Mwamulizo 22
22
U Mulungu yakumulajiliza Abulahamu yamulavye Isaka yawe yikumbiko
1Zali zeza kukondya zizo, hanyuma u Mulungu yakamujela Abulahamu, yakamucema yakutya, “Gwe Abulahamu!” Nayo yakedika yakatya, “Ane, baha Muwaha.” 2Mulungu yakamutya, “Ale, wumusolaje mwanago Isaka, u mwanago we ciwene, mono wumwendile, wubite nayo sunga ku yisi ya Moliya, wukamulavye kuko, likumbiko linyanywe, mucanyha ye litunda lyono nokulajila nene.” 3Ale, imitondo yaco, Abulahamu yakelawa kwinuka hakali mitondo muno muno. Yakayiwikaniza ndogowe yakwe, yakawasoleleza ne wazelelo wakwe wejete, hamonga no mwanagwe Isaka. Ale du, yakawikaniza ne zingwagu so lilyo likumbiko, hodu wakawa kutuluka ku wubita i hanhu hono Mulungu yamulonjela. 4Na mwi'zuwa lye kadatu, Abulahamu yakenula meso gakwe, yakalanga, yakahawonela cidaha i hanhu baho. 5Yakawalonjela wawalya i wazelelo wakwe yakatya, “Ale, anye, mwikalaje bahano, hamonga ne ndogowe yiyino. Ane na ayu Isaka, cobita akulya ku nhumbi ayilya, ko cikahembe, hanyuma ho comuwuyilenyi kanyhi.”
6Nayo Abulahamu yakazisola zingwagu yakamutwika mwanagwe Isaka yazidinghule. Mwene nayo yakadinghula moto no mumaje mu muwoko. Ale, wakawa kutuluka. 7Nayo Isaka yakamuwuza sogwe, yakutya, “Gwe baba!” Nayo Abulahamu yakedika yakatya, “Ane mwanangu?” Isaka yakatya, “Baba, u moto ne zingwagu, avyo cina navyo, alu ma inyana ye ngholo ye likumbiko yili hayi?” 8Abulahamu yapitula yakatya, “Gwe mwanangu, u Mulungu mweneco yo kocipela i nyana ye ngholo so likumbiko linyanywe.” Hodu wakawa kujendelela no muhinzo wawo. 9Nawo waza kufika i hanhu hono Mulungu yamulajiliza. Abulahamu yakazenga cikumbicilo. Yakapanga zingwagu mucanyha ye cikumbicilo, yakawa kumuwopa mwanagwe Isaka, yakawa kumujeleka mu zingwagu, mucanyha ye cikumbicilo. 10Abulahamu yakawa kuwugolola u muwoko wakwe, yakawusola mumaje wakwe, nayo yakawa kwiwikaniza ho yamuwulaje mwanagwe. 11Ninga malayika wo Mulungu yakamucema ku wulawa ku wulanga, yakutya, “Abulahamu! Abulahamu!” Nayo yakedika yakatya, “Ane baha.” 12Malayika yakamutya, “Wulece kumutamisa yuyo mwana, hamba wulece kumutendela nghani yo yose! Alu namanya vyono agwe mbeka wumogopile Mulungu, vyono si wumulemeze mwanago we ciwene Isaka.”
13Nayo Abulahamu yali yeza kwinula meso gakwe, yalanje nhavi ku mugongo wakwe, yakayiwona nduwilu, yibatwe mahembe gayo mu cititika. Abulahamu yakawa kubita kuyisola ngholo yiyo, yakawa kuyilavya likumbiko linyanywe, yikahomela ho mwanagwe Isaka. 14Nayo Abulahamu yakahacemela hanhu baho yakatya, “U Muwaha Mulungu kogawa.” Sunga nalu, wanhu watezaga, “Mwi'tunda lyo Muwaha Mulungu, vijelaga.” 15Malayika wo Mulungu yakamucema kanyhi Abulahamu ku wulawa ku wulanga, 16yakatya, “U Muwaha Mulungu yakutya nhavi, Nilahiza nene no mweneco vyono, ku soko vyono witumile nhavivi, hamba siwunemeze u mwanago we ciwene, 17holeka nane mbeka nokulugutiza, no lulelo lwako nolwinjifya luwe lwinji muno muno nhe zinyelezi za ku wulanga, na kanyhi luwe kotya nho muhangha wa mwi'lenga. 18Na muli lulelo lwako, imakungugo gose mo golugutizizwa vyono agwe kulihulika lilajilizo lyangu.” 19Ale, Abulahamu yakawa kuwabitila wawalya wazelelo wakwe, yakawa kutulukana hamonga nawo, wakawa kuwuya ku kaya ku Belisheba. Nayo Abulahamu, hodu yakekala kuko.
I wana wa Naholi
20Vyaza kupuluta vilo vicefu, nayo Abulahamu yakalonjelwa zo wutya, Milika nayo yamulelela Naholi, nduguye, wana. 21Nawo wo wano, Usi, u mulelwa mulongozi, Buzi u mwanakwawe, Kemuyeli u sogo wa Alamu, 22Kesedi, Hazo, Pilidashi, Yidilafuna na Betuyeli. 23Nayo Betuyeli yo yamulela Labeka. Nayo Milika yamulelela Naholi u nduguye wa Abulahamu, wawo wana wali munana. 24Hamonga na zizo, Lewuna u mujitulwa wa Naholi, nayo yakamulelela Naholi wana, nawo wowa, Teba, Gahamu, Tahashi na Maaka.
Currently Selected:
Mwamulizo 22: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.