मत्ती 13
13
मात्र नुकु भुईं ने बीज बुनतोर कहनी
1हुनी दिने ईशु घर ले निकरून भाती गलील चो झील चो कटा जाऊन बसलो। 2आउर हुनचो लगे असन बड़े भीड़ रूंड़ा होली कि हुन ड़ोंगा उपरे चेगलो, आउर सपाय भीड़ खंडी रेटे उबा रवत। 3आउर हुन हुनमन ले कहनीमन ने खुबे असन गोठमन बल्लो “गोटक बुनतो बिता बीज बुनुक निकरलो। 4बुनतो समया खिन्डिक बीज बाट चो रेटे घसरली आउर चड़ीईमन ऐऊन भाती हुनके खादला। 5खिन्डिक बीज चचरली भूईं थाने घसरली, जोन थाने हुनके खुबे माटी नी मिरली आउर गड़ीयां माटी नी मिरतोर लागुन हुन झटके बाड़ली। 6मान्तर बेर निकरतो के हुनमन जरून गेला, आउर चेर नी धरतो के सुकुन गेली। 7खिन्डिक बीज लाटा-बुटामन ने घसरली आउर लाटा-बुटामन बाडुन भाती हुनमन के चेपाला। 8मान्तर खिन्डिक बीज अच्छा भूईं थाने घसरली, आउर फल आनला, कोनी सव गुना, कोनी साठ गुना, आउर कोनी तीस गुना। 9जेचो कान आसे हुन सुना।”
कहनीमन चो भेद
10चेलामन लगे ऐऊन भाती हुनचो ले बल्ला, “तुय लोगमन ले कहनीमन ने केंव गोठयाय सीस?” 11हुन जबाप दिलो, “तुमके सरग राज चो भेदमन चो समज दिया गेली से, मान्तर हुनमन के नाई। 12कसनबल्लोने जेचो लगे आसे, हुनके दिया जाय दे; आउर हुनचो लगे खुबे होये दे; मान्तर जेचो लगे काई निआय, हुनचो ले जोन काई हुनचो लगे आसे, हुन बले धरा जाये दे। 13मय हुनमन ले कहनीमन ने ऐईकाजे गोठयाऊ आय, कि हुनमन दकते-दकते नी दकोत; आउर सुनते-सुनते नी सुनोत; आउर नी समजोत। 14हुनमन चो बारे ने यशाया चो ऐ अगम गोठ पुरा होऊ आय:
‘तुमी कानमन ले तो सुना से, मान्तर समजास नाई; आउर आँईकमन ले तो दका से, मान्तर तुमके नी सुझे दे।’”
15“कसनबल्लोने ऐ लोगमन चो मन ठोसर होऊन गेली से,
आउर हुनमन कानमन ले ऊँचा सुनु आत आउर हुनमन आपलो आँईकमन के लिमटला से;
काहांय असन नी होओ कि हुनमन आँईकमन ले दकोत,
आउर कानमन ले सुनोत आउर मन ले समजोत,
आउर फिरून जाओत आउर मय हुनमन के चेंगा करें।”
16“मान्तर धन्य आय तुमचो आँईकमन, कि हुनमन दकु आत; आउर तुमचो कान कि हुनमन सुनु आत। 17कसनबल्लोने मय तुमचो ले सते बलें सें कि खुबे असन अगम गिआनीमन आउर धरमीमन चाहला कि जोन गोठमन तुमी दकेसास, दकलास, मान्तर नी दकलास; आउर जोन गोठमन तुमी सुनेसास, सुनलास, मान्तर नी सुनलास।
अच्छा भुईं चो कहनी चो अरत
18“अदायं तुमी बुनतो बिता चो कहनी चो अरत सुना 19जोन कोनी राज चो बचन सुनुन भाती नी समजे, हुनचो मन ने जोन काई बुनलोर रये, हुनके हुन दुष्ट ऐऊन भाती झिकुन नेऊ आय। ऐ हुनी आय, जोन बाट चो रेटे बुनलोर रये। 20आउर जोन चचरली भुईं थाने बुना गेली, ऐ हुन आय, जोन बचन सुनुन भाती तुरते हरिक ने मानु आय। 21मान्तर आपलो ने चेर नी संगातोर लागुन हुन खिन्डिक ची दिन चो आय, आउर जिदलदाय बचन चो लागुन कलेश नाहले झंझट होऊ आय तेबे तुरते ठोकरना खाऊ आय। 22जोन लाटा बुटामन ने बुना गेली, ऐ हुन आय, जोन बचन के सुनु आय, मान्तर ऐ जगत चो चिन्ता आउर धन चो धोका बचन के चेपाऊ आय, आउर हुन फल नी आने। 23जोन अच्छा भूईं ने बुना गेली, ऐ हुन आय, जोन बचन के सुनुन भाती समजु आय, आउर फर आनु आय; कोनी सव गुना, कोनी साठ गुना, आउर कोनी तीस गुना।”
गऊँ आउर रान बीज चो कहनी
24ईशु हुनमन के गोटक आउर कहनी दिलो, “सरग चो राज हुन माने चो असन आय जोन आपलो बेड़ा ने अच्छा बीज बुनलो। 25मान्तर जिदलदाय लोग सोहते रवत तेबे हुनचो बयरी ऐऊन भाती गऊँ चो मंजी रान बीज बुनुन जाते गेलो। 26जिदलदाय बीज निकरली आउर खेड़ लगली, तेबे रान बीजा चो बुटामन बले दका दिली। 27ऐ थाने घर चो दासमन ऐऊन भाती हुनचो ले बल्ला, ‘हे मालिक, काय तुय आपलो बेड़ा ने अच्छा बीज नी बुनुन रलीस? फेर रान बीज चो बुटामन हुता काहां ले ईली?’ 28हुन हुनमन ले बल्लो, ‘ऐ कोनी बयरी चो काम आय।’” दासमन हुनचो ले बल्ला, “काय तुचो मन आसे, कि आमी जाऊन भाती हुनके सकलु दें?” 29हुन बल्लो, “नाई, असन नी होओ कि रान बीजा चो बुटामन सकलते-सकलते तुमी हुनचो संगे गऊँ के बले झिका। 30काटतो दाय ले दुनो के गोटक संगे बाडुक दिआस, आउर काटतो चो समया ने मय काटतो बितामन ले बलेंदें कि पयले रान बीज चो बुटामन सकलुन भाती जरातो काजे हुनमन चो भारा बान्दा, आउर गऊँ के मोचो कोटार ने रूंड़ा करा।”
राई बीज चो कहनी
31हुन हुनमन के आउर गोटक कहनी दिलो, “सरग चो राज राई चो गोटक बीज चो असन आय, जोन के कोनी माने धरून भाती आपलो बेड़ा ने बुनुन दिलो। 32हुन सपाय बीजमन ले नानी तो होऊ आय मान्तर जिदलदाय बाडु आय तेबे सपाय साग डार ले बड़े होऊ आय; आउर असन रूक होऊ आय कि बादरी चो चड़ीईमन ऐऊन भाती हुनचो खेंदामन ने बसु आत।”
खमीर चो कहनी
33हुन गोटक आउर कहनी हुनमन के सुनालो, “सरग चो राज खमीर चो असन आय जोन के कोनी बायले लेकी धरून भाती तीन पोसा आंटा ने मिसाली आउर होऊ-होऊ हुन सपाय खमीर होली।”
कहनीमन चो इसतमाल
34ऐ सपाय गोठमन ईशु कहनीमन ले लोगमन के सांगलो, आउर बिन कहनी चो हुन हुनमन ले काई नी बोलते रये, 35कि जोन बचन अगम गिआनी चो बाटले बोला जाऊ रली, हुन पुरा होओ: “मय कहनी सांगतो काजे आपलो मुंह खोलें दें मय हुन गोठमन के जोन जगत चो मुर ले गुपत रली से उजागर करेंदे।”
गऊँ आउर रान बीज चो कहनी चो अरत
36तेबे हुन भीड़ के छांडुन भाती घर ने ईलो, आउर हुनचो चेलामन हुनचो लगे ऐऊन भाती बल्ला, “बेड़ा ने रान बीज चो कहनी आमके समजाऊन देस।” 37हुन हुनमन के जबाप दिलो, “अच्छा बीज चो बुनतो बिता माने चो बेटा आय।” 38बेड़ा जगत आय, “अच्छा बीज राज चो पिला आय, आउर रान बीज दुष्ट चो पिलामन आत। 39जोन शतरू हुनमन के बुनलो हुन शयतान आय; काटतोर जगत चो आखरी आय, आउर काटतो बितामन सरगदूत आत। 40आउर जसन रान बीज सकला जाऊ आय आउर जराया जाऊ आत असने ची जगत चो आखरी ने होयेदे। 41माने चो बेटा आपलो सरग दूतमन के पटाये दे, आउर हुनमन हुनचो राजमन थानले सपाय ठोकरना चो कारनमन के आउर कुकरम काम करतो बितामन के रूंड़ा करदे, 42आउर हुनमन के आईग चो कुण्ड ने पका दे, जोन थाने गागतोर आउर दात कड़रतोर होयेदे। 43हुन समय धरमी आपलो बुआ चो राज ने बेर चो असन चमक दे। जेचो कान आसे हुन सुना।
लुकालो धन
44“सरग चो राज बेड़ा ने लुकालो बिती धन चो असन आय, जोन के कोनी माने पावलो आउर लुकाऊन दिलो, आउर मारे हरिक ने जाऊन भाती आपलो सपाय काई बीकुन दिलो आउर हुन बेड़ा के घेनलो।
खुबे मोल मोती
45“फेर सरग चो राज गोटक बेबारी चो असन आय जोन अच्छा मोतीमन चो डगर ने रलो। 46जिदलदाय हुनके गोटक खुबे कीमत बिती मोती मिरली तेबे हुन जाऊन भाती आपलो सपाय काई बिकुन दिलो आउर हुनके घेनलो।
झारी चो कहनी
47“फेर सरग चो राज हुन बड़े झारी चो असन आय जोन समुन्द ने डाला गेली, आउर सपाय परकार चो मछरीमन के सकलुन आनली। 48आउर जिदलदाय झारी भरली, तेबे मछरी धरू बितामन हुनके कटा ने झिकुन आनला, आउर बसुन भाती अच्छा-अच्छा के तो भण्डवामन ने रूंड़ा करला आउर खराप-खराप के पकाऊन दिलो। 49जगत चो आखरी ने असने ची होये दे। सरग दूतमन ऐऊन भाती दुष्टमन के धरमीमन ले अलग करदे, 50आउर हुनमन के आईग चो कुण्ड ने पकादे। जोन थाने गागतोर आउर दात कड़रतोर होयेदे।
नवा आउर जुना सिक्या चो मोल
51“काय तुमी ऐ सपाय गोठमन के समजलास?” चेलामन जबाप दिला, “हव।” 52फेर ईशु हुनमन ले बल्लो, “ऐईकाजे सपाय शास्तरी जोन सरग राज चो चेला बनलो से, हुन घर चलाऊ बिता चो असन आय जोन आपलो भण्डार ले नवा आउर जुना तीजमन निकराऊ आय।”
ईशु चो नासरत ने फेर ऐतोर
53जिदलदाय ईशु सपाय कहनीमन सांगलो, तेबे हुन थानले गेलो। 54आउर आपलो नंगर ने ऐऊन भाती हुनमन चो आराधना घर ने हुनमन के असन उपदेश देऊक मुरयालो कि हुनमन अकचकित होऊन भाती बोलुक मुरयाला, “ऐके ऐ गिआन आउर सामरत चो काम काहां ले मिरली? 55काय ऐ बड़ई चो बेटा नुआय? आउर काय ऐचो आया चो नाव मरियम आउर ऐचो भाईमन चो नाव याकूब, यूसुफ, शिमोन आउर यहूदा नुआय? 56आउर काय ऐचो सपाय भईनमन आमचो मंजी ने नी रवत? फेर ऐके ऐ सपाय काहां ले मिरली?”
57ऐ परकार हुनमन हुनचो लागुन ठोकरना खादला, मान्तर ईशु हुनमन ले बल्लो, “अगम गिआनी चो आपलो देश आउर आपलो घर के छांडुन आउर काहांय बेईजिती नी होये।” 58आउर हुन हुता हुनमन चो अबिश्वास चो लागुन खुबे सामरत चो काम नी करलो।
Currently Selected:
मत्ती 13: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.