Luka 18
18
Umulumbe wamwanachi mufwilwe umulume nukapanzya
1Yesu awumila umulumbenye woo, uwakuwasambilizya ukuti wapepa penye nanti kulechelezya. 2Mukaya kamwi mwalinji kapanzya wumwi wino atatinanga Leza nanti akuchindika awantu. 3Swinya mukaya kakonye mwalinji umwanachi mufwilwe umulume weyonye awino wayanga kweweliwe penye akulambilizya akuti, Njavwa untule kumulwani wane! 4Impindi yakuzile nkaninye kapanzya nanti kulonda ukumwavwa, ukuwa pakupelelechezya ayipanzya ati, Chingatenga nsitina Leza nanti akupechela umuntu wumwi. 5ukuwa ilelo, muno amwanachi mufwilwe umulume wee akuntamya nandi mulandulile; amuno angalanga akwiza akunsuntilila ansovye namaka!
6Ngapano Imfumu e Yesu alandalila avwanga ati, Yivwa chino kapanzyanye weyo umukalale wavwanzile. 7Aleni fwandi, wuzye Leza atalivwanjila awantu wakwe wane wakumulilila umusanya nuwusiku? Wuzye alizinguluka ukuwavwa? 8Nkuwanena nkuti, Aliwapanzizya ichete, nanti kuzimba. Ukuwa wuzye pano Umwana Muntu wizawiza alizana isuwilo munsi?
Umulumbe wamuFalisi nukasonchezya wamusonko
9Swinya Yesu ayumila awantu umulumbenye woo wane wayisuwilanga wakuti swewazima wasulanga awawuye wonsi. 10Awantu wawili wayile kung'anda yakwe Leza mukupepa; wumwi walinji amuFalisi, numuwuye walinji wekasonchezya wamusonko. 11Umu Falisi ayimilila ayipepela palwakwe ati, We Leza, nkukusalifya, muno ntakolana nawanji wonsi; awamilichisye, awachilumba, nanti awazelele, swinya ntakolana nanti wekasonchezya wamusonkonye wee. 12Nkasolezya ukulya yawili mumulungu wonga, swinya nkakufimila ichikumi chonsi chino nkazana. 13Ukuwa kasonchezya wamusonko ayimilila apatali nanti kwelezya ukupunamila mwiyulu, ukuwa ayikung'unsya pachifuwa chakwe ati, Leza, siwa ninkumbu nani, nemuwembu! 14Yesu ati, Nkuwanena nkuti, umuntunye wee, Leza watezile amutetezile pane wayanga kung'anda yakwe. Amuno wensi wino akuyikuzya alichefwa, nawensi wino akuyichefya alikuzwa,
Yesu apepa utwana
(Mateyu 19:13-15; Marko 10:13-16)
15Wamwi awatwala utwana twawo kwe Yesu ukuti akawike amakasa yakwe petolito. Ukuwa awala awasambilizi walola awawakalipila. 16Ukuwa Yesu ayita utwana ati, Lekani awana wize kwenene, mutawalesya, amuno awaWufumu wakwe Leza wali ndivino wanye-waa. 17Yizukani choo! Wensi wino wakana ukupochelela Uwufumu wakwe Leza ndivino umwana mutichi ataliyinjila mwenemo nawanda.
Umuchindame
(Mateyu 19:16-30; Marko 10:17-31)
18Enankolelo wumwi uwawa Yuda awuzya Yesu ati, Musambilizya Muzima, Nga nazipila ukuchita chani ukuti mpochelele uwumi wamuyayaya?
19Nawe Yesu amuwuzya ati, Ngamuno chani chino ukunjita ukuti, Muzima? Pasi umuzima wumwi, nkandi Leza mutupu. 20Wamanya amasundo yakuti, Utazeleluka; utakoma; utakwiwa; utawipizya; uwachindika eso nu nyoko.
21Umuntu atolelela ati, Vyonsi vyonye-vyoo navisunga ukufumilila kuwutichi wane.
22Ala Yesu wivwa wonye-woo, amunena ati, Wasowezya ichintu chonga. Kazya vyonsi vino uli navyo upe awasaluke indalama, apano uliwa ninsawo mwiyulu nga uyize unkonke. 23Ukuwa ala umuntu wivwa wonye-woo afwilimana nkaninye, amuno walinji ninsawo mvule.
24Ala Yesu wamulolechesya kuno ali namalanda ati, Ye, chatalila awachindame ukwinjila mu Wufumu wakwe Leza wuli! 25Chatalila umuchindame wuli ukwinjila Muwufumu wakwe Leza ukulusye ingamila ukupuiunkana mwilinso lyansindano.
26Awantu wano wivwile pano akuvwanga awati, Ngafwandi, weweni wino angatulwa?
27Yesu atolelela ati, ivintu vino vyatalila awantu ukuchita Leza weni angavichita.
28Ngapano Peter ati, Lola! Ngavino swenji twasya utwaya twitu twakukonka.
29Yesu ati, Molimonye, nkuwanena nkuti; wensi wino wasya ing'anda yakwe numuchi, nant'awanyina nant'awakwasi nanti awanakwe muno a Wufumu wakwe Leza 30weyonye awino alipochelela ivivule nkani munkulonye yoo, ayize apochelele nuwumi wamuyayaya mumpindi yino iliyiza.
Yesu avwanga ivyamfwa yakwe impindi yachititatu
(Mateyu 20:17-19; Marko 10:32-34)
31Yesu asenda awasambilizi ikumi nawawili palwawo awanena ati, Teyelezyani! Tukuya kwe Yerusalemu kuno vyonsinye vino vyawalisilwe nawatumwa ku vya Mwana Muntu vyaya fiswa. 32Aliya akalemekwe kumakandi, asowekwe wamusoweka nukumutuka nga nukumuswilila amati. 33Wize wamuvyapule wamukome nukumukoma, ukuwa pawanda wachititatu azyulupuke.
34Awasambilizi weni nanti kwiluka ivintunye vyoo; chino amazwinye yaa yasulanga chatazile ukumanya, watamanyile chino Yesu wavwanjizile wonye-woo.
Yesu apozya intonko yino yalenganga
(Mateyu 20:29-34; Marko 10:46-52)
35Ala pano Yesu wapalamila kwe Jeriko, intonko yimwi yisile mumbali yanzila, yalenganga. 36Ila yivwa iwumba likupita iwuzya iti, Nga choo achani?
37Awamunena awati, We Yesu wamwe Nazareti akupita.
38Ipunda iti, We Yesu, Mwanakwe Davidi! Waninkumbu kwenene!
39Awantu wane wakolezile awamukalipila ukuti amyalale. Ukuwa weni apundisya nkaninye ati, We Mwanakwe Davidi? Waninkumbu kwenene!
40Yesu ayimilila akomelezya ukuti intonko itwalwe kweweliwe. Ila yapalamila, Yesu ayiwuzya ati, 41Nga ukasi nkuchitile chani?
Hi, Mulali, nkulonda mpochelele icheni chane swinya.
42Yesu anena intonko ati, Silola! Isuwilo lyako lyakupozya.
43Napapo-napaponye intonko iti nukulola, ikonka Yesu, iwachindika Leza. Awala wantu walola wonye-woo, awalumbula Leza.
Currently Selected:
Luka 18: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
