KEJADIAN 38
38
Yehuda inom Tamar inom hilingitukwa wene
1Andem higit he at Yehuda a'nogo agaila'lak herakfisaluk he hun Hira it o kota Adulam mene inom welagaukwa. 2Andoma logolik at Yehuda nen hele tugum mene hun Sua a'logo o Kanaan mene inom wene nasukwasik he wok-wok agaukwa. 3Wok-wok agaukwasik inamlogo manggusa mene ta'lagaikhemo re eisena nen enu Er salhikhe. 4Ineak ombo'ne mene ogore abengge tatukwama re enu Onan salhukwa. 5Inomalik henaganek mene ogore abenggeat ta'lagaikhemo re enu Syela salhukwa. At Syela ta'lagaikhe higit andem oba re at Yehuda o Kezib were'ma nen ta'lagaikhe.
6At Yehuda nen amlogo manggusa mene a'nogo agwe hele enu Tamar wogetikhe. 7A'nogo hilingitikhemo nen at Er obabut mondok weak hilingik aple nen Tuhan nen anini oba fesikhesik ebe wat fesikhe. 8Wat fesikhemo at Yehuda nen Er agot Onan a'nogo yagati logolik, ”Hat he, at agot hilingik welagenma re, hoe agwe sogwe andi ambit laluk he hinom nogoi lan o. Nen, hoe nen tago mene hak logouwageluk haren at hoeba hilingisu hak mene andi hat hoba hilingfikhi logogin,” iluk yagatikhe. 9A'nogo yagatikhe oba nen he at Onan he, ”Omalik tak lasugun mene re an namlogomi asugun lek a'nogo re,” iluk aren oe sogwe a'nogore inom nogogu sambul he at oe nen ambisangmangge tago mene ekhe logogin mondok lek iluk amusu we hesangge wulak fisikhi lagaikhe. 10A'nogo hilingitu aple nen he Tuhan anini agaikhesik Tuhan nen at a'nogo ogo watfesikheat. 11Watfesikhemo at Yehuda nen eamalhe Tamar a'nogo yagati logolik, ”Haiba heisena hagaisa were'ma andoma hambotkwe lan o, lambik he Syela alue agu nenangorogo hebe we sogwe logoino o,” iluk yagatikhe andire, at Yehuda nen anggikhi logolik an namlogomi inebe pire aremnogo Tuhan nen inoatenggere at Syela ogo wasinogo iluk anggasikhesik, a'nogo yagatikhemo at Tamar agaisa eisena inambit lagaikhesik welagaikhe.
12A'nogo hilingitikhesik inenggi aninurogo welagaukwasik he at Yehuda agwe a'nogo wa'lagaikhe. Wa'lagaikhemo fong warogo welagaukwasigen, at Yehuda nen are Hiram o Adulam mene a'nogoba at Yehuda mene anggo domba esi palhunem o Timna louwogen iluk mimingitikhe. 13At he Tamar a'nogo esanggo holhasikhe re eamal Yehuda anggo domba esi o Timna pali lageluk ili'lago iluk ugunem holhikhe. 14A'nogo holhikhesik he at Tamar en inom Syela hun Yehuda amlogo a'nogo mondogat alue aga elu logolik oba nen he oan lombolinafi'lek oma re anggasikhesik, asu sogwe logolik ugu welagaikhe mene a'nogo fuluk obali'mo asu amu mene laberasikhe. Labera'luk he elokhe ogo su nen salogo o kota Enaim kwi lagaikharek oba, o Timna louwogeluk kwe lili'lagwiba andoma hurek welagaikhe. 15A'nogo elokhe salogo hurek were'ma at Yehuda nen he Tamar a'nogo eil hasikhesik he, he andire yanani hilingirik nikho mene a'nogo werek anggasikhe. 16A'nogo hilingitikhesik at Yehuda a'nogo he a'nogo era'lu ebekhalem aremnogo asi lagaikhesik he, at Yehuda nen he andi at eamalhe a'nogo onggothogo yagati logolik he, ”Noe haren miren hak wo'nesigin andire we haren enek,” iluk yagatikhemo, at he Tamar a'nogo nen ikhi logolik, ”Noe haren nenangge wo'nesigin e?” iluk yagatikhe. 17Yagatikhemo at Yehuda nen ikhi logolik, ”An he wam kambing ket kotorek mene ekhe wokhesigin,” iluk yagatikhe. Yagatikhemo, he Tamar a'nogo nen ikhi logolik, ”Fanoba nen he kambing eberogo lak fei wesigin iluk endawinggen lisogo enegengge ekhe fisogo logoigen he, noe haren kambing andi lakfei wesigin fano,” iluk yagatikhe 18Yagatikhemo at Yehuda nen ikhi logolik, ”Hendawinggen litungge ebe nenamene woghesik?” iluk heinok wokhasikhemo, at he Tamar a'nogo nen ikhi logolik, ”Hat noe nen handomuk fisogo welagen mene andi inom, haren mene cap agale erengge inom an wo'nom,” iluk yagatikhe. Yagatikhemo at Yehuda nen kino yagatikhe mene omanogo mondogat wogetikhesik he Tamar a'nogo inom sebe isukwama he a'nogo omalik a'ma agaikhe. 19At Tamar a'nogo aiba lagaikhesik su elokhe salogo lagaikhe mene a'nogo nonggologo fesikhesik asu ebe sogwe logolik labeti lagaikhe mene a'nogo nekhengge labetikhe.
20Inenggi miren hak welagaukwasik at Yehuda nen Hira are a'nogo obare kambing a'nogo waluk wogosi laluk he, endawi litungge wogotikhe mene omanogo waluk wesuageluk wogotikhemo lagaikhe oba nen he, at Hira nen he a'nogo inom ambi agaukwa lek. 21Ambi agaukwa lek andi nen he, at Hira nen it afuni o Enaim mene andoma inoba heinok wogisikhi logolik he, he yanini hilingirik nikherek mene ekhe kwe yiba werek aga a'naga re koma werek,” iluk heinok wogisasikhe. Heinok wogisasikhemo iren ikhi logolik, ”Hemi hesangge hilingirik nikharek mene o kwe yiba re ekhe werek lego,” iluk yagatukwa. 22A'nogo yagatukwama, at Hira a'nogo ambotkwe sugulogo Yehuda ambit lagaikhesik yagati logolik, ”An he a'nogo ninom ekhe ambi ago lek. It afuni andoma mene nen ikhi logolik o yoma re he hesangge hilingiri'lago mene ekhe werek lego,” iluk yaganeta, isikhe 23A'nogo isikhemo, at Yehuda nen ikhi logolik, ”An he andi onggo fagain iluk hilingitiba nen, at ebe hat hinom ambi agep lek andi re, yi mene ti mene andi re at helagain halok fano, oba nen he nit ninenggali asu lek hak,” iluk yagatikhe.
24Tugi henagan hak welagaukwasigen at Yehuda holhugunemen he, ”He Tamar at eamalhe a'nogo re yanani nilik nugunemen omalik a'ma aga o,” iluk ugunem holhikhe. Holhikhesikhe he, at Yehuda nen miminginafi logolik, ”He andi waluk we'luk he nolfoumo wa'lakhoago,” iluk yagaisasikhe. 25Yagaisasikhemo iren waluk wulibi lagu kwelek, he a'nogo nen agun eisena eamal oba wene yi'nogo yaga'no iluk yonggo lak fikhi logolik, ”Enegengge cap agale inom, tomuk yiet enggere sa mene iluk kwelakhoak, an he hun yi mene ti mene yoma onggwarek agun andi nen, omalik na'mat fikhenggere,” iluk wene lakfesikhe. 26Lakfesikhemo re at Yehuda nen enegengge aremnogo hasikhesik aren ikhi logolik, ”An nen at oba ekhe hilingisu mene ekhe werek lego, he andire weak hilingiti'lek, enggere he andi an namlogo Syela inom lombot fisaba nen he,” iluk isikhesik at Yehuda he Tamar a'nogo inom ekhe sebeti'lek welagaikhe.
27At he Tamar a'nogo omalik takhagain horok agaikhemo, kwelakhasikhe re, omalik hulipmio ta'lasigiluk hilingi'mo hasikhe. 28A'nogo hilingi'mo hasikhemo nen he, he a'nogo omalik takhugunemen, omalik aremnogo ekhe enggi tak wulakfei wagaikhemo, at he omalik taginaferek mene nen he omalik a'nogo enggi senek logolik enggimo yo lalek mep meneba kelfesikhe. Kelfesikhesik aren ikhi logolik, ”Omalik yire attak ta'laga mene re yi o,” isikhe. 29A'nogo isikhemo nen he, omalik enggi hele kelfesikhe mene a'nogo enggi ambotkwe lisogo wanhikhemo, omalik ekhe a'nogo tak ta'lagaikhemo re, at hele omalik taginafi lagaikhe mene a'nogo nen ikhi logolik, ”Hat wulibi waga lagen he, a'nogo ari a!” iluk isikhe. Omalik attak ta'lagaikhe mene a'nogo enu Peres salhukwa, enu andi it Ibrani inaneba, ”Weak-weak wulibime,” iluk u hak salhukwa. 30A'nogo tatikhemo nen he, agot ombo'ne mene enggimo yo lalek mep meneba enggimo kelik mene a'nogo ta'lagaikhemo at enu Zerah salhukwa.
Currently Selected:
KEJADIAN 38: inohap
Highlight
Share
ਕਾਪੀ।
Want to have your highlights saved across all your devices? Sign up or sign in