雅憫。 20約瑟佇埃及地生瑪拿西及以法蓮，就是希利坡里城的祭司波提‧非拉的查某子亞西納給約瑟生的。 21便雅憫的子比拉、比結、亞實別、基拉、乃縵、以希、羅實、慕平、戶平、亞勒。 22以上是蕾潔給雅各生的子孫，共十四人。
23 但的子是戶伸。 24拿弗他利的子雅薛、沽尼、耶色、示冷。 25以上是拉班互伊的查某子蕾潔的女婢辟拉給雅各生的子孫，共七人。
26及雅各做夥去埃及的子孫，新婦無算，共六十六人。 27閣有約瑟佇埃及生的兩個子；雅各的家來到埃及的，總共七十人。
雅各及伊的家族佇埃及
28 雅各差猶大先去見約瑟，請伊給𪜶講欲按怎去歌珊；𪜶就來到歌珊。 29約瑟給車準備好勢，去歌珊迎接伊的老父雅各。𪜶一下見著面，約瑟就仆佇老父的頷頸哭真久。 30雅各給約瑟講：「我看著你的面，知你猶活啲，今我死嘛甘願。」
31 約瑟給伊的兄弟及𪜶老父全家的人講：「我著去對埃及王報告，講：『我的兄弟及我的老父全家的人，攏已經對迦南地來到我遮。 32𪜶是飼羊，是照顧牲生的人；𪜶將牛群、羊群，及一切所有的攏帶來。』 33埃及王若召恁，問恁講：『恁是做什麼工作的？』 34恁著講：『你的僕人對少年到今，及阮的祖先攏是啲飼牲生。』按呢恁就會當住佇歌珊地區；因為埃及人討厭飼牲生的人。」
Currently Selected:
創世記 46: TTVH
Highlight
Share
ਕਾਪੀ।
Want to have your highlights saved across all your devices? Sign up or sign in
The Bible Society in Taiwan, 2021