मत्ती 19
19
तलाका रे बारे मन्झ यीसू रा सुआल
(मरकु. 10:1-12)
1जेबे यीसू ये गल्ला बोली चुक्केया, ता से गलील जिल्ले ले चली गया, होर यहूदिया ईलाके रे यरदन दराऊआ रे पारली तरफ आया। 2होर बौह्त बडी भीड़ तेसरे साउगी चली पई, होर तिन्हें तिन्हारे ब्मार लोक ठीक करी दिते। 3तेबे फरीसी लोक तेसरी परखणी करणे रे कठे तेस वाले आई किन्हें पुछदे लगे, “क्या मूसा री व्यवस्था रे मताबक ये ठीक आ कि मर्ध आपणी लाड़ी जो केसी भी वजहा ले तलाक देई सक्हा?”
4तेबे यीसूए जवाब दितेया, “क्या तुस्से नी पढ़ेया कि, जिन्हें स्यों बणाये, तिन्हें सृस्टी रे सुर्हूआता ले ई स्यों मर्ध होर जनानी बणाई।” 5“होर बोल्या, ‘एस वजहा ले माह्णुंआं आपणे माऊ-बापू ले लग हुई किन्हें आपणी लाड़ी साउगी रैंह्णां, होर तिन्हा एक ही हूंणां।’” 6एता कठे स्यों ऐबे दो नी, पर एक हूंणे। इधी कठे जेस जो परमेसरे जोड़िरा हो, तेस जो माह्णुं लग नी करहे।
7फरीसी लोके यीसू किन्हें बोल्या, “फेरी मूसे ये किधियो तय कितेया कि, त्याग पत्र देई किन्हें तेस्सा जो छाडी दे?” 8यीसूए तिन्हा किन्हें बोल्या, “तुस्से जिद्दी ऐ, एस वजहा ले मूसे नबिये तुस्सा जो आपणी लाड़ी जो तलाक देणे रा इज्जाजत दिती, पर सुर्हूआता मन्झ एह्ड़ा नी था। 9होर हांऊँ तुस्सा किन्हें बोल्हा कि, जो कोई व्यभिचारा रे अलावा केसी वजहा ले आपणी लाड़ी जो तलाक देई किन्हें दूजी किन्हें ब्याह करहा, से व्यभिचार करहा। होर जो कोई तेस्सा तलाकसुदा किन्हें ब्याह करहा, से भी व्यभिचार करहा।”
10चेले यीसू किन्हें बोल्या, “अगर मर्धा रा ज्नाने साउगी एह्ड़ा रिस्ता आ, ता ब्याह करणा ठीक नी आ।” 11यीसूए तिन्हा किन्हें बोल्या, “सभ ये इन्हा गल्ला जो ग्रैहण नी करी सक्दे, सिर्फ स्यों ईं जिन्हा जो परमेसरे एह्ड़े जीणे रा दान दितिरा। 12क्यूंकि कुछ हिजड़े एह्ड़े ऐं जो माऊआ रे गर्भा ले ई एह्ड़े जम्मे; होर कुछ हिजड़े एह्ड़े ऐं, जिन्हा जो माह्णुंऐ हिजड़े बणाया: होर कुछ हिजड़े एह्ड़े ऐं, जिन्हें स्वर्गा रे राज्या रे कठे आपणे आपा जो हिजड़े बणाई दितेया। जो इन्हा गल्ला जो समझी सका, से ही समझे।”
बच्चेया जो आसीस
(मरकु. 10:13-16; लूक. 18:15-17)
13एक ध्याड़े कुछ माऊ-बापू आपणे बच्चेया जो यीसू वाले ल्याउंदे लगे, ताकि से तिन्हा पर हाथ रखी किन्हें तिन्हारे कठे प्रार्थना करहे। पर चेले तिन्हा माऊ-बापू जो बक्कदे लगे ताकि स्यों यीसू जो परेसान नी करहे। 14पर यीसूए बोल्या, “बच्चेया जो मेरे वाले आऊणें देआ, होर इन्हा जो नांह नी करा। क्यूंकि स्वर्गा रा राज एह्ड़े लोका रा आ, जो बच्चे साहीं नम्र ऐं।” 15होर से तिन्हारे सिरा पर हाथ रखी किन्हें आसरीवाद दितेया, होर तेथी ले चली गया।
अमीर जुआन होर अनंत जिन्दगी
(मरकु. 10:17-31; लूक. 18:18-30)
16एक माह्णुंऐ यीसू वाले आई किन्हें तेस ले सुआल कितेया, “हे गुरु अनंत जिन्दगी पाणे रे कठे हांऊँ क्या खरा काम करूं?” 17यीसूए तेस किन्हें बोल्या, “तू मुंजो खरे कामा रे बारे मन्झ किधियो पूछ्हा? खरा ता एक ई आ। पर अगर तू अनंत जिन्दगी मन्झ दाखल हूंणां चाहां, ता हुक्म मन्या कर।” 18तिन्हें माह्णुंऐ यीसू किन्हें बोल्या, “केह्ड़े हुक्म?” यीसूए बोल्या, “ये कि हत्या नी करणा, व्यभिचार न करणा, चोरी नी करणा, झूठी गुआही नी देणा; 19आपणे माऊ-बापू री इज्जत करणा, आपणे पड़ोसी साउगी आपणे साहीं प्यार रखा।#19:19 व्य. 5:16-20, लैव्य. 19:18 ” 20तिन्हें जुआने माह्णुंऐ यीसू किन्हें बोल्या, “ये सभ हुक्म ता हांऊँ मन्हां, ऐबे मेरे अंदर क्या कमी ई?” 21यीसूए तेस किन्हें बोल्या, “अगर तू सिद्ध हूंणां चाहां; ता जा, आपणा सभ कुछ बेची किन्हें गरीबा जो बांडी दे, होर आई किन्हें मेरा चेला बण, तेबे तूजो स्वर्गा मन्झ धन मिलणा।” 22पर से जुआन ये गल सुणी किन्हें दुआस हुई किन्हें चली गया, क्यूंकि से बौह्त अमीर था होर बेचणा नी चाहन्दा था।
23तेबे यीसूए आपणे चेले किन्हें बोल्या, “हांऊँ तुस्सा किन्हें सच्च बोल्हा कि, अमीरा रा स्वर्गा रे राजा मन्झ दाखल हूंणां बौह्त कठण आ। 24हांऊँ तुस्सा किन्हें दबारा बोल्हा, ऊंटा रा सुई रे नाके मन्झा ले निकल्ना असान हुई सक्हा पर परमेसरा रे राज्या मन्झ अमीरा रा दाखल हूंणां बौह्त कठण आ।” 25ये सुणी किन्हें, चेले बौह्त हरान हुई किन्हें बोल्या, “अगर अमीरा रा परमेसरा रे राजा मन्झ दाखल हूंणां बौह्त कठण आ, फेरी केसरा उद्धार हुई सक्हा?” 26यीसूए तिन्हा जो देखी किन्हें, बोल्या, “माह्णुंआं ले ता ये हुई नी सक्दा, पर परमेसरा ले सभ कुछ हुई सक्हा” 27एता पर पतरसे तेस किन्हें बोल्या कि, “आस्से ता सभ कुछ छाडी किन्हें तेरे चेले बणी गईरे, ता आस्सा जो क्या मिलणा?”
28यीसूए चेले किन्हें बोल्या, “हांऊँ तुस्सा किन्हें सच्च बोल्हा कि, नौंईं सृस्टी मन्झ जेबे मां माह्णुं रे मह्ठे आपणी महिमा री राजगद्दी पर बैठणा, ता तुस्सा भी जो मेरे चेले बणिरे, तुस्सा बारा राजगद्दी पर बैठी किन्हें इस्राएल देसा रे बारा गोत्रा रा न्याय करणा। 29होर जेस केसिए घर-बार या भाई-बैहण या माऊ-बापू या बाल बच्चे या डोर्हीया मेरे चेले हूंणे रे नाते छाडी दितिरे, तिन्हा जो सौ गुणा मिलणा, होर तेस अनंत जिन्दगी रा अधिकारी हूंणां। 30पर बौह्त जो ऐबे खास हुन्घे तिन्हा बादा मन्झ खास नी हूंणां होर जो ऐबे खास नी ऐं तिन्हा बादा खास हूंणां।”
Currently Selected:
मत्ती 19: MJLNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.