Malikɔ 11
11
Yɛsu usuingea mo mosomba we Yɛlusalɛma
(Mat 21:1-11; Luk 19:28-40; Yɔa 12:12-19)
1Aba Yɛsu ne baeyechwa bakɛ baswisɛɛna mosomba we Yɛlusalɛma, abe abe bangaolea Bɛtɛfayɛ ne Bɛtania, mɔsɛɛsɛ mwe keembe kye Misɛituni, awɛ na kotoma baeyechwa bakɛ babee. 2na kobasaolea: «Moye ko kalya kae kombaa kwinu. Ataingee banu moa, motasange kyana kye mbonda kesofekewa, ketaasi mondo ndanakobea. Mokekakoe ne kombea nakyo.
3Ne kende mondo osobabocha: ‹Ko eke kotoketa banu bobo?› momosaolee itɛ: ‹Nombe oe ne bwɛnwa bwakyo›, alakini otakɔɔtɔsɛɛ akyo. 4baa baeyechwa na koya, abɔ na kosanga kea kyaana kye mbonda kee bofekewe ku mukinda we ɛmɔ ndabo, mɔsɛɛsɛ mwe njea. na kokekakoa. 5Bando bamɔchi ko baa babɛchaya alya na kobabocha: «Yee! Ko eke kotosoola banu kea kyaana kye mbonda?»
6Abɔ na kobasaolea bwaɔcha Yɛsu, kusia bando baa na kɔbalɛkɛa bayake. 7Amobeela abɔ Yɛsu na kea kyaana kye mbonda, na koanja bibwalwa byabɔ mo nganda mwakyo. kusia Yɛsu na kokekobeea. 8Ne bando babua na koanja bibwalwa byabɔ mo njea, bakinɛ na koya kwabɛmbɛ mɛbɔmbɔ yee bisɛsi ko masio na kobangoa kubianja mo njea. 9Na baa baeta kombaa na baa babaka kɔmɔngɔ bakandokaya:
«Osana#11:9 Osana Mu kiɛbulania Osana ɛtɔɔcha itɛ: «Keno ne kyanya ke kotoolosa!» Yɔɔla Nem 118:25-26.!
Kauwe ko oona osobaka mu chiina lya Mwaame!
10Ne Boombe bwa isito mokoo Lauli boe mokoba
Na abo bɔtɛɛ awɛ kauwe
Kakua oelelekiwe kwiyoo!»
11Abɛchaya Yɛsu usuingea mo mosomba wɛ Yɛlusalɛma na kwingea mo Ɛkalu. na kɔlɔla biisɛ byabɛchaya monda. Kɔmɔ kwabɛɛ kotae kyɔlwa ne boya awɛ Bɛtania ne ndomwa chaakɛ ikumi ne babee.
Yɛsu usukimoa mutini
(Mat 21:18-19)
12Ngɛcha yaakɛ, aba abɔ mo koola Bɛtania, Yɛsu na kuungwa njaa. 13Na kɔmɔa kwɛ njɔɔ Mutini wabɛchaya ne bisɛsi. olya mote wabɛchaya ne bisɛsi byabua. Awɛ na koya kwakɛngɛyɛɛ kende otakonje bimuka. Alakini, aisɛɛna awɛ, ndasanga keemo, bisɛsi bokata, kɔmɔa ndekyaba kyanya kye Mutini koocha bimuka. 14Kɔ bɔbɔ Yɛsu na kukimoa olya mote itɛ: «Kobangoa leno, kɔbɛchaya kabee naa ne mondo ɔmɔɔsa we kolya bimuka byao!» Maɔ makomo, baeyechwa bakɛ na kuungwa.
Yɛsu usulikita batosombya biemo mo ndabo ya Kakua
(Mat 21:12-17; Luk 19:45-48; Yɔa 2:13-22)
15Kusia Yɛsu ne baeyechwa bakɛ na koolea mo kalya kɛ Yɛlusalɛma. Na kwingea mo Ɛkalu, awɛ na kulikita baolekyaya ne baolaya alya.#11:15 Alya ɛtokonda kɔɔcha kyambaa kye Ɛkalu kyabekwa ko bataasi Bayula. Na kobangoa kutungumua ma mɛsa me baa baalolaya tombaambaa, ne biti bye batoolekya ngulimba#11:15 Bayula kotokea mɛsɛngɛ yee kɛbɛɔ basindaya tombaambaa twabɔ alya. kusia, ko kobaɛcha bɔkɛtɛ bwe koola nyama chaochiwaya ne molambo we Ɛkalu., 16Na awɛ ndaimenya na nawɛ koeta ne keemo mo Ɛkalu.
17Kusia Yɛsu na kobangoa kobaeyecha: «Tuchimba twa ama tɔtɔɔcha itɛ: ‹Ndabo yaanɛ itaitaniwaye ndabo yee kwiyaya ko bando basɛ.›#11:17 Yɔɔla Isa 56:7. Alakini banu, mwausia kumituula iboa lye ngiba kwisamea!»#11:17 Yɔɔla Yɛl 7:11.
18Bakoo be Mapatili ne baeyechi be Salia aungwa abɔ lea ilɔngɔ, na kobangoa koenga njea ye kuchia Yɛsu. Alakini na komotena kɔmɔa bando basɛ bakanakanaya byabua ne byaechechaya awɛ. 19Aolea kyɔlwa, awɛ ne baeyechwa bakɛ na koola mo kaa kalya.
Maeyechi me kwiyaya ne iekekeo
(Mat 21:20-22)
20Aolea mambombe me ngɛcha yaakɛ, Yɛsu ne baeyechwa bakɛ babɛchaya mo koeta, na kɔmɔa olya mutini ɔɔsɛ ususia kooma ne kumichi. 21Pɛtɛlɔ na koeyoka itɛ Yɛsu ukimoe olya mutini. Awɛ na komosaolea Yɛsu: «Mweyechi, lɔla, olya mutini okimonee awɛ osooma!»
22Kɔ bɔbɔ Yɛsu na kobasaolea Baeyechwa bakɛ: «Mwimenye Kakua! 23Kiinɛkinɛ natobasaolea: mondo otokoka kosaolea kee keembe: ‹Choeka ana ne ilaala mu kichibachiba!› ingɛ ndatwikakanya mo motema waakɛ, alakini uswimenya itɛ biɔchɛɛ awɛ bitaolee, na bitaongwe. 24Kɔ bɔbɔ, nasobasaolea, kɛsɛ kɛtaɛngɛɛ banu Kakua mu kwiyaya, moongwe ne iekekeo itɛ mususia kokekonja, ne ko njea ena mɔtaɛchiwɛ akyo.
25«Ne atabɛ baanu mukwiyaya kwa Kakua, ingɛ oe ne ikomo ne mondo ukinɛ, tamokwea lokwa. Kɔ bɔbɔ Isao oe mwiyoo na awɛ otakokwee lokwa ko bwabea bwao. [26Alakini kende ndemwaungweaya bakinɛ lokwa, na baanu Isinu utuchikana kwiyoo ndakamokwee lokwa ko bwabea bwiinu.»]
Bɔkɛtɛ bwa Yɛsu bototokea koni?
(Mat 21:23-27; Luk 20:1-8)
27Abɔ na kɔɔtɔka kabee kalya ke Yɛlusalɛma. Aba awɛ mo kochomba mo Ɛkalu, bakoo be Mapatili, ne baeyechi be Salia ne bakoo be Bayula na komoolelea. 28Na komobocha itɛ: «Bibi biisɛ bitoketa awɛ, utubiketa kɔ bɔkɛtɛ bwa naani? Na ni naani ɔtɔkɔɛchɛɛ boa bɔkɛtɛ?» 29Yɛsu na kobasaolea: «Na mee ngetababocha ikomo lɛmɔɔsa. Mwasonjaolea, na mee ndabasaolee kɔ bɔkɛ bɔkɛtɛ botoketa mee mama makomo. 30Naani otomee Yɔana kwaine bando mbuu? Kakua ɔbɛɛ bando? Monjaolee.»
31Baa bakoo na koya kaɔlɛ na kobangoa kosaoleana: «Ingɛ tɔsɔɔcha: ‹Kwiyoo ne kwatoka abo, otaɔchɛ, ko eke kotaasi banu ndemwamwimenya?› 32Ne kende tosomosaolea: «Bwatokea ko bando». Baɔcha bobo kɔmɔa batenaya bando, kɔmɔa basɛ bacheba itɛ Yɔana waba ndɛnda lya Kakua lye kiinɛkinɛ. 33Kɔ bɔbɔ, Abɔ na kosaolea Yɛsu: «Toocheba!» Ko boa Yɛsu na kobasaolea: «Na mee, sikamosaolee kɔ bɔkɛ bɔkɛtɛ botoketa mee maa makomo.»
Currently Selected:
Malikɔ 11: ZMB
Highlight
Share
Copy
Want to have your highlights saved across all your devices? Sign up or sign in
©2022 Seed Company in coordination with Forum Communautaire des Traducteurs de la Bible et Alphabétisation