लुका 24
24
येसु पुनरुत्थान् तबल
(मत्ती २८:१-१०; मर्कुस् १६:१-११; युहन्न २०:१-१०)
1अइतबार् स्य्होरी अमकोलमा र्हङ्चे टोप् स्य्हेङ्बे य्हक्को ङोर्थङ् खबे स्हेःमा बोर्ज्यीम् येसुत थेन्बे दुर्सरी ङ्यीज्यी। 2थेङ्यीमा दुर्सरी दोःमम् दुर्सइ म्रप्री थेन्बे ङ्हच्छ्यङ् युङ्ब स्यालाबल म्रङ्ज्यी। 3होत्तज्यीम् थेङ्यीमा न्हङ्री वङ्ज्यी। तर थेङ्यीमाचे हुजुरी प्रभु येसुइ ल्हीः अम्रङ्। 4थेङ्यीमा थोम्ज्यीम् र्प्टीब मुबल। हुजु बेलोरीनो तर्-तर्ले सर्बे येन् येन्बे म्ही ङ्य्ही थेङ्यीमाकी रेइरी रप्युज्यी। 5अमकोलमा लोङ्ज्यीम् सरी पब्लु लज्यी। तर अमकोलमात हुजु म्ही ङ्य्हीचे पङ्ज्यी, “सोज्यीन्बे म्हीत तले एङ्यीमाचे स्यीबलमा थेन्बे दुर्सरी म्हइबल? 6थेङ् चुरी अरे। थेङ् स्यीब ग्यम्से सोजेत्पल मुब! व्हल् स्य्हेङो, थेङ् गालील्री मुबे बेलोरी एङ्यीमात थेङ्चे ता सुङ्बल मुबल। 7थेङ्चे सुङ्ज्यी, ‘म्हीइ ज पापीमाकी यारी सोप्तीज्यीम् क्रुस्री च्योलास्ये मुब। ओसेम् सोम्रेत् कुनो स्यीब ग्यम्से सोस्ये मुब।’” 8ओसेम् थेङ्यीमाचे येसुचे सुङ्बे फ्रोइमा व्हल् लज्यी।
9ओसेम् अमकोलमा दुर्स ग्यम्से दोःय्हर्ज्यीम् थेङ्यीमाचे म्रङ्बे जम्म तम्मा चुक्ख्रीत् डबमातेङ् ल्हो-ल्हो जम्म डबमात स्येत्ज्यी। 10हुजु अमकोलमामी मरीयम्, मग्दलीनी ओसेम् याकुब्की अम मरीयम् ओसेम् योअन्नातेङ् ल्हो-ल्हो अमकोलमाएनो मुबल। थेङ्यीमचेनो चु तम्मा प्रेरीत्मात स्येत्पल मुबल। 11तर हुजु अमकोलमाकी तम्त थेङ्यीमाचे अतबे तम् पङ्ज्यीम् पतइअती। 12तर पत्रुस् फोत् रेःज्यीम् दुर्सरी छ्योङ्य्हर्ज्यी। ओसेम् कुक् लज्यीम् न्हङ्री च्यामम् सुतीइ येन्कीनो म्रङ्ज्यी ल्हो-ल्हो तेएनो अम्रङ्। चु म्रङ्ज्यीम् थे तेःङेन् तज्यीम् दीम्री दोःय्हर्ज्यी।
इम्माउस नम्स ङ्यीबे ग्यम्री येसु
(मर्कुस् १६:१२-१३)
13हुजु दीन्रीनो येसुइ डब ङ्य्ही यरुस्लेम् य्हङ्से चुख्रीत् कीलोमीटर् थारीङ् मुबे इम्माउस् पङ्बे नम्सरी य्हर्टीब मुबल। 14थेङ्य्ही यरुस्लेम्री तबे जम्म तम्माकी बारेरी तम् लज्यीम् य्हर्टीब मुबल। 15थेङ्य्ही तम् लज्यीम् य्हर्टीबे बेलोरीनो येसु ब्योन्खज्यीम् थेङ्य्हीतेङ् बक्च्य स्येःजेत्ज्यी। 16तर पर्मेस्वर्चे थेङ्यीमात थेङ्त म्रङ्लेनो अस्येःन लजेत्ज्यी। 17येसुचे थेङ्यीमात, “एङ्यीमा तइ बारेरी तम् पङ्ज्यीम् ब्रटीब?” बी ङ्योत्जेत्मम् थेङ्य्ही छेर्बे लीः थोःज्यीम् थोम्ले रप्ज्यी। 18हुजु ङ्य्ही न्हङ्री क्लेओपास् पङ्बे म्हीचे थेङ्त, “यरुस्लेम् कोर्ज्यीम् खज्यीम्एनो हुजुरी तीन्हम्स्यो ताता तटीब बी खले एचेकीनो अस्ये?” बी ङ्योत्ज्यी। 19थेङ्चे थेङ्य्हीत, “तइ तम्?” बी ङ्योत्जेत्ज्यी। ओसेम् थेङय्हीचे, “नासरत्की येसुइ तम्, थेङ् अगम्बक्त मुबल। थेङ्चे स्य्हेङ्जेत्पे लक्तेङ् लोप्जेत्पे फ्रोइ पर्मेस्वर्तेङ् जम्म म्हीमाकी ङोन्री सक्तीसाली मुबल। 20तर ङ्यीमाइ ङ्हच्छ्यङ् लम्बुमातेङ् सासक्माचे थेङ्त सेत्लागो पङ्ज्यीम् रोमी सर्कार्की यारी सोप्तीज्यी, ओसेम् थेङ्त क्रुस्री च्योलाज्यी। 21थेङ्चेनो इस्राएलीमात थर्नलजेत्प बी ङ्यीमाचे आस् लबल मुबल। तर थेङ्त क्रुस्री च्योलाबलेएनो तीङ्यीम् सोम्रेत् तज्यी। 22ङ्यीमा न्हङ्की डेत्-डेत् अमकोलमाचे ङ्यीमात थोम्न लज्यी। थेङ्यीमा दोल्स्य्हो दुर्सरी ङ्यीज्यी, 23तर थेङ्यीमाचे थेङ्की ल्हीःत अय्हङ्नेम्। ओसेम् दोःखज्यीम् थेङ्यीमाचे स्वर्गदुत्मा म्रङ्बे तम् ओसेम् स्वर्गदुत्माचे ‘येसु सोजेत्पल मुब’ पङ्ज्यी बी ङ्यीमात स्येत्खज्यी। 24चु तम् थ्येःज्यीम् ङ्यीमाइ डेत्-डेत् र्होमाएनो दुर्सरी ङ्यीमम् अमकोलमाचे पङ्ब र्हङ्लेनो यङ्ज्यी। तर थेङ्यीमाचेएनो येसुइ ल्हीःतमी अम्रङ्।”
25ओसेम् येसुचे थेङ्यीमात सुङ्ज्यी, “एङ्यीमा गत्ते मुर्ख म्हीमा! अगम्बक्तमाचे पङ्बे जम्म तम्मात बीस्वास् स्य्हेङ्बरीएनो एङ्यीमात गत्ते गारो तबल? 26मुक्ती न्हङ्बे ख्रीस्ट् र्हङ्की महीमारी स्येःब बीमम् ङोन्ग्यम् चु दुखमा नाअथोबल स्यीम्?” 27ओसेम् येसुचे र्हङ्की बारेरी मोसा य्हङ्से जम्म अगम्बक्तमाचे धर्म छ्येःरी ब्रीबे जम्म तम्मा थेङ्यीमात गोनलजेत्ज्यी।
28ओसेम् थेङ्यीमा इम्माउस नम्सइ रेइरी दोःजेत्प बीसेम् येसुचे ङोन्-ङोन् स्येःब म्हइब र्हङ् लजेत्ज्यी। 29तर थेङ्य्हीचे थेङ्त, “म्हुन तयम्ज्यी, तीङ्यीइ म्हुन् ङ्यी ङ्य्हीतेङ्नो बक्च्य स्य्हुजेतो” बी पङ्ज्यी। होत्तज्यीम् थेङ् बक्च्या स्य्हुबरी थेङ्य्हीतेङ् स्येःजेत्ज्यी। 30येसु थेङ्य्हीतेङ् बक्च्य स्य्हेःब सोल्बरी स्य्हुःजेत्ज्यी। थेङ्चे गेङ् थोःजेत्ज्यीम् मोलम् न्हङ्ज्यी। ओसेम् गेङ् स्योइज्यीम् थेङ्य्हीत न्हङ्ज्यी। 31हुजु लीप्चे पर्मेस्वर्चे थेङ्य्हीत थेङ्नो येसुनो टीम् बी स्येःनलजेत्ज्यी। तर हुजु बेलोरीनो थेङ्मी थेङ्य्ही ग्यम्से म्हय्हर्जेत्ज्यी। 32थेङ्य्हीचे गीचे गीत, “येसु ङ्य्हङ् ङ्य्हीतेङ् बक्च्या ग्यम्री ब्रज्यीम् धर्म छ्येःकी तम् गोनलजेत्पे बेलोरी ङ्य्हङ् ङ्य्हीइ सेम् अतङो स्यीम?” बी पङ्ज्यी।
33होत्तज्यीम् हुजु बेलोरीनो थेङ्य्ही रेःज्यीम् यरुस्लेम्री दोःय्हर्ज्यी। हुजुरी थेङ्य्हीचे चुख्रीत् डबमातेङ् ल्हो-ल्हो म्हीमात र्हुब्ले यङ्ज्यी। 34ओसेम्, “प्रभु देमेन्नो स्यीब ग्यम्से सोजेत्ज्यीम् सीमोन्ज ब्योन्खनेम्!” बी तम् पङ्टीबल यङ्ज्यी। 35ओसेम् हुजु डब ङ्य्हीचे ग्यम्री तबे तम्तेङ् येसुचे गेङ् स्योइज्यीम् थेङ्य्हीत न्हङ्बे बेलोरी थेङ्त खले स्येःज्यी बी हुजुरी मुबलमात स्येत्पीन्ज्यी।
येसु डबमाज म्रङ्बल
(मत्ती २८:१६-२०; मर्कुस् १६:१४-१८; युहन्न २०:१९-२३; प्रेरीत् १:४-८)
36थेङ्यीमा चु तम् पङ्टीन-पङ्टीननो येसु थेङ्यीमाइ गुङ्री र्प्खजेत्ज्यीम् थेङ्यीमात, “एङ्यीमात सान्ती तखइ” बी सुङ्ज्यी। 37ओसेम् थेङ्यीमाचे म्हङ् म्रङ्टीब म्हेन्ज्यीम् य्हक्को लोङ्ज्यी। 38तर येसुचे थेङ्यीमात, “एङ्यीमा तले लोङ्बल? एङ्यीमाचे तले सेम्री सङ्क लबल?” बी ङ्योत्जेत्ज्यी। 39“च्याको, ओसेम् ङइ यातेङ् कङ्री छुउ, एङ्यीमाचे म्रङ्बल देमेन्नो ङ य्हीन्ब। तलेपङ्सम् म्हङ्ल स्यतेङ् नख्रुत् अत, तर ङलमी मुब!” 40चोले सुङ्ज्यीम् थेङ्चे थेङ्यीमात र्हङ्की फ्यातेङ् स्य्हब् ङोन्जेत्ज्यी। 41थेङ्यीमा तङ्ज्यीम् तेःङेन् तलेनो थेङ्यीमाचे येसुनो बी पतइतीब अखम्। होत्तज्यीम् येसुचे थेङ्यीमात, “एङ्यीमातेङ् चबे स्हेः तेए मुब?” बी ङ्योत्जेत्मम् 42थेङ्यीमाचे ख्रङ्बे तर्ङइ स्य दुम्बु गी पीन्ज्यी। 43येसुचे हुजु तर्ङइ स्य थेङ्यीमाइ ङ्होन्सङ्नो सोल्ज्यी। 44ओसेम् येसुचे थेङ्यीमात, “मोसाचे ब्रीबे पर्मेस्वर्की नीयम्री, अगम्बक्तमाचे ब्रीबे छ्येःरी ओसेम् भजनसङ्ग्रहरी ङइ बारेरी ब्रीबे जम्म तम्मा टोप् तथोब बी ङ एङ्यीमातेङ् बक्च्य मुबे बेलोरी ङचे ङोन्ग्यम्नो स्येत्पल मुबल” बी सुङ्जेत्ज्यी।
45हुजु लीप्चे येसुचे थेङ्यीमात धर्म छ्येः गोखम्बे सेम् न्हङ्ज्यी। 46ओसेम् थेङ्यीमात सुङ्ज्यी, “चोले ब्रीबल मुब, मुक्ती न्हङ्बे ख्रीस्ट्चे दुख नाज्यीम् स्यीथोस्ये मुब। ओसेम् सोम्रेत् कुनो स्यीब ग्यम्से सोथोस्ये मुब। 47ओसेम् पाप् ग्यम्से पस्चताप् स्य्हेङ्बमाचे क्षमा यङ्ब पङ्बे सम्तर् यरुस्लेम् य्हङ्से तीप्ज्यीम् जम्बुलीङ्की जम्म य्हुल्री थेङ्की छेन्री प्रचार् तथोब। 48चु जम्म तम्मा एङ्यीमाचे स्येत्नोथोःब। 49ङइ अपचे न्हङ्ब पङ्ज्यीम् बाचा स्य्हेङ्बे पबीत्र आत्मा ङचे एङ्यीमात पीत्युस्ये मुब। तर स्वर्ग ग्यम्से सक्ती अयङ्गदे एङ्यीमा चु सहर्रीनो टीउ।”
येसु स्वर्गरी स्येःजेत्पल
(मर्कुस् १६:१९-२०; प्रेरीत् १:९-११)
50हुजु लीप्चे येसुचे र्हङ्की डबमात बेथानीया सम्मा नोम्जेत्ज्यी। हुजुरी थेङ्चे फ्या ङ्य्हीनो रेःजेत्ज्यीम् थेङ्यीमात मोलम् न्हङ्जेत्ज्यी। 51थेङ्चे थेङ्यीमात मोलम् न्हङ्जेत्टीबे बेलोरी, थेङ् थेङ्यीमा ग्यम्से फेःज्यीम् स्वर्गतोर् नोम्जेत्ज्यी। 52थेङ्यीमाचे थेङ्त तेन्ज्यीम् य्हक्को तङ्ज्यी, ओसेम् यरुस्लेम्री दोःय्हर्ज्यी। 53ओसेम् थेङ्यीमा पर्मेस्वर्त तोप्परी दीन् र्हङ्स्यीनो पर्मेस्वर्त तेन्बे दीम्री र्हुब् तज्यी।
Currently Selected:
लुका 24: WTDG
Highlight
Share
ਕਾਪੀ।
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
