Mwamulizo 20
20
Abulahamu na Abimeleki
1Abulahamu yakatuluka yakulawa ku Mamule, yakawa kubita ku yisi ya Negebu, nayo yakekala haciligati ya Kadeshi na Shuli, kanyhi yakekala hadodo na ku Gelali. 2Nayo Abulahamu lono yali yali kuko, yakenoza u mugolece wakwe Sala kotya nha lumbulye. Holeka u mutemi Abimeleki wa ku Gelali yakamusola Sala. 3Ninga Mulungu yakamubitila Abimeleki ne cilo mu ndoto, yakamutya, “Langa ta, agwe lu kofwa, ku soko yo kumusola yuyo mucekulu, hambi nha mugolece wa munhu yunji.” 4Ninga hamba nhavivyo Abimeleki yali yakali si nagona na Sala ng'o. Holeka nayo Abimeleki yakatya, “Alu Muwaha, ho kowawulaga sunga ne wanhu wono wasina masutya! 5Alu si yo mweneco Abulahamu mono yenoza yeze Sala nha lumbulye? Kanyhi hamba nhavivyo, Sala nayo yenoza Abulahamu nha lumbulye! Ane nane nayinoza nghani yiyi ko mutima muzelu muno muno, holeka sina yisutya.”
6Nayo Mulungu yakamulonjela Abimeleki mu ndoto yakatya, “Ale, heya viswanu! Nane manyile nha vyono wayituma nghani yiyi ko mutima muzelu, ane nane nha yo nene mono nghwimiye ho wulece kwituma wubi kuli'ne, holeka singhukomboye ho wugone no mucekulu yuyu. 7Ale, hodu aluno, wumugomolaje u mucekulu yuyu ko mulume wakwe, mwene yuyo muwizi, nayo kokulombela ho wulece kufwa. Ninga hono wulece kumugomola, ale wumanyile lukulu vyono agwe kofwa, gwegwe go mweneco hamonga ne wanhu wako wose.” 8Hodu, Abimeleki yakapinjila kwinuka hakali mitondo muno muno, yakawacema i watazi wakwe wose, yakawaloloseza zose zono yaziwene mu ndoto, nawo wakenjilwa na woga muno muno. 9Nayo Abimeleki yakamucema Abulahamu, yakamuwuza yakatya, “Alu Abulahamu, ho kucitendela vye wule? Alu ane nghusutizya cici, sunga kuwa kundetela zimbali zizino hamonga no wutemi wangu? Mbeka kunhendela nghani zono si zikwiliye hamba hadodo.” 10Abimeleki yakacila kumuwuza kanyhi, yakatya, “Mwene agwe Abulahamu, alu mwene wali kwihwesa nhawule, sunga kuwa kwituma zono zinha zizi?” 11Nayo Abulahamu yakamupitula yakatya, “Ane nituma nhavivyo, vyono nali kwihwesa hasina munhu wo wose bahano mono yamogopilo Mulungu. Na kanyhi ane, nali kogopa nghutya lunji mombulaga, mumusole mugolece wangu. 12Ninga hamba nhavivyo, hono nonje mbeka, ayu mwene Sala, heya, lumbu lyangu, cihanjile sogo yetu monga, langa i wanyina zetu wo citemanuce, munhu na nyina wakwe, ninga ane hodu nghawa kumutola. 13Na lono Mulungu yanyhemela ho niyilece nyumba ya baba, mbite ku zisi zo wujenzi, ane namunena mugolece wangu Sala, yambonele lusungu, ho hose hono cowa kubita, mwene yanyityaje ane vyono nili lumbulye.”
14Ale baho Abimeleki yakawa kumugomolela Abulahamu u mugolece wakwe Sala, yakamupela ne zingholo, zing'ombe, hamonga ne wawanda. 15Hamonga na zizo, Abimeleki yakamutya Abulahamu, “Ale wuyilangaje yisi yiyino, yose yangu, holeka wihagulilaje ho hose hono wukusaka gwegwe go mweneco, wubite wukekale.” 16Abimeleki yakamulonjela na Sala nayo, yakatya, “Ale, wulanje! Ane nimupela u lumbulyo fweza elufu monga, ho niwakangazize wose wono wali hamonga nagwe, vyono wusina yisutya, na vyono wina ling'ani hali wene.” 17Hodu Abulahamu yakawa kumulomba u Mulungu, nayo Mulungu yakawa kuwaponya wa Abimeleki, no mugolece wakwe hamonga ne wetumami wakwe we cicekulu wose, nawo wakalela wana. 18Hambi Mulungu nha yali yakondya kuwanoza wacekulu wose wa mu nyumba ya Abimeleki wawe si wakulela, ku soko ya Sala u mugolece wa Abulahamu.
Currently Selected:
Mwamulizo 20: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.