Matthew 3
3
John Baptist chongril
(Mk 1:1-8; Luk 3:1-18; Jn 1:19-28)
1Khawapha takkhan John Baptist in Judea neelramma aheisuok ah chongril aleiphut,
2“Manu ah inphut ningmalung thuultaru,”” “Ajarchu marwaan Rengram kha anaijei!”” Matt 4:17; Mk 1:15
3Ajarchu Pathian chongkachoi Isaiah in ileiril kha,
“Neelram ah Mi inkhat in akheek,
“‘Nangni Pumi sik ah lam boolru;
Ama lamkha mintuunru!’’ ”” tia irilkha John hi eii, Isa 40:3
4John apumtak Salaileem mulla inbool puondiar aleitho; ama'n sawun koongkhit akoongnga aleikhit, halli ama bak-inchu khaisor li ram khuoining alei eii. 2 Reng 1:8
5Jerusalemma inphut, Judea rampumpui, khat-um Jordan Tuidung sirra kaom mipuingai amadiang inleihong. 6Inmani'n inmanu inrilsuok ah, khat-um ama'n inmani Jordanna baptize aleitho.
7John in Pharisee le Sadducee ngai baptize thonasik inheiwa amupha khan, inmani diang ama'n ati, “Nangni Maruul sangai akahongsik Pathian rachaakna akajuosik makheiya taanru tia tu-in nangnidiang narilpiya me? Matt 12:34; 23:33
8Manu ah inphut ningmalung thuulna kanaminmu sik chuon ngaikha thoru,
9Keini kinpu Abraham om keengnga poongraalna ah inphut taansuok mator kinte ti-inlang ngaidonmaru, ajarchu kei'n nangni diang kati, Pathian in hiwa lung ngaihin Abraham sangai amin eii mator! Matt 12:34; 23:33
10Tuuntak hin thingkuung ngaikha tukpur nasik rei kha insuuk ah omjei; khawa jarra kara katha kakaramak thingkuung rakip kha intuk khiak ah mei suungnga indeeng luutsik eii. Matt 12:34; 23:33
11Malung thuulna jarra kei'n nangni tuiya baptize kanatho, takkha kei kanuk ah akajuopa khachu keineek ah alok, keichu ama Hureikhaang kachoi sik um rahoi suokmong, Ama inchu nangni Ratha Inthiang li meiya baptize anathosik eii. 12Ama'n saangzaapna kha akut ah achoi khat-um asaang kha inthiangnga zaapthiangta Ama'n saang ngaikha asapang suungnga athunsik eii, takkha arasi ngaikha akathimak mei suungnga adeengluut sik eii.””
Jisu Baptize thona
(Mk 1:9-11; Luk 3:21,22)
13Khawa phakhan Jisu'n Galilee makheiya John diang Baptize intho nasik Jordan katung aleihong. 14Takkha John in zootmak ah aheiti, “Nang in kei kha baptize nanatho sik keeng,”” “takkha nang in keidiang nahong bejei?””
15Halli Jisu'n aleimasang, “Tuunna sikchu nazootpi diro, ajarchu Pathian imanuom rakip kha hintho ah eini'n nithosik eii.”” khawa jarra John in aleizootpi jei.
16Jisu baptize atholi, tui makheiya ahongsuok jei, halli marwaan kha inlongjei, halli Pathian Ratha kha wathu angnga juochumma ama chungnga ajuochong kha aleimu,
17Halli marwaanna inphut rasa inkhat in ajuoti, “Hiwahi kei'n kiminriang khet kasapa kha eii, ama chungnga kamalung atai.”” Inphut 22:2; Minpkla 2:7; Isa 42:1; Matt 12:18; 17:5; Mk 1:11; Luk 9:35
Currently Selected:
Matthew 3: KHMNT
Highlight
Share
Copy
Want to have your highlights saved across all your devices? Sign up or sign in
The New Testament in Kharam © The Word for the World International and NECTAR, 2021.